1. Чь әʹйан дькә кӧ һʹьзкьрьна дь нав мәрьвада сар буйә?

КʹЬТЕБА Пирозда һатийә пʹехәмбәртикьрьне кӧ рʹожед ахьрийеда һʹьзкьрьна дь нав мәрьвада ԝе сар бьбә (2 Тимотʹейо 3:1, 3). Иро әв пʹехәмбәрти бәр чʹәʹвед мә те сери. Мәсәлә, бь милйона малбәт жь һәв дьԛәтьн, жь бо ве йәке жьн-мер һәврʹа кʹине дажон, у зарʹ жи дьфькьрьн кӧ ԝана һʹьз накьн. Ле гәләк жьн-мер жь һәв наԛәтьн у маләкеда дьминьн, ле әԝана диса жи бәхтәԝар ниньн. Шеԝьрмәндәки малбәта ӧса дьбежә: «Де-бав у зарʹ ниве зәʹф бь компӧтәр, табләт йан тʹелед хԝә мьжул ьн. Әԝ маләкеда дьжин, ле пʹаки һаш жь һәв тʹӧнәнә».

2-3. (а) Ль гора Рʹомайи 12:10, гәрәке әм кʹе һʹьз бькьн? (б) Ве готареда, әме чь һин бьн?

² Гәрәке әм нәкʹәвьн бәр байе ве дьнйа дьлсар (Рʹомайи 12:2). Ль гора Кʹьтеба Пироз, лазьм ә кӧ әм нә тʹәне малбәта хԝә, ле хушк-бьред ль щьвате жи һʹьз бькьн (Рʹомайи 12:10 бьхунә). Хәбәра кӧ ль Рʹомайи 12:10 ча «шәԝат бьн» һатийә ԝәлгәрʹандьн, дьлгәрмийа дь нав нәфәред маледа әʹйан дькә. Чаԝа кӧ әм сәр малбәта хԝә шәԝат ьн, чьмки ԝана һʹьз дькьн, гәрәке әм хушк-бьра жи ӧса һʹьз бькьн. Әв йәк ԝе али мә бькә кӧ әм бь йәкти Йаһоԝарʹа хьзмәт бькьн (Миха 2:12).

³ Ве готареда, әме һьнә сәрһатийед Кʹьтеба Пироз леколин  бькьн, йед кӧ нишани мә дькьн кӧ әм чаԝа дькарьн хушк-бьра дьһа зедә һʹьз бькьн.

4. Ль гора Зәбур 103:8, Йаһоԝа мә чьԛас һʹьз дькә?

⁴ Кʹьтеба Пироз бәʹса гәләк һʹӧнӧред Йаһоԝайә бәдәԝ дькә. Мәсәлә, дь Кʹьтеба Пирозда те готьне кӧ «Хԝәде һʹьзкьрьн ә» (1 Йуһʹәнна 4:8). Бь сәрда жи, Йаһоԝа «гәләк дьлшәԝат ә» (Зәбур 103:8 бьхунә). Бәле, Йаһоԝа бь рʹасти жи гәләк мә һʹьз дькә!

5. Йаһоԝа дьлрʹәʹмийа хԝә чаԝа нишан дькә, у әм чаԝа дькарьн чʹәʹв бьдьнә ԝи?

⁵ Ль гора Зәбур 103:8, Йаһоԝа ӧса жи «рʹәʹм ә» (Дәркʹәтьн 34:6). Йаһоԝа гәләк дьлрʹәʹм ә, ләма әԝ шашийед мә әʹфу дькә (Зәбур 51:1). Хенщи ве йәке, Кʹьтеба Пироз нишан дькә кӧ дьлрʹәʹми нә тʹәне бь бахшандьнева гьредайи йә. Гава кәсәки дьлрʹәʹм дьвинә кӧ кәсед дьн тәнгасийеда ньн, әԝ жь дьл дьхԝазә али ԝан бькә. Дьлрʹәʹмийа Йаһоԝа жь дьлрʹәʹмийа дайика мәзьнтьр ә (Ишайа 49:15). Ләма, ԝәхта кӧ әм дькʹәвьн тәнгасийе, Йаһоԝа һәртʹьм һазьр ә кӧ али мә бькә (Зәбур 37:39; 1 Корьнтʹи 10:13). Ԝе баш бә кӧ әм жи һьндава хушк-бьра дьлрʹәʹм бьн. Гава әԝ дьле мә дешиньн, гәрәке әм кʹине нәжон, ле бьбахшиньнә ԝан (Әфәси 4:32). Ӧса жи, гава хушк у бьра рʹасти тәнгасийа тен, гәрәке әм пьштгьрийа ԝан бькьн. Бь ве йәке, әме чʹәʹв бьдьнә дьлрʹәʹми у дьлшәԝатийа Йаһоԝа (Әфәси 5:1).

6. Дәрһәԛа достийа Даԝьд у Йонатʹан гьли кә.

⁶ Кʹьтеба Пироз бәʹса гәләк мәрьвед дьлшәԝат дькә. Мәсәла, дина хԝә бьдә сәрһатийа Даԝьд у Йонатʹан. Кʹьтеба Пироз дьбежә кӧ әԝ достед һәв бун, у «Йонатʹан мина щане хԝә» Даԝьд һʹьз дькьр (1 Самуйел 18:1). Йаһоԝа Даԝьд бьжартьбу кӧ әԝ паши Шаԝул бьбә  пʹадше мьләте Исраел. Шаԝул Пʹадша чʹәʹвнәбарийа Даԝьд дькьр у дьхԝәст ԝи бькӧжә. Ле Йонатʹан нәдькʹәтә бәр байе баве хԝә. Даԝьд у Йонатʹан соз данә һәвдӧ кӧ әԝе тʹьме достийе бькьн у һәртʹьм пьштгьрийа һәв бькьн (1 Самуйел 20:42).

7. Чь дькарьбу рʹе Даԝьд у Йонатʹан бьгьрта кӧ әԝ бьбьнә достед һәв?

⁷ Бь рʹасти гәләк сәбәб һәбун йед кӧ дькарьбун рʹийа ԝан бьгьртана кӧ достийе бькьн. Мәсәлә, Йонатʹан ԝәкә 30 сал жь Даԝьд мәзьнтьр бу. Диса жи, Йонатʹан нәдьфькьри кӧ Даԝьд һаԛас щаһьл у нәщерʹьбанди йә кӧ әԝана ԝе нькарьбьн бьбьн достед һәв. Бәле, Йонатʹан Даԝьд жь хԝә ньмьзтьр һʹәсаб нәдькьр, ле ԛәдьре ԝи дьгьрт.

8. Бь дитьна тә, Йонатʹан чьма достәки баш бу?

⁸ Рʹаст ә Йонатʹан кӧрʹе Шаԝул Пʹадша бу, ле әԝ нәдьфькьри кӧ гәрәке әԝ бьбә пʹадша, у әԝи чʹәʹвнәбарийа Даԝьд нәдькьр (1 Самуйел 20:31). Йонатʹан мәрьвәки мьлук бу, у әԝ Йаһоԝарʹа амьн бу. Ләма, әԝи ԛьрара Йаһоԝа ԛәбул кьр кӧ гәрәке Даԝьд бьбә пʹадша, у әԝи пьштгьрийа Даԝьд дькьр. Ԝәхта кӧ Шаԝьл ль сәр Йонатʹан һерс кʹәт, әԝ диса жи Даԝьдрʹа амьн ма (1 Самуйел 20:32-34).

9. Чьрʹа Йонатʹан һʹәвсуди Даԝьд нәдькьр?

⁹ Йонатʹан Даԝьд һʹьз дькьр, ләма әԝи һʹәвсуди ԝи нәдькьр у тʹәви ԝи нәдькʹәтә һʹӧщәте. Йонатʹан тирванәки һостә у әскәрәки мерхас бу. Мина баве хԝә Шаԝул, Йонатан «жь ԛәртәла жиртьр, жь шера хӧрттьр [ԛәԝаттьр] бу» (2 Самуйел 1:22, 23). Әшкәрә йә кӧ гәләк сәбәб һәбун кӧ Йонатʹан пәсне әʹгитийа хԝә бьда. Ле бәле, Йонатʹан чʹәʹвнәбарийа сәркʹәтьнед Даԝьд нәдькьр. Даԝьд йәки мерхас бу у хԝә дьспарт Йаһоԝа. Паши кӧ әԝи Голйат кӧшт, Йонатʹан ԝирʹа һʹәйран ма, у әԝана бун достед һәв. Гәло әм чаԝа дькарьн һʹьзкьрьна ви щурʹәйи хушк-бьрарʹа әʹйан кьн?

10. Гәрәке әм һәвдӧ ча һʹьз бькьн?

¹⁰ Кʹьтеба Пироз дьбежә кӧ гәрәке әм «бь дьле сах һәвдӧ ԛайим һʹьз бькьн» (1 Пәтрус 1:22). Дь ве йәкеда, Йаһоԝа мәрʹа мәсәлә йә. Һʹьзкьрьна ԝи һаԛас ԛәԝи йә кӧ һʹәта әм ԝирʹа амьн бьминьн, тʹӧ тьшт нькарә достийа дь нав мә у Йаһоԝада хьраб кә (Рʹомайи 8:38, 39). Хәбәра Йунани, йа кӧ ве рʹезеда ча «ԛайим» һатийә ԝәлгәрʹандьне, фькьрәки ӧса дьдә, кӧ мәри гәрәке щәфа бькʹьшинә ԝәки һʹьзкьрьне бьдә кʹьфше. Щарна бәлки лазьм ә кӧ әм зоре хԝә бькьн ԝәки хушк йан бьраки һʹьз бькьн. Гава кәсед дьн дьле мә дешиньн, гәрәке әм «бь сәбьре һʹьзкьрьнеда ль бәр һәв дахьн . . . бьщәʹдиньн, кӧ йәктийа рʹӧһʹ пе һәвгьредана әʹдьлайийе хԝәй кьн» (Әфәси 4:1-3). Һәгәр әм дьхԝазьн «һәвгьредана әʹдьлайийе хԝәй кьн», гәрәке әм дина хԝә нәдьн шашийед хушк у бьра, ле бь чʹәʹве Йаһоԝа Хԝәде ль ԝан бьньһерʹьн (1 Самуйел 16:7; Зәбур 130:3).

11. Щарна чьма зор ә кӧ әм һәвдӧ һʹьз бькьн?

¹¹ Илаһи гава әм шашийед хушк у бьра дьвиньн, щарна һеса нинә кӧ әм ԝан һʹьз бькьн. Ль ԛьрʹна йәке жи, әв йәк һьнә шагьртед Иса Мәсиһ зор дьһат. Мәсәлә, дӧ хушкед бь наве Әйодийа у Сьнтиха һебун, йед кӧ дь кʹаре бәлакьрьна мьзгинеда тʹәви Паԝлосе шанди  һәвкʹари дькьрьн. Ле дь нав ван дӧ хушкада проблемәк пешда һат. Ләма Паԝлосе шанди ԝанрʹа гот кӧ әԝ «тʹәви Хӧдан йәкбуйи бьра ль һәв бен» (Филипи 4:2, 3).

12. Әм чаԝа дькарьн хушк у бьра дьһа зедә һʹьз бькьн?

¹² Гәло әм чаԝа дькарьн хушк у бьра дьһа зедә һʹьз бькьн? Һәгәр әм ԝана дьһа незик нас бькьн, мәрʹа ԝе дьһа һеса бә кӧ ԝана фәʹм бькьн у һʹьз бькьн. Фьрԛи тʹӧнә хушк-бьред мә чәнд сали нә у жь кʹижан мьләти нә, диса жи әм дькарьн ԝанрʹа һәвалтийе бькьн. Йонатʹан ԝәкә 30 сал жь Даԝьд мәзьнтьр бу, ле әԝ диса жи бунә достед һәв. Гава кӧ әм тʹәви хушк йан бьраки жь мә мәзьнтьр йан бьчʹуктьр һәвалтийе дькьн, әм нишан дькьн кӧ әм тʹәмамийа бьратийа хԝә һʹьз дькьн (1 Пәтрус 2:17).

13. Щьватеда, дьбә кӧ әм чьма нькарьн дь әʹйни дәрәщеда тʹәви һәр кәси бьбьн достед незик?

¹³ Гәло әв йәк те һʹәсабе кӧ гәрәке әм тʹәви һʹәму хушк у бьра бьбьнә достед незик? На, әв йәк набә. Бь рʹасти инсан хԝә дьһа незики ԝан кәса тʹәхмин дькә, йед кӧ мина ԝи әʹйни тьшта һʹьз дькьн у бь әʹйни тьшта мьжул ьн. Иса Мәсиһ жи һʹәму шандийед хԝә ԝәк достед хԝә һʹәсаб дькьр, ле әԝи Йуһʹәнна бь мәхсуси һʹьз дькьр (Йуһʹәнна 13:23; 15:15; 20:2). Диса жи, Иса Мәсиһ щӧдәти нәдькьрә дь нав шагьртед хԝәда. Мәсәлә, гава Йуһʹәнна тʹәви бьре хԝә Аԛуб дьхԝәстьн кӧ ль Пʹадшатийа Хԝәде щики бьльнд бьстиньн, Иса Мәсиһ ԝанрʹа гот: «Изьна ль мьле мьни чʹәп у рʹасте рʹуньштьне нә дәсте мьнда йә» (Марԛос 10:35-40). Мина Иса Мәсиһ, гәрәке әм жи һәвалед хԝә йед незик сәр кәсед дьнрʹа нәгьрьн (Аԛуб 2:3, 4). Гәрәке әм мьԛати хԝә бьн ԝәки дӧтирәти у щӧдәти нәкʹәвә щьватеда (Щьһуда 17-19).

14. Ль гора Филипи 2:3, чь дькарә али мә бькә кӧ әм һәвдӧрʹа нәкʹәвьнә рʹьке?

¹⁴ Һәгәр һʹьзкьрьна мә һәбә, әме хԝә жь хушк у бьра бьльндтьр нәгьрьн.  Чаԝа кӧ мә дит, Йонатʹан Даԝьдрʹа нәдькʹәтә рʹьке. Ԝе баш бә кӧ әм чʹәʹв бьдьнә Йонатʹан. Гәрәке әм һʹәвсудийе хушк-бьра нәкьн жь бо һʹӧнӧред ԝан. Паԝлос ӧса ширәт дабу: «Жь ԝә һәр йәк бь мьлуктийе һәвале хԝә сәр хԝәрʹа бьгьрә» (Филипи 2:3 бьхунә). Дь щьватеда, рола һәр кәси ԛимәт ә. Һәгәр әм мьлук бьн, әме һʹәму хушк-бьра ԛимәт бькьн у чʹәʹв бьдьнә амьнийа ԝан (1 Корьнтʹи 12:21-25).

15. Сәрһатийа Танйа у малбәта ԝе чь мә һин дькә?

¹⁵ Гава әм ньшкева рʹасти тәнгасийа тен, Йаһоԝа бәрдьлийе дьдә мә бь сайа дьлшәԝати, һʹьзкьрьн у аликʹарийа хушк-бьра. Ԝәрә әм ве йәке ль мәсәла малбәтәкә дь Америкайеда бьньһерьн. Дь сала 2019-да, әԝ чун сәр щьвата серʹожи йа бь наве «Һʹьзкьрьн Тʹӧ Щар Кʹӧта Набә». Паши бәрнама рʹожа Шәмийе, гава малбәт бь әʹрәба хԝә вәдьгәрʹийа отеле, әʹрәбәкә дьн жь контроле дәркʹәт у ль әʹрәба ԝан хьст. Хушка мә Танйа ӧса дьбежә: «Тʹӧ кәс бьриндар нәбу, ле әм гәләк тьрсийан у жь әʹрәбе дәркʹәтьн. Шофоре әʹрәбәкә дьн незики мә сәкьни у гази мә кьр. Әԝ бьраки мә бу, йе кӧ тʹәзә жь щьвата мәзьн дәркʹәтьбу. Ӧса жи, пенщ хушк-бьред кӧ жь Шԝедйайе һатьбун бь әʹрәба хԝә сәкьнин. Хушка әз у ԛиза мьн һʹәмез кьрьн у бәр дьле мәда һатьн. Мьн ԝанрʹа гот кӧ һәр тьшт баш ә, ле әԝ ль щәм мә ман. Паши кӧ амбуланс һат, әԝана диса жи нәчун у бона һʹәԝщед мә хәм кьрьн. Ль ԝе дәма зор, мә һʹьзкьрьна Йаһоԝа сәр хԝә тʹәхмин кьр. Паши ве ԛәԝьмандьне, мә хушк-бьра  у Йаһоԝа дьһа зедә һʹьз кьр». Ле тӧ дькари бини бира хԝә кӧ чаԝа хушк-бьра дь дәма чәтьнда аликʹари у һʹьзкьрьна хԝә тәрʹа данә кʹьфше?

16. Чьма фәрз ә кӧ әм һәвдӧ һʹьз бькьн?

¹⁶ Кʹара һʹьзкьрьне гәләк мәзьн ә. Мәсәлә, әм дьлбинийе дьдьнә хушк-бьред һʹәԝщәдар у бь ве йәке йәктийа дь нав хьзмәткʹаред Хԝәдеда дьһа ԛәԝи дьбә. Әм избат дькьн кӧ әм шагьртед Иса Мәсиһ нә, у әв йәк дькарә кәсед дьлпʹак бькʹьшинә бәр бь рʹастийе. Тьште һәри фәрз жи әв ә кӧ бь ви щурʹәйи, әм пәсне Йаһоԝа дьдьн, йе кӧ «Баве дьлшәԝатийе у Хԝәдейе һʹәму бәрдьлийе» йә (2 Корьнтʹи 1:3). Ԝәрә әм һʹьзкьрьна хԝә һәртʹьм зедә бькьн у һьндава кәсед дьн дьлшәԝат бьн!