1. Kʼaru nakʼutbʼesink re, naq saʼebʼ li qakutan maakʼaʼ chik li rahok?

LI SANTIL HU naxye naq saʼ rosoʼjikebʼ li kutan ebʼ li kristiʼaan «inkʼaʼ chik teʼxrahatq ribʼ» (2 Tim. 3:1, 3). Ut saʼebʼ li qakutan yook chi tzʼaqlok ru li propesiiy aʼin. Jun eetalil, naabʼalebʼ li naʼbʼej yuwaʼbʼej nekeʼxraq li xsumlajik chiru chaqʼrabʼ, joʼkan naq inkʼaʼ chik sa nekeʼril ribʼ, ut ebʼ li ralal xkʼajol nekeʼrekʼa naq maaʼani chik narahok rehebʼ. Joʼkan ajwiʼ, wankebʼ li junkabʼal li nekeʼwank saʼ jun chi ochoch, abʼan chanchan tawiʼ naq maawaʼebʼ junkabʼal. Jun aj kʼehol naʼlebʼ chirix li junkabʼal naxye: «Li naʼbʼej, li yuwaʼbʼej ut ebʼ li alal kʼajolbʼej inkʼaʼ nekeʼraatina ribʼ, xikenaqebʼ bʼan xchʼool saʼ jun li ululchʼiichʼ, jun li tablet, jun li selular malaj saʼ jun li kʼanjelobʼaal re bʼatzʼunk. Usta wankebʼ saʼ jun chi ochoch, abʼan inkʼaʼ nekeʼxnaw ruhebʼ chiribʼilebʼ ribʼ».

2, 3. a) Joʼ naxye saʼ Romanos 12:10, chirix anihebʼ tento tqakʼutbʼesi li tzʼaqal rahok? b) Kʼaru tqil saʼ li tzolom aʼin?

² Inkʼaʼ naqaj naq li ruuchichʼochʼ aʼin tooxbʼon rikʼin li xnaʼlebʼ (Rom. 12:2). Tento bʼan tqakʼutbʼesi li tzʼaqal rahok chirixebʼ li qechpaabʼanel joʼ naqakʼutbʼesi chirixebʼ li qajunkabʼal (taayaabʼasi Romanos 12:10). Kʼaru naraj xyeebʼal li aatin: «Chera eeribʼ cheribʼil eeribʼ»? Li aatin aʼin saʼ griego yook chi aatinak chirix li rahok li naqekʼa chirixebʼ li qajunkabʼal li naqilebʼ joʼ tzʼaqal qamiiw. Ut aʼan aʼin ajwiʼ li tento tqekʼa chirixebʼ li qechpaabʼanel xbʼaan naq aʼanebʼ ajwiʼ li qajunkabʼal. Wi naqakʼutbʼesi li tzʼaqal rahok, naqatenqʼa qibʼ chiqibʼil qibʼ re kʼanjelak chiru li Jehobʼa saʼ junajil (Miq. 2:12).

³ Saʼ li tzolom aʼin tqil naabʼal li eetalil li natawmank saʼ li Santil Hu li tooxtenqʼa chi xkʼutbʼesinkil li tzʼaqal rahok.

4. Chanru nokooxtenqʼa Salmo 103:8 chi xtawbʼal ru naq li Jehobʼa qʼaxal nokooxra?

⁴ Li Santil Hu naʼaatinak chirix li xchaqʼal ru xnaʼlebʼ li Jehobʼa. Jun eetalil, naxye naq «li Yos aʼan rahok» (1 Juan 4:8). Xnawbʼal aʼin naxbʼaanu naq tqaj jilok chixkʼatq li Jehobʼa. Abʼan, li Santil Hu naxye ajwiʼ naq «li Qaawaʼ [...] numtajenaq xrahom» (taayaabʼasi Salmo 103:8). Kʼajoʼ xchʼinaʼusal li aatin li naroksi li Jehobʼa re xyeebʼal qe li narekʼa chiqix!

5. Chanru naxkʼutbʼesi li uxtaanank u li Jehobʼa, ut chanru naru naqakʼam qe rikʼin?

⁵ Qakʼehaq reetal naq li rahok li naʼaatinak wiʼ Salmo 103:8 naxchap ribʼ rikʼin jun chik li xchaabʼil naʼlebʼ li Jehobʼa: aʼ li uxtaanank u (Éx. 34:6). Li Jehobʼa naxkʼutbʼesi naq naruxtaana qu naq naxkuy naxsach qamaak (Sal. 51:3). Abʼanan, naq li Santil Hu naʼaatinak chirix li uxtaanank u moko kaʼaj tawiʼ naʼaatinak chirix li kuyuk maak. Li uxtaanank u nasiyank chaq saʼ xchʼool junaq li kristiʼaan ut aʼin li naʼekʼasink re chi xtenqʼankil li yook xkʼulbʼal li rahilal. Li Santil Hu naxye naq qʼaxal nim li xrahom li Jehobʼa chiqix chiru li xrahom junaq li naʼbʼej chirix li ralal xkʼajol, joʼkan naq aʼan naraj qatenqʼankil (Is. 49:15). Naq naqakʼul junaq li rahilal, li uxtaanank u naʼekʼasink re li Jehobʼa re qatenqʼankil (Sal. 37:39; 1 Cor. 10:13). Laaʼo ajwiʼ naru naqakʼam qe rikʼin li Jehobʼa naq naqakuyebʼ xmaak ebʼ li qechpaabʼanel ut naq inkʼaʼ naqaxok saʼ qachʼool li xpaltilebʼ usta nekeʼxrahobʼtesi qachʼool (Efes. 4:32). Abʼan, li xnimal ru naʼlebʼ re xkʼutbʼesinkil li uxtaanank u aʼan naq naqatenqʼahebʼ naq nekeʼxkʼul ebʼ li rahilal. Kaʼajwiʼ li Jehobʼa qʼaxal narahok, ut naqakʼam qe rikʼin naq li rahok naʼekʼasink qe chi xkʼutbʼesinkil li uxtaanank u (Efes. 5:1).

6. Chanru xeʼxkʼutbʼesi li tzʼaqal rahok chiribʼilebʼ ribʼ laj Jonatán ut laj David?

⁶ Saʼ li Santil Hu natawmank naabʼal li eetalil chirixebʼ li kristiʼaan li xeʼxkʼutbʼesi li tzʼaqal rahok chiribʼilebʼ ribʼ. Qilaq li kixbʼaanu laj Jonatán ut laj David. Li Santil Hu naxye naq «li  xchʼool laj Jonatán kixjunaji ribʼ rikʼin li xchʼool laj David, ut laj Jonatán kixra laj David joʼ naxra ribʼ aʼan» (1 Sam. 18:1). Li Jehobʼa kixsikʼ ru laj David re naq aʼan t-oq joʼ awabʼej choʼq reqaj laj Saúl li xyuwaʼ laj Jonatán. Laj Saúl kʼajoʼ naq kixkaqali laj David ut qʼaxal kijosqʼoʼk rikʼin, joʼkan naq kixyal xkamsinkil. Abʼan laj Jonatán inkʼaʼ kiʼokenk chirix li xyuwaʼ re xkamsinkil laj David. Laj Jonatán ut laj David xeʼxkʼe li raatin naq junelik teʼwanq saʼ amiiwil ut naq teʼxtenqʼa ribʼ chiribʼilebʼ ribʼ (1 Sam. 20:42).

7. Kʼaru raj kiruuk xrambʼal chiruhebʼ laj Jonatán ut laj David wank saʼ amiiwil?

⁷ Nasach qachʼool chi xkʼebʼal reetal naq laj Jonatán ut laj David xeʼruuk chi wank saʼ amiiwil xbʼaan naq naabʼal li naʼlebʼ kiruuk raj xrambʼal chiruhebʼ xbʼaanunkil aʼin. Jun eetalil, laj Jonatán numenaq tana 30 chihabʼ asbʼej chiru laj David. Joʼkan naq kiruuk raj xkʼoxlankil naq moko naru ta nawank saʼ amiiwil rikʼin jun li saaj li moko naabʼal ta xnawom. Usta joʼkan, laj Jonatán maajunwa kixkʼoxla chi moko kixye naq maakʼaʼ naʼok wiʼ laj David.

8. Kʼaʼut nakaakʼoxla laaʼat naq laj Jonatán kiwank joʼ jun chaabʼil amiiw choʼq re laj David?

⁸ Joʼkan ajwiʼ, laj Jonatán kiruuk raj xkaqalinkil laj David, ut xbʼaan naq aʼan li ralal laj Saúl, kiruuk raj xyeebʼal naq aʼan wank xkʼulubʼ re kanaak choʼq reqaj li xyuwaʼ (1 Sam. 20:31). Abʼan laj Jonatán kixkubʼsi xwankil ut inkʼaʼ kixtzʼeqtaana li Jehobʼa, joʼkan naq chi anchal xchʼool kixkʼulubʼa naq li Jehobʼa kixye naq tixkʼe li awabʼejilal re laj David. Inkʼaʼ ajwiʼ kixtzʼeqtaana laj David usta aʼin kixbʼaanu naq qʼaxal tjosqʼoʼq laj Saúl (1 Sam. 20:32-34).

9. Chanru naqanaw naq laj Jonatán inkʼaʼ kixkaqali laj David?

⁹ Li tzʼaqal rahok li kixkʼutbʼesi laj Jonatán chirix laj David kixbʼaanu naq inkʼaʼ tixkaqali. Laj Jonatán kaw chaq xchʼool chi yalok ut naxnaw chaq roksinkil chiʼus li simaj. Nayeemank chaq naq aʼan ut li xyuwaʼ «qʼaxal seebʼebʼ chiruhebʼ li tʼiw ut qʼaxal kawebʼ ribʼ chiruhebʼ li kaqkoj!» (2 Sam. 1:22, 23). Joʼkan naq laj Jonatán kiruuk raj xnimobʼresinkil ribʼ xbʼaan naq us naʼelk saʼebʼ li yalok. Abʼan, inkʼaʼ kixjuntaqʼeeta ribʼ rikʼin laj David chi moko kixkaqali naq aʼan us kiʼelk saʼ xyuʼam. Oxloqʼ bʼan chaq chiru naq laj David inkʼaʼ naxuwak ut naq naxkʼojobʼ xchʼool rikʼin li Jehobʼa. Relik chi yaal, laj Jonatán kiʼok chi xraabʼal laj David naq aʼan kixkamsi laj Goliat. Chanru tooruuq xkʼutbʼesinkil li rahok aʼin chirixebʼ li qechpaabʼanel?

10. Kʼaru naraj xyeebʼal li aatin: «Qʼaxal bʼiʼ naq cherahaq eeribʼ chi saqaq ru leechʼool»?

¹⁰ Li Santil Hu naxye: «Qʼaxal bʼiʼ naq cherahaq eeribʼ chi saqaq ru leechʼool» (1 Ped. 1:22). Li Jehobʼa aʼan li xnimal ru eetalil chirix li rahok. Aʼan qʼaxal nokooxra, joʼkan naq wi inkʼaʼ naqatzʼeqtaana, maakʼaʼ naru najachok qe rikʼin (Rom. 8:38, 39). Li aatin saʼ griego li najalmank ru joʼ «qʼaxal» yook chi aatinak chirix jun li kristiʼaan li jwal naxyal xqʼe chi xkʼutbʼesinkil li rahok, ut maare aʼin tento tqakʼutbʼesi chirix wiibʼ oxibʼ li qechpaabʼanel. Li Santil hu naxye qe kʼaru tento tqabʼaanu naq nokoochʼaʼajkoʼk rikʼin junaq li hermaan: «Chekuyaq eeribʼ cheribʼil eeribʼ rikʼin rahok, cheyalaq eeqʼe chi xkʼuulankil li junajil li nachalk rikʼin li Musiqʼej, saʼ xkʼabʼaʼ li tuqtuukilal li najitʼok eere» (Efes. 4:1-3). Wi naqaj naq junelik wanq «li tuqtuukilal li najitʼok» qe, miqakʼe saʼ qu li xpaltilebʼ li qechpaabʼanel, qayalaq bʼan qaqʼe chi rilbʼalebʼ joʼ nekeʼileʼk xbʼaan li Jehobʼa (1 Sam. 16:7; Sal. 130:3).

11. Kʼaʼut naq wank sut qʼaxal nachʼaʼajkoʼk chiqu xkʼutbʼesinkil li tzʼaqal rahok?

¹¹ Wank sut qʼaxal nachʼaʼajkoʼk chiqu xkʼutbʼesinkil li tzʼaqal rahok chirixebʼ li qechpaabʼanel,  qʼaxal chik naq junelik yooko xkʼebʼal saʼ qu li xpaltilebʼ. Chanchan tawiʼ naq ak yook chaq chi kʼulmank aʼin saʼ xkutankilebʼ li apóstol. Jun eetalil, chanchan naq li xʼEvodia ut li xSíntique inkʼaʼ kichʼaʼajkoʼk chaq chiruhebʼ kʼanjelak rochbʼen laj Pablo «chirix li Chaabʼil Esilal». Abʼan, inkʼaʼ sa nekeʼril ribʼebʼ. Joʼkan naq laj Pablo kixye rehebʼ «naq junajaq xkʼaʼuxebʼ joʼ naraj li Qaawaʼ» (Filip. 4:2, 3).

12. Kʼaru tqabʼaanu re xkʼutbʼesinkil li tzʼaqal rahok chirixebʼ li qechpaabʼanel?

¹² Kʼaru tqabʼaanu re xkʼutbʼesinkil li tzʼaqal rahok chirixebʼ li qechpaabʼanel? Qanawaq ruhebʼ chiʼus. Chi joʼkan, moko tchʼaʼajkoʼq ta chiqu xtawbʼal ruhebʼ ut xkʼutbʼesinkil naq naqarahebʼ. Naru nokoowank saʼ amiiwil rikʼinebʼ maakʼaʼ naxye li xchihabʼebʼ malaj bʼar chalenaqebʼ. Qajultikaq naq laj Jonatán kiwank saʼ tzʼaqal amiiwil rikʼin laj David usta numenaq tana 30 chihabʼ asbʼej chiru. Kʼaʼut naq inkʼaʼ nakaasikʼ choʼq aawamiiw junaq li hermaan saʼ laachʼuut li cheek malaj saaj chaawu? Wi nakaabʼaanu, taakʼutbʼesi naq qʼaxal nakaarahebʼ laawechpaabʼanel (1 Ped. 2:17).

13. Kʼaʼut naq inkʼaʼ naru nokoowank saʼ tzʼaqal amiiwil rikʼin chixjunilebʼ li hermaan?

¹³ Abʼanan, naq naqaye naq naqarahebʼ li qechpaabʼanel aʼan moko naraj ta xyeebʼal naq chixjunilebʼ wankebʼ joʼ tzʼaqal qamiiw. Ak re, naq rikʼin wiibʼ oxibʼ li hermaan sa naqekʼa qibʼ xbʼaan naq juntaqʼeet li naʼlebʼ li nawulak chiqu. Relik chi yaal, li Jesús kirilebʼ chixjunilebʼ li xʼapóstol joʼ ramiiw, abʼan qʼaxal naxra chaq laj Juan (Juan 13:23; 15:15; 20:2). Usta joʼkan, li Jesús moko kixkʼe ta xbʼeenwa laj Juan chiruhebʼ li junchʼol. Jun eetalil, naq laj Juan ut laj Santiago xeʼxtzʼaama re li Jesús naq teʼkʼojlaaq saʼ li naʼaj li jwal wank xwankil saʼ li Xʼawabʼejilal li Yos, li Jesús kixye rehebʼ: «Li kʼojlaak saʼ linnim uqʼ malaj saʼ lintzʼe moko laaʼin ta yaal we xkʼeebʼal» (Mar. 10:35-40). Laaʼo ajwiʼ tento tqakʼam qe rikʼin li Jesús, joʼkan naq miqakʼe xbʼeenwa ebʼ li tzʼaqal qamiiw chiruhebʼ li junchʼol chi hermaan (Sant. 2:3, 4). Wi naqakʼe xbʼeenwa ebʼ li tzʼaqal qamiiw, tqakʼam chaq li jachok ibʼ saʼ xyanqebʼ li hermaan ut aʼin moko naru ta nawank saʼ li chʼuut (Jud. 17-19).

14. Joʼ naxye saʼ Filipenses 2:3, kʼaru ttenqʼanq qe re naq inkʼaʼ tqakʼoxla naq qʼaxal seebʼo chiruhebʼ li qechpaabʼanel?

 ¹⁴ Li tzʼaqal rahok nokooxtenqʼa re naq inkʼaʼ tqakʼoxla naq qʼaxal seebʼo chiruhebʼ li qechpaabʼanel. Qajultikaq naq laj Jonatán moko kixkaqali ta laj David chi moko kixyal xkʼebʼal ribʼ choʼq awabʼej. Qakʼamaq qe rikʼin laj Jonatán ut miqakaqali ebʼ li qechpaabʼanel xbʼaan li xseebʼalebʼ xchʼool. Qabʼaanuhaq bʼan li kixye laj Pablo: «Chekubʼsiiq bʼan eewankil; li junjunq tixkʼoxla naq ebʼ li xkomon qʼaxal ninqebʼ chik xwankil chiru» (taayaabʼasi Filipenses 2:3). Chʼolchʼooq chiqu naq li junjunq chi qechpaabʼanel nekeʼtenqʼank saʼ li chʼuut. Wi naqakubʼsi qibʼ tqakʼe reetal li xchaabʼilal ru xnaʼlebʼebʼ li qechpaabʼanel ut tqatzol qe rikʼinebʼ (1 Cor. 12:21-25).

15. Kʼaru nakaatzol rikʼin li kixkʼul li xTanya ut li xjunkabʼal?

¹⁵ Naq naqakʼul junaq li rahilal, li Jehobʼa naxkʼojobʼ qachʼool saʼ xkʼabʼaʼ li tzʼaqal rahok ut li tenqʼ li nekeʼxkʼe qe ebʼ li qechpaabʼanel. Qilaq li xkʼulmank rikʼin jun li junkabʼal saʼ sábado naq ak xraqeʼk jun li nimla chʼutam bʼarwiʼ xeʼtzʼaqonk naabʼal li tenamit li naxkʼabʼaʼi «Li rahok maajoqʼe naʼosoʼk» li kiʼuxmank saʼ 2019 aran Estados Unidos. Li xTanya li wank oxibʼ ralal xkʼajol naxseeraqʼi naq, naq yookebʼ chi sutqʼiik saʼ bʼelebʼaal chʼiichʼ saʼ li naʼaj bʼarwiʼ yookebʼ chi kanaak, jun chik li bʼelebʼaal chʼiichʼ kixchʼik ribʼ saʼ xbʼehebʼ ut kixtochʼ ribʼ rikʼinebʼ. Aʼan naxye: «Maaʼani kixkʼul li rahilal, abʼan chi sachso qachʼool xooʼelk saʼ li bʼelebʼaal chʼiichʼ. Tojaʼ naq xqil jun li bʼelebʼaal chʼiichʼ xaqxo chire bʼe ut chisaʼ wank jun li winq li yook chaq xkʼutbʼal li ruqʼ chiqu re naq tooxik bʼarwiʼ wank. Aʼan peʼ jun li hermaan li kiwulak ajwiʼ saʼ li nimla chʼutam. Ut moko kaʼaj tawiʼ aʼan kixxaqabʼ li xbʼelebʼaal  chʼiichʼ, joʼkan ajwiʼ xeʼxbʼaanu oobʼ li hermaan li nekeʼchalk Suecia. Ebʼ li hermaan ixq xeʼxqʼalu linkoʼ ut xineʼxqʼalu ajwiʼ laaʼin, ut aʼan tzʼaqal li naʼajmank raj chiqu. Usta xqaye rehebʼ naq maakʼaʼ xqakʼul, abʼan xeʼkanaak chi qochbʼeninkil. Inkʼaʼ xooʼeʼxkanabʼ qajunes usta xeʼwulak ebʼ laj bʼanonel, ut xeʼxyal xqʼe re naq maakʼaʼ tpaltoʼq chiqu. Chiru li hoonal aʼan, junelik xqekʼa naq li Jehobʼa nokooxra. Naq xqakʼul aʼan xkʼiik li qarahom chirixebʼ li qechpaabʼanel. Joʼkan ajwiʼ, qʼaxal kikʼiik li qarahom chirix li Jehobʼa, ut chalen li hoonal aʼan, qʼaxal naqabʼanyoxi re li naxbʼaanu saʼ qakʼabʼaʼ». Ma jultik aawe jun li kutan naq jun li hermaan kixkʼutbʼesi li tzʼaqal rahok chaawix naq qʼaxal kiʼajmank chaawu?

16. Kʼaʼut tento tqakʼutbʼesi li tzʼaqal rahok chiqibʼil qibʼ?

¹⁶ Kʼaru rusilal tqataw wi naqakʼutbʼesi li tzʼaqal rahok chiqibʼil qibʼ? Tqakʼojobʼ xchʼoolebʼ li qechpaabʼanel naq yooqebʼ xkʼulbʼal junaq li rahilal ut tootzʼaqonq re naq twanq li tzʼaqal junajil saʼ li xtenamit li Yos. Joʼkan ajwiʼ, tqakʼutbʼesi naq laaʼo tzʼaqal xtzolom li Kriist, ut aweʼ tixbʼaanu naq jalanebʼ chik kristiʼaan teʼraj kʼanjelak chiru li Yos. Abʼan li qʼaxal wank xwankil aʼan naq tqakʼe xloqʼal li Jehobʼa, «li Yuwaʼbʼej aj uxtaan ut li Yos qʼaxal aj kʼojobʼanel chʼoolej» (2 Cor. 1:3). Joʼkan bʼiʼ, chiqajunilo qakʼehaq qachʼool chi xkʼutbʼesinkil li tzʼaqal rahok chiqibʼil qibʼ.