1. Met a pwári nafangawen tong lón chómmóng famili?

EWE Paipel a fen oesini pwe lón ekkewe ránin lesópwólóón, epwe nafangaw án aramas “tong.” (2 Tim. 3:1, 3) Sia kúkkúna pwénúetáán ena oesini lón ei fansoun. Áwewe chék, chómmóng pwúpwúlú ra mufesen, me ra fókkun songfengen, iwe néúr kewe ra meefi pwe ese wor tongeer. Pwal mwo nge ekkewe famili mi nómfengen lón chék eú imw, rese ririéchfengen. Iei alon emén soufén lón famili: “Ekkewe sam me in me néúr kewe rese kan fóffósfengen, nge ra alapa ar fansoun le nóm wóón computer, tablet, phone, are play video game. Inaamwo ika ekkena famili ra nómfengen lón chék eú imw, nge rese sissilefengeniir.”

2-3. (a) Me ren Rom 12:10, ié kewe mi lamot sipwe pwári ewe tongen pwipwi ngeniir? (b) Met sipwe káé lón ei lesen?

² Sise mochen usun chón ei fénúfan rese kan pwári tong. (Rom 12:2) Nge a lamot ach sipwe ámááraatá ewe tongen pwipwi esap chék ngeni chón ach famili nge pwal ngeni pwiich kewe Chón Kraist. (Álleani Rom 12:10.) Met weween tongen pwipwi? Ina ewe sókkun memmeef lefilen chón eú famili mi ririéchfengen. Ina ewe sókkun tong mi lamot ach sipwe ámááraatá lefilach me pwiich kewe Chón Kraist. Ika sia pwári ena tongen pwipwi, sia álisatá tipeeúfengen, ewe napanap mi lamot lón ewe fel mi enlet.​—Mik. 2:12.

³ Ren ach sipwe ámááraatá me pwári tongen pwipwi, sipwele ppii met sia tongeni káé seni ekkóch pwóróus lón Paipel.

4. Ifa usun James 5:11 a álisikich le aúcheani úkúkún watteen án Jiowa tong?

⁴ Ewe Paipel a pwári ngenikich napanapen Jiowa kewe mi echipwér. Áwewe chék, a erá pwe “Kot chen.” (1 Joh. 4:8) Lupwen sia silei ena usun Jiowa, iwe sia mochen chiechi ngeni. Nge ewe Paipel a pwal erá pwe Jiowa “a uren kirikiröch.” (Álleani James 5:11.) A ifa me échún án ena wokisin áweweei úkúkún watteen tongach me ren Jiowa!

5. Ifa usun Jiowa a pwári úméúméch, me ifa usun sia tongeni áppirú?

⁵ Nengeni pwe James 5:11 a eriri kirekiréchún Jiowa ngeni pwal eú napanap mi lukiikich ngeni i, ina an úméúméch. (Eks. 34:6) Eú alen án Jiowa úméúméch ngenikich, ina ren an omusaaló tipisich kewe. (Kölf. 51:1) Lón ewe Paipel, úméúméch ese chék wewe ngeni án emén omusaaló tipisin emén. A pwal wewe ngeni eú memmeef mi lap lón emén atun a kúna riáfféún emén me mochen álisi. Jiowa a apasa pwe an mochen álisikich a fókkun lap seni án emén inelap mochen álisi néún we kúkkún. (Ais. 49:15) Atun sia nóm fán weires, án Jiowa úméúméch a amwékútú i le álisikich. (Kölf. 37:39; 1 Kor. 10:13) Sia tongeni pwári úméúméch ngeni pwiich kewe Chón Kraist ren ach omusaaló tipisiir me sisap amwéchú ach song rer lupwen ra elichippúngúkich. (Ef. 4:32) Nge ewe ákkáeúin alen ach sipwe pwári úméúméch ngeniir, ina ren ach ákkálisiir atun ra nóm fán weires. Lupwen tong a amwékútúkich le úméúméch ngeni aramas, iwe sia áppirú Jiowa, ewe mi pwári kirekiréch lap seni meinisin.​—Ef. 5:1.

6. Ifa usun Jonatan me Tafit ra pwári ewe tongen pwipwi lefiler?

⁶ A masou ewe Paipel ren pwóróusen ekkewe aramas rese unuséch nge ra tongefengeniir usun chiechi. Ekieki usun pwóróusen Jonatan me Tafit. Ewe Paipel a  erá: “Jonatan nöün Saul we a pwipwi ngeni Tafit seni lon letipan o echeni usun an püsin echeni.” (1 Sam. 18:1) Jiowa a filatá Tafit an epwe wii Saul lón wisan king. Mwirin ena, Saul a fókkun lólówóiti Tafit me sótun nieló. Nge Jonatan néún Saul we, ese peni seman na lupwen a sótun nieló Tafit. Jonatan me Tafit ra pwonfengen pwe repwe chék pwipwiéch me álillisfengen fansoun meinisin.​—1 Sam. 20:42.

7. Eli met a tongeni eppeti án Jonatan me Tafit resap wiliti chiechi?

⁷ Ewe tongen pwipwi lefilen Jonatan me Tafit a fókkun amwarar atun sia ekieki usun ekkewe mettóch eli a tongeni eppeti ar resap wiliti chiechi. Áwewe chék, Jonatan a watte seni Tafit wóón 30 som ier. Eli Jonatan a tongeni ekieki pwe ese tongeni chiechiéch ngeni emén mi fókkun kúkkún seni me ese kon watte silean. Nge Jonatan ese ekieki ena usun Tafit, nge a fókkun súféliti.

8. Pwata ka ekieki pwe Jonatan i emén chiechi mi fókkun múrinné ngeni Tafit?

⁸ Jonatan a tongeni lólówóiti Tafit. Pokiten Jonatan i néún King Saul, iwe a tongeni péchéú wóón an pwúúng le wii seman na le king. (1 Sam. 20:31) Nge Jonatan a tipetekison, me a pwal tuppwél ngeni Jiowa. Ina popun, a unusen álisatá án Jiowa kefil pwe Tafit epwe wisen king. A pwal tuppwél ngeni Tafit inaamwo ika a fókkun asonga Saul.​—1 Sam. 20:32-34.

9. Ifa usun sia silei pwe Jonatan ese lólówóiti Tafit?

⁹ Pokiten Jonatan a tongei Tafit, iwe ese lólówóiti. Jonatan a fókkun sipeéch le nikáppich me i emén soufiu mi pwora. Iir me seman we Saul, ra iteféúló ren ar “müttir seni ekewe ikel” me “pöchökül seni ekewe laion.” (2 Sam. 1:22, 23) Ina minne Jonatan a tongeni eingeing wóón pworaan le féri ekkewe mettóch. Iwe nge, ese okkuf ngeni Tafit me ese pwal lólówóiti wóón minne a féri. Nge Jonatan a fen ingeiti án Tafit pwora me lúkúlúk wóón Jiowa. Áwewe chék, mwirin chék án Tafit nieló Koliat, Jonatan a poputá le tongei Tafit usun pwisin i. Ifa usun sia tongeni pwári ena esin tongen pwipwi ngeni pwiich kewe Chón Kraist?

10. Met weween ach sipwe ‘wesewesen echenifengenikich ren unusen lelukach’?

¹⁰ Ewe Paipel a erenikich: “Oupwe wesewesen echenifengenikemi ren unusen lelukemi.” (1 Pet. 1:22) Jiowa a isetiw leenien áppirú fán itach. A fókkun péchékkúl an tongekich pwe ika sia tuppwél ngeni, ese wor met a tongeni atai ach riri ngeni. (Rom 8:38, 39) Ewe kapasen Krik mi afféú ngeni “wesewesen” a menlapei án emén fókkun achocho le pwári tong. Fán ekkóch ese mecheres ach sipwe tongei pwiich kewe Chón Kraist. Lupwen ra asongakich, a lamot ach sipwe sópweló le ‘echenifengenikich ren ach songomangfengen lefilach. Sipwe fokun achocho le tümwünü ach tipeeufengen lon ewe Ngünmifel ren ewe kinamwe mi rifengenikich.’ (Ef. 4:1-3) Lupwen sia achocho le ákkeáni ‘ewe kinamwe mi rifengenikich,’ sisap nefótófót wóón mwáállin pwiich kewe. Sipwe achocho úkúkún ach tufich le eáni án Jiowa ekiek usur.​—1 Sam. 16:7; Kölf. 130:3.

11. Eli pwata ese mecheres fán ekkóch ach sipwe ámááraatá ewe tongen pwipwi?

¹¹ Ese mecheres ach sipwe pwári ewe tongen  pwipwi ngeni pwiich kewe Chón Kraist iteitan, ákkáeúin atun sia silei ar kewe apwangapwang. A ffat pwe ekkóch ekkewe popun Chón Kraist ra pwal kúna ena esin weires. Áwewe chék, ese mwáál ese wor weiresin án Eutia me Sintike angangfengen me “eti [Paulus] le arongafeili ewe Pworausen Manau.” Nge ren och popun, a weires ngeniir ar repwe chiechifengen. Ina popun, Paulus a peseer ar repwe “tipeeufengen usun chök pwipwi lon ach Samol.”​—Fil. 4:2, 3.

12. Ifa usun sipwe tongeni ámááraatá ewe tongen pwipwi ngeni pwiich kewe Chón Kraist?

¹² Ifa usun sipwe tongeni ámááraatá ewe tongen pwipwi ngeni pwiich kewe Chón Kraist lón ei fansoun? Atun sia sissileeló pwiich kewe, eli epwe mecheresiló ach sipwe weweitiir me ámááraatá ach tongeer. Sia tongeni chiechi ngeniir inaamwo ika ra watte are kúkkún senikich are ika iir seni ekis. Chemeni pwe Jonatan a watte seni Tafit wóón 30 som ier, nge ra chiechiéchfengen. Ka tongeni wiliti chiechien emén mi watte are kúkkún sonuk? Óm féri ena, ka pwári pwe ka ‘echeni chienom kewe souläng’ meinisin.​—1 Pet. 2:17.

13. Eli pwata sia kon pach ngeni ekkewe ekkóch lón ewe mwichefel lap seni pwal ekkewe ekkóch?

¹³ Itá ach eáni ewe tongen pwipwi ngeni pwiich kewe a wewe ngeni pwe ach fókkun chiechiéch ngeni emén me emén lón ewe mwichefel epwe chék taitap? Aapw ese tufich ena. Ese wor ngawen ach sipwe kon pach ngeni ekkewe ekkóch lap seni pwal ekkewe ekkóch pokiten sia taitap wóón met sia pwapwaiti. Jesus a eita ngeni meinisin néún kewe aposel “chiechiei,” nge a fókkun echeni Johannes. (Joh. 13:23; 15:15; 20:2) Iwe nge, Jesus ese eimwumwu lón féfférún ngeni Johannes lap seni ekkewe ekkóch. Áwewe chék, atun Johannes me pwiin we James ra tingorei Jesus an epwe ewisa ngeniir wis mi tekia lón ewe Mwúún Kot, Jesus a ereniir: “Esap wor ai pwüüng ai üpwe filätä iö epwe mot pelifichi  ika pelimöngi.” (Mark. 10:35-40) Sipwe usun Jesus, sisap eimwumwu lón féfférúch ngeni chiechiach kewe sia kon pachfengen. (Jas. 2:3, 4) Ika sia eimwumwu, sia efisi tipefesen, ewe napanap ese ketiw lón ewe mwichefel.​—Jut. 17-19.

14. Me ren Filipi 2:3, met epwe álisikich ach sisap eáni ewe napanap okkuffengen?

¹⁴ Atun sia pwári ewe tongen pwipwi lefilach, sia túmúnú ewe mwichefel seni ewe napanap okkuffengen. Chemeni pwe Jonatan ese sótun okkuf ngeni Tafit me sótun angei seni ewe wis king. Kich meinisin sia tongeni áppirú án Jonatan leenien áppirú. Sisap lólówóiti pwiich kewe Chón Kraist pokiten tufichiir kewe, ‘nge sipwe tipetekisonfengen lefilach, sisap ekieki pwe sia mürina seni ekewe ekoch.’ (Álleani Filipi 2:3.) Chemeni pwe emén me emén kich sia tongeni féri met epwe álisatá ewe mwichefel. Ika sia chék tittipetekison, sipwe tufichin kúna ekkewe napanap mi múrinné pwiich kewe ra eáni me sipwe káé seni ar leenien áppirú usun ar tuppwél.​—1 Kor. 12:21-25.

15. Met ka káé seni pwóróusen Tanya me an we famili?

¹⁵ Lupwen och mettóch mi ngaw a fis lón manawach, Jiowa a oururukich ren ewe tongen pwipwi me ewe álillis sia angei seni pwiich kewe Chón Kraist. Iei pwóróusen eú famili sárin ar fiti ewe prokram lón Ammól atun ewe 2019 International Mwichelap lón Merika, itelapan “Tong Esap Muchúló!” Tanya, ewe in mi wor úlúmén néún, a apasa: “Atun aua ssásefál ngeni ewe hotel aua nóm lón, efóch tarakú a purekem. Ese wor  a feiengaw, nge aua towu seni wáám we, me útá ppen ewe al fán ám rúké. A wor emén a kérikem pwe aupwe feiló ren waan we pwe aute feiengaw. I emén chienach Chón Kraist mi kerán ssá seni ewe mwichelap. Nge esap chék i a kaúló rem. A pwal wor nimmén mi etto fiti ewe mwichelap seni Sweden, ra pwal kaúló. Ekkena fefin Chón Kraist ra turufikem me nei we nengngin me a ekinamweekem! Ua ereniir pwe resap lólilen rem, nge rese mochen sú senikem. Ra nóm rem pwal mwo nge mwirin án ekkewe chón pioing waroto, me ra nochchei an epwe wor rem met a lamot ngenikem. Atun ena fansoun mi áweires, aua meefi án Jiowa tong. Minne a fis ngenikem a alapaaló ám tongei pwiim kewe, me alóllóólaaló ám tongei Jiowa me aúcheani.” Ka chemeni eú atun ka nóm lón osupwang nge emén pwiium Chón Kraist a pwári ngonuk ewe tongen pwipwi?

16. Ikkefa ekkewe popun sia kan pwári ewe tongen pwipwi lefilach?

¹⁶ Ekieki usun ekkewe mettóch mi múrinné a fis seni ach pwári ewe tongen pwipwi lefilach. Sia oururu pwiich kewe lón ar fansoun weires. Sia alapaaló ewe tipeeú lefilen néún Kot kewe aramas. Sia ánneta pwe kich néún Jesus chón káé, me ena mettóch a lukeato chókkewe mi letipwenechar ngeni ewe fel mi enlet. Nge lap seni meinisin, sia elingaaló Jiowa “ewe Sam mi eäni tong me ewe Kot mi echipakich lon mettoch meinisin.” (2 Kor. 1:3) Amwo kich meinisin ousipwe sópweló le ámááraatá me pwáppwári ewe tongen pwipwi!