1. Anni i mangipasingan nga ari kuruga madukko i familia sangawe?

NIPROFESIYA na Biblia nga ta pangurianan nga aggaggaw, ‘awan tu allo na totolay ta ikattoleda.’ (2 Tim. 3:1, 3) Matuttuppal ngana yatun sangawe. Angngariganna, minillion nga familia i nafektan na diborsio. Megafu tatun, makka-kalussaw i magatawa ira anna ari natageno na ánada i pangaya. Maski nu tadday nga balay laman i paddianan na familia, gittana ariadda makka-ammammu. Kagian na tadday nga eksperto ta familia: “Mas aru ngana i tiempo na yena, yama, anna ána ira ta pangusa tu computer, tablet, smartphone, onu video game, anne ta tiempoda nga maggiristoria.” Kunna paga: “Maski nu mavvurulu ira ta tadday nga balay, awan tu madukko nga relasiodda ta kataggi-tadday.”

2-3. (a) Segun ta Roma 12:10, sinni nakuan i pangipasingannattam tu napafutuan nga aya? (b) Anni i gigiammuattam taw nga artikulo?

² Ari tam kayà nga parigan i totolay taw ta mundo nga awan tu ayada ta kasittoleda. (Roma 12:2) Imbes tu kunna, ipasingattam nakuan i napafutuan nga aya ari laman ta unag na familia tam, nu ari, maski ta kapangngurug tam. (Bibbigan i Roma 12:10.) Anni i napafutuan nga aya? Tumukoy yatun nga termino ta pakka-iddu-iddu na makkafamilia. Mawag nga kultibattam i kunnatun nga aya ta espiritual nga familia tam—i wawwaragi tam ta kongregasion. Nu mangipasingan ittam tu napafutuan nga aya, egga i pattaradday ta unag na kongregasion anna magayayya i wawwaragi nga masserbi kani Jehova.​—Mik. 2:12.

³ Tapenu makultiba anna mepasingattam i kunnatun nga aya, gigiammuattam i ehemplo ira ta Biblia.

4. Anni i kagian na Santiago 5:11 meyannung ta konag na aya ni Jehova para nittam?

⁴ Mabibbig ta Biblia i makasta ira nga kualidad ni Jehova. Angngariganna, nakagi tatun nga “i Dios ay aya.” (1 Juan 4:8) Turi ta nammuattam yatun, ikaya tam nga maddukko nisa. Kagian paga na Biblia nga “minaggiddeddu” si Jehova. (Bibbigan i Santiago 5:11.) Anni mabba i kastana nga paddeskriba ta mataga-tageno ni Jehova para nittam!

5. Kunnasi nga nangipasingan si Jehova tu allo, anna kunnasi tam yayya nga maparigan?

⁵ Fuera paga ta napafutuan nga aya, nakagi paga ta Santiago 5:11 i tadday nga kualidad ni Jehova—i allona. (Ex. 34:6) Pamakoma ta liwi-liwa tam i tadday nga pangipasingan ni Jehova ta allona ta nittam. (Sal. 51:1) Ta Biblia, i pamakoma ay ari laman tu basta pangipasingan tu allo. I allo ay panageno nga maggafu ta kononaggan na tadday nga tolay. Yatun i mamaguyu nisa tapenu uffunan i tolay nga masinganna nga marigatan. Nu kunnasi nga kakayà na yena nga uffunan i anana, mas paga tatun i pakkaraga ni Jehova nga uffunan ittam. (Isa. 49:15) Nu meparubang ittam ta problema ira, paguyuan na allo si Jehova tapenu uffunan ittam. (Sal. 37:39; 1 Cor. 10:13) Mepasingattam i allo ta wawwaragi nu pakomattam ira ta liwi-liwada anna nu ari ittam nga mangipappan tu taki na nono nu natakitadda ittam. (Efe. 4:32) Mepasingattam gapa nga ikallo tam i wawwaragi nu uffunattam ira ta tiempo na ziga. Paguyuan ittam nakuan na aya nga kuan yatun. Nu kuattam danatun, maparigattam si Jehova, i kapianan nga ehemplo na napafutuan nga aya.​—Efe. 5:1.

6. Istorian nu kunnasi i pakkofun da Jonatan anni David.

⁶ Mabibbig ta Biblia i angngarigan na imperfekto ira nga totolay nga nakepasingan tu napafutuan nga aya. Ikonsidera i ehemplo da Jonatan anni David. Kagian na Biblia: “Nabbalin tu madukko nga makkofun da Jonatan anna David, anna iniddu ni Jonatan si David nga kunna pangidduna ta baggina.” (1 Sam.  18:1) Pinili ni Jehova si David nga mabbalin tu patul kabalin ni Saul. Megafu tatun, nattaki i nono ni Saul kani David anna nigatona nga patayan yayya. Ngem ari nga sinuportan ni Jonatan i plano na yamana nga patayan si David. Nakka-tabba da Jonatan anna David nga mattalupaddian ira nga makkofun anna kanayun nga makka-uffun.​—1 Sam. 20:42.

7. Anni nakuan i puede nga makefugag ta pakkofun ni Jonatan anni David?

⁷ Kappabbaw i napafutuan nga aya ni Jonatan anni David ta kataggi-tadday maski nu aru nakuan i makefugag ta pakkofudda. Angngariganna, mas kaka si Jonatan tu 30 dagun kani David. Awayya gapa nga nonopan ni Jonatan nga arianna puede nga mabbalin tu madukko ta mas mabbing anna mas baddi i ekspiriensana nga tolay. Ngem ari tu kunnatun i ninono ni Jonatan. Dakal i respetona kani David.

8. Ngatta mapia nga kofun si Jonatan kani David?

⁸ Awayya nakuan nga mappassil si Jonatan kani David. Bilang ana ni Patul Saul, awayya nakuan nga ipilit ni Jonatan nga yayya i mabbalin tu tumunug nga patul. (1 Sam. 20:31) Ngem minappakalinno si Jonatan, anna matalo yayya kani Jehova. Yatutta sinuportanna i pinili ni Jehova nga mabbalin nga tumunug nga patul. Matalo gapa yayya kani David maski nu napalussona si Saul.​—1 Sam. 20:32-34.

9. Nappassil kari si Jonatan kani David? Ipakanawag.

⁹ Napafutuan i pangaya ni Jonatan kani David yari tu ari yayya nga nappassil ta nisa. Malalaki nga gumappana si Jonatan anna magutu-gutu yayya ta gerra. Madumu-rumug gapa ira na yamana nga si Saul nga “mas alistu anne ta agila ira” anna “mas masikan anne ta leon ira.” (2 Sam. 1:22, 23) Puede nakuan gafu nga iparayag ni Jonatan i kalalakina nga makiggerra. Ngem ari tu minakkikompetensia si Jonatan anna arianna nga passilan i makasta ira nga kingngua ni David. Imbes tu kunna, atannang i paninganna kani David megafu ta magutu si David anna mattalo yayya kani Jehova. Kakuruganna, turi ta napatay ni David si Goliat, namegafu ngana nga iniddu ni Jonatan si David nga kunna baggina. Kunnasi tam gapa nga mepasingan i kunnatun nga napafutuan nga aya ta wawwaragi tam?

10. Anni i kebalinan na ‘pakka-aya-aya ta napafutu’?

¹⁰ Kagian na Biblia nga ‘makka-aya-aya ittam ta napafutu.’ (1 Ped. 1:22) Si Jehova i kapianan nga ehemplo para nittam. Talaga napafutuan i pangayana nittam anna nu matalo ittam nisa, arianna vuluvuga pawanan yatun nga pangayana nittam. (Roma 8:38, 39) I Griego nga termino nga netransleyt tu “napafutu,” kebalinanna nga kuan na tadday i ngamin nga mawayyana tapenu ipasingan i aya. Nu karuan, ari tu mapaleg i mangipasingan tu aya ta wawwaragi. Ngem nu matakitan ittam na tanakuan, mawag nga ‘ipasingattam i pakka-aya-aya anna pakkapasa-pasensia ta kataggi-tadday.’ Fuera paga tatun, ‘kuattam i adde na awayya tam nga mamannanayun ta pia na pattaradday nga iyawa na Espiritu Santo gafu ta imammo nga mamakatadday nittam.’ (Efe. 4:1-3) Makua tam i adde na mawayya tam nga pattalupaddianan i “imammo nga mamakatadday” nu ari ittam maffokus ta nakkamalian na wawwaragi tam. Mappursigi ittam lallagu nga parigan i pagimamma ni Jehova ta wawwaragi tam.​—1 Sam. 16:7; Sal. 130:3.

11. Ngatta nu karuan mariga i mangipasingan tu napafutuan nga aya?

¹¹ Ari nga malogon nga mangipasingan tu  napafutuan nga aya ta wawwaragi tam, lalu nu masingi-singammu i pakkafiadda. Yatun i nabbalin nga problema ta karuan nga Cristiano ta ollu siglo. Angngariganna, makasta gapa i avvulu da Euodia anna Sintike turi ta ‘nabbanna-bannag ira nga nanguffun kani Pablo ta nikelammuyag na evanghelio.’ Ngem nu ira ngana laman dua, ari ira nga makkasundu. Yatutta sinabarangngan ira ni Pablo nga ‘pakappiadda i avvuluda nga kunna mawwagi ta Yafu.’—Fil. 4:2, 3.

12. Kunnasi tam nga kultiban i napafutuan nga pangaya para ta wawwaragi tam?

¹² Kunnasi tam nga makultiba i napafutuan nga pangaya para ta wawwaragi? Nu mas nga kilalattam i kapangngurug tam ira, mas mapaleg ta nittam nga alippawatan ira anna napafutuan nga ayatan ira. Kofunattam maski danuri mas manakam nittam, mas mabbing, onu danuri tanakuan i kulturada. Daddammammu nga kaka tu 30 dagun si Jonatan anne kani David ngem nabbalin ira tu madukko nga makkofun. Egga kari i kakongregasiommu nga mas kaka niko onu mas abbing niko nga awayyam kofunan? Nu kuammu yatun, mapakurug mu nga ‘ayatammu i wawwagim ta angngurug.’—1 Ped. 2:17.

13. Ngatta ta mas madukko ittam ta karuan nga wagi ta kongregasion anne ta tanakuan?

¹³ Kawagan kari nga madukko ittam ta ngamin nga kakongregasiottam tapenu makagi nga egga i napafutuan nga pangaya tam? Ari. Imposible nga mesimmu yatun. Normal laman nga mas madukko ittam ta wawwaragi nga parehu i paginteresattam. “Kakkofun” i pagagal ni Jesus ta ngamin nga apostolesna ngem espesial i pangidduna kani Juan. (Juan 13:23; 15:15; 20:2) Ngem ari nga nangipasingan si Jesus tu faboritismo kani Juan. Angngariganna, turi ta nakkiddaw si Juan anna i wagina nga si Santiago tu prominente nga posision ta Pappatulan na Dios, kinagi ni Jesus nira: “Awan tu pakawayyà nga mappili nu sinni i magitubang ta ziwanak-ku anna zimigì.” (Mar. 10:35-40) Kagitta ni Jesus, ariattam nakuan gapa nga mangipasingan tu faboritismo ta madukko nga kokkofuttam. (Sant. 2:3, 4) Nu awan nittam i faboritismo,  malillitattam i mamassirina ta kongregasion anna mapattalupaddiattam i imammo.​—Jud. 17-19.

14. Segun ta Filipos 2:3, anni i makoffun nittam tapenu malillitattam i espiritu na pakikkompetensia?

¹⁴ Nu makka-aya-aya ittam, maprotektattam i kongregasion ta espiritu na pakikkompetensia. Daddammattam nga ari nga nakikompetensia si Jonatan kani David anna arianna nga minammatan si David nga kalaban ta pabbalin tu patul. Maparigattam gapa i ehemplo ni Jonatan. Ari tam nakuan nga passilan i wawwaragi tam megafu ta abilidadda ira, nu ari, ‘mappakalinno ittam anna ipay tam kanayun ta nono tam tu mas mapia i karuan anne nittam.’ (Bibbigan i Filipos 2:3.) Daddammattam nga egga i meyuffun na kada tadday nittam ta kongregasion. Nu kanayun ittam nga mappakalinno, masingattam i makasta ira nga kualidad na wawwaragi tam anna mabenefisiowan ittam ta matalo nga ehemploda.​—1 Cor. 12:21-25.

15. Anni i magigiammum ta ekspiriensa da Tanya?

¹⁵ Nu egga i gavva nga marake nga mesimmu nittam, banna-bannayan ittam ni Jehova gukaban na napafutuan nga aya anna praktikal nga uffun na wawwaragi tam. Naekspiriensa yatun na tadday nga familia turi ta lubbe ngana ira maggafu ta programa ta Sabadu na 2019 Mannanayun i Aya! nga Internasional nga Kombension ta United States. Kunnaw i istorian ni Tanya nga kavuluna i tallu nga ánana: “Ta palabbe kami ngana ta hotel mi, egga i takay nga nawanan tu kontrol anna binanggana i takemi. Awan tu nabigaran nikami, ngem ta sobra nga nikakaddag mi, nallawakkami ta takay anna siminaddag kami ta aggig na dalan. Ngem  egga i nassenias nikami ta abbag nga dalan nga umay kami nga makitakay nisa. Kagagafu gapa natun nga brother ta kombension. Ari laman tu yayya i nagimmang. Egga paga i lima nga delegadu nga taga-Sweden nga nagimmang. Ginakkopannà na sister ira kunne na gapa i ana ku nga babay yayya nga nabanna-bannayakkami. Kinagì nira nga okay kami laman anna awayyada ngana i mappollu. Ngem ariadda kami nga pinanawan adde ta zimittal i ambulansia. Siniguraduda nga egga nikami i ngamin nga kawagammi. Tatun nga mariga nga situasion, natageno mi i aya ni Jehova. Megafu taw nga ekspiriensa, mas ziminakal i pangaya mi ta wawwaragi kunne na gapa i pangaya anna i appresasiommi kani Jehova.” Meraddammammu kari turi ta magawag ka gapa tapus egga i kapangngurug mu nga nangipasingan niko tu napafutuan nga aya?

16. Anni ira i makasta nga efekto na pakka-aya-aya tam?

¹⁶ Nonopan i makasta ira nga efektona nu makka-aya-aya ittam. Mabanna-bannayattam i wawwaragi nu egga ira i problemada anna mas mattaradday gapa i totolay na Dios. Mapakurug tam nga disipulo ittam ni Jesus anna megafu tatun, maginteres i totolay nga masserbi kani Jehova. Pinaka-importante ta ngamin, medayaw tam si Jehova, “i minaggallallo nga Yama anna Dios nga paggafuan na ngamin nga uffun.” (2 Cor. 1:3) Paray nakuan tu tulu-tuloy tam nga kultiban anna ipasingan i napafutuan nga aya!