1. Jòdijou, adan onlo fanmi, yonn pa gè enmé lòt. Ka ki ka montré sa ?

LABIB té ja anonsé kè adan sé dènyé jou-la, ‘sé moun-la pa té’é enmé pwòp fanmi a yo’ (2 Tim. 3:1, 3). Pwofési-lasa ka réyalizé an 2 zyé an nou jòdijou. Pa ègzanp, ni onlo moun ki divòsé é défwa, yonn kòlè èvè lòt, é sé timoun-la ni lenprésyon kè fanmi a yo pa enmé-yo. Délè, ni plizyè moun ka rété an menm kaz-la men ou té’é di sé étranjé ki an kaz-la. Ni dé moun, travay a yo sé édé fanmi ki an difikilté. Mi sa yonn adan yo ka di : « Yonn pa’a palé ba lòt an kaz-la. Manman-la, papa-la é sé timoun-la ka pasé tout tan a yo asi tablèt, asi òwdinatè, asi téléfòn, oben yo ka jouwé jé-vidéo. Menmsi tout sé moun-lasa ka rété an menm kaz-la, yonn pa konnèt lòt vréman *. »

2-3. a) Kijan pou nou apliké Women 12:10 ? b) Ka nou ké vwè adan awtik-lasa ?

² Sé moun-la ki an mond-la pa ni lanmou yonn pou lòt é nou vé pa aji kon yo (Wom. 12:2). Olyé dè sa, fò-nou aprann enmé fanmi an nou é frè é sè an nou (li Women 12:10). Fò-nou enmé frè é sè an nou èvè tandrès. Men ka sa vé di ? Fò-nou enmé-yo konsi yo sé pwòp fanmi an nou. Lè nou enmé frè é sè an nou é kè nou ka aji épi yo èvè tandrès, lasanblé-la ka rété soudé é toutmoun ka sèvi Jéova èvè tchè-kontan (Mich. 2:12).

³ Pou nou enmé frè é sè an nou é pou nou aji épi yo èvè tandrès, an-nou vwè ka déotwa ègzanp ki an Bib-la pé aprann-nou.

4. Ka Jak 5:11 ka aprann-nou asi lanmou-la Jéova ni pou nou la ?

⁴ Adan Labib, nou ka touvé tout bèl kalité a Jéova. Pa ègzanp, an 1 Jan 4:8, yo ka di-nou kè « Bondyé sé lanmou ». Lè nou ka vin aprann sa, nou ka anvi plonjé an 2 bra a-y. Men Labib ka di-nou osi kè Jéova sé on Papa ki ‘plen lanmou é ki plen tandrès’ (li Jak 5:11). Lè nou ka tann sa, nou ka rann-nou kont kè Jéova enmé-nou fò toubònman !

5. Kijan Jéova ka aji èvè mizérikòd, é ka nou pé fè pou imité-y ?

⁵ Jak 5:11 ka palé dè lanmou a Jéova, dè tandrès a-y men i ka palé dè mizérikòd a-y osi (Ègz. 34:6). Jéova ka montré-nou mizérikòd a-y plizyè fason diféran. Pa ègzanp, i ka fè sa lè i ka padonné-nou (Sòm 51:1). Men sèlon Labib, lè on moun ni mizérikòd, a pa yenki padonné i ka padonné. Si i ka vwè zafè a on moun mélé, i ka chèché a fè on biten ba-y. On manman enmé timoun a-y fò, men Jéova enmé-nou plis ki sa ankò (Iz. 49:15). É sé sa ki ka fè kè i anvi édé-nou. Konm Jéova ni mizérikòd, lè nou an difikilté, i ka fè on biten pou édé-nou (Sòm 37:39 ; 1 Kor. 10:13). Nou pé montré kè nou ni mizérikòd si nou ka padonné frè é sè an nou lè yo fè-nou on biten ki fè-nou mal é si nou pa rété faché èvè yo (Éféz. 4:32). Méyè biten nou pé fè pou montré kè nou ni mizérikòd sé soutyenn frè é sè an nou lè yo ka jwenn on bout-rèd. Lè nou enmé frè é sè an nou é lè nou ka aji èvè mizérikòd épi yo, nou ka imité Jéova. É adan domenn-lasa, pa ni ponmoun ki pi fò ki-y ! (Éféz. 5:1).

6. Kijan Jonatan é David montré kè yo té 2 zanmi-frè ?

⁶ Adan Labib, nou ka touvé istwa a sèwten moun ki té enmé-yo fò menm. Yo té bon bon zanmi magré yo té enpawfè. An-nou pran ka a David é Jonatan. Mi sa  Labib ka di : « Jonatan vin enmé David kon limenm, é Jonatan é David vin bon bon zanmi » (1 Sam. 18:1). Jéova chwazi David pou i vin wa anplas a Sayil. Aprésa, Sayil vin jalou David bon jalou la, é i jous éséyé tchouyé-y. Onlè, Sayil té ka chèché David toupatou pou i té pé sa tchouyé-y. Men menmsi Jonatan sé té gason a Sayil, i pa soutiré pap’a-y. Jonatan di David kè i ké toujou rété bon bon zanmi èvè-y é kè i ké toujou soutyenn-li. É David fè Jonatan menm pwomès-la (1 Sam. 20:42).

7. Ki biten ki té’é pé anpéché David é Jonatan vin zanmi ?

⁷ Jonatan é David té bon zanmi, é sa èstraòwdinè toubònman pas ni onlo biten ki té’é pé anpéché sa fèt. Pa ègzanp, Jonatan té lontan pi gran ki David : i té ni 30 an anplis ki-y. Jonatan té’é pé di kè i pé pa vin zanmi èvè on moun ki fèt yè maten é ki pa konnèt granzafè. Men a pa konsa Jonatan aji èvè David. I té ni onlo rèspé pou-y.

8. Poukwa nou pé di kè Jonatan sé té vréman on zanmi-frè pou David ?

⁸ Jonatan té’é pé jalou David. Konm Jonatan sé té gason a Wa Sayil, i té’é pé sonjé kè apré mò a pap’a-y, sé-y ki té pou vin wa (1 Sam. 20:31). Men Jonatan té ni imilité é i té fidèl a Jéova. Kifè, konm sé David Jéova chwazi pou vin wa, i soutyenn désizyon-lasa dètoukè. Jonatan pa jen lagé David menmsi sa fè pap’a-y fè bon kòlè (1 Sam. 20:32-34).

9. Ès Jonatan té anripaj èvè David ? Bay on ti èsplikasyon.

⁹ Jonatan té enmé David toubònman. I pa té anripaj èvè-y. Jonatan sé té on sòlda ki té plen kouraj, é lèwvwè i té ka voyé flèch dèyè do a moun, i pa gè té ka raté ! Moun té ka di kè li é pap’a-y té k’ay « pi vit ki sé èg-la » é kè yo té ni « plis fòs ki sé liyon-la » (2 Sam. 1:22, 23). É konm Jonatan fè onlo biten ki té ka montré kè i té fò, i té’é pé ka blagé sa. Men Jonatan pa jen éséyé montré kè i té pi fò ki David, é i pa té jalou-y nonplis. Okontrè, Jonatan té ni onlo rèspé pou David pas David té plen kouraj é i té ka fè Jéova konfyans a san pou san. An réyalité, sé apré kè David tchouyé Golyat kè Jonatan koumansé vin bon bon zanmi èvè-y. Kijan nou pé montré kè nou enmé frè é sè an nou kon Jonatan té enmé David ?

10. Lè yo ka di-nou kè « fò-nou enmé-nou fò toubònman », kijan pou nou konprann sa ?

¹⁰ Labib ka di kè « fò-nou enmé-nou fò toubònman èvè tout tchè an nou » (1 Pyè 1:22). Adan domenn-lasa, Jéova ka ban-nou on bèl ègzanp. Tèlman Jéova enmé-nou, nou pé sèten kè si nou rété fidèl, ayen pé’é pé séparé-nou dè-y (Wom. 8:38, 39). Adan vèwsé-lasa, lè yo ka di kè fò-nou enmé-nou fò toubònman, sa vé di kè, délè, fò nou ké fè onlo éfò pou nou rivé fè sa. Dépawfwa, nou ni dimal a montré frè é sè an nou kè nou enmé-yo fò. Lè on moun fè on biten ki pa fè-nou plézi, ‘fò-nou sipòté-y èvè lanmou toupannan nou ka fè bon éfò pou nou rété ini grasa lèspri sen é grasa lapé ki ka lyanné-nou’ (Éféz. 4:1-3). Si nou ka fè onlo éfò pou antann-nou byen èvè frè é sè an nou, nou pé’é rété gadé sé érè-la yo ka fè la. Nou ké fè tousa nou pé pou vwè sé bèl kalité-la yo ni la, kon Jéova ka fè (1 Sam. 16:7 ; Sòm 130:3).

11. Défwa, nou anvi montré frè é sè an nou kè nou enmé-yo é nou anvi aji èvè tandrès épi yo men nou ni dimal a fè sa. Poukwa ?

 ¹¹ Nou pé ni dimal a montré frè é sè an nou kè nou enmé-yo é nou pé ni dimal a aji épi tandrès èvè yo, siwtou lè nou ka vwè défo a yo. É jistèman, o 1^é syèk, sèwten krétyen té ni pwoblèm-lasa. Pa ègzanp, Évodi é Sentich té ka travay ansanm èvè Pòl pou préché bon nouvèl-la é pétèt kè yo té ka fè sa san pon pwoblèm. Men onlè, nou pa sav pou ki rézon, yo pa té ka antann-yo byen ankò. Pòl ankourajé-yo a tonbé dakò pas sé sa Ségnè-la vé (Filip. 4:2, 3).

12. Ka pou nou fè pou montré frè é sè an nou kè nou enmé-yo é pou nou vin bon bon zanmi èvè yo ?

¹² Jòdijou, kijan nou pé montré frè é sè an nou kè nou enmé-yo é kijan nou pé aji èvè tandrès épi yo ? Si nou aprann konnèt frè é sè an nou pibyen, nou ké pé konprann-yo pi fasilman. Konsa, nou ké pé montré-yo kè nou enmé-yo é nou ké pé aji èvè tandrès épi yo. Nou pa bizwen ni menm laj-la é menm kilti-la pou vin zanmi èvè frè é sè an nou. Enn gadé ! Jonatan té ni apépré 30 an douvan David, é poutan yo té bon bon zanmi. Adan lasanblé a-w, ni dé moun ki pli gran ki-w oben ki pli piti ki-w. Ès ou pa té’é pé vin zanmi èvè yonn adan yo ? Konsa, ou ké montré kè ou enmé tout frè é sè a-w (1 Pyè 2:17).

13. Poukwa nou pé pa bon bon zanmi èvè toutmoun an lasanblé-la ?

¹³ Lè yo ka di-nou kè fò-nou montré frè é sè an nou kè nou enmé-yo é kè fò-nou aji épi tandrès èvè yo, ès savédi kè nou ké bon bon zanmi èvè toutmoun an lasanblé-la ? Nou té’é byen vlé, men sa pa posib. Souvantfwa, nou ka antann-nou pibyen èvè sèwten moun pas yo enmé menm biten ki nou. É sa toutafè nòwmal ! Pa ègzanp, Jézi di kè tout sé apòt-la sé té zanmi a-y. Men Jan sé té moun a-y menm ! (Jan 13:23 ; 15:15 ; 20:2). Magrésa, i pa té ka fè préférans. Lèwvwè Jan é frè a-y Jak vin mandé Jézi on favè pou yo  té pé ni on bèl plas an Wayòm-la, mi sa Jézi di-yo : « A pa mwen ki ka désidé pou di kimoun ki ké sizé adwat an mwen é agòch an mwen » (Mawk 10:35-40). É pou nou imité Jézi, menmsi nou ni bon zig an nou an lasanblé-la, fò pa nou fè préférans (Jak 2:3, 4). Pas si nou ka fè préférans, ké ni zizanni an lasanblé-la é lasanblé-la pé’é soudé ankò (Jid 17-19).

14. Sèlon Filipyen 2:3, ka pou nou fè pou nou pa anripaj èvè lézòt ?

¹⁴ Lè nou enmé frè é sè an nou é kè nou ka aji èvè tandrès épi yo, nou pa anripaj èvè ponmoun an lasanblé-la. Pa oubliyé kè Jonatan pa té jalou David é i pa chèché a vin wa anplas a-y. Fò-nou imité Jonatan. Fò pa nou jalou frè é sè an nou pas kò a yo pi bon adan sèwten domenn. Men èvè imilité, fò-nou kontinyé vwè lézòt kon moun ki ni plis valè ki nou (li Filipyen 2:3). Pa jen oubliyé kè noutout pé fè on biten pou fè lasanblé-la dibyen. Si nou ni imilité, nou ké vwè bèl kalité a frè é sè an nou, é nou ké imité ègzanp a yo (1 Kor. 12:21-25).

15. Lè ou ka gadé sa Tanya é fanmi a-y viv, ka sa ka aprann-vou ?

¹⁵ Lè nou ka jwenn on bout-rèd, Jéova ka konsolé-nou é pousa, i ka itilizé frè é sè an nou. Pa ègzanp, yo ka montré-nou kè yo enmé-nou fò é lè nou bizwen on biten, yo toujou la pou nou. An 2019, on fanmi ki ni 3 timoun ay adan on lasanblé entèwnasyonal o Zétazini. Tèm a-y sé té « Lanmou pa ka jen disparèt ! » Lè sanmdi-la, apré yo pran on bèl ti jouné lasanblé, on malè rivé-yo. Mi sa Tanya,  manman-la, ka rakonté : « Nou té ka viré an lotèl-la, lèwgadé, on vwati sòti la i sòti é i vin varé asi nou. Érèzman, ponmoun pa té blésé. Lè nou sòti an vwati-la, nou pa té ka konprann sa ki té ka rivé-nou la ! Nou té doubout an lari-la é on moun di-nou vin an vwati a-y pou mèt-nou ansékirité. Sé té on frè ki té sòti lasanblé kon nou. Men ni dòt frè ankò ki vwè sa é yo vin a sèkou an nou. Sé té 5 frè é sè ki té sòti an Syèd pou vin an lasanblé-la. Sé sè-la pran ki mwen ki tifi an mwen an 2 bra a yo é sa fè-nou dibyen toubònman. Magré nou di-yo kè sa ké ay, yo rété la èvè nou. Menm lè lanbilans-la rivé, touttan yo pa té sèten kè nou té ni tousa nou bizwen, yo pa jen pati. Pannan moman difisil-lasa, nou vwè men a Jéova. Sa nou viv la fè-nou enmé frè é sè an nou pi fò ankò. Anplisdisa, nou vin enmé Jéova pi fò é nou té ni plis rèkonésans pou-y ankò. » Pétèt on jou ou té adan on sitiyasyon difisil é ou touvé on frè oben on sè pou ba-w lanmou é tandrès. Ès ou ka sonjé sa ?

16. Poukwa nou ka montré frè é sè an nou kè nou enmé-yo é poukwa nou ka aji épi tandrès èvè yo ?

¹⁶ Sonjé tout bon biten sa ka pòté lè nou enmé frè é sè an nou é lè nou ka aji èvè tandrès épi yo. Nou ka rékonfòwté frè é sè an nou lè yo ka jwenn pwoblèm. Nou ka édé frè é sè an nou sèvi Jéova èvè tchè-kontan é lasanblé-la ka vin pi soudé. Sa ka montré osi kè nou sé disip a Jézi é sa ka ba moun ki sensè anvi konnèt Jéova. Men on biten ki pi enpòwtan ankò sé kè sa ka ba Jéova glwa, li ki sé « Papa-la ki ka pran penn an nou èvè tandrès é Dyé a tout konsolasyon-la » (2 Kor. 1:3). Fò-nou byen désidé a montré frè é sè an nou kè nou enmé-yo é fò-nou fè éfò pou nou kontinyé enmé-yo pi fò ankò !