1. Cosa ta dale mira que el manada familia ahora nuay amor con uno y otro?

EL Biblia ya predicta que na ultimo maga dia, el maga gente hay queda “nuay amor para con uno y otro.” (2 Tim. 3:1, 3, El Nuevo Testamento) Puede kita mira que ta cumpli ese profecia ahora. Por ejemplo, manada mayores el yan divurcio poreso rabiao sila na uno y otro y el diila maga anak ta sinti que nuay kanila quien ta ama. Gane, maskin el familia quien ta queda na un casa posible nuay cerca relacion na uno y otro. El un counselor de familia ya habla, “El nana, el tata y el maga anak gendeh tan cuento con uno y otro. Y mayoria del diila tiempo ta usa sila na computer, tablet, smartphone o video game. Maskin ta queda sila na un casa, pero no conoce sila con uno y otro.”

2-3. (a) Asegun na Roma 12:10, con quien kita debe tiene cariño? (b) Cosa kita hay considera na este articulo?

² No quierre kita queda igual con el manada gente na este mundo que nuay amor. (Roma 12:2) En vez, necesita kita cultiva cariño gendeh lang para na diaton maga miembro na familia sino para na diaton maga hermano y hermana tambien na fe. (Le con el Roma 12:10.) Cosa el cariño? Amo este cosa ta sinti el maga miembro na familia si tiene sila cerca relacion con uno y otro. Este el clase de amor que debe kita cultiva para na diaton espiritual familia​—el diaton maga hermano y hermana. Si ta dale kita mira cariño, puede kita ayuda mentena con el unidad que un importante parte na verdadero adoranza.​—Miq. 2:12.

³ Para ayuda kanaton cultiva y demonstra cariño, considera kita si cosa kita puede aprende estaba na maga ejemplo na Biblia.

4. Cosa ta habla el Santiago 5:11 acerca si paquemodo de hondo el amor de Jehova para kanaton?

⁴ El Biblia ta revela con el maga bonito calidad de Jehova. Por ejemplo, este ta habla que “el Dios amor.” (1 Juan 4:8) Por causa pa lang na ese expresion, quierre ya kita queda cerca con ele. Pero el Biblia ta habla tambien que si Jehova “bien cariñoso.” (Le con el Santiago 5:11, NWT.) Un bonito expresion este si paquemodo de hondo el amor de Jehova para kanaton!

5. Paquemodo si Jehova ta dale mira lastima y paquemodo kita puede imita con ele?

⁵ El Santiago 5:11 ya menciona con el cariño de Jehova junto con el otro calidad que ta hace kanaton cerca con ele​—el de suyu lastima. (Ex. 34:6) El un manera que ta dale mira si Jehova con el de suyu lastima amo si ta perdona le con el maga kamali que ya hace kita. (Sal. 51:1) Na Biblia, el lastima quierre decir gendeh lang basta perdona. El lastima amo el cosa ta sinti el un persona si tiene le con quien ta mira ta sufri y pricura ayuda con ese persona. Si Jehova ya habla que mas fuerte el de suyu sentido para ayuda kanaton contra na sentido del nana para na de suyu anak. (Isa. 49:15) Si ta sufri kita, el lastima de Jehova amo el ta manda move con ele para ayuda kanaton. (Sal. 37:39; 1 Cor. 10:13) Puede kita dale mira lastima con el diaton maga hermano y hermana si perdona kita kanila y gendeh siembra agrabio kanila si ya hace sila sinti duele kanaton. (Ef. 4:32) Pero el otro importante manera que puede kita dale mira lastima amo si suporta kita con el diaton maga hermano y hermana si ta enfrenta sila dificultad. Si amor el ta manda move kanaton para dale mira lastima con otro, ta imita kita con Jehova, el de con todo buen ejemplo de cariño.​—Ef. 5:1.

6. Paquemodo si Jonatan y David ya demonstra cariño con uno y otro?

⁶ El Biblia ta menciona acerca na maga imperfecto gente quien ya dale mira cariño.  Considera con el ejemplo de Jonatan y David. El Biblia ya habla: “Si Jonatan y David ya queda bien cerca man amigo, y ya ama si Jonatan con David igual como ta ama le con el de suyu mismo cuerpo.” (1 Sam. 18:1) Ya iscuji con David para releva con Saul como rey. Despues de ese, ya rabia si Saul con David y ya pricura mata con ele. Pero si Jonatan, el anak de Saul, nuay suporta con el de suyu tata cuando ya pricura este mata con David. Si Jonatan y David ya promete que esta sila man amigo y pirmi suporta con uno y otro.​—1 Sam. 20:42.

7. Cosa era el puede sangga con Jonatan y David para queda man amigo?

⁷ Dol gendeh kita puede expecta que queda cerca man amigo si Jonatan y David cay manada cosas el puede era sangga kanila para queda man amigo. Por ejemplo, maga 30 año mayor si Jonatan con David. Puede era pensa si Jonatan que gendeh le puede queda cerca na un persona quien mas joven y nuay experiencia na vida. Pero nuay se pensa si Jonatan y tiene le grande respeto con David.

8. Porque tu puede habla que un buen amigo si Jonatan con David?

⁸ Puede era man celos si Jonatan con David. Como anak de Rey Saul, puede era pensa si Jonatan que ele debe el queda sunod rey. (1 Sam. 20:31) Pero humilde si Jonatan y leal le con Jehova. Poreso ya suporta le con el decision de Jehova si quien queda sunod rey. Leal tambien le con David maskin pa ya queda bien rabiao con ele si Saul.​—1 Sam. 20:32-34.

9. Yan competencia ba si Jonatan con David? Explica.

⁹ Cay ta ama si Jonatan con David, nuay le man competencia con este. Bien bueno tira pana si Jonatan y un animoso soldao le. Ele y el de suyu tata, si Saul, conocido como “mas ligero pa . . . na maga agila” y “mas mafuerza na maga leon.” (2 Sam. 1:22, 23) Poreso, tiene era razon si Jonatan para man hambug acerca na maga cosa le ya hace. Pero, nuay man competencia si Jonatan o ya rabia con David. Sino, ya aprecia le con el coraje y confianza de David con Jehova. Gane, ya principia ama si Jonatan con David igual na de suyu mismo cuerpo despues este mata con Goliat. Paquemodo kita puede dale mira igual amor con el diaton maga hermano y hermana?

10. Cosa quierre decir que “ama deverasan con uno y otro y con todo el corazon”?

¹⁰ El Biblia ya habla kanaton que “ama deverasan con uno y otro y con todo el corazon.” (1 Ped. 1:22) Un buen ejemplo si Jehova para kanaton. Bien fuerte el de suyu amor para kanaton y si esta kita leal, nuay cosa el puede quita con ese amor. (Roma 8:38, 39) El Griego palabra que yan translate “deverasan” ta manda kanaton pensa con el un persona que ta istira o ta hace hitat con el un cosa. Tiene vez, posible necesita kita “istira” y “man hitat” para dale mira cariño con el diaton maga hermano y hermana. Si ya sinti kita duele na cosa ya hace el otro, necesita kita continua “aguanta con uno y otro . . . , trabaja para tene paz entre con uno y otro y, ansina, guarda el union que ta dale el Espiritu.” (Ef. 4:1-3) Si hace kita esfuerzo para mentena el “paz” na diaton maga hermano y hermana, gendeh kita man focus na diila maga kamali. Pricura kita hace el todo para mira con el diaton maga hermano y hermana igual si paquemodo si Jehova ta mira kanila.​—1 Sam. 16:7; Sal. 130:3.

11. Porque posible dificil tiene vez cultiva cariño?

¹¹ Gendeh pirmi facil dale mira cariño na  diaton maga hermano y hermana, especialmente si ta mira kita el diila maga kamali. Ta sale que ya experiencia este el cuanto maga Cristiano del primer siglo. Por ejemplo, si Evodia y Sintique posible nuay problema “trabaja junto [con Pablo] para defende el Buen Noticia.” Pero por causa na cuanto razon, gendeh sila tan uyun con uno y otro. Poreso, ya anima kanila si Pablo que “olvida el diila diferencia por amor del Señor.”​—Fil. 4:2, 3.

12. Paquemodo kita puede cultiva cariño para na diaton maga hermano y hermana?

¹² Paquemodo kita puede cultiva cariño para na diaton maga hermano y hermana ahora? Si pricura kita conoce mas con el diaton maga hermano y hermana, posible mas facil para kanaton que entende y dale mira cariño kanila. Puede kita queda amigo diila maskin cosa pa el diila edad y cultura. Acorda que maga 30 año mayor si Jonatan con David pero ya queda sila bien cerca man amigo. Tiene ba na de ustedes congregacion quien mas mayor o menor contigo quien puede queda de tuyu amigo? Si hace tu se, puede tu dale mira que ‘ta ama tu con todo el maga creyente’ o maga hermano y hermana.​—1 Ped. 2:17, El Nuevo Testamento.

13. Porque posible gendeh kita sinti cerca con todo na congregacion?

¹³ Si tiene kita cariño na maga hermano y hermana, quierre decir ba de ese que tiene kita cerca relacion con todo na congregacion? Gendeh, imposible se. Normal lang que sinti kita mas cerca con el cuanto persona contra na otro cay tiene kita maga semejante interes. “Maga amigo” de Jesus el todo de suyu maga apostoles pero mas cerca le con Juan. (Juan 13:23; 15:15; 20:2) Pero, nuay dale mira favoritismo si Jesus con Juan. Por ejemplo, cuando si Juan y el de suyu hermano, si Santiago, ya pidi un prominente posicion na Reino del Dios, si Jesus ya habla kanila: “Si quien ay sinta na mi derecha o mi izquierda, gendeh Yo puede dale ese.” (Mar. 10:35-40) Igual con Jesus,  gendeh kita debe dale mira favoritismo na diaton maga cerca amigo. (Sant. 2:3, 4) Si hace kita se, hay causa se division​—un cosa que gendeh debe existi na Cristiano congregacion.​—Jud. 17-19.

14. Asegun na Filipo 2:3, cosa puede ayuda kanaton para evita man competencia?

¹⁴ Si dale kita mira cariño, ta evita kita man competencia con otro na congregacion. Acorda que nuay man competencia si Jonatan con David para queda rey. Todo kita puede imita con el ejemplo de Jonatan. Gendeh kita man celos con el diaton maga hermano y hermana por causa na diila maga abilidad, “sino precura hace todo con humildad; y pone firmi na [diaton] maga pensamiento que el los demas mas bueno pa que [kanaton].” (Le con el Filipo 2:3.) Acorda que el cada uno kanaton tiene cosa puede hace para ayuda na congregacion. Si esta kita humilde, puede kita mira con el maga buen calidad del diaton maga hermano y hermana y beneficia kita na diila maga buen ejemplo.​—1 Cor. 12:21-25.

15. Cosa tu ya puede aprende na experiencia de Tanya y del de suyu familia?

¹⁵ Si enfrenta kita maga probanza, puede kanaton dale comforta si Jehova por medio na amor y practical ayuda que puede kita ricibi estaba na diaton maga hermano y hermana. Considera si cosa ya sucede con el un familia despues sila atende con el programa de Sabado del 2019 “El Amor Hasta Para Cuando!” Internacional Convencion na United States. “Pabolbida ya kame para na diamon hotel,” ya habla si Tanya, un nana que tiene tres anak. “Tiene un coche que ya perde el control y yan bangga kanamon. Nuay quien  ya sinti duele pero ya sale kame na coche, ya para na camino y bien espantao. Pero tiene yan señas kanamon que anda na de suyu coche. Uno quel del diaton maga hermano quien estaba tambien na convencion. Y gendeh lang ele el quien ya para. Cinco maga hermano y hermana de Sweden el ya para tambien. El maga hermana ya abraza con el de mio anak mujer y conmigo​—un cosa que bien necesita kame de aquel tiempo. Ya habla yo kanila que OK lang kame, pero nuay sila deja kanamon. Ya esta sila alla maskin despues llega el medical team y ya asigura sila que tiene kame el todo cosa necesita. Durante este dificil tiempo, ya sinti kame el amor de Jehova. Este experiencia ya hace fuerte con el diamon amor para na diaton maga hermano y hermana y ya hace hondo con el diamon amor y apresacion con Jehova.” Ta puede ba tu acorda con el un tiempo cuando necesita tu ayuda y el maga hermano y hermana ya dale mira cariño contigo?

16. Cosa el maga razon para dale kita mira cariño con uno y otro?

¹⁶ Considera si cosa el maga resulta si dale kita mira cariño con uno y otro. Ta dale kita comforta con el diaton maga hermano y hermana si ta experiencia sila maga problema. Ta hace kita fuerte con el unidad entre na maga siervo del Dios. Ta dale kita prueba que maga dicipulo kita de Jesus y ta causa este con el maga sincero persona para sirvi tambien con Jehova. Y el mas importante, ta dale kita honor con “el Tata de todo clase de lastima y el Dios de todo clase de consuelo,” si Jehova. (2 Cor. 1:3) Ojala todo kita hay cultiva y demonstra cariño!