1. Ɛbɛ wɩlɩɣ se sɔɔlɩm fɛyɩ hɔŋ sakɩyɛ taa sɔnɔ?

BIBL kaayɔɔdaa se kɛdɛzaɣ kɩyakɩŋ taa lɛ, ɛyaa ɩɩkaɣ wɛnʋʋ “sɔɔlɩm.” (2 Tim. 3:1, 3) Ðɩwɛɛ nɛ ɖɩnaɣ se natʋ tɔm ndʋ tiɖiɣni labʋ sɔnɔ. Kɩɖaʋ nakʋyʋ yɔ: Lʋlɩyaa sakɩyɛ cɛbɩ nesi nɛ pʋyɔɔ lɛ, pa-taa wɩɣnɩ ɖama nɛ pe-piya maɣzɩɣ se patɩsɔɔlɩ-sɩ. Halɩ hɔʋ nakʋyʋ taa ñɩma pɩzɩɣ nɛ pɛwɛɛ ɖɩɣa kʋɖʋmaɣ taa, ɛlɛ taabalɩyɛ kɩbanɖɛ ɛɛwɛɣ pɛ-hɛkʋ taa. Mba patasɩɣ lɔŋ hɔŋ yɔ, pa-taa nɔɔyʋ yɔɔdaa se: “Ðoyo, caja nɛ piya paayɔɔdʋʋnɩ ɖama, nɛ pakpakɩɣ pa-alɩwaatʋ hɔɔlʋʋ sɔsɔʋ nɛ palakɩnɩ tʋmɩyɛ ordinatɛɛrɩwaa, taabɩlɛɛtɩwaa, pɔrtaabɩlɩwaa yaa palakɩ video yɔɔ aleɣya. Paa hɔʋ ŋgʋ, kɩ-taa ñɩma ɩwɛ ɖɩɣa kʋɖʋmaɣ taa yɔ, paasɩŋ ɖama camɩyɛ.”

2-3. (a) Ɛzɩ Roma mba 12:10 yɔɔdʋʋ yɔ, mba pɩwɛɛ se ɖɩwɩlɩ sɔɔlɩm sɔsɔm? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa?

² Ðɩtɩsɔɔlɩ se ɖɩpɩsɩ ɛyaa mba pɛfɛyɩnɩ sɔɔlɩm yɔ ɛzɩ ɛjaɖɛ yɔɔ ɛyaa sakɩyɛ yɔ. (Roma 12:2) Ɛlɛ, pɩwɛɛ se ɖɩñaɣ pana nɛ ɖɩwɛɛnɩ sɔɔlɩm sɔsɔm ɖɔ-hɔʋ taa ñɩma yɔɔ nɛ mba ɖa nɛ wɛ ɖɩka tisuu yɔ pɔ-yɔɔ ɖɔɖɔ. (Kalɩ Roma mba 12:10.) Ɛbɛ sɔɔlɩm sɔsɔm kɛnaa? Tɔm loyaɣ kanɛ kawɩlɩɣ taabalɩyɛ kɩbanɖɛ nɖɩ ɖɩwɛɣ hɔʋ nakʋyʋ taa ñɩma hɛkʋ taa yɔ. Pɩpɔzʋʋ se ɖɩñaɣ pana nɛ ɖɩwɛɛnɩ sɔɔlɩm mbʋ ɖo-koobiya mba pɛwɛ ɛgbɛyɛ taa yɔ pɔ-yɔɔ. Alɩwaatʋ ndʋ ɖɩwɩlɩɣ sɔɔlɩm sɔsɔm yɔ, ɖɩsɩɣnɩ paa weyi se ɛsɛɛ Yehowa nɔɔ kʋɖʋmaɣ taa nɛ taa leleŋ.—Mik. 2:12.

³ Pɩsa nɛ ɖɩñaɣ pana nɛ ɖɩwɩlɩ sɔɔlɩm sɔsɔm lɛ, iyele nɛ ɖɩna lɔŋ weyi ɖɩpɩzɩɣ nɛ ɖɩkpɛlɩkɩ Bibl taa kɩɖaŋ taa yɔ.

4. Tɔm ndʋ Yakubu 5:11 heyiɣ-ɖʋ Yehowa sɔɔlɩm yɔɔ?

⁴ Bibl heyiɣ-ɖʋ wɛtʋ kɩbandʋ ndʋ Yehowa wɛna yɔ tɩ-tɔm. Bibl yɔɔdʋʋ se “Ɛsɔ kɛ sɔɔlɩm.” (1 Yoh. 4:8) Alɩwaatʋ ndʋ ɖɩtɩlɩɣ Yehowa yɔɔ tɔm ndʋ yɔ, ɖɩsɔɔlʋʋ se ɖɩkɛ ɛ-taabalaa. Ɛlɛ Bibl yɔɔdʋʋ ɖɔɖɔ se Yehowa “wɛnɩ sɔɔlɩm sɔsɔm.” (Kalɩ Yakubu 5:11.) Tɔm kɩbandʋ ndʋ, tɩwɩlɩɣ se Yehowa sɔɔlɩ-ɖʋ siŋŋ!

5. (a) Ɛzɩma Yehowa wɩlɩɣ se ɛkɛ pʋtɔdɩyɛ nayʋ? (b) Nɛ ɛzɩma ɖɩpɩzɩɣ nɛ ɖɩmaɣzɩnɩ-ɩ?

⁵ Yakubu 5:11 yɔɔdʋʋ Yehowa sɔɔlɩm sɔsɔm nɛ ɛ-wɛtʋ lɛɛtʋ tɔm, nɛ wɛtʋ ndʋ tiyeki se ɖɩñɔtɩnɩ-ɩ. Wɛtʋ ndʋ lɛ pʋtɔdɩyɛ naʋ. (Ejl. 34:6) Nʋmɔŋ weyi ɩ-yɔɔ Yehowa tɩŋɩɣna nɛ ɛwɩlɩɣ se ɛnaɣ ɖa-pʋtɔdɩyɛ yɔ, ɩ-taa lɛɛkʋ lɛ se ekpeɣu-ɖʋ ɖa-kɩwɛɛkɩm. (Keɣa 50:3) Bibl taa lɛ, pʋtɔdɩyɛ naʋ ɛɛsɩɣnɩ kpaɣʋ nɛ kpeɣu ɖeke. Pʋtɔdɩyɛ naʋ kɛ ɖɔɖɔ siziŋ weyi ɛyʋ nɩɣ ɖooo ɛ-laŋɩyɛ taa alɩwaatʋ ndʋ ɛnaɣ nɔɔyʋ laŋwɛɛkɩyɛ taa nɛ piseɣtiɣ-i se ɛñaɣ pana nɛ ɛsɩnɩ-ɩ yɔ. Yehowa yɔɔdaa se ɛzɩma ɛsɔɔlɩ siŋŋ se ɛsɩnɩ-ɖʋ yɔ, halɩ pɩcɛzɩ ɛzɩma ɖoyo nɔɔyʋ sɔɔlʋʋ se ɛsɩnɩ ɛ-pɩɣa yɔ. (Iza. 49:15) Alɩwaatʋ ndʋ ɖɩwɛɣ laŋwɛɛkɩyɛ taa yɔ, pʋtɔdɩyɛ naʋ seɣtiɣ Yehowa se ɛsɩnɩ-ɖʋ. (Keɣa 36:39; 1 Kɔr. 10:13) Ðɩpɩzɩɣ nɛ ɖɩwɩlɩ se ɖɩnaɣ ɖo-koobiya pʋtɔdɩyɛ ye ɖikpeɣu-wɛ nɛ ɖɩɩcakɩnɩ-wɛ alɩwaatʋ ndʋ paɖʋʋ-ɖʋ ɖɩwɩzɩyɛ yɔ. (Efɛz. 4:32) Nʋmɔʋ sɔsɔʋ lɛɛkʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ se ɖɩnaɣ ɖo-koobiya pʋtɔdɩyɛ yɔ, ŋgʋ lɛ se ɖɩsɩnɩ-wɛ alɩwaatʋ ndʋ pakatɩɣ kala yɔ. Alɩwaatʋ ndʋ sɔɔlɩm seɣtiɣ-ɖʋ se ɖɩna ɛyaa lalaa pʋtɔdɩyɛ yɔ, ɖɩmaɣzɩɣnɩ Yehowa. Ɛnʋ hanɩ kɩɖaʋ ŋgʋ kɩkpaɖaa yɔ pʋtɔdɩyɛ naʋ hɔɔlʋʋ taa.—Efɛz. 5:1.

6. Ɛzɩma Yonataanɩ nɛ Daviid pawɩlɩ ɖama sɔɔlɩm sɔsɔm?

⁶ Bibl heyiɣ-ɖʋ ɛyaa mantɩtalɩ pilimwaa mba pawɩlɩ ɖama sɔɔlɩm sɔsɔm yɔ pɔ-tɔm. Maɣzɩ Yonataanɩ nɛ Daviid pa-kɩɖaʋ yɔɔ nɛ  ŋna. Bibl yɔɔdʋʋ se: “Yonataanɩ kalɩzaɣ sʋ Daviid nɛ ɛsɔɔlɩ-ɩ ɛzɩ ɛ-maɣmaɣ e-wezuu yɔ.” (1 Sam. 18:1) Paata Daviid num se ɛpɩsɩ wiyaʋ Sɔɔlɩ lone taa. Pata Daviid num nɛ pɩtɛ lɛ, Sɔɔlɩ paɣzɩ-ɩ sʋsʋʋ siŋŋ nɛ ɛñakaɣ pana se ɛkʋ-ɩ. Ɛlɛ, Yonataanɩ tɩɖʋ ɛ-caa Sɔɔlɩ nesi alɩwaatʋ ndʋ ɛlɛ ñakaɣ pana se ɛkʋ Daviid yɔ. Yonataanɩ nɛ Daviid palabɩ ɖama tamaɣ se pɛkɛɣ taabalaa tam nɛ paɖʋ ɖama nesi paa ɛzɩmtaa.—1 Sam. 20:42.

7. Ɛbɛ pɩzaɣ se pɩɖɩɣ Yonataanɩ nɛ Daviid nʋmɔʋ se pataakɛ taabalaa?

⁷ Yonataanɩ nɛ Daviid paapɩsʋʋ taabalaa kɩbama yɔ, pɩwɛ piti kpem mbʋ pʋyɔɔ yɔ wondu sakɩyɛ pɩzaɣ se tɩɖɩɣ-wɛ nʋmɔʋ nɛ pataakɛ taabalaa. Yonataanɩ kaakɩlɩ Daviid nɛ pɩnzɩ ɛzɩ 30 mbʋ yɔ. Yonataanɩ pɩzaɣ se ɛmaɣzɩ se ɛɛpɩzɩɣ nɛ ɛkɛ ɛyʋ weyi ɛkɛ pɩɣa evelaɣ yem nɛ ɛtaatɩlɩtɩ tɔm sakɩyɛ e-wezuu caɣʋ taa yɔ ɛ-taabalʋ. Ɛlɛ Yonataanɩ taawɛɛnɩ lɩmaɣza ana. Ɛñaŋaɣ Daviid siŋŋ.

8. Ɛbɛ yɔɔ ŋmaɣzɩɣ se Yonataanɩ kaakɛ Daviid taabalʋ kɩbanʋ?

⁸ Yonataanɩ pɩzaɣ se ɛsʋsɩ Daviid. Yonataanɩ kaakɛ wiyaʋ Sɔɔlɩ pɩyalʋ nɛ pʋyɔɔ lɛ, ɛpɩzaɣ se ɛyɔɔdɩ se ɛnʋ mʋnɩna se ɛpɩsɩ wiyaʋ ɛ-caa lone taa. (1 Sam. 20:31) Ɛlɛ, Yonataanɩ kaaluzi ɛ-tɩ nɛ ɛñɔɔnɩ Yehowa kpam. Pʋyɔɔ lɛ, ɛɖʋ nesi lɩmaɣzɩyɛ nɖɩ Yehowa kpaɣaa nɛ ɛlɩzɩ Daviid se ɛkɛ wiyaʋ pʋwayɩ yɔ nɛ ɛ-laŋɩyɛ pilim. Ɛɛñɔnɩ Daviid kpam ɖɔɖɔ paa piiyeba nɛ Sɔɔlɩ mʋ pana siŋŋ yɔ.—1 Sam. 20:32-34.

9. Ɛzɩma ɖɩlaba nɛ ɖɩna se Yonataanɩ taasʋsʋʋ Daviid?

⁹ Yonataanɩ kaawɛnɩ sɔɔlɩm sɔsɔm Daviid yɔɔ nɛ pʋyɔɔ lɛ, ɛtaasʋsʋʋ-ɩ. Yonataanɩ kaakɛ tɔʋ tɔyʋ weyi ɛwɛ niye yɔ nɛ you laɖʋ weyi ɛwɛ abalɩtʋ yɔ. Paasɩm ɛ nɛ ɛ-caa Sɔɔlɩ se “pakɩlɩɣ seu kpeliŋ” nɛ “paakpaɖɩ ɖoŋ mʋʋzɩŋ.” (2 Sam. 1:22, 23) Pʋyɔɔ lɛ, Yonataanɩ pɩzaɣ se ɛkpazɩ ɛ-tɩ tʋma sɔsɔna wena ɛlaba yɔ a-yɔɔ. Ɛlɛ Yonataanɩ taañakɩ pana se ɛkpaɖɩ Daviid nɛ ɛtaasʋsʋʋ-ɩ tʋma kɩbana wena ɛlɛ laba yɔ a-yɔɔ. Daviid tɔm kaakɛdɩnɩ Yonataanɩ mbʋ pʋyɔɔ yɔ ɛɛwɛ abalɩtʋ nɛ ɛtaɣaɣ Yehowa liu. Toovenim taa lɛ, Daviid kʋ Gooliyaatɩ nɛ pɩtɛ lɛ, Yonataanɩ paɣzɩ-ɩ sɔɔlʋʋ ɛzɩ ɛ-maɣmaɣ yɔ. Ɛzɩma ɖɩpɩzɩɣ nɛ ɖɩwɩlɩ sɔɔlɩm sɔsɔm mbʋ ɖo-koobiya?

10. Ye pɔtɔm se ‘ɖɩsɔɔlɩ ɖama siŋŋ pɩlɩɩnɩ ɖa-laŋɩyɛ taa’ yɔ, pʋ-tɔbʋʋ lɛ suwe?

¹⁰ Bibl heyiɣ-ɖʋ se ‘ɖɩsɔɔlɩ ɖama siŋŋ pɩlɩɩnɩ ɖa-laŋɩyɛ taa.’ (1 Pɩy. 1:22) Yehowa ha-ɖʋ kɩɖaʋ. Ɛsɔɔlɩ-ɖʋ siŋŋ nɛ pʋyɔɔ lɛ, ye ɖɩñɔnɩ-ɩ kpam yɔ, nabʋyʋ ɛɛpɩzɩɣ pɩcɛ ɖa nɛ ɩ ɖa-taabalɩyɛ. (Roma 8:38, 39) Grɛɛkɩ tɔm piye nɖɩ pɛɖɛzaa se “siŋŋ” yɔ, ɖitukuuni ɛyʋ weyi ɛñakɩ pana siŋŋ se ɛlɩzɩ sɔɔlɩm nɛ ɛwɩlɩ yɔ. Nabʋyʋ taa, pɩfɛyɩ kɛlɛʋ se ɖɩwɩlɩ sɔɔlɩm ɖo-koobiya. Alɩwaatʋ ndʋ lalaa ɖʋʋ-ɖʋ ɖɩwɩzɩyɛ yɔ, pɩcɛyaa se ɖiwolo pɩ-yɔɔ nɛ ‘ɖɩɖɔkɩ ɖa-tɩ ɖama lakasɩ yɔɔ nɛ sɔɔlɩm, ɖɩñaɣ pana siŋŋ nɛ nɔɔ kʋɖʋmaɣ ŋga fezuu yeba nɛ ɖɩwɛɛna yɔ, kɛwɛɛ mbʋ tam laŋhɛzɩyɛ tomiye nɖɩ ɖɩhɔkɩ-ɖʋ nɛ ɖama yɔ ɖɩ-taa.’ (Efɛz. 4:1-3) Ye ɖɩñakɩ pana se laŋhɛzɩyɛ ɛwɛɛ ɖa nɛ ɖo-koobiya ɖɛ-hɛkʋ taa yɔ, ɖɩɩkaɣ kam ɖa-lɩmaɣza pɛ-ɛjandʋ yɔɔ. Ðɩkaɣ ñaɣʋ pana nɛ ɖɩnaɣ ɖo-koobiya ɛzɩ Yehowa naɣʋ-wɛ yɔ.—1 Sam. 16:7; Keɣa 129:3.

11. Ɛbɛ yɔɔ pɩpɩzɩɣ nɛ pɩwɛɛ kaɖɛ nabʋyʋ taa se ɛyʋ ɛwɛɛnɩ sɔɔlɩm sɔsɔm?

¹¹ Pɩfɛyɩ kɛlɛʋ paa ɛzɩmtaa se ɖɩwɩlɩ sɔɔlɩm sɔsɔm ɖo-koobiya, kɔzɩ kɔzɩ alɩwaatʋ  ndʋ ɖɩtɩlɩɣ pɛ-ɛjandʋ yɔ. Pɩwɛ ɛzɩ pɩɩwɛ kaɖɛ kajalaɣ pɩnzɩ mɩnʋʋ taa Krɩstʋ ñɩma nabɛyɛ se pawɩlɩ sɔɔlɩm sɔsɔm po-koobiya yɔ. Kɩɖaʋ nakʋyʋ yɔ: Pɩtʋʋ fɛyɩ se nɔɔ kʋɖʋmaɣ kaawɛ Evoodii nɛ Sɛntiisi pɛ-hɛkʋ taa alɩwaatʋ ndʋ ‘pañakaɣ pana [Pɔɔlɩ] cɔlɔ tɔm kɩbandʋ yɔɔ yɔ.’ Ɛlɛ lɩmaɣza naayɛ yɔɔ lɛ, pɩkɔm nɛ pɩwɛɛ-wɛ kaɖɛ se panɩɩnɩ ɖama. Pʋyɔɔ lɛ, Pɔɔlɩ seɣti-wɛ “se pɛwɛɛnɩ maɣzɩm kʋɖʋmʋm Kɩbaɣlʋ taa.”—Fil. 4:2, 3.

12. Ɛzɩma ɖɩpɩzɩɣ ɖɩla nɛ ɖɩwɛɛnɩ sɔɔlɩm sɔsɔm ɖo-koobiya yɔɔ?

¹² Ɛzɩma ɖɩpɩzɩɣ ɖɩla nɛ ɖɩwɛɛnɩ sɔɔlɩm sɔsɔm ɖo-koobiya yɔɔ sɔnɔ? Ye ɖɩñaɣ pana nɛ ɖɩtɩlɩ ɖo-koobiya camɩyɛ yɔ, pɩwɛɣ-ɖʋ kɛlɛʋ se ɖɩnɩɩ pɔ-tɔm taa nɛ ɖɩwɩlɩ-wɛ sɔɔlɩm sɔsɔm. Ða nɛ wɛ ɖɩpɩzɩɣ nɛ ɖɩɖʋ taabalɩyɛ, paa pakɩlɩ-ɖʋ pɩnzɩ yaa ɖɩkɩlɩ-wɛ, yaa ɖa nɛ wɛ ɖɩtɩkaa sɔnzɩ yɔ. Taasɔɔ se Yonataanɩ kaakɩlɩ Daviid nɛ pɩnzɩ 30 mbʋ yɔ, paa mbʋ yɔ, ɛ nɛ ɩ paɖʋ taabalɩyɛ nɛ ɖɩcɛyɩsɩ siŋŋ. Nɔɔyʋ wɛ ñɛ-ɛgbɛyɛ taa nɛ ɛkɩlɩ-ŋ pɩnzɩ yaa ŋkɩlɩ-ɩ nɛ ña nɛ ɩ ɩpɩzɩɣ nɛ ɩɖʋ taabalɩyɛ na? Ye ŋlakɩ mbʋ yɔ, ŋwɛɛ nɛ ŋwɩlɩɣ se “[ŋsɔɔlɩ] ɛjaɖɛ kpeekpe yɔɔ koobiya.”—1 Pɩy. 2:17.

13. Ɛbɛ yɔɔ ɖa nɛ ɛgbɛyɛ taa ñɩma nabɛyɛ ɖa-taabalɩyɛ pɩzɩɣ ɖɩcɛyɩsɩ nɛ pɩkɩlɩ ɛyaa lalaa?

¹³ Ye pɔtɔm se ɖɩwɛɛnɩ sɔɔlɩm sɔsɔm ɖo-koobiya yɔɔ yɔ, ɛzɩ pɩwɩlɩɣ se ɖa nɛ paa ɛgbɛyɛ taa tʋ weyi lɛ ɖa-taabalɩyɛ kaɣ cɛyɩsʋʋ siŋŋ na? Aayɩ, pɩɩpɩzɩɣ nɛ pɩla mbʋ. Ye ɖa nɛ ɛyaa nabɛyɛ ɖa-taabalɩyɛ ɛcɛyɩsaa nɛ pɩkɩlɩ ɛyaa lalaa mbʋ pʋyɔɔ yɔ, mbʋ pɩkɛdɩɣnɩ-wɛ yɔ pɩkɛdɩɣnɩ ɖa ɖɔɖɔ yɔ, pɩtɩwɩlɩ se kokoko lɛ pɩwɛɛkaa. Yesu kaaya ɛ-apostoloowaa tɩŋa se “taabalaa,” ɛlɛ ɛ nɛ Yohanɛɛsɩ pa-taabalɩyɛ kaacɛyɩsɩ siŋŋ nɛ pɩkɩlɩ. (Yoh. 13:23; 15:15; 20:2) Paa mbʋ yɔ, Yesu taalakɩ Yohanɛɛsɩ camɩyɛ nɛ pɩkɩlɩɣ lalaa. Alɩwaatʋ ndʋ Yohanɛɛsɩ nɛ ɛ-ɖalʋ Yakubu pɔpɔzɩ Yesu se ɛha-wɛ lone sɔsɔɖɛ naɖɩyɛ Ɛsɔ Kewiyaɣ taa yɔ, Yesu heyi-wɛ se: “Me-nesi kɩbanzɩ nɛ ma-nɩmɩyɛ yɔɔ caɣʋ lɛ, pɩtɩkɛ mahaɣnɩ lona ana.” (Mark. 10:35-40)  Ɛzɩ Yesu yɔ, pɩtɩpɔzɩ se ɖɩla mba ɖa nɛ wɛ ɖa-taabalɩyɛ cɛyɩsaa nɛ pɩkɩlɩ yɔ camɩyɛ nɛ pɩkpaɖɩ ɛyaa lalaa. (Yak. 2:3, 4) Ye ɖɩlakɩ mbʋ yɔ, ɖɩkɔŋnɩ tayʋʋ ɛgbɛyɛ taa nɛ pɩtɩpɔzɩ se wɛtʋ ndʋ tɩwɛɛ Krɩstʋ ɛgbɛyɛ taa.—Yud. 17-19.

14. Ɛzɩma tɔm ndʋ tɩwɛ Filiipi mba 2:3 taa yɔ, tɩsɩɣnɩ-ɖʋ se ɖɩtaalʋkɩ se ɖɩkpaɖɩ ɛyaa lalaa?

¹⁴ Alɩwaatʋ ndʋ ɖɩwɩlɩɣ ɖama sɔɔlɩm sɔsɔm yɔ, piyeki nɛ ɖɩɩkaɣ lʋbʋ se ɖɩkpaɖɩ ɛyaa lalaa ɛgbɛyɛ taa. Tɔzɩ se Yonataanɩ taasʋsɩ Daviid nɛ ɛtaalʋ se ɛkɛ wiyaʋ Daviid lone taa. Ða-tɩŋa ɖɩpɩzɩɣ nɛ ɖɩmaɣzɩnɩ Yonataanɩ kɩɖaʋ. Taasʋsɩ ño-koobiya mbʋ pʋyɔɔ yɔ pɛwɛ niye hɔɔlɩŋ nɩɩyɩ taa, ‘ɛlɛ luzi ña-tɩ nɛ ŋkpaɣ lalaa se pakɩlɩ-ŋ.’ (Kalɩ Filiipi mba 2:3.) Tɔzɩ se paa weyi ɛpɩzɩɣ nɛ ɛla nabʋyʋ nɛ ɛɖʋ nesi ɛgbɛyɛ. Ye ɖiwobi pɩ-yɔɔ nɛ ɖɩwɛɛnɩ tɩ luzuu yɔ, ɖɩkaɣ pɩzʋʋ nɛ ɖɩna ɖo-koobiya wɛtʋ kɩbandʋ, nɛ ɖɩkpɛlɩkɩ lɔŋ pa-kɩɖaŋ kɩbaŋ taa.—1 Kɔr. 12:21-25.

15. Mbʋ pɩtalɩ Tanya nɛ ɛ-hɔʋ yɔ, ɛbɛ pɩkpɛlɩkɩɣ-ŋ?

¹⁵ Alɩwaatʋ ndʋ ɖɩkatɩɣ kala wena ɖɩtaaɖʋna yɔ, Yehowa tɩŋɩɣnɩ sɔɔlɩm sɔsɔm mbʋ ɖo-koobiya wɩlɩɣ-ɖʋ nɛ mbʋ palakɩ ɖeyi ɖeyi se pasɩnɩ-ɖʋ yɔ pɩ-yɔɔ nɛ ɛhɛzɩɣ ɖa-laŋa. Kɩɖaʋ nakʋyʋ yɔ: Lʋlɩyaa nabɛyɛ nɛ pe-piya naadozo paawobi pɩnaɣ 2019 kigbeɣluu sɔsɔʋ ŋgʋ palabɩ Etaazuunii ɛjaɖɛ taa yɔ. Kɩ-ñʋʋ yɔ: “Sɔɔlɩm ɛɛtɛŋ kpa!” Mazaɣ wiye palɩnɩ kigbeɣluu nɛ pekpeŋ lɛ, lɔɔɖɩyɛ naɖɩyɛ yɔkɩ pɔ-lɔɔɖɩyɛ. Tanya weyi ɛkɛ hɔʋ ɖoyo yɔ ɛyɔɔdaa se: “Pɩtɩkʋ ɖa-taa nɔɔyʋ, ɛlɛ sɔɔndʋ kaakpa-ɖʋ siŋŋ nɛ ɖɩlɩɩ lɔɔɖɩyɛ taa nɛ ɖɩsɩŋ habɩyɛ yɔɔ. Peeɖe nɔɔyʋ ya-ɖʋ se ɖɩkɔɔ nɛ ɖɩsʋʋ ɛ-lɔɔɖɩyɛ taa nɛ pɩkandɩyɩ ɖɔ-yɔɔ. Pɩɩkɛ ɖo-koobu  nɔɔyʋ, ɛlɛ ɖɔɖɔ ɛɛlɩnɩ kigbeɣluu nɛ ekpeŋ. Nɛ pɩtaakɛ e-ɖeke ɛɛsɩŋna. Aseɣɖe Tɩnaa kagbanzɩ mba palɩnɩ Suyɛɛdɩ nɛ pɔkɔɔ kigbeɣluu taa yɔ, paba ɖɔɖɔ paasɩŋaa. Koobiya halɩñɩma mba paawɛ pa-taa yɔ, pekpibi ma nɛ mɛn-pɛlɛ nɛ taa leleŋ nɛ piyeba nɛ ɖa-laŋɩyɛ hɛɛ! Maaheyi koobiya mba pasɩŋaa yɔ se papɩzɩɣ nɛ pɛɖɛɛ, nabʋyʋ ɛɛlakɩ-ɖʋ ɛlɛ petitisi se pɛɖɛɛ nɛ peyebi-ɖʋ. Pacaɣ ɖɔ-cɔlɔ pɩkɔɔ pɩsɩɩnɩ alɩwaatʋ ndʋ fɛɖaa kɔma se pasɩnɩ-ɖʋ yɔ, nɛ paañaɣ pana nɛ pasɩnɩ-ɖʋ nɛ ɖɩwɛɛnɩ mbʋ payɩ pɩpɔzaɣ-ɖʋ yɔ. Alɩwaatʋ kaɖɛ ñɩndʋ ndʋ tɩ-taa, ɖiɖiɣzinaa se Yehowa sɔɔlɩ-ɖʋ. Mbʋ pɩtalɩ-ɖʋ yɔ, pɩkpazɩ ɖoŋ sɔɔlɩm mbʋ ɖɩwɛnɩ ɖo-koobiya yɔɔ yɔ nɛ pɩkpazɩ ɖoŋ ɖɔɖɔ sɔɔlɩm nɛ ɛsɩmɩyɛ nɖɩ ɖɩwɛnɩ Yehowa yɔɔ yɔ.” Ŋtɔzʋʋ alɩwaatʋ ndʋ pɩɩpɔzaa se pasɩnɩ-ŋ nɛ ño-koobu nɔɔyʋ wɩlɩ-ŋ sɔɔlɩm sɔsɔm yɔ tɩ-yɔɔ?

16. Lɩmaɣza wena yɔɔ ɖɩsɔɔlaa se ɖɩwɩlɩ ɖama sɔɔlɩm sɔsɔm?

¹⁶ Alɩwaatʋ ndʋ ɖɩwɩlɩɣ ɖama sɔɔlɩm sɔsɔm yɔ, pɩlʋlʋʋ pee kɩbana. Maɣzɩ a-yɔɔ nɛ ŋna. Ðɩhɛzɩɣ ɖo-koobiya laŋa alɩwaatʋ ndʋ pakatɩɣ tɩlasɩ yɔ. Ðɩkpazɩɣ ɖoŋ nɔɔ kʋɖʋmaɣ ŋga kɛwɛ Ɛsɔ samaɣ taa yɔ. Ðɩwɩlɩɣ se ɖɩkɛ Yesu tɔmkpɛlɩkɩyaa, nɛ pɩhɔŋ laŋa kɩbana tɩnaa se pɔkɔɔ toovenim Ɛsɔ sɛtʋ taa. Kɔzɩ kɔzɩ lɛ, ɖɩɖʋʋ hɩɖɛ “pʋtɔdɩyɛ naʋ siŋŋ Caa nɛ laŋɩyɛ hɛzʋʋ kpeekpe tɛ Ɛsɔ” Yehowa. (2 Kɔr. 1:3) Tɛtɛ nɛ ɖa-tɩŋa ɖiwolo pɩ-yɔɔ nɛ ɖɩwɛɣnɩ sɔɔlɩm sɔsɔm nɛ ɖɩwɩlɩɣ-pʋ!