1. Ihi ilondekesa kwila, lelu sayi miji yavulu kadizolo?

O BIBIDYA yakanena kwila mu izuwa isukidilaku, o athu ‘kejilondekesa henda,’ kifwa kejilondekesa ohenda yedikisa o athu atokala kumwiji umoxi. (2 Tim. 3:1, 3) Lelu twamumona kwila, opolofesiya yiyi yamudikumbidila. Mukifika, mazunda ni mazunda amiji adimwange mukonda dyakubatula o ukaza. Ojitata azoka mudyâ, otwana kadivu kwila a azolo kujitata jâ. Katé mwene jindandu atungu mu inzo imoxi, atena kudivwa kwila kadizolo. Sayi muthu wala ni ufunu wakubhana jindunge kumiji, wambe: “Tata, mama ni twana, kadisuwa mudyâ, asuwa dingi omitelembe, ojikomputadolo, jitelefone ni jividyongeme. Sumbala atungu mu inzo imoxi, maji ene kadijiya kyambote.”

2-3. (a) Kala kilondekesa Loma 12:10, twatokala kuzola ananyi? (b) Ihi itwandamona mumilongi yiyi?

² Etu kitumesena kwila omundu yú wayibha wakambe ohenda utufwinyisa. (Loma 12:2) Muveji dya kiki, twamesena kudizola mudyetu ni kidi kyoso. Kitumesena kulondekesa ngó ohenda yiyi kujindandu jetu muxitu, maji twamesena ku ilondekesa we kumwiji wetu munzumbi, kifwa ojiphange jetu. (Tanga Loma 12:10.) Kyoso kituzola ojiphange jetu ni muxima woso, tudizukama dingi mudyetu. Okukala kumoxi, kima kyala ni valolo yadikota mu ubhezelu wakidi. Okulondekesa henda kujiphange jetu kukwatekesa oso kusidivila Jihova kumoxi ni kusanguluka.—Mik. 2:12.

³ Ihi itena kutukwatekesa kubandekesa ohenda yetu ni ku  ilondekesa kujiphange jetu ni muxima woso. Twandamona ihi itutena kudilonga kuphangu ya athu a atange mu Bibidya.

4. Omukanda wa Tiyaku 5:11 itulondekesa ihi yalungu ni henda ya Jihova?

⁴ O Bibidya itulondekesa o idifwa ya Jihova. Mukifika, o Bibidya izwela kwila “Nzambi henda.” (1 Nzwá 4:8) Okwijiya okidi kiki, kutubhangesa kukala makamba a Jihova. Maji o Bibidya itutangela we kwila Jihova “wavula o kukwatela henda.” (Tanga Tiyaku 5:11.) Kima kyambote kwijiya kwila, Jihova katuzolo ngó kana, maji usuwa muthu ni mudyetu!

5. Kyebhi Jihova kyakwatela henda ni kyebhi kitutena kukayela ophangu yê?

⁵ Omukanda wa Tiyaku 5:11, isokesa o ukexilu wa Nzambi wakuzola ni kidifwa kyamukwa, okukwatela henda. (Mak. 34:6) Mukifika, Jihova utukwatela henda, mukuloloka o ituxi yetu. (Jisá. 51:1) Maji mu Bibidya okukwatela henda kikwalungu ngó ni kuloloka. Okukwatela henda kidifwa kyakatunda, kiswinisa omuthu kukwatekesa yó wamutala hadi. Jihova wambe kwila, ovondadi yê yakutukwatekesa, yabeta dingi kota, oya mama kwa monê, ndenge. (Iza. 49:15) Ohenda yene iswinisa Jihova kutukwatekesa kyoso kitubhita mujiphaxi. (Jisá. 37:39; 1 Kol. 10:13) Etu tulondekesa kwila twazolo ojiphange jetu, kyoso kitwaloloka ni kukamba kwabhakela phonzo. (Efe. 4:32) Maji o ukexilu wabetakota wakukwatela henda kujiphange jetu okwakwatekesa kyoso kyadibhana ni maka kumwenyu. Kyoso ohenda ituswinisa kukwatekesa akwetu, etu tukayela Jihova, ophangu yabetakota mukubhanga kiki.—Efe. 5:1.

6. Kyebhi kyexile o ukamba wa Jonata ni Davidi?

⁶ Mu Bibidya mwala misoso yavulu ya athu exile makamba ambote, sumbala exile akwa ituxi. Phangu imoxi ya Jonata ni Davidi. Obibidya yamba: “Bhenyobo anga kibhita kwila kyazubha Davidi kuzwela ni Sawulu, muxima wa Jonata utakana ni muxima wa Davidi,  Jonata anga uzola Davidi kala kyadizolo mwene.” (1 Sam. 18:1) Jihova wasolele Davidi phala kukala Sobha mukididi kya Sawulu. Kyenyiki, Sawulu wakexile ni difuba dyavulu, yu wamesenene kujibha Davidi. Maji Jonata mona Sawulu kakwatekesa tatê mukubhanga kiki. Jonata ni Davidi adikanena kukala jinga makamba ni kudikwatekesa katé kuhádya ni hádya.—1 Sam. 20:42.

7. Ihi yeji fidisa Jonata kukala dikamba dya Davidi?

⁷ Okima kitubhangesa kudiwana mu ukamba wa Jonata ni Davidi, okumona kwila, kwexile ima yavulu yejikwafidisa kukala makamba. Mukifika, Jonata wexile kota dya Davidi mu 30 amivu. Jonata hinu waxinganeka, Davidi monandenge, mwene kala ni uhete kala eme, kitwasokela mu ima yavulu. Maji nekiki, Jonata kexile mudimona kwila wabetelekota Davidi ndenge.

8. Mudye, mukonda dyahi Jonata wexile dikamba dyambote phala Davidi?

⁸ Jonata hinu wejikala ni difuba dya Davidi. Kuma wexile mon’a Sawulu, Jonata wejibanza kwila, mwene wakexile ni ujitu wakukala Sobha. (1 Sam. 20:31) Maji Jonata wexile muthu walenduka, wexile fiyele kwa Jihova. Mukonda dyakiki, mwene waxikina kyoso Jihova kyasolo Davidi phala kukala Sobha. Mwene walondekesa we o ufiyele we kwa Davidi, sumbala wejidile kwila mukubhanga kiki, wejibhekela njinda kwa tatê.—1 Sam. 20:32-34.

9. Okwila Jonata wexile mumona Davidi kala nguma? Jimbulula

⁹ Jonata wazolele kyavulu Davidi, mukonda dyakiki, kexile mumumona kala nguma. Jonata wejidile kukalakala kyambote ni mifula ni misongo, mwene wexile disoladi dyaswina. Kikale mwene ni tatê a ejidile kala athu “mukulenga lusolo asomboloka jiholokoko, mukuswina kinene atunda jihoji.” (2 Sam. 1:22, 23) Jonata wejitena kudizangeleka mukonda dya ima yoso yabhangele kya. Mwene kexile mukwa kudisokesa ni akwâ, kexile we mukwa lwimbi. Muveji dyakiki, Jonata wexile mudiwana mukumona okuswina kwa Davidi ni kidyelelu kyexile nakyu kwa Jihova. Mukidi kyoso Davidi kyajibha Ngoliya, Jonata wamateka kuzola Davidi kala kyadizolo mwene. Abha etu? Kyebhi kitutena kulondekesa ohenda ya kidi kala yiyi, kujiphange jetu?

10. Ihi ilombolola “okudizola ni muxima wafulujuka?”

¹⁰ O Bibidya yamba: “Dizodyenuphe mudyenu ni muxima wafulujuka.” (1 Phe. 1:22) Jihova mwene watubhana ophangu yakuzola. Mwene watuzolo kyavulu. Kyenyiki se tumukala fiyele kanaku kima kyandatusondolola mu henda yê. (Loma 8:38, 39) Okizwelu “kufulujuka” mudimi dya Ngeleku, kilombolola we kusunga kima katé kudisukilu. Sayi ithangana twandabhinga “kudisunga” mba “kubhanga nguzu” yavulu phala kulondekesa henda kwa phangyetu. Kyoso akwetu kyatuluwalesa twatokala kukolokota “mu londekesa jinga o henda yenu mukudikwatekesa kala muthu ni mukwâ. Mukwata mwanu wa kubhanga kyoso kimwatena mukudibhaka mu usoko wa kwongama kwa mi bhana o Nzumbi, mu dijikita dyê dya paze.” (Efe. 4:1-3) Setwamesena “kukala ni paze” mukilunga, kitwatokala kudikwatenena mu itondalu yajiphange jetu. Twatokala kubhanga nguzu phala kwamona kala kya amona Jihova.—1 Sam. 16:7; Jisá. 130:3.

11. Mukonda dyahi sayi bhabha, kubhonza kuzola ojiphange ni muxima woso?

¹¹ Sayi bhabha kubhonza kuzola ojiphange jetu ni muxima woso, bengebenge kyoso kitumona  o itondalu yâ. Sayi Jikidistá muhama yadyanga nange adibhana we ni maka yá. Mukifika Evódya ni Sindike awabhelele kukalakala kumoxi ni Phawulu “mukuboka onjimbu yambote.” Maji mukonda dyamaka oso oso amoneka bhukaxi kâ, ene kexile mudibhana dingi kyambote. Kyenyiki, Phawulu wa aswinisa kukala ni “muxima umoxi mwa Ngana.”—Fil. 4:2, 3.

12. Kyebhi kitutena kuzola ojiphange jetu ni muxima woso?

¹² Kyebhi kitutena kuzola ojiphange jetu ni muxima woso lelu? Twabhingi kwa ejiya kyambote. Setusota kwijiya kyambote ojiphange jetu, twandakwatendela kyambote, kikwandabhonza kwazola ni muxima woso. Okitala ni ijila ki itokala kutufidisa kuzola ojiphange jetu. Xinganeka muphangu ya Jonata, mwene wexile kota dya Davidi mu 30 amivu, maji nekiki ene exile makamba ambote. Mukilunga kyê, okwila utena kubhanga ukamba ni muthu wala kotadyê mba ndengyê? Mukubhanga kiki, eye wandalondekesa henda ‘kujiphange jê ala kumundu woso.’—1 Phe. 2:17.

13. Mukonda dyahi, sayi bhabha, kitwandatena kukala makamba a athu oso mukilunga?

¹³ Okwila okuzola ojiphange jetu ni muxima woso, kulombolola kwila athu oso mukilunga andakala makamba metu amuxima? Kana, kikyene. Kikima kyayibha kukala dingi dikamba dyamuthu wawabhela o ima iwawabhela we. Jezú wexana ojipoxolo joso kala “makamba,” maji mwene wazolele dingi Nzwá. (Nzwá 13:23; 15:15; 20:2) Maji Jezú kexile mutalatala Nzwá kala wabetelekota, ojipoxolo jamukwá ndenge. Mukifika, kyoso Nzwá ni phangyé Tiyaku kyabhingile kididi kya ungana mu Utuminu wa Nzambi, Jezú wa atangela: “Okuxikama kumadilu mamiphe ni kukyasu, kikyamyeme okukibhana.” (Mál. 10:35-40) Kala Jezú, kitutokala kutalatala ngó kyambote odikamba dyetu dyamuxima, anga ojiphange jamukwa tu atalatala mu ukexilu wengi. (Tiya. 2:3, 4) Sekiki tukibhanga, twandabhangesa okilunga kudiwanuna. Okima kiki, kikitena kubhita mukilunga kya Nzambi.—Juda 17-19.

14. Kala kilondekesa Filipe 2:3, ihi yandatukwatekesa kukamba kudisokesa ni jiphange jetu?

 ¹⁴ Kyoso kituzola ojiphange jetu, twamulanga okilunga phala kimukale o ukexilu wakudisokesa. Lembalala kwila, Jonata kexile mudisokesa ni Davidi, mba kumona se nanyi wabetelekota, né kumesena kukala mukididi kya Davidi. Etwenyoso tutena kukayela ophangu ya Jonata. Mukumona o mawuhete ajiphange jê, kana kwamona kala jinguma jê. Maji ‘ni kulenduka kwoso, sota kumona akwenu kala abetakota eye ndenge.’ (Tanga Filipe 2:3.) Lembalala kwila athu oso atena kukwatekesa okilunga mumawukexilu avulu bhukaxi ka mawuhete mâ. Se tukala tu athu alenduka, twandatena kumona o idifwa yambote yajiphange jetu ni kudilonga imayavulu muphangu yâ yafiyele.—1 Kol. 12:21-25.

15. Ihi iwadilongo mumusoso wa Tanya ni mwiji wê?

¹⁵ Sayi bhabha, tubhita mu ibhidi kitu ifikile. Mu ithangana yiyi, Jihova utena kutukonda omalamba, kutulondekesa ohenda yê, ni kutubhana okikwatekesu kitwabhindamena bhukaxi kajiphange jetu. Tumone yabhiti ni Tanya ni twana twê tutatu. Kumuvu wa 2019, mwene wayile mukyonge kyadikota kyabhiti mu ixi ya Estados Unidos, ni dyambu: “O henda ki ya ka Bhwa!” Tanya ututangela yabhiti kyasabhalu kyoso kyabhu ominangu: “Twabande kudikalu, etu twexile muvutuka kyá ku otele. Twamono ngo dikalu dyadiphuphu kudikalu dyetu. Seku muthu wadikwama mukilwezu kiki, maji twatundu mudikalu ni kuteketa, etu twemanene mukikoka. Mukithangana kyenyokyo, twamono mwendexi wadikalu dyengi wemana yu wakexile mutwixana. Wexile phangyetu  wakexile mutunda we mukyonge kyadikota. Kimwene ngo wemana, twamono we phange jitanu akwa suwesya emana we. Ojiphange ja ahatu eza angindwakuna, andwakuna we monami wamuhatu. Kiki kyene okima kitwabhindamene! Ngatangela ojiphane kwila, twejikala kyambote, maji né kiki ene katwehela kukala ubheka wetu, axala netu katé kyeza o asaki. Ojiphange asoto kwijiya se twakexile ni yoso itwabhindamene. Mukithangana kyokyo kyabhonzo, etu twamono ohenda yatukwatela Jihova. Okizulukutu kiki kyabandekesa dingi ohenda yetu kujiphange. Kyabandekesa we ohenda ni kisakidilu kyetu kwa Jihova.” Okwila ulembalala kyoso phange kyakulondekesa henda mukithangana kiwabhindamene?

16. Ihi itubhangesa kuzola akwetu ni muxima woso?

¹⁶ Tala ombote ijila mukulondekesa ohenda ku akwetu. Kyoso kitubhanga kiki, tukonda omalamba ajiphange jetu kyabhita mu ibhidi. Etu tubhanga ombandu yetu phala okilunga kya Nzambi kikale kumoxi. Tulondekesa ni kidi kyoso kwila tumaxibulu a Jezú. Okima kyabetakota, kyoso kituzola akwetu, etu tuximana Jihova “o Tata ya jihenda, Nzambi yó athu oso kwene mutambula o dikwatekesu.” (2 Kol. 1:3) Mukiki, bhanga yoso phala kubandekesa ni kulondekesa henda ku athu oso.