1. Kisa ki ka montré ki i pa gen bokou lanmou annan fanmi-ya jòdla ?

LABIB-A di ki, annan dèrnyé jou-ya, moun-yan « pa té ké kontan yé fanmi » (2 Tim. 3:1, 3). Nou ka wè sa profési-a ka fèt jòdla. Parèkzanp, annan roun patché fanmi yé bonbon boulé paské papa ké manman-an divòrsé é timoun-yan ka santi kousidiré yé pa kontan yé. Menm lò fanmi-a ka rété annan menm kaz-a, a kousidiré yé pa konnèt yé konpanyen. Parèkzanp roun èspésyalis ki ka idé fanmi-ya ka di : « Annan kaz-a, manman, papa ké timoun, yé chak ka pran yé bò. É yé ka pasé tout yé tan asou yé pòrtab, yé tablèt yé òrdinatèr ouben ka jwé jévidéyo. Menm si yé ka viv annan menm kaz-a, yé pa byen konnèt yé konpanyen *. »

2-3. a) Dapré Romains 12:10, kimoun nou divèt kontan ké tout nou tchò ? b) Kisa nou ké wè annan sa artik-a ?

² Annan sa monn-an, moun-yan pa gen lanmou é nou pa lé yé détenn anlè nou (Rom. 12:2). Nou pito lé anprann gen plis lanmou pou nou fanmi mé osi pou nou frè ké sò-ya annan asanblé-a (li Romains 12:10). Kisa sa lé di « kontan ké tout nou tchò » ? A sa lanmou-a moun-yan annan roun fanmi ka santi lò yé pròch ké yé konpanyen é lò yé ka santi yé byen ansanm. A sa kalité lanmou-a nou divèt gen pou nou frè ké sò-ya annan asanblé-a. Lò nou kontan nou konpanyen ké tout nou tchò, nou ka idé tout moun adoré Jéova ansanm ké tchò kontan (Mich. 2:12).

³ Pou idé nou gen sa kalité lanmou-a, annou wè kisa plizyèr èkzanp annan Labib-a ka anprann nou.

4. Kouman Jacques 5:11 ka idé nou konprann fòrs lanmou Jéova gen pou nou ?

⁴ Labib-a ka palé nou di tout bèl kalité Jéova gen. Parèkzanp i ka di nou ki « Bondjé sa lanmou » (1 Jean 4:8). Lò nou savé sa, sa ka bay nou anvi divini so zanmi. Mé Labib-a ka di nou osi ki Jéova « kontan nou ké tout so tchò » (li Jacques 5:11). Men roun bèl fason pou di kouman Jéova kontan nou !

5. Kouman Jéova ka montré so mizérikòrd, é kouman nou pouvé imité li ?

⁵ Jacques 5:11 ka di ki lanmou Jéova ka maché ansanm ké rounòt kalité ki ka fè nou anvi divini pi pròch ké li : so mizérikòrd (Ex. 34:6). Jéova ka montré nou so mizérikòrd lò i ka pardonnen nou lò nou ka fè bagaj ki pa bon (Ps. 51:1). Annan Labib-a, mizérikòrd-a, a plis ki pardonnen. Mizérikòrd-a, a roun bagaj ki fò menm roun moun ka santi annan so tchò lò i ka wè roun moun anba dlo. Sa ka bay li anvi idé l’. Jéova ka di ki sa anvi i gen idé nou-a pi fò pasé sa roun manman ka santi pou so pitit (Is. 49:15). Lò nou anba dlo, mizérikòrd Jéova gen-an ka fè li idé nou (Ps. 37:39 ; 1 Cor. 10:13). Nou pouvé montré nou mizérikòrd pou nou frè ké sò-ya lò nou ka pardonnen yé é lò nou pa ka tchenbé yé asou nou tchò lò yé ka fè bagaj ki ka nèrvé nou (Éph. 4:32). I gen rounòt bagaj enpòrtan nou divèt fè pou montré nou mizérikòrd. A idé nou frè ké sò-ya lò yé ka jwenn problèm. Lò lanmou ka fè nou aji ké mizérikòrd, nou ka imité Jéova ki kontan nou ké tout so tchò (Éph. 5:1).

6. Kouman David ké Jonatan montré yé té kontan yé konpanyen ké tout yé tchò ?

⁶ Labib-a ka rakonté istwè plizyèr moun ki pa té parfè ki montré yé té kontan yé konpanyen ké tout yé tchò.  Annou wè èkzanp Jonatan ké David. Labib-a ka di : ‘Jonatan koumansé kontan David kou li menm, é yé divini bon zanmi menm’ (1 Sam. 18:1). Jéova té chwazi David pou i divini rwa apré Sayil. Apré sa, Sayil koumansé jalou David é i chaché tchwé l’. Mé Jonatan pa bay so papa lanmen annan sa konplo-a. Jonatan ké David promèt toujou idé yé konpanyen é rété zanmi (1 Sam. 20:42).

7. Kisa ki té pouvé anpéché Jonatan ké David divini zanmi ?

⁷ Lò nou ka wè kouman Jonatan ké David té bon zanmi menm, nou ka rété ababa paské i té gen roun patché bagaj ki té pouvé anpéché yé divini zanmi. Parèkzanp, Jonatan té gran 30 lannen pasé David. Jonatan té pouvé pansé ki i pa té ké pouvé divini zanmi ké roun tiboug konsa ki pa té gen pyès èspéryans é ki té pi jenn pasé l’. Mé a pa konsa Jonatan té ka wè David, i té ka rèspèkté l’.

8. Dapré to, poukisa Jonatan té bon zanmi konsa ké David ?

⁸ Jonatan té pouvé jalou David. Kou a té pitit rwa Sayil, i té pouvé ensisté pou i té divini rwa apré so papa (1 Sam. 20:31). Mé Jonatan pa té ka krè so kò é i té fidèl douvan Jéova. Donk lò Jéova chwazi David pou i divini rwa, i asèpté sa désizyon-an ké tout so tchò. I pa lagé David, menm si so papa té kòlè dèyè li pou sa (1 Sam. 20:32-34).

9. Kouman nou savé ki Jonatan pa té jalou David ?

⁹ Jonatan té kontan David ké tout so tchò, donk i pa té jalou l’. Jonatan té sa roun dòkò annan zafè tiré flèch é i té sa roun sòlda ki té vayan menm. Moun-yan té ka di ki li ké so papa Sayil té ka alé « pi vit pasé èg-ya » é té « fò pasé lyon-yan » (2 Sam. 1:22, 23). Donk Jonatan té pouvé gonflé so lèstomak parapòrta tout sa bèl bagaj-ya i té rivé fè. Mé Jonatan pa éséyé fè pi byen ki David é i pa té jalou tout bèl bagaj David té ka rivé fè. I pito té ka admiré David pas i té gen kouraj é i té ka fè Jéova konfyans. Pou byen di, a lò David tchwé Golyat ki Jonatan koumansé kontan l’ kou li menm. Kouman nou pouvé montré sa kalité lanmou-a pou nou frè ké sò-ya ?

10. ‘Gen roun lanmou ki fò roun pou ròt ké tout nou tchò’, kisa sa lé di ?

¹⁰ Labib-a ka di nou ‘gen roun lanmou ki fò roun pou ròt ké tout nou tchò’ (1 Pierre 1:22). Jéova ka montré nou kouman pou nou fè sa. So lanmou tèlman fò ki, si nou fidèl, i pa ké jen arété kontan nou (Rom. 8:38, 39). Mo grèk-a yé ka sèrvi pou di « fò » ka fè nou sonjé roun moun ki ka fè bokou éfòr pou montré so lanmou. Détan, sa pa fasil pou nou kontan nou frè ké sò-ya. Kisa pou nou fè lò roun moun ka nèrvé nou ? Nou divèt kontinyé ‘sipòrté nou konpanyen ké lanmou’ é ‘kou lèspri sen-an mété nou ansanm, annou kontinyé fè tousa nou pouvé pou nou kontinyé viv byen ansanm annan lapè’ (Éph. 4:1-3). Si nou ka fè tousa nou pouvé pou kontinyé viv byen ansanm annan lapè ké nou frè ké sò-ya, nou pa ké rété asou yé défo. Nou ké fè tousa nou pouvé pou wè yé kou Jéova ka wè yé (1 Sam. 16:7 ; Ps. 130:3).

11. Poukisa détan sa pouvé rèd pou nou kontan nou konpanyen ké tout nou tchò ?

 ¹¹ Détan sa pa fasil pou nou kontan nou frè ké sò-ya ké tout nou tchò, èspésyalman lò nou savé ki défo yé gen. Aparaman, roun ran krétyen 1^é syèk-a té gen sa problèm-an. Parèkzanp, dapré sa nou ka wè, Évodi ké Sentich pa té gen pyès problèm pou travay ansanm ké Pòl « pou bon nouvèl-a ». Mé nou pa vréman savé poukisa yé toulédé pa té ka rivé tonbé dakò. A pou sa Pòl doumandé yé pou yé « tonbé dakò annan Sényèr-a » (Phil. 4:2, 3).

12. Kisa nou pouvé fè pou nou rivé kontan nou frè ké sò-ya ké tout nou tchò ?

¹² Kouman jòdla nou pouvé rivé kontan nou frè ké sò-ya ké tout nou tchò ? A pou nou anprann konnèt nou frè ké sò-ya pi byen, konsa sa ké pi fasil pou nou konprann yé. Nou pouvé divini zanmi ké yé menm si yé pi gran ouben pi jenn pasé nou, ouben si yé pa gen menm kiltir ké nou. Sonjé ki Jonatan té gran 30 lannen pasé David, mé i divini bon zanmi ké li. Ès i gen annan to asanblé roun moun ki pi gran ouben pi piti pasé to é ki pouvé divini to zanmi ? Si to ka divini zanmi ké sa moun-an to ka montré ki to ‘kontan tout frè ké sò-ya’ (1 Pierre 2:17).

13. Poukisa sa nòrmal si nou pa pròch ké tout moun annan asanblé-a ?

¹³ Lò nou ka di ki nou divèt kontan nou frè ké sò-ya ké tout nou tchò, ès sa lé di ki nou divèt pròch ké yé tout annan asanblé-a ? Non, sa pa posib. Sa nòrmal si nou pi pròch ké roun ran moun pasé rounòt paské yé kontan menm bagaj ké nou. Jézi té ka wè tout so apot-ya kou so « zanmi », mé i té vréman pi pròch ké Jan (Jean 13:23 ; 15:15 ; 20:2). Mé a pa pou sa i trété Jan pi byen pasé ròt apot-ya. Parèkzanp, lò Jan ké Jak doumandé li pou i bay yé roun plas enpòrtan annan rwayonm Bondjé-a, i réponn yé : « A  pa mo pou désidé kimoun ki ké asiz òbò mo a mo drèt ouben a mo goch » (Marc 10:35-40). Kou Jézi, nou pa divèt trété nou zanmi pi byen pasé ròt-ya (Jacq. 2:3, 4). Si nou ka fè sa, nou pa ka idé asanblé-a rété annan lapè (Jude 17-19).

14. Kouman Philippiens 2:3 pouvé idé nou pa chaché fè pi byen pasé ròt-ya ?

¹⁴ Lò nou kontan nou frè ké sò-ya ké tout nou tchò, nou pa ka chaché fè pi byen pasé yé. Sonjé ki Jonatan pa té jalou David é ki i pa éséyé divini rwa a so plas. Nou tout, nou pouvé fè kou Jonatan. A pa pou nou jalou nou frè ké sò-ya paské yé konnèt fè sèrten bagaj. Mé ké imilité, a pou nou wè ròt-ya ‘kou moun ki pi fò pasé nou’ (li Philippiens 2:3). Sonjé ki tout moun pouvé fè roun bagaj pou idé asanblé-a. Si nou ka kontinyé fè nou kò toupiti, nou ké pouvé wè bèl kalité nou frè ké sò-ya gen é nou ké pouvé imité yé fidélité (1 Cor. 12:21-25).

15. Kisa sa ki rivé Tanya ké so timoun ka anprann to ?

¹⁵ Lò roun mové bagaj ka rivé nou, Jéova ka sèrvi nou frè ké sò-ya ki kontan nou ké tout yé tchò pou soulajé nou é pou idé nou. Gadé sa ki rivé roun manman ké so trwa pitit ki té alé annan asanblé entèrnasyonal 2019 « Lanmou pa janmen ka disparèt » Ozétazini. A té apré program sanmdi aprémidi-a. Men sa Tanya, manman-an, ka di : « Nou té ka roulé pou routounen annan nou lotèl lò roun loto rantré anlè nou. Pyès moun pa té blésé mé nou té tou stoubi,  nou soti annan loto-a é nou rété dibout asou larout-a. Roun moun òbò larout-a di nou vini annan so loto, pou anyen pa rivé nou. A té roun frè ki té fin soti annan asanblé-a osi. É a pa li rounso ki idé nou. Senk frè ké sò ki té ka vini di Swèd arété osi pou idé nou. Sò-ya kroké mo ké mo tifi. A sa menm nou té bézwen pou nou santi nou kò pi byen. Mo di yé ki tout bagaj té ké alé byen é ki yé té pouvé alé, mé yé pa té lé lésé nou. Yé rété ké nou jistan ponpyé-ya rivé é yé byen gadé si nou té gen tousa nou té bézwen. Pannan sa moman difisil-a, nou santi lanmou Jéova. Sa ki rivé nou sa jou-a fè nou lanmou pou nou frè ké sò-ya vin pi fò é sa fè nou lanmou ké nou rékonésans pou Jéova vin pi fò osi. » Ès to ka sonjé roun jou to té bézwen roun moun idé to é roun frè ouben roun sò montré to ki i té kontan to ké tout so tchò ?

16. Poukisa nou divèt kontan nou konpanyen ké tout nou tchò ?

¹⁶ Sonjé tout bèl bagaj ki ka rivé lò nou kontan nou frè ké sò-ya ké tout nou tchò. Nou ka konsolé yé lò yé ka jwenn problèm. Nou ka idé yé adoré Jéova ansanm ké tchò kontan. Nou ka montré ki nou sa disip Jézi é sa ka bay sa-ya ki sensèr anvi adoré Jéova. É pi enpòrtan-an, nou ka bay « Papa ki ka fè mizérikòrd, Bondjé tout konsolasyon-an », Jéova, lònò (2 Cor. 1:3). Annou tout byen désidé montré nou kontan nou konpanyen ké tout nou tchò !