1. Unsay nagpakita nga ang mga tawo karon wala nay pagmahal sa ilang pamilya?

GITAGNA sa Bibliya nga sa kataposang mga adlaw, ang mga tawo ‘mawad-ag pagmahal’ sa ilang pamilya. (2 Tim. 3:1, 3) Nakita nato nga natuman ang maong tagna karon. Pananglitan, minilyong pamilya ang nabahin tungod sa diborsiyo, busa ang mga ginikanan suko sa usag usa ug ang mga anak mibati nga wala mahala. Bisan ang mga pamilya nga nagpuyo sa usa lang ka balay dili suod sa usag usa. “Ang inahan, amahan, ug mga anak dili na mag-estoryahanay ug pirme na lang mag-atubang sa ilang computer, tablet, smartphone, o magdulag video game,” miingon ang usa ka magtatambag sa pamilya. “Bisag kini nga mga pamilya nagpuyo sa usa lang ka balay, morag dili sila magkaila.”

2-3. (a) Sumala sa Roma 12:10, kinsay angay natong pakitaag mabinationg pagmahal? (b) Unsay atong hisgotan niining artikuloha?

² Dili nato gustong maimpluwensiyahan sa dili mahigugmaong mga tawo sa kalibotan. (Roma 12:2) Hinunoa, kinahanglan natong ugmaron ang mabinationg pagmahal dili lang sa atong pamilya kondili sa ato pong mga igsoon sa kongregasyon. (Basaha ang Roma 12:10.) Unsa ang mabinationg pagmahal? Nagtumong ni sa suod nga relasyon tali sa mga membro sa pamilya. Kana ang klase sa gugma nga kinahanglan natong ugmaron para sa atong espirituwal nga pamilya​—ang mga igsoon sa kongregasyon. Sa dihang magpakita tag mabinationg pagmahal, makatabang ta sa pagmentinar sa panaghiusa nga importante sa matuod nga pagsimba.​—Miq. 2:12.

 ³ Aron matabangan ta sa pag-ugmad ug pagpakitag mabinationg pagmahal, tan-awon nato kon unsay atong makat-onan sa mga ehemplo sa Bibliya.

4. Sa unsang paagi ang Santiago 5:11 makatabang nato sa pag-apresyar sa kalalom sa gugma ni Jehova kanato?

⁴ Gipadayag sa Bibliya ang nindot nga mga hiyas ni Jehova. Pananglitan, kini nag-ingon nga “ang Diyos gugma.” (1 Juan 4:8) Kana pa lang nga deskripsiyon makapasuod na nato kaniya. Pero ang Bibliya nag-ingon sab nga si Jehova “mabination kaayo.” (Basaha ang Santiago 5:11.) Pagkanindot nga deskripsiyon sa kalalom sa gugma ni Jehova kanato!

5. Sa unsang paagi si Jehova nagpakitag pagkamaluluy-on, ug unsaon nato siya pagsundog?

⁵ Matikdi nga ang Santiago 5:11 naghisgot sa pagkamabination ni Jehova uban sa laing hiyas nga makapasuod nato kaniya​—ang iyang pagkamaluluy-on. (Ex. 34:6) Ang usa ka paagi nga si Jehova nagpakitag pagkamaluluy-on mao ang pagpasaylo sa atong kasaypanan. (Sal. 51:1) Sa Bibliya, ang pagkamaluluy-on wala lang magpasabot ug pagpasaylo. Kini nagpasabot sab ug kusganong pagbati nga bation sa usa dihang makakita siyag tawo nga naa sa kalisdanan ug tungod niana, mapalihok siya sa pagtabang sa maong tawo. Si Jehova nag-ingon nga ang iyang tinguha sa pagtabang kanato mas kusganon pa kay sa pagbati sa usa ka inahan ngadto sa iyang gamayng bata. (Isa. 49:15) Sa dihang kita anaa sa kalisdanan, ang pagkamaluluy-on ni Jehova magpalihok niya sa pagtabang kanato. (Sal. 37:39; 1 Cor. 10:13) Makapakita tag kaluoy sa atong mga igsoon pinaagi sa pagpasaylo kanila ug dili paghambin ug kasuko dihang makasala sila kanato. (Efe. 4:32) Pero ang usa ka pangunang paagi nga makapakita tag kaluoy mao ang pagtabang sa atong mga igsoon dihang duna silay mga problema. Dihang ang gugma magpalihok nato nga magmaluluy-on sa uban, atong gisundog si Jehova, ang kinalabwang ehemplo sa mabinationg pagmahal.​—Efe. 5:1.

6. Sa unsang paagi gipakita ni Jonatan ug David ang mabinationg pagmahal sa usag usa?

⁶ Ang Bibliya naghisgot bahin sa dili hingpit nga mga tawo nga nagpakitag mabinationg pagmahal. Tagda ang pananglitan ni Jonatan ug David. Ang Bibliya nag-ingon: “Si Jonatan ug David nahimong suod nga managhigala, ug si Jonatan nahigugma kaniya sama sa iyang kaugalingon.” (1 Sam. 18:1) Si David gidihogan aron mahimong hari human kang Saul. Human niana, si Saul nasina pag-ayo kang David ug misulay pagpatay kaniya. Pero ang anak ni Saul nga si Jonatan wala mosuportar sa plano niini nga patyon si David. Si Jonatan ug David nagsinaaray nga magpabilin silang managhigala ug kanunayng suportahan ang usag usa.​—1 Sam. 20:42.

7. Unsa untay makapugong kang Jonatan ug David nga mahimong managhigala?

⁷ Ang mabinationg pagmahal tali kang Jonatan ug David talagsaon kaayo kon atong konsiderahon ang pipila ka butang nga makapugong unta nila nga mahimong managhigala. Pananglitan, si Jonatan magulang kang David ug mga 30 anyos. Puwede untang maghunahuna si Jonatan nga dili siya mahimong makigsuod sa usa nga mas bata ug menos ug eksperyensiya. Pero wala maghunahuna si Jonatan niana. Dako ang iyang pagtahod kang David.

8. Sa imong hunahuna, nganong si Jonatan maayong higala ni David?

⁸ Puwede untang masina si Jonatan kang David. Ingong anak ni Haring Saul, puwede untang moinsistir si Jonatan nga siya ang may katungod nga mahimong manununod sa trono. (1 Sam. 20:31) Pero si Jonatan mapainubsanon, ug siya maunongon kang Jehova. Busa bug-os niyang gisuportahan ang pagpili ni Jehova kang David ingong sunod nga hari. Maunongon sab siya kang David, bisag nakapasuko ni pag-ayo kang Saul.​—1 Sam. 20:32-34.

9. Giisip ba ni Jonatan si David ingong karibal? Ipatin-aw.

⁹ Si Jonatan may mabinationg pagmahal kang David, busa wala niya kini isipa ingong karibal. Si Jonatan hanas nga magpapana ug isog nga manggugubat. Siya ug ang iyang amahan, si Saul, nailhan ingong “mas tulin kay sa mga agila” ug “mas kusgan kay sa mga leyon.” (2 Sam. 1:22, 23) Busa puwede untang manghambog si Jonatan bahin sa iyang mga kadaogan. Pero si Jonatan wala makigkompetensiya o masina kang David. Siya nakadayeg kang David tungod sa kaisog ug pagsalig niini kang Jehova. Gani, ayha pa siya nasuod kang David human mapatay niini si Goliat. Unsaon nato pagpakita ang maong mabinationg pagmahal sa atong mga igsoon?

10. Unsay ipasabot sa ‘paghigugma pag-ayo sa usag usa nga kinasingkasing’?

¹⁰ Ang Bibliya nag-awhag nato nga ‘higugmaon pag-ayo ang usag usa nga kinasingkasing.’ (1 Ped. 1:22) Si Jehova nagpakitag ehemplo kanato. Gihigugma ta niya pag-ayo nga kon kita magmaunongon kaniya, walay makabulag nato kaniya. (Roma 8:38, 39) Ang Gregong pulong para sa “pag-ayo” dunay ideya nga mangab-ot o manlimbasog pa gani. Usahay kinahanglan tingali tang “mangab-ot” ug “manlimbasog” aron mobati tag mabinationg pagmahal sa usa ka igsoon. Sa dihang ang uban makapasuko nato, kinahanglang padayon tang “mag-inantosay tungod sa gugma, nga maningkamot pag-ayo nga makigdinaitay aron mamentinar ang panaghiusa nga [atong] nabatonan pinaagi sa balaang espiritu.” (Efe. 4:1-3) Kon maningkamot ta nga mamentinar  ang “panaghiusa,” dili ta magpokus sa kasaypanan sa mga igsoon. Maningkamot ta nga isipon ang atong mga igsoon sama sa pag-isip ni Jehova kanila.​—1 Sam. 16:7; Sal. 130:3.

11. Nganong lisod usahay ang pag-ugmad ug mabinationg pagmahal?

¹¹ Dili kanunayng sayon ang pagpakitag mabinationg pagmahal sa atong mga igsoon, ilabina dihang makita nato ang ilang kasaypanan. Dayag nga nalisdan pod niini ang unang siglong mga Kristohanon. Pananglitan, si Euodia ug Sintique posibleng wala ray problema sa ilang ‘paghago pag-ayo uban [kang Pablo] para sa maayong balita.’ Pero tungod sa usa ka hinungdan, wala sila magkasinabtanay. Busa giawhag sila ni Pablo sa “pagbaton ug samang panghunahuna diha sa Ginoo.”​—Filip. 4:2, 3.

12. Unsaon nato pag-ugmad ug mabinationg pagmahal sa mga igsoon?

¹² Unsaon nato pag-ugmad ug mabinationg pagmahal sa mga igsoon karon? Kon mas mailhan nato ang mga igsoon, mas dali nato silang masabtan ug mas maugmad nato ang mabinationg pagmahal kanila. Ang edad ug kagikan dili angayng mahimong babag. Hinumdomi nga si Jonatan magulang kang David ug mga 30 anyos, pero nasuod siya kaniya. Duna bay igsoon sa kongregasyon nga mas magulang o mas bata kanimo nga mahimo nimong suoron? Kon buhaton nimo kana, ikapakita nimo nga imong ‘gihigugma ang tanang igsoon.’​—1 Ped. 2:17.

13. Nganong dili tingali ta mobatig parehas nga kasuod sa tanan diha sa kongregasyon?

¹³ Ang pagbaton bag mabinationg pagmahal sa mga igsoon nagpasabot nga mobati tag parehas nga kasuod sa tanan diha sa kongregasyon? Wala. Dili nâ realistiko. Normal lang nga mas masuod ta sa pipila ka tawo tungod kay parehas tag interes nila. Gitawag ni Jesus ang tanan niyang apostoles ug “mga higala,” pero suod kaayo siya kang Juan. (Juan 13:23; 15:15; 20:2) Hinunoa, si Jesus wala magpakitag paboritismo kang Juan. Pananglitan, sa dihang si Juan ug ang iyang igsoong si Santiago nangayog prominenteng posisyon sa Gingharian sa Diyos, giingnan sila ni Jesus: “Dili akoy mopili kon kinsay molingkod sa  akong tuo o sa akong wala.” (Mar. 10:35-40) Sama kang Jesus, dili ta angayng magpakitag paboritismo sa atong suod nga mga higala. (Sant. 2:3, 4) Ang paghimo niana moresulta sa pagkabahinbahin, nga dili gyod nato gustong mahitabo sa Kristohanong kongregasyon.​—Jud. 17-19.

14. Sumala sa Filipos 2:3, unsay makatabang nato aron dili ta makigkompetensiya sa uban?

¹⁴ Aron makapakita tag mabinationg pagmahal sa usag usa, dili ta makigkompetensiya sa uban diha sa kongregasyon. Hinumdomi nga si Jonatan wala makigkompetensiya kang David, nga nag-isip kaniya ingong karibal sa trono. Masundog natong tanan ang ehemplo ni Jonatan. Ayawg kasina sa mga igsoon tungod sa ilang mga abilidad, “apan magpaubos mo ug isipa ang uban nga labaw kay kaninyo.” (Basaha ang Filipos 2:3.) Hinumdomi nga ang matag usa kanato dunay mahimo nga makatabang sa kongregasyon. Pinaagi sa pagpabiling mapainubsanon, makita nato ang maayong mga hiyas sa mga igsoon ug makabenepisyo ta sa ilang pagkamatinumanon.​—1 Cor. 12:21-25.

15. Unsay imong nakat-onan sa eksperyensiya ni Tanya ug sa iyang pamilya?

¹⁵ Sa dihang makasinati tag wala damhang mga problema, si Jehova maghupay kanato pinaagi sa mabinationg pagmahal ug praktikal nga tabang gikan sa mga igsoon. Tagda ang nahitabo sa usa ka pamilya human sila motambong sa Sabado nga programa sa usa sa 2019 “Ang Gugma Dili Molubad!” Internasyonal nga mga Kombensiyon sa United States. “Sa pagpaingon namo sa among hotel,” miingon si Tanya nga may tulo ka anak, “dihay laing sakyanan nga nawad-ag preno ug  mibangga sa among sakyanan. Wala ra mi maunsa, pero nakurat kaayo mi. Nanganaog mi sa sakyanan ug mibarog sa haywey. Sa daplin sa karsada, dihay nanawag namo nga paadtoon mi sa iyang sakyanan. Usa siya sa mga brader nga bag-o lang pod mibiya gikan sa kombensiyon. Ug dili lang siya ang mihunong. Diha pay lima ka delegado gikan sa Sweden nga mihunong sab. Kami sa akong anak nga babaye gigakos sa mga sister, nga mao gyoy among gikinahanglan! Gipasaligan nako sila nga OK ra mi, pero wala gyod mi nila biyai. Nagpabilin sila bisan dihang nangabot na ang mga paramedic, ug giseguro nila nga nabatonan namo ang tanan namong gikinahanglan. Niining lisod nga situwasyon, gibati namo ang gugma ni Jehova. Tungod niini nga eksperyensiya, milalom ang among gugma sa mga igsoon ug ang among gugma ug apresasyon kang Jehova.” Diha bay higayon nga nagkinahanglan kag tabang ug may igsoon nga nagpakita nimog mabinationg pagmahal?

16. Unsay mga rason kon nganong angay tang magpakitag mabinationg pagmahal sa usag usa?

¹⁶ Hunahunaa ang maayong mga resulta dihang magpakita tag mabinationg pagmahal sa usag usa. Mahupay nato ang mga igsoon dihang may mga problema sila. Mapalig-on nato ang panaghiusa sa katawhan sa Diyos. Mapamatud-an nato nga kita mga tinun-an ni Jesus, ug kini makadani sa sinserong mga tawo sa matuod nga pagsimba. Labaw sa tanan, mahimaya nato “ang Amahan nga malumo ug maluluy-on ug ang Diyos sa tanang paghupay,” si Jehova. (2 Cor. 1:3) Hinaot kitang tanan magpadayon sa pag-ugmad ug pagpakitag mabinationg pagmahal!