1. Nama nunjukka ruang bilik kemayaharitu kurang pengerindu?

BUP KUDUS madahka ba hari ti penudi, orang deka “nadai penyayau.” (2 Tim. 3:1, 3, NWT) Kitai meda utai tu nyadi kemayaharitu. Ambika chunto, mayuh ruang bilik beserara ketegal apai indai ke udah sarak. Sida ringat enggau pangan diri lalu ngujungka bala anak ngasaika diri enda dikesayau. Indah diri sebilik ke diau ba sama rumah mega nadai kaul ti rapat. Ku seiku kaunselor ruang bilik madahka, “Apai indai enggau bala anak enda bejaku enggau pangan diri. Suah agi sida ngena awak ba komputer, tablet, telefon binching tauka video game.”

2-3. (a) Nitihka Rome 12:10, ngagai sapa kitai patut nunjukka pengerindu? (b) Nama deka dipejuraika kitai ba artikel tu?

² Kitai enggai nitihka chara dunya ti nadai pengerindu. (Rom. 12:2) Tang kitai patut belajar ngemansangka pengerindu ke diri sebilik sereta ke bala menyadi ba eklisia. (Bacha Rome 12:10.) Nama pengerindu nya? Iya nya pengerindu ti diasaika diri sebilik lebuh sida bisi kaul ti rapat enggau pangan diri. Nya meh pengerindu ke deka diayanka kitai ngagai bala menyadi Kristian. Lebuh kitai ngayanka pengerindu nya, kitai ngetanka penyerakup ti beguna kena semua orang nyembah Jehovah enggau gaga ati.—Mik. 2:12.

³ Kena nulung kitai ngemansangka sereta nunjukka pengerindu tu, kitai ulih beratika chunto ari Bup Kudus.

4. Baka ni Masmur 103:8 nulung kitai nemu pengerindu Jehovah?

⁴ Bup Kudus madahka kitai pasal kualiti Jehovah. Ambika chunto, Bup Kudus madahka ‘Petara endang pengerindu.’ (1 Jhn. 4:8) Tu meransang kitai majak semak enggau Iya. Tang Bup Kudus mega madahka Jehovah bisi “pengerindu ti meruan belama iya.” (Bacha Masmur 103:8.) Ayat tu nunjukka Jehovah amat rinduka kitai!

5. Baka ni Jehovah ngayanka pengasih, lalu baka ni kitai ulih nunda Iya?

⁵ Peratika, Masmur 103:8 madahka Jehovah bisi siti agi kualiti ti ngasuh kitai semak enggau Iya, iya nya kasih. (P-sut. 34:6) Siti chara Jehovah ngayanka pengasih ngagai kitai, lebuh Iya ngampunka penyalah kitai. (Mas. 51:1) Tang ba Bup Kudus, pengasih ukai semina ngampun orang ke udah ngereja penyalah. Tang pengasih mega nyengkaum ngembuan asai ati ti keran deka nulung orang ke dituntung penusah. Jehovah ngambarka asai ati Iya ke keran deka nulung kitai balat agi ari asai ati seiku indai ke anak iya. (Isa. 49:15) Lebuh kitai dituntung penusah, pengasih Jehovah meransang Iya nulung kitai. (Mas. 37:39; 1 Kor. 10:13) Baka ni kitai ulih nunda Jehovah? Kitai ngereja nya lebuh kitai ngampun bala menyadi Kristian. Kitai mega enggai terus ringat enggau sida, enti sida bisi ngemediska ati kitai. (Eps. 4:32) Tang siti chara ti beguna agi iya nya nyaup sida lebuh sida dituntung penusah. Lebuh pengerindu meransang kitai ngayanka pengasih ngagai orang bukai, kitai nunda Jehovah, teladan ti pemadu badas!—Eps. 5:1.

6. Padahka baka ni kaul entara Jonatan enggau David.

⁶ Bup Kudus bisi madah pasal orang ti enda sempurna ke nunjukka pengerindu enggau pangan diri, baka kaban ti rapat.  Peratika chunto Jonatan enggau David. Bup Kudus madahka: “Jonatan enggau David bisi kaul ti amat rapat, lalu Jonatan belabuh rinduka iya baka ke rinduka diri empu.” (1 Sam. 18:1, NWT) Jehovah udah milih David nyadi raja pengudah Saul. Ketegal nya, Saul amat kepapaska David lalu deka munuh iya. Tang anak Saul Jonatan, enda nyukung apai iya lebuh Saul deka munuh David. Jonatan enggau David besemaya deka terus bekaban lalu selalu nyukung pangan diri.—1 Sam. 20:42.

7. Nama ulih nagang Jonatan enggau David ari bekaban?

⁷ Endang ngalitka ati Jonatan enggau David ulih nyadi kaban ti rapat. Nama kebuah? Laban bisi mayuh utai ke ulih nagang seduai iya ari bekaban. Ambika chunto, Jonatan kira-kira 30 taun tuai agi ari David. Jonatan engka ulih berunding iya enda ulih bekaban enggau David laban David agi biak sereta kurang peneleba. Tang, Jonatan enda berunding baka nya. Iya amat bebasaka David.

8. Ba runding nuan, nama kebuah Jonatan kaban ti manah ngagai David?

⁸ Jonatan engka ulih kepapaska David. Ketegal iya anak Saul, Jonatan ulih ngetanka hak iya nyadi raja pengudah Saul. (1 Sam. 20:31) Tang Jonatan baruh ati lalu taluk ngagai Jehovah. Nya alai iya nyukung Jehovah ke milih David nyadi raja. Iya mega taluk ngagai David taja pan nya ngasuh Saul balat pedis ati.—1 Sam. 20:32-34.

9. Baka ni kitai nemu Jonatan enda kepapaska David?

⁹ Ketegal Jonatan rinduka David, iya enda kepapaska David. Jonatan orang ti berani lalu udah belaban ba mayuh perang. Iya mega orang ti landik ngena panah. Mayuh orang madah Jonatan enggau apai iya Saul, “laju agi ari menaul, kering agi ari singa.” (2 Sam. 1:22, 23) Nya alai Jonatan ulih bejaku begah pasal pengawa iya. Tang iya enda nguji nyadi manah agi ari David tauka kepapas enggau utai manah ke udah digaga David. Iya temegah ati enggau pemerani David sereta meda iya bepanggai ba Jehovah. Kebendar iya, pengudah David munuh Goliat, nya meh maya Jonatan berengkah rinduka David baka iya rinduka diri empu. Baka ni kitai ulih rinduka bala menyadi Kristian baka Jonatan rinduka David?

10. Nama reti iya “rinduka pangan diri enggau pengabis ati”?

¹⁰ Bup Kudus ngasuh kitai “rinduka pangan diri enggau pengabis ati kita.” (1 Pet. 1:22) Jehovah teladan ti manah ke kitai. Iya rinduka kitai enggau pengabis ati nyentukka enti kitai taluk ngagai Iya, nadai utai ulih nyeraraka kitai ari pengerindu Iya. (Rom. 8:38, 39) Leka jaku “pengabis” tau ngambarka orang ti bebendar ngayanka pengerindu. Kekadang kitai engka tusah deka ngayanka pengerindu ngagai bala menyadi Kristian. Lebuh bisi orang ngemediska ati kitai, kitai patut ‘sabar enggau pangan diri dalam pengerindu, lalu enggau naka ulih nyaga penyerakup dalam roh ngena pemaik ti nanggam kita semua.’ (Eps. 4:1-3) Enti kitai enggau naka ulih ngetanka “pemaik” enggau bala menyadi Kristian, kitai enda betatika penyalah sida. Kitai meda bala menyadi Kristian baka Jehovah ke meda sida.—1 Sam. 16:7; Mas. 130:3.

11. Nama kebuah kekadang tusah deka ngayanka pengerindu?

¹¹ Kekadang kitai engka tusah deka ngayanka  pengerindu ngagai bala menyadi Kristian, kelebih agi enti kitai nemu pengelemi sida. Tu kala nyadi penanggul ngagai orang Kristian ba kurun keterubah. Ambika chunto, Eudia enggau Sintike nadai penanggul lebuh sama gawa enggau Paul ‘nusui berita manah.’ Tang seduai iya tusah deka begulai enggau pangan diri. Nya alai Paul meransang seduai ‘besetuju enggau pangan diri dalam Tuan.’—Plp. 4:2, 3.

12. Baka ni kitai ulih ngembuan kaul ti rapat enggau bala menyadi Kristian?

¹² Baka ni kitai ulih ngembuan kaul ti rapat enggau bala menyadi Kristian kemayaharitu? Lebuh kitai ngelala sida enggau manah agi, kitai engka senang meretika sida lalu rinduka sida. Kitai ulih bekaban enggau sida taja pan sida enda serambau tauka ari bansa ti bukai. Kingatka, Jonatan kira-kira 30 taun tuai agi ari David. Tang iya ulih nyadi kaban rapat David. Kati bisi orang ba eklisia nuan ke ulih nyadi kaban rapat nuan, enda ngira iya tuai agi tauka biak agi ari nuan? Enti nuan ngereja nya, nuan nunjukka diri “rinduka orang ke arap.”—1 Pet. 2:17.

13. Nama kebuah kitai engka berasai rapat agi enggau sekeda orang ba eklisia?

¹³ Taja pan kitai rinduka bala menyadi Kristian, kati kitai ulih rapat enggau semua orang ba eklisia? Tu engka tusah. Nama kebuah? Laban kitai senang agi begulai enggau orang ke bisi minat ti sama enggau kitai. Jesus ngumbai bala rasul iya “pangan.” Tang iya rapat agi enggau John. (Jhn. 13:23; 15:15; 20:2) Taja pia, Jesus enda ngenuluka John lebih agi ari orang bukai. Ambika chunto, lebuh John enggau menyadi iya James minta penuduk ti tinggi ba Perintah Petara, Jesus madah ngagai seduai: ‘Ukai aku ke ngeletak sapa ke duduk muak ari kanan tauka ari kiba aku.’ (Mrk. 10:35-40) Baka Jesus, kitai enda ngenuluka kaban rapat lebih agi ari bala menyadi Kristian ke bukai. (Jas. 2:3, 4) Enti kitai ngereja nya, kitai ngasuh eklisia beserakup.—Jud. 17-19.

14. Nitihka Pilipi 2:3, nama ulih nulung kitai enda bepekit enggau bala menyadi Kristian?

 ¹⁴ Enti kitai ngayanka pengerindu ngagai pangan diri, kitai enda nguji bepekit enggau bala menyadi ba eklisia. Kingatka, Jonatan enda kepapaska David, lalu iya enda nguji nyadi raja bepekit enggau David. Semua kitai ulih nunda teladan Jonatan. Anang kepapaska bala menyadi nuan ketegal pengelandik sida, “tang enggau ati ti baruh, seruran ngumbai orang bukai pama agi ari kita.” (Bacha Pilipi 2:3.) Kingatka, tiap iku kitai ulih ngemansangka eklisia. Enti kitai baruh ati, kitai ulih meda pemanah bala menyadi Kristian sereta bulih penguntung ari teladan sida ti tetap ati.—1 Kor. 12:21-25.

15. Nama ulih dipelajarka nuan ari utai ke nyadi ba Tanya sebilik?

¹⁵ Lebuh bisi penusah ti enda disadang nyadi ba pengidup kitai, Jehovah ulih ngelantangka kitai. Baka ni chara Iya ngereja nya? Iya ulih ngena bala menyadi Kristian ngayanka pengerindu sereta meri bantu ti diguna kitai. Peratika utai ke nyadi ngagai siti ruang bilik ke enggau Konvensyen Entarabansa “Pengerindu Enda Nemu Abis”! di Amerika Serikat, kena taun 2019. Pengudah tembu program ba Hari Enam, Tanya, ke bisi tiga iku anak madahka: “Kami benung ba jalai deka pulai ngagai hotel lebuh sebuah kerita ngelanggar kerita kami. Taja pan kami nadai bakal, tang kami amat tekenyit. Kami pansut ari kerita lalu bediri ba jalai. Tang bisi seiku orang ngepai jari ngagai kami lalu ngasuh kami ngagai kerita iya. Iya seiku ari menyadi Kristian lelaki ke sama enggau ba konvensyen nya. Tang ukai iya aja ke ngetu. Bisi lima iku agi Saksi ari Sweden  mega ngetu. Menyadi Kristian indu merap aku enggau anak indu aku, lalu nya ngasuh kami berasai nyamai agi. Aku madahka sida, kami nadai nama-nama lalu sida ulih neruska pejalai. Tang sida terus enggau kami, indah pengudah ambulan datai. Lalu sida nentuka kami bisi semua utai ti diguna kami. Ari utai ke nyadi tu, kami ulih ngasaika pengerindu Jehovah. Tu ngasuh kami rindu agi ke bala menyadi Kristian lalu ngeringka pengerindu kami ngagai Jehovah.” Kati nuan agi ingat maya nuan begunaka bantu lalu bisi menyadi Kristian ke datai ngayanka pengerindu ngagai nuan?

16. Nama kebuah kitai patut ngayanka pengerindu ngagai pangan diri?

¹⁶ Perundingka nama utai manah ke nyadi enti kitai nunjukka pengerindu ngagai pangan diri. Kitai ulih ngelantangka bala menyadi lebuh sida napi penanggul. Kitai ulih ngeringka penyerakup entara nembiak Petara. Kitai nunjukka diri murid Jesus, lalu tu narit ati orang deka nyembah Jehovah. Ke amat beguna, kitai muliaka ‘Apai ti pun semua pengasih, Petara ti pun semua pengelantang,’ Jehovah. (2 Kor. 1:3) Aram meh semua kitai terus ngemansang sereta ngayanka pengerindu!