1. San e soi taki gaanse osufamii á lobi denseefi moo?

BEIBEL taki aini den lasiti dei, famii á be o lobi denseefi moo (2 Tim. 3:1, 3). Wi e si fa a sani ya e kon tuu aini a ten ya. A omen osufamii e booko toow. Son leisi dda efuso mma e gwe fika den osufamii. Te a sani ya pasa, den pikin e fii enke sama á lobi den. Winsi dda anga mma de aini son osufamii seefi, toku den nai sidon gi toli anga den pikin fu den moo enke fa den gaansama be e du fosi. Wan sama di e yeepi osufamii fu libi bun anga denseefi taki: ‘Mma, dda anga den pikin nai taki anga denseefi. Iniiwan sama e de neen telefon, computer efuso tablet e luku felon, e taki anga taawan efuso e pee game. Winsi fa den e tan aini a wan osu, toku den á kaba sabi denseefi.’

2-3. (a) Enke fa Romesama 12:10 e soi, da sama u mu lobi? (b) San wi o luku aini a artikel ya?

² Wi á wani de enke den sama fu a goontapu ya di á lobi denseefi (Rom. 12:2). U mu meke moiti fu kon moo lobi den sama aini wi osufamii anga den baala anga sisa aini a kemeente. (Leisi Romesama 12:10.) Fu sowtu lobi wi o taki aini a artikel ya? Aini a artikel ya, wi o luku fa u sa meke moiti fu lobi den baala anga sisa aini a kemeente enke famii di lobi denseefi tuutuu. Efu u lobi useefi na a fasi ya, ala sama aini  a kemeente o man dini Yehofa anga piisii.​—Mika 2:12.

³ Wi o luku wantu toli aini Beibel di o yeepi u fu si san u mu du fu lobi den baala anga sisa aini a kemeente enke fa u lobi u famii.

4. Fa Yakowbesi 5:11 e yeepi u fu fusutan fa Yehofa lobi u?

⁴ Beibel e taigi u sowtu manii Yehofa abi. A sikiifi aini Beibel taki ‘Gadu a lobi’ (1 Yoh. 4:8). A sabi di u sabi a sani ya e meke u wani toon Yehofa mati. Ma a sikiifi aini Beibel tu taki ‘Yehofa lobi sama tuutuu’. (Leisi Yakowbesi 5:11.) A sani ya e soi taki ná pikin lobi Yehofa lobi u.

5. Fa Yehofa e soi taki tyali fu taawan e kisi en? Fa u sa waka neen baka?

⁵ Yakowbesi 5:11 á taki Yehofa lobi u namo, ma a taki a abi tyali-ati tu (Ek. 34:6). A de kabakaba fu gi u paadon te u meke wan fowtu, dati a wan fasi fa ai soi tyali-ati gi u (Ps. 51:1). Ma te wan sama abi tyali-ati, a ná paadon namo ai gi taawan. Wan sama di abi tyali-ati e fii gi taawan tu. Ai du ala san a poi fu yeepi taawan. Yu e si a sani ya na a fasi fa wan mma e fii gi en pikin di a lobi. Ma Yehofa lobi u dyow moo fa wan mma lobi en pikin (Yes. 49:15). Te sani e moo u, Yehofa de kabakaba fu yeepi u fu di tyali fu wi e kisi en (Ps. 37:39; 1 Kor. 10:13). Useefi sa soi tyali-ati gi den baala anga sisa fu u tu. Te den misi u, wi á mu holi den na ati, ma u mu gi den paadon anga u hii ati (Efe. 4:32). Ma a moo bun fasi fa u sa soi den baala anga sisa fu u di de a nowtu taki tyali fu wi e kisi den, a te wi e du sani fu yeepi den. Te wi e soi tyali-ati gi taawan fu di u lobi den, wi e soi taki wi e waka a Yehofa baka a Sama di lobi u moo ala taa sama.​—Efe. 5:1.

6. Fa Yonatan anga David soi taki den be lobi denseefi?

⁶ Beibel abi toli fu mati di be lobi denseefi tuutuu. Yonatan anga David a tu fu den sama ya. Beibel taki: ‘Yonatan anga David toon bun mati. Yonatan be kon lobi David enke fa a lobi enseefi’ (1 Sam. 18:1). A David Yehofa be salufu fu toon Kownu baka Saul. Di Saul kon sabi a sani ya, a be e dyalusu anga David te a be wani kii en. Ma Yonatan á be e holibaka gi en dda Saul. Yonatan anga David paamisi denseefi taki ala yuu den o holibaka gi denseefi enke mati.​—1 Sam. 20:42.

7. San a wantu sani di be sa tapu Yonatan anga David fu toon mati?

⁷ Ai foondoo wi fa Yonatan anga David du toon bun mati, bika a omen sani be sa tapu den fu toon mati. Yonatan be sa meke David, bika a be gaandi wan sani fu 30 yali moo en. Yonatan be sa taki: ‘A biya ya yonkuu tumisi, mi ná o leli nawan sani fi en, a ná abi ondoofeni.’ Ma Yonatan á be e denki so, a be e lesipeki David.

8. Saide yu e si enke Yonatan a be wan bun mati fu David?

⁸ Yonatan a be a manpikin fu Kownu Saul. Neen be o toon kownu di en dda be o dede, a sani ya be sa meke a dyalusu anga David (1 Sam. 20:31). Ma a be abi sakafasi. A be e dini Yehofa anga en hii ati tu, neen meke di a fusutan taki a David Yehofa salufu fu toon kownu, a holibaka gi a sani ya. A be e holibaka gi David tu, winsi fa a sani ya be meke Saul ati boon neen.​—1 Sam. 20:32-34.

9. Fa u du sabi taki Yonatan á be e dyalusu anga David?

⁹ Yonatan be lobi David, neen meke a á be e si en enke feyanti. Yonatan be abi deki-ati, a omen feti a be feti kaba. A be sabi feti anga bo. Sama be e gafa Yonatan anga en dda taki den be gaw moo agaa, den taki den be taanga moo lew (2 Sam. 1:22, 23). Ma toku Yonatan á be e gafa fu den sani ya, bika a á be e fii enke a bun moo David. A á be e dyalusu te sama be e gafa David fu den bun sani di a be e du. A be e switi gi en te a be si fa David be abi deki-ati anga fa a be e fitoow Yehofa. A di Yonatan be si fa David kii Goliyat meke a be kon lobi en enke fa a lobi enseefi. Fa u sa soi taki u lobi u baala anga sisa na a fasi ya?

10. San a wani taki fu ‘lobi useefi anga u hii ati’?

¹⁰ Beibel taki ‘u mu lobi useefi anga u hii ati’ (1 Peit. 1:22). Yehofa soi u fa u mu du a sani ya. A lobi wi anga en hii ati, neen meke efu wi á gwe fika en, a ná o gwe fika u tu (Rom. 8:38, 39). Te Beibel taki u mu lobi useefi anga u hii ati, da a sani ya wani taki u mu meke moiti fu lobi useefi. A ná ala yuu a makiliki fu soi den baala anga sisa fu u taki u lobi den. Son leisi den e du hati sani anga u. Te a sani ya pasa, lobi o yeepi u fu ‘abi boo anga den. A o yeepi u tu fu libi bun anga useefi. Efu u lobi den baala anga sisa, wi o du ala san u poi fu libi na a wan, enke fa a santa yeye e yeepi u’ (Efe. 4:1-3). Efu u meke moiti fu libi na a wan, wi o wai  ede gi den baala anga sisa fu u te den meke wan fowtu. U mu meke moiti fu si den enke fa Yehofa e si den.​—1 Sam. 16:7; Ps. 130:3.

11. Saide ai taanga son yuu fu lobi den baala anga sisa fu u?

¹¹ Te wi e si den fowtu di den baala anga sisa fu wi e meke, ai moo taanga gi u fu lobi den. A sani ya be e miti den fosi Kelesten tu. Eyodiya anga Sentike be lobi wooko makandaa anga Pawlesi fu paati a bun nyunsu. Ma a gei den á be e kaba fusutan denseefi. Neen meke Pawlesi taigi den taki den mu meke moiti ‘fu denki go na a wan se te den e wooko gi Masaa’.​—Filip. 4:2, 3.

12. San o yeepi u fu lobi den baala anga sisa fu u?

¹² San o yeepi u fu lobi den baala anga sisa fu wi aini a ten ya? Efu u meke moiti fu sabi den baala anga sisa fu u moo bun, a sani de o yeepi u fu moo lobi den. A ná abi toobi efu den gaandi efuso yonkuu moo u, ma tokuso u mu meke moiti fu toon mati anga den. A moo enke 30 yali Yonatan be gi David, ma toku Yonatan be toon en mati. Sama de aini i kemeente di gaandi efuso yonkuu moo yu? Kande i sa meke mati anga den. Te yu e du a sani ya, yu e soi taki i ‘lobi ala den baala anga sisa fu i’.​—1 Peit. 2:17.

13. Saide u ná o poi de bun mati anga ala den baala anga sisa aini a kemeente?

¹³ U mu meke moiti fu toon mati anga ala den baala anga sisa aini a kemeente, ma a sani ya wani taki anga ala den wi o de bun mati? Nono, wi á poi toon bun mati anga ala den. Son leisi wi anga wan sama e toon bun mati fu di u lobi denseefi sani. Yesesi be kai ala den apostel fi en ‘mati’, ma a be moo lobi Yohanisi (Yoh. 13:23; 15:15; 20:2). Winsi fa Yesesi be moo lobi en, tokuso a á be e paati bee. Di Yohanisi anga en baala Yakowbesi be akisi Yesesi efu den sa sidon neen leti-ana  anga en kukutu-ana aini a Kownukondee, Yesesi taigi den taki: ‘A ná mi e taki sama o sidon a mi leti-ana anga mi kukutu-ana’ (Malik. 10:35-40). U sa abi bun mati aini a kemeente, ma wi á mu e libi wan fasi anga den taa baala anga sisa (Yak. 2:3, 4). Efu u be o du a sani de, a kemeente á be o libi na a wan moo.​—Yud. 17-19.

14. Enke fa Filipisama 2:3 e soi, da san o yeepi u fu wi a dyalusu anga useefi aini kemeente?

¹⁴ Efu u lobi ala den baala anga sisa fu u, u ná o dyalusu anga den. A di Yonatan be lobi David meke a á be e dyalusu anga en di a be fusutan taki a be o toon kownu. Leti enke Yonatan, wi á mu e dyalusu anga den baala anga sisa te den poi du son sani bun moo wi. Pe fu u dyalusu anga den, ‘u mu abi sakafasi. U mu e si taawan pelensipali moo u’. (Leisi Filipisama 2:3.) Holi a pakisei taki na ala sama aini a kemeente e du sani di e tyai wini gi a kemeente. Neen meke efu u nai fii useefi, wi o si den bun sani di den baala anga sisa fu wi e du. Wi o si tu taki a omen sani u sa leli fu den.​—1 Kor. 12:21-25.

15. San a toli fu Tanya anga en osufamii e leli i?

¹⁵ Te sani miti u, a den baala anga sisa fu wi e yeepi u. A so Yehofa e toosutu u. Luku san pasa anga wan mma aini Ameekankondee den e kai Tanya anga den pikin fi en. A sataa di den komoto na a ‘Lobi nai kaba noiti’ konkelesi fu 2019 neen wan taa wagi lei kon naki den di den e go a osu. Tanya taki: ‘Wi á be kisi mankei, ma ná pikin dyombo u be dyombo. U komoto aini  a wagi neen u taampu a sikinpasi. Di u taampu de neen u si wan baala di be komoto na a konkelesi wai ana kai u fu go sidon aini en wagi. Feifi baala anga sisa fu Sweden di be kon na a konkelesi kon a u tu. Den sisa baasa mi anga a meisyo fu mi. Mi taigi den taki den sa gwe, sani á du u, ma den á be wani gwe. Di dataa kon a u seefi, den be de anga wi ete fu luku efu ala sani bun. Di a sani ya miti u, u si taki Yehofa lobi u tuutuu. A sani ya meke u moo lobi en. U kon moo lobi den baala anga sisa fu u tu, di u si fa den be e booko den ede anga u.’ I sabi ete fa den baala anga sisa be soi taki den lobi i di sani be miti i?

16. Saide u mu meke moiti fu moo lobi den baala anga sisa fu u?

¹⁶ A omen wini ai tyai te wi e soi den baala anga sisa fu u taki u lobi den. Wi e toosutu den te sani e miti den. Wi e yeepi den baala anga sisa fu libi na a wan. Te u lobi den baala anga sisa fu u, a sani ya e yeepi sama fu sabi taki wi a Yesesi bakaman. Da denseefi sa kon dini Yehofa tu. A so wi e ‘gafa a Dda di abi tyali-ati, a Gadu di e toosutu sama’ (2 Kor. 1:3). Neen meke u mu du ala san u poi fu moo lobi den baala anga sisa fu wi anga u hii ati.