1. Aiz zaitea familimnim moipas na mhunn koxem kolltta?

NIMANNEA disamnim munxam “moipas naslolim” zatolim mhunn Bible-ant adinch sanglolem. (2 Tim. 3:1, 3) Hi bhasaunni purnn zata ti ami polloitat. Udharonnak aiz lak’khamnim ghov-bailam divors ghetat ani eka-mekacher ragar astat. Ani tanchea bhurgeank, aplo konnuch mog korina oxem dista. Thodde pavtti ekach ghorant ravon pasun, familichea sodoxiam modem ek ghott natem asona. Kuttumbank sol’lo diupi eklo oso mhunntta: “Avoi, bapui ani bhurgim eka-meka sangata vell sarinant. Karonn tim computer, tablet ani smart fon uzar korun, toxench viddeo gami khellon aplo vell sartat. Tim ekach ghorant ravtat hem khorem, punn tim eka-mekak sarkim vollkhonant.”

2-3. (a) Romkarank 12:10 pormonnem, amkam konna pasot opurbai asonk zai? (b) Hea lekhant ami kitem xiktolim?

² Aiz sonvsarantlo zaito lok mog korina, ani amkam tanchea bhaxen zaunk naka. (Rom. 12:2) Tachea bodlek, ami amchea familichea sodoxianchi ani sobhentlea bhav-bhoinnanchi opurbai asonk zai. (Romkarank 12:10 vachat.) Opurbai mhunnttlear kitem? Hem utor familichea sodoxiam modem aslolea natea vixim sangonk uzar kortat. Osloch mog ami sobhentlea bhav-bhoinnancho pasun korunk zai. Ami eka-mekachi opurbai kelear sobhent ekvottkai samballunk modot kortolim. Hea toren ami Jehovachi seva korunk pavtolim.—Mik. 2:12.

³ Ami eka-mekachi opurbai korunk ani ho gunn vaddounk Bible-antlea thoddea udharonnantlean kitem xikonk zata tem polloum-ia.

4. Jehova amcho kitlo mog korta, tem amkam Jakob 5:11-ntlean koxem kolltta?

⁴ Bible-ant amkam Jehovachea sobit gunnam vixim sanglam. Udharonnak, “Dev mhollear moguch” mhunn Bible sangta. (1 Juanv 4:8) Hem zannam zalolean ami Jehovache ixtt zaunk sodhtat. Punn Jehova “maiemogacho” mhunn pasun Bible sangta. (Jakob 5:11 vachat.) Hea utrantlean Jehova amcho kitlo mog korta, tem amkam kollon ieta!

5. Jehova doia koxi dakhoita, ani ami tachi dekh koxi gheunk zata?

⁵ Jakob 5:11-ant Jehova lagim amkam voddun vhorta toslea anik eka gunnam vixim sanglam. To mhunnttlear konnvollai vo doiallai. (Sutt. 34:6) Jehova amcheo chuki bhogxita tednam to amkam doia dakhoita. (St. 51:1) Doia mhunnttlear, ami dusreancheo chuki bhogsovop titlech nhoi mhunn Bible dakhoita. Punn tachea bhair, konn trasant asa tednam taka vo tika polloun modot korunk upzotat tim bhavnam pasun tantunt mellon asa. Amkam modot korunk Jehovak asat tim bhavnam eka avoik aplea bhurgea pasot asta tea bhavnam poros chodd asa mhunn to sangta. (Iz. 49:15) Jehovak doia asa dekhun, ami trasant astat tednam to amkam modot korta. (St. 37:39; 1 Kor. 10:13) Amchim bhav-bhoinnam amkam dukhoitat tednam ami tanchea add rag dhorchea bodlek, tankam bhogxitat. Hea toren ami tankam doia dakhoitat. (Ef. 4:32) Punn doia dakhounchi mukhel vatt mhunnttlear, amchim bhav-bhoinnam trasant astat tednam tanchi modot korop. Ami dusreancho mog kortat dekhun ami tankam mog dakhoitat tednam ami Jehovachi dekh ghetat, zo sogleam-von chodd dusreanchi opurbai korta.—Ef. 5:1.

6. Jonathan ani David-a modem ixttagot koxi asli? Somzaiat.

⁶ Oporipurnn munxamnim eka-mekachi opurbai kel’lea vixim amkam Bible-ant vachunk melltta. Atam ami Jonathan ani David-achem udharonn polloum-ia. Bible  oxem sangta: “Jonathan, Sauluchea putak David khub avoddlo. Itlo avoddlo ki, aplea jiva poros to tacho chodd mog korunk laglo.” (1 Sam. 18:1) Sauluchea zagear David-ak raza mhunn nemlolo. Uprant, Sauluk Davidachi nattkai zali, ani to taka marunk sodhtalo. Punn hem korunk Jonathan-an aplea bapaik sangat diunk na. Apli ixttagot sodanch samballttole ani tenko ditole mhunn Jonathan-an ani David-an eka-mekak soput dilolo.—1 Sam. 20:42.

7. Jonathan ani Davidachi ixttagot zaina zaunk khoinchem ek karonn aslem?

⁷ Jonathan ani Davidachi ixttagot polloitana amkam ojap zata. Karonn tanchea modem ixttagot zaina zaunk zaitim karonnam aslim. Udharonnak, Jonathan, Davida poros 30 vorsam vhodd aslo. David aplea poros khub lhan asa, ani taka titlo onnbhov na, oxem Jonathan chintunk xoktalo. Punn Jonathan-an toxem chintchea bodlek Davidak khub resped dilo.

8. Jonathan Davidacho ek boro ixtt aslo mhunn ami koxim zannant?

⁸ Jonathan-ak Davidachi nattkai zaunk xoktali. To Saulu Razacho put aslolean, tachea fattlean apunn raza zaunk to proitn korunk xoktalo. (1 Sam. 20:31) Punn Jonathan khalto ani Jehovak visvaxi aslo. Tor tannem Jehovan vinchun kaddlolea razak, mhunnche Davidak, aplo purnn tenko dilo. Tacho bapui tacher ragar zalo, tori astana to Davidak visvaxi ravlo.—1 Sam. 20:32-34.

9. Jonathan-ak Davidachi nattkai nasli mhunn ami kiteak sangonk xoktat? Somzaiat.

⁹ Jonathan-ak Davidachi opurbai asli. Taka lagon, taka tachi nattkai zaunk na. Jonathan-ak bann uzar korchi bori kola asli, ani to zaitim zhuzam zhuzlolo. To ani tacho bapui “ghonni-von suddsuddit ani xinvam poros bollixtt” asle mhunn lok sangtale. (2 Sam. 1:22, 23) Tor aplea dhirvont kamam vixim to boddai marunk xoktalo. Punn tannem apunn Davida poros boro asa mhunn dakhouncho proitn korunk na. Vo Davidan kel’lea borea kamanchi taka nattkai zaunk na. Tachea bodlek, Jonathan-an Davidachea dhirachi ani taka Jehovacher asa tea visvasachi tokhnnai keli. Khorem mhunnttlear, David-an Goliatak jivexim marlea uprant Jonathan Davidacho khub mog korunk laglo. Teach bhaxen, ami amchea bhav-bhoinnanchi opurbai koxi korunk zata?

10. ‘Sogllea kallzan eka-mekacho mog korop’ mhunnttlear kitem?

¹⁰ “Sogllea kallzan ekamekacho mog korat” mhunn Bible sangta. (1 Ped. 1:22) Hea vixim Jehovan amkam bori dekh dovorlea. To amcho itlo mog korta, ki ami taka visvaxi ravlear to amcho mog korop kednanch bond korcho na. (Rom. 8:38, 39) “Sogllea kallzan,” hea utrank uzar kelolea Grek utracho orth, mog dakhounk khub vavr korop. Thodde pavtti, amchea bhav-bhoinnank mog dakhounk khub kotthin zaunk xokta. Dusrim amkam rag haddttat tednam ami ‘ekamekak mogan sosunk zai; ani Devachea Atmean amche modem ekvott rochun haddla, tor amkam ektthaim dovorta ti xanti samballunk zata titlem korunk zai.’ (Ef. 4:1-3) Amkam ‘ektthaim dovorta ti xanti’ samballunk ami vavr kortat tednam ami amchea bhav-bhoinnanchea chukincher dhean diunchimnant. Tachea bodlek, Jehova amchea bhav-bhoinnank koso lekhta, tea bhaxen ami-i tankam lekhtolim.—1 Sam. 16:7; St. 130:3.

11. Eka-meka sangata opurbaien vagop thodde pavtti kiteak kotthin zaunk xokta?

¹¹ Amchea bhav-bhoinnacheo chuki ami zannam astat tednam, tanchea sangata opurbaien vagop amkam kotthin zaunk puro. Poilea xekddeantlea Kristanvank pasun hi ek  oddchonn asli astoli. Udahoronnak, Euodie-k ani Sintike-k ‘[Paulu] vangdda Xubhvortoman porgottunk’ kotthin zaunk na astolem. Punn tankam khoinchea eka karonnak lagon, eka-meka sangata kam korunk kotthin zalem astolem. Taka lagon “Somia sovem tim eka monachim” zaunk, Paulun tankam urba dili.—Filp. 4:2, 3.

12. Ami amchea bhav-bhoinnam sangata opurbaien koxim vagonk xoktat?

¹² Aiz ami amchea bhav-bhoinnam sangata opurbaien koxim vagonk zata? Ami amchea bhav-bhoinnank bore toren vollkhotat tednam, tankam somzon gheunk ani tanchea sangata opurbaien vagonk amkam sompem zatolem. Tim amchea poros piraien vhodd vo lhan asat zalear pasun, vo vegllea sonskrutaiechi asat zalear pasun ami tanchi ixtt zaunk xoktat. Jonathan Davida poros 30 vorsam vhodd aslo. Tori astana, tanchea modem ghott ixttagot asli. Teach bhaxen, tumchea sobhent, tumchea-von vhodd vo lhan piraiechi asat tanchea sangata tumi ixttagot korunk xoktat kai? Oxem kortat zalear, tumi ‘tumchea bhav-bhoinnancho mog korunk’ pavtoleat.—1 Ped. 2:17.

13. Sobhentlea dor eklea sangata amchi ixttagot ghoddie ek sarki kiteak aschi na?

¹³ Sobhentlea sogleam sangata opurbaien vagop hacho orth, dor eklea sangata amchi ixttagot ek sarkich asonk zai oso kai? Na, toxem zaunk xokona. Karonn amkam kitem avoddtta tench zankam avoddtta, tosleam bhav-bhoinnam lagim ami chodd lagim sortat. Ani hem chukichem nhoi. Karonn Jezun aplea soglea apostlank “ixtt” mhunnttle. Punn to Juanvacho chodd mog kortalo. (Juanv 13:23; 15:15; 20:2) Tori astana Jezu aplea soglea apostlam sangata ek sarkoch vaglo. Zoxem, jednam Juanv ani tacho bhav Jakob-an Devachea Rajeant apleak vhodd podvi di mhunn Jezu lagim maglem tednam, tannem mhunnttlem: “Mhojea uzvea vo davea hatak bosunk diunk Mhojea hatant na.” (Marku 10:35-40) Tor ami pasun Jezu bhaxen sogleam lagim ek sarkench vagonk zai. (Jak. 2:3, 4) Ami oxem kortat tednam sobhent xanti dovrunk pavtolim.—Judas 17-19.

14. Filipkarank 2:3-ant sanglolea pormonnem, ami dusream poros borim mhunn dakhouncho sobhav pois korunk amkam kitem modot korunk xokta?

 ¹⁴ Ami eka-mekachi opurbai kortat tednam ami dusream poros borim mhunn dakhouncho proitn korchimnant. Ugddas korat, Jonathan-an David-a poros boro zauncho proitn korunk na. Karonn, to Davidachea zagear apunn raza zaunk sodhinaslo. Ami soglim, Jonathan-achi dekh gheunk xoktat. Amchea bhav-bhoinnachi tank polloun, nattkai korchea bodlek “khalteponnan dusrim amche-von vortim” mhonn lekhunk zai. (Filipkarank 2:3 vachat.) Sobhentlim dor eklim valorachi asat mhunn ami ugddas dovrunk zai. Ami khaltim asat zalear, ami amchea bhav-bhoinnachea borea gunnancher dhean ditolim. Ani tanchea borea udharonnam thaun ami xikonk pavtolim.—1 Kor. 12:21-25.

15. Tanya-chea onnbhovantlean tumi kitem xiktat?

¹⁵ Amchea jivitant kitem-i vaitt ghoddtta tednam Jehova amchea bhav-bhoinnam udexim amkam buzvonn dita. Tim amchea sangata opurbaien vagtat ani amkam modot kortat. 2019 hea vorsa, United States-ant zal’lea eka ontoraxttria odhivexona vellar kitem zalem tem polloum-ia. Tea odhivexonacho vixoi “Pritimog Kodinch Sompona!” zaun aslo. Sonvarachi kariavoll somplea uprant, Tanya ani aplea tin bhurgeam sangata kitem ghoddlem, tea vixim ti sangta: “Ami gaddient boson odhivexona thaun porot hotel-ant voitalim tednam ekttean apli ghaddi amchea gaddier marli. Amkam konnakuch kainch zaunk na. Punn ami samkim bhielim. Ami gaddientlean bhair sorlim, ani rostea kuxik ubim ravlim. Tednam rosteachea dusrea vatten konn tori amkam hat dakhoun apoitalo  tem ami polloilem. To amcho bhav aslo, ani to pasun odhivexon zaun porot voitalo. To ekttoch nhoi, punn amkam polloun anik panch bhav-bhoinnam ravlim. Tim Sweden desa thaun odhivexonak ailolim. Tannim mhaka ani mhojea dhuvek ghott veng marli! Amkam khub borem dislem. Amkam kainch zaunk na, ani atam tumi vochonk zata mhunn ami tankam sanglem. Tori astana, ambulance ieun dotor amkam polloita tea poriant amkam zai tem soglem asa mhunn khatri korunk tim amchea sangatach ravlim. Tea vellar Jehova amcho kitlo mog korta, tem ami polloilem. Tor hea ghoddnne uprant, Jehova pasot ani bhav-bhoinnam pasot amcho mog ani upkariponn anik vaddlem. Tumkam kotthin poristhitincho fuddo korcho poddlo tednam tumchea bhav-bhoinnamnim tumchi opurbai kel’li tumkam ugddas asa kai?

16. Eka-mekachi opurbai kelolean kosle faide asat?

¹⁶ Ami dusreanchi opurbai kortat tednam kitem borem faide zatat tea vixim chintat. Kotthin vellar, bhav-bhoinnank amchea thaun buzvonn melltta. Tankam ekvottan ani khuxalkaien Jehovachi seva korunk modot zata. Promannik lok, ami Jezuche khore xis mhunn polloitat tednam, tankam pasun khori bhokti korunk urba melltta. Ani sogleant mhotvachem mhunnttlear, “sodanch doiall Bapui ani sogllea amchea gorzamnim amkam dhir-diupi,” Jehovak vakhann’nni melltta. (2 Kor. 1:3) Tor opurbai ho gunn vaddounk ani sodanch dakhounk ami ghott nichov korum-ia!