1. ¿Jamüsü watüjaaka saaʼu eein wayuu eekai maalin apüla wayuu maaʼulu?

SAASHIN tü Wiwüliakat, sülüʼütpa maʼin sükalia süpüla sajaʼttüin tü kasakalüirua «eejeerü wainma wayuu eekai maalin wayuu napüla» (2 Tim. 3:1, 3). Ekeraajüsü tia maaʼulu. Wainma na wayuu ooʼulaakana suulia naʼwayuuse, eeshii na mojujiraakana sümaa naʼwayuuse jee müshiʼiya na tepichikana maaliinsalii naya apülawaa saaʼin namüin. Eetaashii na kepiajiraakana sümaa müin naatajanakai naaʼin. Anuu nünüiki wanee wayuu süpüʼüya tü alatakat nümüin wanee wayuu sümaa nüpüshi: «Nnojolitchipa yootiraain wanee wayuu sümaa nuʼwayuuse jee namaa nachonnii, shia naaʼinmaaka maʼin tü computadorkot, tü tabletakat, serulaat jee ashaitaa videojuego. Mayaainjeʼe kepiajiraain naya, nnojotsü neʼraajiraain nakuwaʼipa».

2, 3. (1) ¿Jaralii na alinjanakana wapüla saashin Roma 12:10? (2) ¿Kasa wekirajaajeetka anain sünain ekirajaayakat tüü?

² Nnojotsü meein wakuwaʼipa maʼaka naaʼin na manoujainsaliikana maalin wayuu napüla (Roma 12:2). Wachajaainjatü sukuwaʼipa süpüla alinjanain wapüla na wapüshikana otta na wawalayuu anoujiraakana wanaa wamaa (paashajeʼera Roma 12:10). ¿Kasa aküjüneeka süka tü pütchikat griego «aijiraale jia»? Shia aküjüneeka achiki naalin na wapüshikana wapüla, na aleewakana amaa waya. Müinjatia naalin wapüla na wawalayuukana maʼaka naalin na wapüshikana wapüla, jama wapüshinnapain naya saaʼu anoujaa. Aijiraale waya akaalinjiraweena waya süpüla paaʼinwain waya sünain aʼyatawaa nümüin Jeʼwaa (Miq. 2:12).

 ³ Sünain ekirajaayakat tüü, wekirajaajeerü achiki nakuwaʼipa waneinnua wayuu ashajünakana achiki suluʼu tü Wiwüliakat. Sükaalinjeena waya tia süpüla aijiraainjanain waya.

4. ¿Jamüsü sünüiki Santiago 5:11 süpüla watüjaain saaʼu alin waya nüpüla Jeʼwaa?

⁴ Süküjain wamüin tü Wiwüliakat anain maʼin nukuwaʼipa Jeʼwaa. Süküjain wamüin alin maʼin waya nüpüla Jeʼwaa (1 Juan 4:8). Arütkaashii maʼin waya nünainmüin sutuma tia. Saashin tü Wiwüliakat aipürai maʼin Jeʼwaa (paashajeʼera Santiago 5:11, TNM). * Anakatche maʼin tü aküjünakat nüchiki Jeʼwaa.

5. ¿Kasa naaʼinraka Jeʼwaa sükajee sümülialaain naaʼin waalin otta kasa waaʼinrajatka süpüla washatüin nukuwaʼipa?

⁵ Saashin Santiago 5:11, aipürai maʼin Jeʼwaa sümaa nümüliajülin wayuu (Éx. 34:6). Wayaawata aaʼu nümüliajülin Jeʼwaa sünainjee motuin naaʼin waainjala (Sal. 51:1). Saashin tü Wiwüliakat nümüliajüire wanee wayuu, nnojotsü shiain neʼe motuin naaʼin naainjala na waneinnua. Antüsü suluʼumüin naaʼin nükaalinjeein na wayuu müliakana niʼrüin. Saashin tü Wiwüliakat, alanaʼaleesia nükaalinjeein maʼin waya Jeʼwaa suulialeʼeya sükaalinjeein maʼin süchon wanee wayuu (Is. 49:15). Wanaa sümaa weʼrüin müliaa, nükaalinjain waya Jeʼwaa süka sümülialaain naaʼin waalin (Sal. 37:39; 1 Cor. 10:13). Eesü süpüla washatüin nümüliajülin Jeʼwaa motule waaʼin naainjala na wawalayuukana otta nnojorüle üttakuʼu sümüin waaʼin naaʼinrüle wanee kasa airuʼutka wamüin (Éf. 4:32). Wamüliajeena na wawalayuukana wakaalinjale naya soʼu neʼrüin müliaa. Waaʼinrüle tia, washatüin nukuwaʼipa Jeʼwaa chi aipüraikai maʼin (Éf. 5:1).

6. ¿Jamüsü watüjaaka saaʼu aijiraain maʼin Jonatán nümaa David?

⁶ Ashajünüsü suluʼu tü Wiwüliakat nachiki  waneinnua wayuu aijiraakana maʼin maʼaka naaʼin Jonatán nümaa David. Saashin tü Wiwüliakat «aleewashi maʼin Jonatán nümaa David otta aishi maʼin David nüpüla Jonatán maʼaka alin nia nüpülajiraa» (1 Sam. 18:1). Aneekünüshi David nutuma Jeʼwaa süpüla nuluwataainjachin nüchikumüin Saúl chi nüshikai Jonatán. Achunjasü naaʼin Saúl naaʼu David otta jashichishi maʼin nia, nuʼutataaichijee aaʼin David. Nnojotpejeʼe wanaawain naaʼin Jonatán nümaa chi nüshikai sünain oʼutaa naaʼin David. Naapüin nünüiki Jonatán nümüin David aleewainjanain naya waneepia otta nakaalinjiraainjanain (1 Sam. 20:42).

7. ¿Kasa eeka süpüla nnojoluin aleewain atuma Jonatán nümaa David?

⁷ Aleewashi maʼin Jonatán nümaa David mayaainjeʼe wainmain tü kasa eekat süpüla nnojoluin aleewajiraain atuma naya. Jamüshijaʼa Jonatán laülaa nuulia David, eesü maʼaka 30 juya nülüʼüjain nüpüleerua David. Eesüjaʼa süpüla jülüjain naaʼin Jonatán jintülin neʼe David jee nnojoluin kasain nütüjaain aaʼu. Nnojotpejeʼe jülüjain naaʼin Jonatán tia, kojutushi David nümüin.

8. Püküja jamüin aleewaka maʼin Jonatán nümaa David.

⁸ Jee müsia, achunjasüjeʼe naaʼin Jonatán naaʼu David, jülüjasüjeʼe naaʼin niainjachin aluwataain nüchikumüin Saúl, jama nüshin nia (1 Sam. 20:31). Nnojotpejeʼe naaʼinrüin Jonatán tia, anashiisü nümüin Jonatán tü nüneekakat Jeʼwaa jee waneepiashi nia nümaa. Nücheka achikit Jonatán nüneekünüin David nutuma Jeʼwaa süpüla aluwatawaa. Waneepiashi Jonatán nümaa David mayaainjeʼe jashichin maʼin Saúl sünainjee tia (1 Sam. 20:32-34).

9. ¿Jamüsü watüjaaka saaʼu nnojoluin suchunjain naaʼin Jonatán naaʼu David?

⁹ Nnojotsü achunjain naaʼin Jonatán naaʼu David süka alin nia nüpüla. Eʼinai maʼin Jonatán süka jatü jee yalayala aaʼinchi nia sünain atkawaa. Anuu pütchi nüchiki niakai otta nüchiki chi nüshikai: «Kawatüleshii maʼin naya suulialeʼeya warulapai» otta «katchinreeshiʼiya maʼin naya suulialeʼeya wasashi» (2 Sam. 1:22, 23). Yaletüsüjeʼe maʼin naaʼin Jonatán sükajee wainmain na nüʼünüü nükanajakana. Nnojotpejeʼe naaʼinrüin tia, nnojoishi jashichikuʼu müin nia sünainjee wainmain na nükanajakana David. Kojutushi David nümüin süka yalayalain nia sünain atkawaa jee niʼitaain naaʼin nünain Jeʼwaa. Wanaa sümaa nuʼutunuin aaʼin Goliat nutuma David, aishi David nüpüla Jonatán yalejeechikireʼeya. ¿Kasa waaʼinrajatka süpüla müin naalin na wawalayuukana wapüla?

10. ¿Kasa aküjüneeka sükajee tü pütchikat «alinjanain maʼin wapüla na wawalayuukana süka süpüshuaʼa waaʼin»?

¹⁰ Saashin tü Wiwüliakat, alinjana maʼin wapüla na wawalayuukana süka süpüshuaʼa waaʼin (1 Ped. 1:22, TNM). Naaʼinrüin Jeʼwaa tia wapüleerua. Aishii maʼin waya nüpüla, waneepiale waya nümaa nnojoleerü eein wanee kasa akayaleʼeraka waya nuulia (Roma 8:38, 39). Tü aküjüneekat sükajee tü pütchikat griego «alinjanain maʼin» shia wachajaainjatüin sukuwaʼipa süpüla weeʼiyatüin naalin na wayuukana wapüla. Eesüjaʼa kapüleere wamüin waaʼinrüin tia namüin waneinnua wawalayuu, waaʼinrajatpejeʼe shia. Süküjain wamüin tü Wiwüliakat tü waaʼinrajatkat aire wamüin tü nümakat wamüin wanee wawala, anuu sünüiki: «Jaaʼinra tü anasükat niʼipajee chi juwalakai eekai niʼrülüin wayumüin jümüin, saaʼu alin jia jüpüshua nüpüla chi Maleiwakai. Nnojo jüʼülüjiraain. Nnojo jütkaajiraain. Soto jaaʼin sünain eeichipain chi Naaʼinkai Maleiwa suluʼu jaaʼin, chi akaalinjüinjachikai jia süpüla wanaawajiraainjatüin jaaʼin» (Éf. 4:1-3). Süpüla nnojoliinjanain  waʼülüjiraain jee nnojoliinjanain watkaajiraain, nnojotsü jülüjainjatüin maʼin waaʼin tü kasa mojukat natuma na wawalayuukana, alinjana naya wapüla maʼaka alin naya nüpüla Jeʼwaa (1 Sam. 16:7; Sal. 130:3).

11. ¿Jamüsü kapüleʼewaika wamüin weeʼiyatüin naalin na wawalayuukana wapüla?

¹¹ Eesü kapüleere wamüin weeʼiyatüin naalin na wawalayuukana wapüla, shialeekajaʼa watüjaale saaʼu tü kasa mojukat natuma. Alatapuʼusü tia namüin na anoujashiikana sümaiwa paala. Jamüsüjaʼa Evodia sümaa Síntique, aʼyataajiraapuʼushii naya nümaa Pablo sünain aküjaa pütchi. Kapüleepejeʼe sümüin Evodia anajiraain shia sümaa Síntique. Makalaka nümüin Pablo namüin: «Tachuntüin jümüin süpüla anajiraainjanain jia jüchikua saaʼu saʼaniraaitpain jukuaippa nümaa chi Senyotkai» (Filip. 4:2, 3).

12. ¿Kasa waaʼinrajatka süpüla alinjanain wapüla na wawalayuukana?

¹² ¿Kasa waaʼinrajatka süpüla alinjanain wapüla na wawalayuukana? Weʼraajüinjana maʼin naya. Waaʼinrüle tia, watüjaajeerü aaʼu jamüin maka nakuwaʼipa otta aijeena naya wapüla. Eeshii süpüla aleewain waya namaa na wawalayuukana jaʼitaina laülaayuuin jee tepichijain naya. Soto waaʼin aleewain maʼin Jonatán nümaa David mayaainjeʼe nülüʼüjain 30 juya nüpüleerua. Eeshi süpüla aleewain pia nümaa wanee wawala eekai laülaaichin jee jintülin puulia. Paaʼinrüle tia, aijeena püpüla na wawalayuukana (1 Ped. 2:17).

13. ¿Jamüshii aleewaka maʼin waya namaa waneinnua wawalayuu?

¹³ Aishii wapüla napüshuaʼa na wawalayuukana, eepejeʼe na aleewakana maʼin amaa waya süka anain waaʼin namaa otta wanaawain tü keeʼireekat waaʼin. Müshiijeseʼe aleewain maʼin waya namaa, nnojotpejeʼe mojuin tia. Jamüshijaʼa Jesuu, aleewashi nia namaa napüshuaʼa na aluwataaushikana, aipejeʼe maʼin Juan nüpüla (Juan 13:23; 15:15; 20:2). Mayaainjeʼe müin tia, wanaawasü naalin na aluwataaushikana nüpüla Jesuu. Jamüsüjaʼa wanaa sümaa nuchuntuin Juan otta Santiago nüikaleʼerüinjanain naya naʼatoʼu chaa eeinjachire nuluwataain, anuu nünüiki Jesuu namüin: «Nnojoishi  laülaain taya süpüla taikkaleʼerüinjanain jia tekialuʼujee ooʼulaka tepeʼeruʼujee» (Mar. 10:35-40). Müinjanaʼaya waya maʼaka naaʼin Jesuu, wanaawainjatü naalin na wawalayuukana wapüla (Sant. 2:3, 4). Nnojoleena paaʼinwain na wawalayuukana nnojorüle wanaawain naalin wapüla (Jud. 17-19).

14. Saashin Filipos 2:3, ¿kasa waaʼinrajatka süpüla nnojoluin wayoujireʼerüin wakuwaʼipa namaa na wawalayuukana?

¹⁴ Aire wapüla na wawalayuukana, nnojoleerü wayoujireʼerüin wakuwaʼipa namaa. Soto waaʼin nnojoluin niyoujiraain Jonatán nümaa David jee nnojotsü achunjain naaʼin saaʼu nuluwataainjachin David. Washata nukuwaʼipa, nnojo wayoujiraain namaa na wawalayuukana saaʼujee tü kasa natüjakalü apüleerua. Waaʼinra tü nümakat Pablo, tü makat: «Nnojo yaletayaain jukuaippa suʼupala wayuu. Shia anaka aluʼu kojutule napüshua na juwalayuukana jütüma» (paashajeʼera Filipos 2:3). Soto waaʼin jaloulin napüshuaʼa na wawalayuukana suluʼu tü outkajaaleekat. Nnojorüle yaletüin waaʼin, nnojoleerü jülüjain waaʼin tü kasa mojusü naaʼinrakat, shieerü jülüjaka waaʼin tü kasa anasü naaʼinrakat otta aneerü wakuwaʼipa nanainjee (1 Cor. 12:21-25).

15. ¿Kasa pütüjaka sünainjee tü alatakat sümüin Tanya namaa süchonnii?

¹⁵ Sülatüle kasa mojusü wamüin nümülialüin waya Jeʼwaa jee nükaalinjain waya nakajee na wawalayuukana. Waapa süchiki tü alatakat sümüin tü wawalakat Tanya namaa apünüinshii süchonnii. Chajana naya Estados Unidos sünain tü outkajawaa miyoʼu kanüliakat «Tü aliikalü apüla wayuu, ayateerü choʼujaain waneepia» soʼujatka 2019, tia shia wanee outkajawaa eere nantüin wawalayuu naatakana oumain. Saashin shiakat, süleʼejapa chaa eere sutunküin, asheʼetuusü tü kemion  kalujutkat shia sutuma wane kemion. Anuu sünüiki: «Nnojoishii waya jamajüin, washakataka suluʼujee tia kemionkat, yalaka waya shaʼwatüin suluʼu tü karateetkat, moʼooshii neʼe waya. Nüshaʼwaleeraka neʼejena wanee wayuu jee nuunejaka waya. Nia wane wawala chejeejachi sünain tü outkajawaakat. Shiasaʼa süchikijee tia, nantapaataka jaʼraishii wawalayuu chejeʼewalii Suecia. Nojuupataka taya na wawalayuu jieyuukana jee nojuupatüinya tü tachonkat. Weʼrüin waalin napüla naya wawalayuukana, anasü waaʼin sutuma tia. Mayaainjeʼe waküjain namüin anain waya, makatüshii naya wamaa jaʼitakajeʼe wanaa sümaa nantapaatüin na tottoot eʼrajaainjanakana waya. Jülüjasü naaʼin müleka eere wanee kasa choʼujaaka wamüin. Soʼunnaa tia alatakat wamüin, weʼrüin waalin nüpüla Jeʼwaa otta kooʼomüinsü naalin na wawalayuukana wapüla. Kojutusü wamüin tü naaʼinrakat Jeʼwaa jee kooʼomüinsü naalin wapüla». ¿Sotusüche paaʼin tü naaʼinrakat wanee wawala püpüleerua süpüla nükaalinjain pia?

16. ¿Jamüshii aijiraainjanaka waya namaa na wawalayuukana?

¹⁶ ¿Kasa weʼreetka aijiraale waya namaa na wawalayuukana? Wamülialeerü naaʼin na wawalayuukana wanaa sümaa neʼrüin müliaa otta paaʼinweena waya. Ayaawatüneena waya sünain wayain na nikirajüinkana Jesuu. Sünainjee tia, keeʼireejeerü naaʼin na wayuukana naʼyataain nümüin Jeʼwaa otta müsia waʼwaajeechi Jeʼwaa, chi Washi amüliajakai waya jee akaalinjakai waya (2 Cor. 1:3). Wachajaa maʼin sukuwaʼipa süpüla aijiraain waya namaa na wawalayuukana.