1. ¿Nitre ñan kitera ja tarere ye kukwe meden tä mike gare metre?

NITRE “ñan rabadi ni mda mda tarere jire chi” ye mikani gare Bibliakwe (2 Tim. 3:1, 3). Kukwe ye nemen bare kä nengwane. Ñodre, nitre ja mräkäre kwati yekänti nitre rüne tä ja tuenmetre ye köböite tätre rubun jabe aune monsotre ye ñaka tareta ruin ietre. Ne madakäre, nitre ja mräkäre tätre nüne gwairebe jabe, akwa ja ngwanta ño kwetre jabe yebiti ja ñaka gare ietre bämikata kwetre. Ni iti mäträkä nitre ja mräkärebätä tä niere: “Meye, rün aune monsotre ñaka blite jabe aune tätre kä raire te computadora, tablet, teléfono o videojuego yebätä ja näkwite. Tätre ju arabe te, akwa ja ñaka gare kwin ietre”.

2, 3. a) Romanos 12:10 tä niere erere, ¿nikwe nire nire taredre bökän? b) ¿Dre rabai gare nie kukwe ja tötikara nekänti?

² Nitre ngwarbe kä nebätä ñaka ja tarere kwärikwäri ye reketadrekä nibätä ye ni ñaka tö (Rom. 12:2). Nikwe ñaka ni mräkätre nikwe aibe taredre, ñakare aune ja mräkätre konkrekasionte taredre bökän arato (ñäkädre Romanos 12:10 yebätä). ¿Ja tareta bökän ye abokän ño? Ja tare ye ni tä ja mräkäre töi mike ja kete kwin jabe kwärikwäri. Ye erere ja töi mikadre ja mräkätre konkrekasionte ye kräke ñobätä ñan aune niaratre ni mräkätre ja üairebiti. Nikwe ja tare bökän bämikai ngwane, ni täi ja dimike kwärikwäri sribikäre jankunu Jehová kräke gwairebe (Miq. 2:12).

³ Kukwe keta kabre Bibliabätä raba ni dimike ja töi mike ja tare bökän ye bämike ye rabai gare nie kukwe ja tötikara nekänti.

4. ¿Santiago 5:11 tä ni dimike ño Jehová tä ni tarere krubäte mike nüke gare jai?

⁴ Jehová töi kwin keta kabre ye mikata gare Bibliabätä. Ñodre, “Ngöbö abokän ja tare” mikata gare 1 Juan 4:8 (TNM) yekänti. Kukwe ne tä nemen gare nie ye tä ni töi mike ja kete Jehovabe. Ne madakäre, Jehová ye “moto kuin nikrä” nieta Bibliabätä arato (ñäkädre Santiago 5:11 yebätä). ¡Jehovata ni tarere krubäte mikata gare kwin nie kukwe nebiti!

5. ¿Jehovata ni mike tuin bobre jai ye bämikata ño kwe aune ni raba nuainne ño arato?

⁵ Kukwe meden nieta Santiago 5:11 yebätä ani töbike. Jehová moto kwin nikrä ye ketata niarata ni mike tuin bobre jai yebiti aune ye tä nemen tuin kwin krubäte nie (Éx. 34:6). Kukwe keteitibiti Jehovata ni mike tuin bobre jai, ye abokän tä ngite nikwe juen nibiti ta nita ja mike ngite ye ngwane (Sal. 51:1). Akwa, ni mada mikadre tuin bobre jai yebätä Biblia tä blite ngwane, ngite juandre ta ni madabiti ye ñan aibebätä blitata, ñakare aune ni mada mikadre tuin bobre jai ye abokän ja töi mikadre ni mada dimike tä ja tare nike ngwane meden gärätä. Jehová töita ni dimikabätä ye bäri kri ni meyere tä ja töi mike ño monso kwe kräke yebiti ta mikata gare Bibliabätä (Is. 49:15). Nita ja tare nike ngwane, Jehovata ni mike tuin bobre jai ye tä töi mike ni dimike (Sal. 37:39; 1 Cor. 10:13). Jehovata ni mike tuin bobre jai ye erere ni raba nuainne arato, ni rabadre ngite ja mräkätrekwe ye juenbiti ta aune ñaka nemen rubun jankunu kräke tä ni mike ulire ye ngwane (Efes. 4:32). Akwa kukwe keteiti ütiätebiti ni rabadre ni mada mike tuin bobre jai, ye abokän tätre ja tuin kukwe tare ben ngwane nikwe dimikadre. Ja tare ye käkwe ni töi mikai ni mada mike tuin bobre jai ngwane, nita ja ngwen Jehová erere ñobätä ñan aune niara ye ja tare bökän bämikaka kwin (Efes. 5:1).

6. ¿Jonatán aune David ja tare bökän bämikani ño jai kwärikwäri?

⁶ Nitre kwati käkwe ja tare bökän bämikani jai ye mikata gare Bibliabätä. Kukwe meden  bämikani Jonatán aune Davidkwe ye ani mike gare jai. “Jonatán aune David jatani ja kete kwin jabe aune Jonatán jatani tarere nämäne ja tarere ño ye erere” mikata gare Bibliabätä (1 Sam. 18:1). Jehovakwe David dianinkä rabakäre reire Saúl, Jonatán rün ye täte. Saúl namani mokrere krubäte aune brukwä nämäne rubun krubäte yebätä ja töi mikani kwe David kämike. Akwa Jonatán ñaka ja mikani rünkri David kämikakäre. Jonatán aune David rabai ja ketamukore aune ja dimikai kwärikwäri kwetre ye käbämikani kwetre jai (1 Sam. 20:42).

7. ¿Kukwe meden medenbätä Jonatán aune David ñaka rabadre ja kete kwin jabe?

⁷ Jonatán aune David ja ketabare kwin jabe ye raba ni töi mike krütare ñobätä ñan aune kukwe keta kabrebätä ñan rabadre ja kete jabe yebätä. Ñodre, Jonatanbiti kä nämäne 30 biti bäri David kräke yebätä. Aisete kukwe ñaka ja erebe nämäne kwe ja ketakäre monso bati aune kukwe ñaka gare krubäte ie yebe. Akwa yebiti ta, ñaka David mikani tuin ngwarbe kwe jai.

8. ¿Ñobätä David aune Jonatán ja ketabare kwin jabe ruin mäi?

⁸ Ne madakäre, Jonatán raba nemen mokrere David ben aune ja di ngwandre kwe rabakäre reire Saúl täte ñobätä ñan aune niara ye Saúl ngobo yebätä (1 Sam. 20:31). Akwa ñaka nuainbare kwe, ñakare aune ja töi mikani bobre kwe aune ja ngwani metre kwe Jehovai, yebätä Jehovakwe ja töi mikani David mike reire ye kani ngäbiti kwe ja brukwä kwinbiti. Ja ngwani metre kwe David ie arato, Saúl brukwä namani rubun krubäte kräke yebiti ta (1 Sam. 20:32-34).

9. Jonatán ñaka nämäne David mike tuin ja ribare jai, ¿ye ñokänti gare nie?

⁹ Jonatán nämäne David tarere bökän yebätä ñaka mikani tuin kwe jai ja riba erere. Jonatán ye rükä balente krubäte aune buko kita nämäne gare kwin ie. Niara aune rün kwe Saúl ye abokän “bäri jötrö mü ye kräke” aune “bäri dite león ye kräke” nietabätä (2 Sam. 1:22, 23). Aisete Jonatán raba ja dikaire dre dre nuainbare kwe rübätä yebätä. Akwa ñaka ja gani kwe David ben aune kukwe meden kwin namani bare David ie yebätä ñaka brukwä namani rubun, ñakare aune David ye brukwä kwekebe jai aune nämäne tö ngwen Jehovai ye namani tuin ütiäte ie. Davidkwe Goliat kämikani ye ngwane, Jonatán jatani tarere bökän mikata gare. ¿Ja tare bökän ye ni raba bämike ño ja mräkätre kukwebätä ie?

10. “Ja di ngöi jökrä munkwe ja tare era metre kwärikwäri” nieta, ¿ye tä dre mike gare nie?

¹⁰ “Ja di ngöi jökrä munkwe ja tare era metre kwärikwäri” nieta Bibliabätä (1 Ped. 1:22). Jehovata kukwe ye bämike ni käne. Niarata ni tarere krubäte yebätä nikwe ja ngwain metre ie ngwane, kukwe ñaka raba ni denkä niarabätä (Rom. 8:38, 39). Kukwe griego “ja di ngöi jökrä” kwitadre ye abokän ja di ngwandre ja tare bämikakäre meden gärätä aune ye erere ni raba nuainne ruäre ngwane ja mräkätre ruäre ben raba ruin nie. Kukweta nemen jabätä nie ni madabe ye ngwane dre nuaindre Biblia tä mike gare nie: ‘Munkwe ja ngibia bätärekä kwärikwäri amne, Ngöbö Üai Deme köböire munta ja mäke ni itibe kwrere, ye kwrere munkwe nünandre janknu, abkokäre munkwe nüna jäme jabe kwärikwäri’ (Efes. 4:1-3). “Nüna jäme jabe kwärikwäri” ye kriemikakäre, kukwe meden tä nainte ja mräkätre ie yebätä ñaka ja töi mikadre, ñakare aune Jehovata niaratre mike tuin ño jai ye erere ja di ngwandre niaratre mikakäre tuin jai (1 Sam. 16:7; Sal. 130:3).

11. ¿Ñobätä käre ñaka tä nemen nuäre ni kräke ja mräkätre tarekäre bökän?

 ¹¹ Käre ñaka tä nemen nuäre ni kräke ja mräkätre tarekäre bökän, kukwe meden meden tä nainte ietre yebätä nita ja töi mike ngwane bärira jire. Kukwe ye erere nämänena nemen bare siklo kena ye ngwane. Ñodre, Evodia aune Síntique ie kukwe ñaka nämäne sribikäre gwairebe Pablobe kukwe kwin ye driekäre. Akwa kukwe ruärebätä niaratre nibu ye ñaka nämäne ja ngwen kwin jabe. Aisete, “töbikadre ja erebe kwetre Ji dokwäte kribiti” niebare Pablokwe ietre (Filip. 4:2, 3, NGT).

12. ¿Nikwe dre nuaindre ne kwe ni tö rabadre ja mräkätre tarere bökän?

¹² ¿Nikwe dre nuaindre ne kwe ni rabadre ja mräkätre ye tarere bökän? Nikwe ja di ngwandre niaratre mike gare bäri kwin jai. Ye köböire rabai bäri nuäre ni kräke töi mikakäre nüke gare jai aune ja töi mike tarekäre bökän. Kä ñaka ja närebe nibiti aune nita nüne ño ye ñaka raba ni ketebätä ja ketakäre ja mräkätre ben. Jonatanbiti kä nämäne 30 biti bäri David kräke, akwa ja ketabare kwin kwe David ben ye nikwe ngwandre törö jai. Töbike konkrekasion mäkwe yebätä, ¿ja mräkä bäri umbre o bäri bati mä kräke ye tärä abokän ben mä raba ja kete ya? Mäkwe nuaindi ngwane, ja mräkätre jökrä taredre nieta 1 Pedro 2:17 ye mä täi mike täte mäkwe bämikai.

13. ¿Se ñobätä ni ñaka tä ja kete ja erebe ja mräkätre jökrä ben konkrekasionte?

¹³ Ne madakäre, ja mräkätre jökrä taredre bökän nieta, ¿aisete ja mräkätre jökrä ben ja ketadre ja erebe ye mikata gare kukwe yebiti ya? Ñakare, ye ñaka kore. Ja mräkätre ruäre ben jata nemen ruin bäri kwin nie mada mada ye kräke, ye nierare ñobätä ñan aune kukwe ñaka ja erebe nie bentre yebätä. Jesús nämäne nitre apóstol ye jökrä mike tuin jai ja ketamuko kwrere, akwa itibe ye nämäne bäri tare kwe nietabätä, ye abokän Juan (Juan 13:23; 15:15; 20:2). Akwa yebiti ta, ñaka Juan mikani bäri käne kwe mada mada ye kräke. Ñodre, Gobran Ngöbökwe yete Jesukwe Juan aune eteba kwe Santiago ye mikadre täkärä bäri ütiäte yete ribebare kwetre ie ngwane, Jesukwe niebare  ietre: “Nire rabadre täkänintbe ti küde ruenkri amne nire rabadre ti küde ngeberekri, ye abko ñan tä ti kisete” (Mar. 10:35-40). Ni rabadre ja ngwen Jesús erere arato aune ñaka ja ketamuko bäri tare nikwe ye mike bäri käne o ütiäte mada mada ye kräke (Sant. 2:2-4). Ni iti mikadre bäri käne o ütiäte jai ye köböite konkrekasion ñaka täi keteitibe aune kukwe ye ñaka nuain bä jire konkrekasionte (Jud. 17-19).

14. Filipenses 2:3 tä niere erere, ¿dre käkwe ja mräkätre dimikai ñaka ja gain kwärikwäri?

¹⁴ Ja tare bökän ye raba ja mräkätre dimike ñaka ja gai kwärikwäri. Jonatán ñaka ja gani David ben aune ñaka mikani tuin kwe jai ja riba erere gobran yebätä ye nikwe ngwandre törö jai. Ni rabadre ja ngwen niara erere aune ñaka ja mräkätre mikadre tuin jai ja riba erere kukwe nuain gare ietre yebätä, ñakare aune kukwe niebare Pablokwe ne nikwe nuaindre: “Bika tidrä ni mda mdabtä amne ni mda mda mika bäri ütiäte jakrä” (ñäkädre Filipenses 2:3 yebätä). Ja mräkätre jökrä tä konkrekasion dimike ye nikwe ngwandre törö jai. Ni töi bobre ngwane, ja mräkätre töi kwin keta kabre yebätä nikwe ja töi mikai aune niaratre tä kukwe kwin bämike ye raba ni dimike (1 Cor. 12:21-25).

15. ¿Kukwe namani bare Tanya aune mräkätre kwebätä ye tä dre driere mäi?

¹⁵ Nita ja tuin kukwe tare ben ye ngwane, Jehovata ni töi mike jäme tä ni tarere bökän yebiti aune ja mräkätre tä ni dimike yebiti. Ñodre, nitre ja mräkärebätä dre namani bare sabadote janamane gätä kri internacional “Ja tare ye ñaka nekä” yebätä ye ani mike gare jai, gätä kri ye nuainbare kä 2019 Estados Unidos yekänti. Tanya, monsoi nimä, nikaninta hotel kokwäre karo kwetre yete ngwane, karo mada  jatani, matani niaratre te. Tanya tä niere: “Nun ñaka juruainba tare, nun rikaba karobätä kwintubu aune nun rababa nünaninkä autopista yekänti bänä ñan krörö ja jiebiti. Aune ji kräbätä se kwrere ni iti nämä kise minienkä nunye aune nun käräba kwe karo jakwe yekänti nun dimikakäre. Ja mräkä ye nämä gätäbätä siba meden jataninta arato. Akwa ja mräkä ye ñan aibe nünankaba yete, ñakare aune ja mräkätre nirike käi Suecia yekwe nuainba arato. Ja etebatre käkwe küde kitaba ti aune ti ngängän ye ngärä ja tare bökän bämikakäre nunye. Nun nämä ye ribere jai. Nun nämä kwin nunkwe nieba ietre akwa niaratre ja mikateba nunbe yete. Ambulancia rükaba ye bitikäre niaratre ñaka rikabata. Jondron jökrä tädre nunkwe ye mikaba gare metre kwetre jai. Kukwe ñaka kwin rababa bare nunbätä ye näire Jehová nämä nun tarere ye rükaba gare nunye. Ye käkwe nun dimikaba ja mräkätre tarere bäri. Ne madakäre, Jehová jataba bäri tare nunkwe aune nun törbaba debe biain bäri ie”. Mä dimikadre mä nämäne ribere bäri jai ngwane ja mräkä iti ja tare bökän bämikani mäi, ¿ye törö mäi ya?

16. ¿Kukwe meden tärä nie ja tare bökän bämikakäre jai kwärikwäri?

¹⁶ Nikwe ja tare bökän bämikai jai kwärikwäri ngwane, ¿kukwe meden kwin rabai bare? Ja mräkätre täi ja tuin kukwe tare ben ngwane, nikwe töi mikai jäme aune ni rabai bäri keteitibe juta Ngöbökwe yete. Ne madakäre, ni ja tötikaka metre Jesukwe nikwe bämikai aune nitre mada töi kwin tö rabai Jehová mikabätä täte siba. Akwa bäri ütiäte nikwe Jehová käikitaikä ñobätä ñan aune niara ye ni Rün ni mike tuin bobre jai aune Ngöbö ni töi mikaka jäme mikata gare 2 Corintios 1:3 yekänti. Ye medenbätä, ni jökrä ja töi mikadre ja tare bökän bämikakäre jankunu.