1. Ka arufudubalin luagu mínsiñehabuhaña lan gürigia uguñe weyu?

ARIÑAGATU Bíbülia “mínsiñehabubaña” lan gürigia lídounme lagumuhóun dan le (2 Tim. 3:1, 3). Lagunfuliruña katei le lidan wadaani, kéiburi hadan saragu míñunu iduheñu ha fánreinguaañabaña ladüga ígiraguni, mawandagun hamá agübürigu hámagua, hámati isaanigu ha asandirubaña ua lan ni aban hádangiñe hagübürigu asandiruti ínsiñeni hawagu. Luagu amu oubaü, añahein iduheñu ha óuserubaña kamá hamuga ibidiñeguatiña hámagua lau sun hawinwanduña lan tidan tugiaméme muna. Ariñagati aban sásaamu: “Wéiriti tetenirun dandu úguchuru, kei úguchili, ítara kei isaanigu, tun konputadora, tun tablet, lun gágamuru o lun huraraü le lídanbei katei burí le, darí lun mayanuhan hamá hámagua. Íbini tídanñanu lan tugiaméme muna lóuguati hasubudiragun hámagua”.

2, 3. a) Según Rómana 12:10, kaba uagun wasandira ínsiñehabuni? b) Kaba wariha lidan aturiahani le?

² Mabusenruntiwa lun labadülerun mínsiñehabuni le lídanbei ubóu le wawagu (Rom. 12:2). Lubaragiñe lira, busenrügütiwa warufudun ínsiñehabuni dandu houn waduheñu kei houn wíbirigu ha lílana damuriguaü (aliiha huméi Rómana 12:10). Lunti wasandiruni ínsiñeni hawagu wíbirigu ha lílana damuriguaü, ha ítarabaña woun kei iduheñu. Ánhawa arufuda ínsiñeni, wídehaba wámagua lun ítarameme wamá eseriwida lun Heowá lidan aban (Mik. 2:12).

³ Lidan aturiahani le wakutihaba saragu sügǘ tídangiñeti Bíbülia le lunbei líderaguniwa áyeiha ínsiñeni luma arufudei.

4. Ida liña líderaguniwa Áfuriduni 34:6 lun gunfuranda wamani weiri lan wínsiñe lun Heowá?

⁴ Ayanuhatu Bíbülia luagu lubuidun ligaburi Heowá. Ariñagatu ínsiñeni lan Bungiu (1 Huan 4:8). Lau wasubudiruni le, aba wasandirun ínsiñeni luagu. Ariñagatu giñe Bíbülia weiri lan Bungiu lidan ínsiñeni (aliiha huméi Áfuriduni 34:6). Ma lubuidun laganbún le ariñawagúbei luagu le lasandirubei wawagu!

5. Ida liña larufudun Heowá gudemehabu ani ida luba wáyeihani?

⁵ Teni wamá lun úaraguagüda lani Áfuriduni 34:6 línsiñehabu Heowá luma amu igaburi le adügübei lun wayarafadun lun: lugudemehabu (Sant. 5:11). Arufuda lumuti Heowá igaburi le dan le feruduna lani wafigoun (Sal. 51:1). Dan le tayanuhan Bíbülia luagu gudemehabu, mama tayanuhaña luagu ferudunawa lan lichara aban gürigia. Tídangiñe anigi láhücha gudemehabu ani ligía ínchahabalin gürigia íderaguei le asufurirubei. Afuranguagüdatu Bíbülia wéiritimati lan layumahan Heowá lun líderaguniwa luéi ínsiñeni le tasandirubei aban úguchuru luagu tisaani (Isa. 49:15). Dan le wasufurirun, adügati lugudemehabu Heowá lun busén lan líderaguniwa (Sal. 37:39; 1 Ko. 10:13). Gayaraati warufudun ínsiñeni houn wíbirigu dan le feruduna wamaniña luma dan le mareidahan wamá igarihabu habá ha adügübaña lun wagañidun (Efe. 4:32). Súdiniti lun warufudun gudemehabu houn wíbirigu lau wíderaguniña dan le hagagibudagun luma lénrengunga. Wáyeihañein Heowá, Bungiu létima hínsiñehabubei, dan le línchahaniwa ínsiñeni arufuda gudemehabu houn amu (Efe. 5:1).

6. Ida liña larufudun Yónatan luma Dawidi ínsiñeni hámawagua?

⁶ Anihein saragu abahüdaguni tidan Bíbülia hawagu gürigia ha meha arufudubaña ínsiñeni. Ariha waméi le ariñawagúbei luagu Yónatan luma Dawidi. Ariñagatu Bíbülia: “Aba gamadagua lan Yónatan luma Dawidi buidu buidu, aba línsiñedun lun kei línsiñegua lungua” (1 Sam. 18:1). Anúadira lumuti meha  Heowá Dawidi keisi urúei leweñegua Saulu le lúguchi Yónatan. Wéiriti meha gimugaü luma igañi le lasandirubei Saulu darí lun busén lan meha láfaruni Dawidi hilagubei. Íbini ítara, múaradunti Yónatan luma lúguchi dan le lálugunbei lagumuchun lau Dawidi. Füramaseti Yónatan luma Dawidi hámagua gamadaguabaña lan lun súnwandan ani híderaguba lan hámawagua (1 Sam. 20:42).

7. Katei san aban lídangiñe katei le hamuga meha gayaraabei ladügün lun mamadagua lan Yónatan luma Dawidi?

⁷ Wéirigüda lumutu lumadagua Yónatan luma Dawidi wanigi, dántima le wasaminarun luagun sun katei le hamuga meha gayaraabei ladügün lun mamadagua hamá. Kéiburi wéiriaali lan meha Yónatan luéi Dawidi kei burí 30 irumu. Gayaraati hamuga meha lasaminarun siñá lan gamadagua lan luma aban nibureinti le lóuguati lisubudin. Íbini ítara, manügün lumuti ani móuserun lumuti Yónatan Dawidi kei ni kata.

8. Ka hasaminarubei ligía lan meha adügübei lun buidu lan lumadagua Yónatan luma Dawidi?

⁸ Gayaraati hamuga meha lagimugaruni Yónatan Dawidi ageindagua ligía luagu liricha lun ligía lan urúei leweñegua Saulu le lúguchi (1 Sam. 20:31). Gama lumoun, ǘnabuguti meha Yónatan ani úaragua ligía lun Heowá, ligía lánharunbei lun Dawidi keisi urúei le lanúadirubei Heowá. Úaraguati giñe Yónatan lun Dawidi, íbini adüga lan lira lun lagañidun Saulu (1 Sam. 20:32-34).

9. Ida liña wasubudiruni marihin lani meha Yónatan Dawidi kei aban ágani?

⁹ Kei meha hínsiñe lubéi Dawidi lun Yónatan, marihin lumuti meha kei aban ágani. Aban meha wügüri gawuribuhati ani gachüühaditi gimara Yónatan. Ariñawagúati meha luagu Yónatan luma luagu lúguchi: “Furesetiña meha sügǘ hau ágila! Here sügǘ hau liñún!” (2 Sam. 1:22, 23). Ligíati, gayaraati hamuga lapantahan Yónatan luagu iyaraani le luágubei kei súdara. Íbini ítara, masaminarungubeiti Yónatan buidu lan luéi Dawidi, masandirun ligía gimugaü luagu sun buiti le ladügübei Dawidi. Luagu amu oubaü: wéiritu meha lanigi Yónatan luagu ganigi luma afiñeni le larufudubei Dawidi luagu Heowá. Lárigiñebei meha láfaruni Dawidi Goliadi hilagubei, aba lagumeserun Yónatan asandira ínsiñeni luagu Dawidi. Ida luba warufuduni ínsiñeni le hawagu wíbirigu?

10. Ka mini lubéi hínsiñehabu wamá wámagua “lau sun taruman [w]anigi”?

¹⁰ Ariñagatu Bíbülia: “Lunti lubeiti hínsiñegua humá hungua lau sun taruman hanigi” (1 Fe. 1:22). Gayaraati wáyeihani Heowá lidan katei le. Wéiriti wínsiñe lun Heowá dan le úaragua wamá lun darí lun úa lan ni kata le gayaraati lafanreinraguniwa luéi (Rom. 8:38, 39). Dimurei güriegu le ásügürawagüdübei kei “lau sun taruman hanigi”, íderagua lumutiwa lun gunfuranda wamani mosu lan wáfaagun lun warufudun ínsiñeni ani anihein dan, mosu wáfaagun lun warufudun ínsiñeni houn íbirigu. Ariñaga tumuti Bíbülia ka lan lunbei wadügüni dan le hadügün amu lun wagañidun: “Gaguraasun humá, areida huguyame houn híbirigu. Houcha humá lun lidan humá aban súnwandan lau lídehan [s]ífiri, lidan darangilaü le óundarubaliwa súngubei” (Efe. 4:1-3). Lun wóunigiruni “darangilaü le óundarubaliwa súngubei”, moun lumuti lun wetenirun lun hachara wíbirigu, lubaragiñe lira, áfaagua wamá lun warihiniña kei larihiniña Heowá (1 Sam. 16:7; Sal. 130:3).

11. Ka uagu anihein lubéi dan hénrengu lan lun warufudun ínsiñeni?

¹¹ Anihein dan hénrengu lan warufudun ínsiñeni houn wíbirigu, dántima le wetenirun lun hachara. Genegeti ligía lan meha asuseredubei  houn kristiánugu ha meha awinwandubaña lidan furumiñeti sígulu. Kéiburi lidan tikesin Ewodía tuma Síntike, ha genegebei maturóbulin hamá meha lun hapurichihani “uganu lánina asalbaruni” úara luma Pábulu. Íbini ítara, manaaguntiña meha bián würiña ha hámagua buidu. Ligía meha lariñagubei Pábulu houn lun “harandarun hámagua keisi iduheñu luéigiñe Kristu” (Fili. 4:2, 3).

12. Ka lunbei wadügüni lun warufudun ínsiñeni hawagu wíbirigu?

¹² Ida luba warufudun ínsiñeni houn wíbirigu uguñe weyu? Lunti wáfaagun lúntima wasubudiruniña buidu buidu. Ítara luba ménrenguntimabei lan woun lun gunfuranda wamaniña luma lun warufudun ínsiñehabuni houn. Moun lumuti lararamuniwa irumudiri luma échuni luéi warufudun ínsiñeni houn wíbirigu. Haritagua waméi gamadagua lan meha Yónatan luma Dawidi lau sun 30 lan meha irumu laweiridun luéi. Ka uagu masaminarun hubéi luagun aban íbiri le derebuguhali, o aban nibureinti, le úmati gayara lan hadügün umadaguaü lidan damuriguaü le ñein hubéi? Anhein hadüga, harufuduñeinme “hínsiñe hamá hiduheñu luéigiñe Hesukrístu hun” (1 Fe. 2:17).

13. Ka uagu buidu lubéi wanaagun woungua hama fiu íbirigu hawéi amu?

¹³ Mini lan san warufudun ínsiñeni houn wíbirigu lunti lan gamadagua wamá hama súngubei buidu buidu? Uá siñabei hamuga lasuseredun lira. Gayaraati buítima lan wanaagun woungua hama íbirigu ha úmabaña gíbetima lan katei le ídanbei úara wamá sügǘ lau ligaburi wanaagun woungua hama ha híbiri. Lau sun meha buidu lan lumadagua Hesusu hama súngubei lani apostolugu, espechaliti meha ínsiñeni le lasandirubei luagu Huan (Huan 13:23; 15:15; 20:2). Íbini ítara, marufudunti meha Hesusu himei lan aban hawéi ha híbiri. Ligíati, dan le lamuriahanbei Huan labu Santiagu, le líbiri, luma Hesusu lun líchugun aban ubaraü súdiniti houn lidan Larúeihan Bungiu, aba lariñagun Hesusu houn: “Anhein lun hañuurun aban luéigiñe nóunwenren, aban luéigiñe nubaünan, mama au lunbei níchuguni” (Mar. 10:35-40). Lunti wáyeihani ligaburi Hesusu lau ua lan himei wamaniña wamadagu ha  hínsiñetimabaña woun (Sant. 2:3, 4). Ánhawa arufuda himei wamá aban gürigia luéi aban, gayaraabei ladügün lira lun ñein lan fánreingua lidan damuriguaü ani manügünbei lira darangilaü (Hud. 17-19).

14. Según Filipuna 2:3, kaba adüga lun ua lan ásügüraguni lidan damuriguaü?

¹⁴ Ladügüba ínsiñeni lun ua lan ásügüraguni lidan damuriguaü. Haritagua waméi málugun lan meha Yónatan lásügüragun luma Dawidi, marihinléi kei aban ágani luéigiñe arúeihani. Ligíati, adüga waméi le lariñagubei Pábulu: “Lau [...] ǘnabuguni, [...] buidulá hanügüniña amu gürigia huéi guánarügü” (aliiha huméi Filipuna 2:3). Gabaroun waméi ídeha hamá sun íbirigu lidan damuriguaü. Anhein ǘnabugu wabéi, warihibei lubuidun hagaburi wíbirigu ani wasagaruba buiti lídangiñe le hadügübei lau úaraguni (1 Ko. 12:21-25).

15. Ka hafurendeirubei lídangiñe le asuseredubei tun Tanya hau sun tisaanigu?

¹⁵ Dan le wagagibudagun luma lénrengunga le sódiniti, ruti Heowá gurasu woun lau layusuruniña wíbirigu lun híderaguniwa luma lun harufudun ínsiñeni woun. Ariha waméi le asuseredubei tun aban íbiri hau tisaanigu aban weyu samudi lárigiñe tagiribudun lídangiñe adamurini le ñein lubéi hóundaragua wíbirigu ha lídangiñetiña ámuñegueinarügü ageiraü le gíribei “Magumuchagunbei ínsiñeni”, le adügǘbei lidan irumu 2019 Meriga. Abahüdaguatu Tanya, to gasaaniguboun ǘrüwa irahüñü, dan le lan tídinbei tidoun haban chülüdügütiña lárigiñe adamurini, aba lan tabuguchun aban karü tuagu tikarün. Ariñagatu: “Úati ni aban abuleseiruti, aba wáfuridun tídangiñe karü ani aba werederun rara ǘmadarugu ibidiñega woun kaba lan wadüga. Ábati warihin  aban gürigia laru üma agúaha woun lun wayarafadun tun likarün chóuruñu wamaamuga. Aban meha hádangiñe wíbirigu le meha agiribudubei lídangiñe adamurini. Ani mámarügüñein ligía ararama, ráramatiña giñe seingü íbirigu suesiana. Aba hóuburuniwa íbirigu hiñaruñu nuguya hama nisaanigu lau saragu ínsiñeni ani ligía meha wemegeirubei oura ligía. Lau sun meha ariñaga nan houn luagu masuseredun lan ni kata woun, mabusenruntiña meha hígiruniwa wábugua ni dan le hachülürünbei ha ídehabaña dan le lasuseredun danaguaü. Rédeitiña wama luéidügü wemegeirun somu katei. Sandí wamuti línsiñehabu Heowá lidan sun luriban sügǘ ligía. Adügati le wásügürübei lúntima derebugu lan ínsiñeni le wasandirubei hawagu wíbirigu. Lanwoun lira, ábatima laganwoundun weteingiradi luma ínsiñeni le wasandirubei luagu Heowá”. Haritagua humagili san larufudun aban íbiri ínsiñeni hun dántima le hemegeiruni?

16. Ka lanügübei warufudun ínsiñeni wámagua?

¹⁶ Ka lanügübei warufudun ínsiñeni wámagua? Wíchuguba gurasu houn wíbirigu danme le hemegeiruni ani gayaraabei wídehan lun derebugu lan úarani le hádanbei lubúeingu Bungiu. Warufudubei lani lan Hesusu disipulugu wagía ani ladügüba lira lun busén hamá gürigia ha harumabaña anigi heseriwidun lun Heowá. Ani le súdinitimabei, wíchuguba uéiriguni lun Heowá, Wáguchi “le gudemehabubei woun; ani aranseñu liña lun líchugun gurasu woun” (2 Ko. 1:3). Ligíati, ítarameme wamá arufuda ínsiñeni wámagua.