ບົດຄວາມສຶກສາທີ 4
ໃຫ້ມີຄວາມຮັກແບບພີ່ນ້ອງຕໍ່ໆໄປ
“ໃຫ້ຮັກກັນແບບພີ່ນ້ອງ.”—ຣມ. 12:10
ເພງ 109 ຮັກທີ່ແຮງກ້າສຸດຫົວໃຈ
ໃຈຄວາມສຳຄັນ *
1. ໃນທຸກມື້ນີ້ເຮົາເຫັນຫຍັງທີ່ສະແດງວ່າຫຼາຍຄອບຄົວຮັກກັນໜ້ອຍລົງ?
ຄຳພີໄບເບິນບອກລ່ວງໜ້າກ່ຽວກັບສະໄໝສຸດທ້າຍວ່າ ຫຼາຍຄົນຈະ “ບໍ່ຮັກຍາດພີ່ນ້ອງ.” (2 ຕມ. 3:1, 3) ໃນທຸກມື້ນີ້ເຮົາເຫັນຄຳພະຍາກອນນີ້ເກີດຂຶ້ນແທ້. ຕົວຢ່າງເຊັ່ນ: ຫຼາຍຄອບຄົວແຕກແຍກກັນຍ້ອນຜົວເມຍປະກັນແລະຄຽດໃຫ້ກັນເຊິ່ງເຮັດໃຫ້ລູກບໍ່ໄດ້ຮັບຄວາມອົບອຸ່ນ ແລະແມ່ນແຕ່ຄົນທີ່ຢູ່ໃນຄອບຄົວດຽວກັນກໍອາດຈະບໍ່ສະໜິດກັນ. ຜູ້ຊ່ຽວຊານແລະໃຫ້ຄຳປຶກສາດ້ານຄອບຄົວຄົນໜຶ່ງບອກວ່າ: “ພໍ່ແມ່ແລະລູກບໍ່ມີໃຜສົນໃຈກັນເລີຍ. ເຂົາເຈົ້າສົນໃຈແຕ່ໜ້າຈໍຄອມພິວເຕີ ແທັບເລັດ ໂທລະສັບ ຫຼືເກມ. ເຖິງວ່າຈະຢູ່ເຮືອນຫຼັງດຽວກັນ ແຕ່ກໍເບິ່ງຄືກັບວ່າເຂົາເຈົ້າບໍ່ໄດ້ຮູ້ຈັກກັນເລີຍ.”
2-3. (ກ) ຕາມໂຣມ 12:10 ເຮົາຄວນສະແດງຄວາມຮັກຕໍ່ໃຜ? (ຂ) ເຮົາຈະຮຽນຫຍັງໃນບົດຄວາມນີ້?
2 ເຮົາບໍ່ຢາກເປັນຄືກັບຫຼາຍຄົນໃນໂລກນີ້ທີ່ບໍ່ສະແດງຄວາມຮັກຕໍ່ກັນ. (ຣມ. 12:2) ເຮົາຢາກສະແດງຄວາມຮັກຕໍ່ຄົນໃນຄອບຄົວແລະຕໍ່ພີ່ນ້ອງໃນປະຊາຄົມໃຫ້ຫຼາຍຂຶ້ນ. (ອ່ານໂຣມ 12:10) ຄວາມຮັກແບບນີ້ເປັນຄວາມຮັກແບບໃດ? ກໍເປັນຄວາມຮັກທີ່ອົບອຸ່ນທີ່ຄົນໃນຄອບຄົວສະແດງຕໍ່ກັນ. ເຮົາຄວນມີຄວາມຮັກແບບນີ້ກັບພີ່ນ້ອງໃນປະຊາຄົມເພາະຈະຊ່ອຍເຮົາໃຫ້ເປັນນ້ຳໜຶ່ງໃຈດຽວກັນແລະຮັບໃຊ້ພະເຢໂຫວາຢ່າງມີຄວາມສຸກນຳກັນ.—ມີເກ 2:12
3 ເພື່ອເຮົາຈະສະແດງຄວາມຮັກແບບນີ້ກັບພີ່ນ້ອງ ໃຫ້ເຮົາມາຮຽນຈາກເລື່ອງຂອງຄົນໃນຄຳພີໄບເບິນ.
ພະເຢໂຫວາ “ມີຄວາມເຫັນອົກເຫັນໃຈແທ້ໆ”
4. ຢາໂກໂບ 5:11 ຊ່ອຍເຮົາໃຫ້ຮູ້ວ່າພະເຢໂຫວາຮັກເຮົາສ່ຳໃດ?
4 ຄຳພີໄບເບິນບອກເຮົາໃຫ້ຮູ້ຄຸນລັກສະນະທີ່ດີຕ່າງໆຂອງພະເຢໂຫວາເຊັ່ນ: ຄຳພີໄບເບິນບອກວ່າ “ພະເຈົ້າເປັນຄວາມຮັກ.” (1 ຢຮ. 4:8) ການຮູ້ເລື່ອງນີ້ເຮັດໃຫ້ເຮົາຢາກເປັນໝູ່ກັບພະເຢໂຫວາ ແລະຄຳພີໄບເບິນຍັງບອກວ່າພະເຢໂຫວາ “ມີຄວາມເຫັນອົກເຫັນໃຈແທ້ໆ.” (ອ່ານຢາໂກໂບ 5:11) ນີ້ເຮັດໃຫ້ເຮົາຮູ້ວ່າພະເຢໂຫວາຮັກເຮົາຫຼາຍແທ້ໆ!
5. ພະເຢໂຫວາສະແດງຄວາມເມດຕາແນວໃດ ແລະເຮົາຈະຮຽນແບບເພິ່ນໄດ້ແນວໃດ?
5 ໃນຢາໂກໂບ 5:11 ຍັງເວົ້າເຖິງຄຸນລັກສະນະອີກຢ່າງໜຶ່ງທີ່ເຮັດໃຫ້ເຮົາຢາກມາເປັນໝູ່ກັບພະເຢໂຫວາເຊັ່ນ: ຄວາມເມດຕາ. (ອົບ. 34:6) ສິ່ງໜຶ່ງທີ່ສະແດງໃຫ້ເຫັນວ່າພະເຢໂຫວາເມດຕາເຮົາກໍຄື ເພິ່ນໃຫ້ອະໄພເຮົາເມື່ອເຮົາເຮັດຜິດ. (ເພງ. 51:1) ໃນຄຳພີໄບເບິນ ຄວາມເມດຕາມີຄວາມໝາຍຫຼາຍກວ່າການໃຫ້ອະໄພຄົນທີ່ເຮັດຜິດ. ຄວາມເມດຕາເປັນຄວາມຮູ້ສຶກອີ່ຕົນຄົນທີ່ເຈິກັບຄວາມທຸກ ແລະຢາກຈະເຮັດບາງສິ່ງເພື່ອຊ່ວຍເຫຼືອຄົນນັ້ນ. ພະເຢໂຫວາຮູ້ສຶກຮັກແລະຢາກຊ່ອຍເຮົາຫຼາຍກວ່າຄວາມຮູ້ສຶກຂອງແມ່ທີ່ຢາກຊ່ອຍລູກດ້ວຍຊ້ຳ. (ເອຊາ. 49:15) ຄວາມເມດຕາຂອງພະເຢໂຫວາກະຕຸ້ນເພິ່ນໃຫ້ຢາກຊ່ອຍເຮົາຕອນທີ່ເຮົາມີຄວາມທຸກ. (ເພງ. 37:39; 1 ກຣ. 10:13) ເມື່ອພີ່ນ້ອງເຮັດຜິດຕໍ່ເຮົາ ເຮົາສາມາດສະແດງຄວາມເມດຕາຕໍ່ເຂົາເຈົ້າໂດຍຍົກໂທດໃຫ້ເຂົາເຈົ້າແລ້ວກໍບໍ່ຄຽດອີກ. (ອຟຊ. 4:32) ແລະເຮົາຍັງສາມາດສະແດງຄວາມເມດຕາຕໍ່ພີ່ນ້ອງໂດຍຊ່ວຍເຫຼືອເຂົາເຈົ້າຕອນທີ່ມີຄວາມລຳບາກ. ເມື່ອເຮົາສະແດງຄວາມເມດຕາຕໍ່ຄົນອື່ນ ເຮົາກໍກຳລັງຮຽນແບບພະເຢໂຫວາຜູ້ທີ່ມີຄວາມຮັກທີ່ຍິ່ງໃຫຍ່ທີ່ສຸດ.—ອຟຊ. 5:1
ໂຢນາທານກັບດາວິດ “ເປັນໝູ່ສະໜິດກັນ”
6. ໂຢນາທານກັບດາວິດສະແດງຄວາມຮັກຕໍ່ກັນແນວໃດ?
6 ຄຳພີໄບເບິນບອກເຮົາໃຫ້ຮູ້ວ່າມະນຸດທີ່ບໍ່ສົມບູນແບບກໍສາມາດສະແດງຄວາມຮັກຕໍ່ກັນໄດ້. ໃນຄຳພີໄບເບິນມີຫຼາຍເລື່ອງທີ່ເວົ້າເຖິງຄົນທີ່ບໍ່ສົມບູນແບບສະແດງຄວາມຮັກຕໍ່ກັນເຊັ່ນ: ເລື່ອງຂອງໂຢນາທານກັບດາວິດ. ຄຳພີໄບເບິນບອກວ່າ: “ໂຢນາທານກັບດາວິດກໍກາຍເປັນໝູ່ສະໜິດກັນ ແລະໂຢນາທານຮັກດາວິດເທົ່າຊີວິດຂອງຕົວເອງ.” (1 ຊາມ. 18:1, ລ.ມ.) ພະເຢໂຫວາເລືອກດາວິດໃຫ້ເປັນກະສັດຕໍ່ຈາກຊາອູນ. ຫຼັງຈາກນັ້ນຊາອູນກໍອິດສາດາວິດແລະພະຍາຍາມຈະຂ້າລາວ ແຕ່ໂຢນາທານລູກຊາຍຂອງຊາອູນບໍ່ໄດ້ເຂົ້າຂ້າງພໍ່ໃນການຂ້າດາວິດ. ໂຢນາທານກັບດາວິດສັນຍາກັນວ່າຈະເປັນໝູ່ກັນແລະຊ່ວຍເຫຼືອກັນຕະຫຼອດໄປ.—1 ຊາມ. 20:42
ເຖິງວ່າໂຢນາທານຈະອາຍຸຫຼາຍກວ່າດາວິດ ແຕ່ເຂົາເຈົ້າກໍເປັນໝູ່ສະໜິດກັນໄດ້ (ເບິ່ງຂໍ້ 6-9)
7. ເປັນຫຍັງໂຢນາທານກັບດາວິດອາດຈະເປັນໝູ່ກັນໄດ້ຍາກ?
7 ເປັນເລື່ອງປະທັບໃຈຫຼາຍທີ່ໂຢນາທານກັບດາວິດເປັນໝູ່ສະໜິດກັນໄດ້ເຖິງວ່າອາຍຸເຂົາເຈົ້າຈະລື່ນກັນຫຼາຍເຊັ່ນ ໂຢນາທານອາຍຸຫຼາຍກວ່າດາວິດ 30 ປີ. ໂຢນາທານອາດຈະຄິດວ່າລາວບໍ່ຢາກເປັນໝູ່ກັບຄົນທີ່ອາຍຸຍັງນ້ອຍແລະບໍ່ມີປະສົບການກໍໄດ້. ແຕ່ໂຢນາທານບໍ່ໄດ້ຄິດແບບນັ້ນ ລາວນັບຖືດາວິດຫຼາຍ.
8. ເປັນຫຍັງໂຢນາທານຈຶ່ງເປັນໝູ່ທີ່ດີຂອງດາວິດ?
8 ໂຢນາທານອາດຈະອິດສາດາວິດກໍໄດ້. ຍ້ອນລາວເປັນລູກຂອງກະສັດຊາອູນ ລາວຈຶ່ງມີສິດທີ່ຈະເປັນກະສັດອົງຕໍ່ໄປ. (1 ຊາມ. 20:31) ແຕ່ໂຢນາທານຖ່ອມຕົວແລະພັກດີຕໍ່ພະເຢໂຫວາ ດັ່ງນັ້ນລາວຈຶ່ງຢູ່ຝ່າຍດາວິດຜູ້ທີ່ພະເຢໂຫວາເລືອກໃຫ້ເປັນກະສັດອົງຕໍ່ໄປ ແລະລາວຍັງພັກດີຕໍ່ດາວິດເຖິງວ່າການເຮັດແບບນີ້ຈະເຮັດໃຫ້ຊາອູນໃຈຮ້າຍກໍຕາມ.—1 ຊາມ. 20:32-34
9. ໂຢນາທານຄິດວ່າດາວິດເປັນຄູ່ແຂ່ງບໍ? ຂໍໃຫ້ອະທິບາຍ.
9 ຍ້ອນໂຢນາທານຮັກດາວິດລາວຈຶ່ງບໍ່ໄດ້ຄິດວ່າດາວິດເປັນຄູ່ແຂ່ງ. ໂຢນາທານເປັນນັກຮົບທີ່ກ້າຫານແລະຊຳນານໃນການຍິງທະນູ. ປະຊາຊົນເວົ້າເຖິງໂຢນາທານກັບຊາອູນວ່າ “ເຂົາເຈົ້າວ່ອງໄວກວ່ານົກອິນຊີ ແລະກ້າຫານຫຼາຍກວ່າສິງ.” (2 ຊາມ. 1:22, 23, ລ.ມ.) ດັ່ງນັ້ນໂຢນາທານອາດຈະໂອ້ອວດຄວາມສາມາດທີ່ລາວມີກໍໄດ້ ແຕ່ລາວບໍ່ໄດ້ເຮັດແບບນັ້ນ. ລາວບໍ່ໄດ້ແຂ່ງຂັນກັບດາວິດຫຼືອິດສາດາວິດ. ກົງກັນຂ້າມໂຢນາທານຍ້ອງຍໍດາວິດທີ່ລາວກ້າຫານແລະໝາຍເພິ່ງພະເຢໂຫວາ. ຕົວຢ່າງເຊັ່ນ: ຫຼັງຈາກທີ່ດາວິດຂ້າໂຄລີອາດ ໂຢນາທານກໍເລີ່ມຮູ້ສຶກຮັກດາວິດ. ເຮົາຈະສະແດງຄວາມຮັກແບບນີ້ຕໍ່ພີ່ນ້ອງຂອງເຮົາໄດ້ແນວໃດ?
ເຮົາຈະສະແດງຄວາມຮັກຕໍ່ພີ່ນ້ອງໄດ້ແນວໃດໃນທຸກມື້ນີ້?
10. ຄຳວ່າ “ຮັກກັນຢ່າງສຸດຫົວໃຈ” ໝາຍຄວາມວ່າແນວໃດ?
10 ຄຳພີໄບເບິນບອກເຮົາໃຫ້ “ຮັກກັນຢ່າງສຸດຫົວໃຈ.” (1 ປຕ. 1:22) ພະເຢໂຫວາເປັນຕົວຢ່າງໃຫ້ເຮົາໃນເລື່ອງນີ້. ພະເຢໂຫວາຮັກເຮົາຫຼາຍແລະຖ້າເຮົາພັກດີຕໍ່ເພິ່ນກໍບໍ່ມີຫຍັງທີ່ຈະມາເຮັດໃຫ້ເພິ່ນເຊົາຮັກເຮົາໄດ້. (ຣມ. 8:38, 39) ໃນພາສາກຣີກຄຳວ່າ “ສຸດຫົວໃຈ” ມີຄວາມໝາຍວ່າຢື້ເອົາ ນີ້ສະແດງວ່າເຮົາຕ້ອງພະຍາຍາມຫຼາຍແທ້ໆທີ່ຈະສະແດງຄວາມຮັກ. ບາງເທື່ອມັນກໍຍາກທີ່ເຮົາຈະສະແດງຄວາມຮັກຕໍ່ພີ່ນ້ອງ. ເມື່ອພີ່ນ້ອງເຮັດໃຫ້ເຮົາເຈັບໃຈ ເຮົາຕ້ອງ “ອົດທົນກັນແລະກັນດ້ວຍຄວາມຮັກ. ພະຍາຍາມເຕັມທີທີ່ຈະເປັນນ້ຳໜຶ່ງໃຈດຽວກັນດ້ວຍພະລັງຂອງພະເຈົ້າ ແລະມີສັນຕິສຸກທີ່ຜູກພັນຄົນເຮົາໃຫ້ເປັນອັນໜຶ່ງອັນດຽວກັນ.” (ອຟຊ. 4:1-3) ຖ້າເຮົາພະຍາຍາມຮັກສາສັນຕິສຸກກັບພີ່ນ້ອງ ເຮົາກໍຈະບໍ່ເບິ່ງແຕ່ຄວາມຜິດຂອງເຂົາເຈົ້າ ແຕ່ເຮົາຈະພະຍາຍາມເບິ່ງພີ່ນ້ອງໃນແບບທີ່ພະເຢໂຫວາເບິ່ງ.—1 ຊາມ. 16:7; ເພງ. 130:3
ໂປໂລບອກຢູໂອເດຍແລະຊີນຕີເຂໃຫ້ເປັນນ້ຳໜຶ່ງໃຈດຽວກັນ. ບາງເທື່ອເຮົາກັບພີ່ນ້ອງກໍເຂົ້າກັນໄດ້ຍາກແຕ່ເຮົາກໍຕ້ອງເປັນນ້ຳໜຶ່ງໃຈດຽວກັນ (ເບິ່ງຂໍ້ 11)
11. ເປັນຫຍັງບາງເທື່ອຈຶ່ງຍາກທີ່ຈະສະແດງຄວາມຮັກຕໍ່ພີ່ນ້ອງ?
11 ບໍ່ແມ່ນເລື່ອງງ່າຍສະເໝີໄປທີ່ເຮົາຈະສະແດງຄວາມຮັກຕໍ່ພີ່ນ້ອງ ໂດຍສະເພາະຕອນທີ່ເຂົາເຈົ້າເຮັດໃຫ້ເຮົາຄຽດ. ເລື່ອງນີ້ເກີດຂຶ້ນກັບພີ່ນ້ອງບາງຄົນໃນສະຕະວັດທຳອິດ. ຕົວຢ່າງເຊັ່ນ: ຢູໂອເດຍແລະຊີນຕີເຂທີ່ເບິ່ງຄືວ່າບໍ່ມີບັນຫາຫຍັງຕອນທີ່ “ເຮັດວຽກໜັກເພື່ອຂ່າວດີນຳກັນກັບ [ໂປໂລ]” ແຕ່ກໍມີບາງເຫດຜົນທີ່ເຮັດໃຫ້ເຂົາເຈົ້າເຂົ້າກັນໄດ້ຍາກ. ດັ່ງນັ້ນໂປໂລຈຶ່ງເຕືອນເຂົາເຈົ້າ “ໃຫ້ເປັນນ້ຳໜຶ່ງໃຈດຽວກັນໃນຖານະລູກສິດຂອງຜູ້ເປັນນາຍ.”—ຟລປ. 4:2, 3
ຜູ້ດູແລທີ່ຍັງໜຸ່ມກັບຜູ້ດູແລທີ່ອາຍຸຫຼາຍກວ່າສາມາດເປັນໝູ່ກັນໄດ້ (ເບິ່ງຂໍ້ 12)
12. ເຮົາຈະສະແດງຄວາມຮັກຕໍ່ພີ່ນ້ອງໄດ້ແນວໃດ?
12 ເຮົາຈະສະແດງຄວາມຮັກແບບນີ້ຕໍ່ພີ່ນ້ອງໃຫ້ຫຼາຍຂຶ້ນໄດ້ແນວໃດໃນທຸກມື້ນີ້? ເມື່ອເຮົາຮູ້ຈັກພີ່ນ້ອງຫຼາຍຂຶ້ນເຮົາກໍຈະເຂົ້າໃຈເຂົາເຈົ້າແລະຮັກເຂົາເຈົ້າຫຼາຍຂຶ້ນ. ເຮົາສາມາດເປັນໝູ່ກັບພີ່ນ້ອງໄດ້ເຖິງວ່າອາຍຸຫຼືວັດທະນະທຳຈະແຕກຕ່າງກັນ. ຂໍໃຫ້ຈື່ໄວ້ວ່າໂຢນາທານອາຍຸຫຼາຍກວ່າດາວິດ 30 ປີແຕ່ເຂົາເຈົ້າກໍຍັງເປັນໝູ່ສະໜິດກັນ. ເຈົ້າຈະເປັນໝູ່ກັບພີ່ນ້ອງໃນປະຊາຄົມທີ່ອາຍຸຫຼາຍກວ່າຫຼືໜ້ອຍກວ່າໄດ້ບໍ? ເມື່ອເຮັດແບບນີ້ເຈົ້າກໍສະແດງໃຫ້ເຫັນວ່າເຈົ້າ “ຮັກພີ່ນ້ອງຄລິດສະຕຽນທຸກຄົນ.”—1 ປຕ. 2:17
ເບິ່ງຂໍ້ 12 *
13. ເປັນຫຍັງເຮົາອາດຮູ້ສຶກສະໜິດກັບບາງຄົນເປັນພິເສດ?
13 ການຮັກພີ່ນ້ອງໝາຍຄວາມວ່າເຮົາຕ້ອງສະໜິດກັບທຸກຄົນໃນປະຊາຄົມບໍ? ຄືຊິເປັນໄປໄດ້ຍາກ. ຕາມປົກກະຕິແລ້ວເຮົາມັກຈະສະໜິດກັບຄົນທີ່ມີນິດໄສຄ້າຍໆກັນກັບເຮົາຫຼາຍກວ່າ. ພະເຢຊູເອີ້ນອັກຄະສາວົກທຸກຄົນວ່າ “ໝູ່” ແຕ່ເພິ່ນກໍຮູ້ສຶກສະໜິດກັບໂຢຮັນເປັນພິເສດ. (ຢຮ. 13:23; 15:15; 20:2) ເຖິງວ່າຈະເປັນແບບນັ້ນພະເຢຊູກໍບໍ່ໄດ້ປະຕິບັດກັບໂຢຮັນດີກວ່າຄົນອື່ນໆ. ຕົວຢ່າງເຊັ່ນ: ຕອນທີ່ໂຢຮັນກັບຢາໂກໂບທີ່ເປັນອ້າຍນ້ອງກັນໄດ້ມາຂໍຕຳແໜ່ງທີ່ສຳຄັນກັບພະເຢຊູ ພະເຢຊູກໍໄດ້ບອກເຂົາເຈົ້າວ່າ: “ຂ້ອຍບໍ່ມີສິດທີ່ຈະກຳນົດວ່າຜູ້ໃດຈະໄດ້ນັ່ງຢູ່ເບື້ອງຂວາຫຼືເບື້ອງຊ້າຍຂອງຂ້ອຍ.” (ມຣກ. 10:35-40) ເຮົາຢາກເຮັດຕາມຕົວຢ່າງຂອງພະເຢຊູໂດຍບໍ່ປະຕິບັດກັບໝູ່ສະໜິດດີກວ່າຄົນອື່ນໆ. (ຢກບ. 2:3, 4) ຖ້າເຮົາບໍ່ເຮັດຕາມຕົວຢ່າງຂອງພະເຢຊູ ເຮົາກໍບໍ່ໄດ້ຊ່ອຍໃຫ້ປະຊາຄົມເປັນນ້ຳໜຶ່ງໃຈດຽວກັນ ແຕ່ຈະເຮັດໃຫ້ແຕກແຍກກັນ.—ຢດ. 17-19
14. ຟີລິບປອຍ 2:3 ຊ່ອຍເຮົາບໍ່ໃຫ້ຖືວ່າຕົວເອງດີກວ່າຄົນອື່ນແນວໃດ?
14 ເມື່ອເຮົາສະແດງຄວາມຮັກຕໍ່ພີ່ນ້ອງເຮົາກໍຈະບໍ່ຖືວ່າຕົວເອງດີກວ່າພີ່ນ້ອງຄົນອື່ນໆໃນປະຊາຄົມ. ຈື່ໄດ້ບໍວ່າໂຢນາທານບໍ່ໄດ້ອິດສາດາວິດແລະບໍ່ໄດ້ພະຍາຍາມທີ່ຈະເປັນກະສັດແທນດາວິດ. ເຮົາທຸກຄົນເຮັດຕາມຕົວຢ່າງຂອງໂຢນາທານໄດ້ໂດຍບໍ່ອິດສາພີ່ນ້ອງທີ່ມີຄວາມສາມາດຫຼາຍກວ່າເຮົາ “ແຕ່ໃຫ້ເຮົາຖ່ອມຕົວແລະຖືວ່າຄົນອື່ນດີກວ່າຕົວເອງ.” (ອ່ານຟີລິບປອຍ 2:3) ຂໍໃຫ້ຈື່ໄວ້ວ່າເຮົາທຸກຄົນມີສ່ວນຊ່ອຍປະຊາຄົມໃນແບບທີ່ຕ່າງກັນ. ຖ້າເຮົາເປັນຄົນຖ່ອມຕົວຕໍ່ໆໄປ ເຮົາກໍຈະເຫັນສິ່ງດີໆໃນໂຕຂອງພີ່ນ້ອງແລະໄດ້ຮັບປະໂຫຍດຈາກຕົວຢ່າງຂອງເຂົາເຈົ້າ.—1 ກຣ. 12:21-25
15. ເຈົ້າໄດ້ຮຽນຫຍັງຈາກປະສົບການຂອງພີ່ນ້ອງທັນຢ້າແລະລູກຂອງລາວ?
15 ເມື່ອເຮົາມີບັນຫາໃນຊີວິດ ພະເຢໂຫວາກໍໃຫ້ກຳລັງໃຈເຮົາໂດຍວິທີທີ່ພີ່ນ້ອງສະແດງຄວາມຮັກແລະຊ່ວຍເຫຼືອເຮົາ. ຂໍໃຫ້ເຮົາມາເບິ່ງສິ່ງທີ່ເກີດຂຶ້ນກັບຄອບຄົວໜຶ່ງຫຼັງຈາກທີ່ເຂົ້າຮ່ວມການປະຊຸມນານາຊາດປີ 2019 ທີ່ມີຫົວຂໍ້ວ່າ: “ຄວາມຮັກຈະຄົງຢູ່ຕະຫຼອດໄປ”! ເຊິ່ງຈັດຂຶ້ນຢູ່ສະຫະລັດອາເມຣິກາ. ພີ່ນ້ອງທັນຢ້າທີ່ມີລູກສາມຄົນໄດ້ເລົ່າສູ່ຟັງວ່າ: “ໃນມື້ວັນເສົາຕອນທີ່ເຮົາກຳລັງຂັບລົດເມືອຫຼັງຈາກທີ່ປະຊຸມແລ້ວ ກໍມີລົດຄັນໜຶ່ງມາຕຳລົດເຮົາຢູ່ທາງດ່ວນ. ຍັງດີທີ່ບໍ່ມີໃຜເຈັບ ແຕ່ພວກເຮົາກໍຕົກໃຈຫຼາຍຈຶ່ງລົງລົດມາຢືນຢູ່ກາງທາງແບບມຶນງົງ. ແລ້ວກໍມີຜູ້ຊາຍຄົນໜຶ່ງຍົກມືເອີ້ນພວກເຮົາໄປຢູ່ລົດລາວເພື່ອຈະປອດໄພ ເຊິ່ງຜູ້ຊາຍຄົນນັ້ນກໍເປັນພີ່ນ້ອງທີ່ຫາກໍກັບຈາກການປະຊຸມໃຫຍ່ຄືກັນ ແລະບໍ່ແມ່ນແຕ່ລາວຜູ້ດຽວທີ່ຈອດລົດມາຊ່ວຍພວກເຮົາເພາະຍັງມີພີ່ນ້ອງອີກຫ້າຄົນທີ່ມາຈາກຊູແອດກໍຈອດລົດມາເບິ່ງພວກເຮົາຄືກັນ. ເຂົາເຈົ້າເຂົ້າມາກອດຂ້ອຍກັບລູກເຊິ່ງເຮັດໃຫ້ພວກເຮົາຮູ້ສຶກດີຂຶ້ນຫຼາຍ. ຂ້ອຍບອກເຂົາເຈົ້າວ່າພວກເຮົາບໍ່ເປັນຫຍັງແລ້ວ ແຕ່ເຂົາເຈົ້າກໍບໍ່ໄດ້ປະເຮົາ. ເຂົາເຈົ້າຢູ່ກັບເຮົາຈົນລົດໂຮງໝໍມາແລະເຮັດໃຫ້ແນ່ໃຈວ່າພວກເຮົາບໍ່ໄດ້ກັງວົນຫຍັງແລ້ວ. ການທີ່ພີ່ນ້ອງຊ່ວຍເຫຼືອພວກເຮົາໃນສະພາບທີ່ຫຍຸ້ງຍາກແບບນີ້ເຮັດໃຫ້ພວກເຮົາຮູ້ສຶກໄດ້ວ່າພະເຢໂຫວາຮັກພວກເຮົາຫຼາຍແທ້ໆ. ເຫດການນີ້ເຮັດໃຫ້ພວກເຮົາຮັກພີ່ນ້ອງຫຼາຍຂຶ້ນແລະກໍຮັກພະເຢໂຫວາຫຼາຍຂຶ້ນຄືກັນ.” ເຈົ້າໄດ້ຄິດເຖິງເຫດການທີ່ພີ່ນ້ອງສະແດງຄວາມຮັກກັບເຈົ້າແບບນີ້ບໍ?
16. ມີເຫດຜົນຫຍັງແດ່ທີ່ເຮົາຈະສະແດງຄວາມຮັກຕໍ່ກັນ?
16 ລອງຄິດເຖິງສິ່ງດີໆທີ່ເກີດຂຶ້ນເມື່ອເຮົາສະແດງຄວາມຮັກຕໍ່ກັນ. ເຮົາໃຫ້ກຳລັງໃຈພີ່ນ້ອງຕອນທີ່ເຂົາເຈົ້າມີບັນຫາ ແລະຊ່ອຍພີ່ນ້ອງໃຫ້ຮັບໃຊ້ພະເຢໂຫວາຢ່າງມີຄວາມສຸກນຳກັນ. ການເຮັດແບບນີ້ເຮົາກໍສະແດງໃຫ້ເຫັນວ່າເຮົາເປັນລູກສິດຂອງພະເຢຊູ ແລະເຮັດໃຫ້ຄົນອື່ນຢາກມາຮູ້ຈັກພະເຢໂຫວາຫຼາຍຂຶ້ນ. ແລະສິ່ງສຳຄັນທີ່ສຸດແມ່ນເຮົາໄດ້ຍ້ອງຍໍສັນລະເສີນພະເຢໂຫວາຜູ້ເປັນ “ພໍ່ທີ່ມີຄວາມເມດຕາກະລຸນາແລະເປັນພະເຈົ້າທີ່ໃຫ້ກຳລັງໃຈໃນທຸກສະຖານະການ.” (2 ກຣ. 1:3) ຂໍໃຫ້ເຮົາທຸກຄົນຮັກພີ່ນ້ອງຫຼາຍຂຶ້ນແລະສະແດງຄວາມຮັກແບບນີ້ຕໍ່ໆໄປ.
ເພງ 130 ເຮົາຕ້ອງໃຫ້ອະໄພກັນ
^ ຂໍ້ 5 ພະເຢຊູບອກວ່າຄົນອື່ນຈະຮູ້ຈັກວ່າໃຜເປັນລູກສິດຂອງເພິ່ນໂດຍເບິ່ງຈາກຄວາມຮັກທີ່ເຂົາເຈົ້າສະແດງຕໍ່ກັນ. ສະນັ້ນເຮົາຕ້ອງພະຍາຍາມສະແດງຄວາມຮັກຕໍ່ກັນ. ເຮົາຄວນຮຽນຮູ້ທີ່ຈະສະແດງຄວາມຮັກຕໍ່ພີ່ນ້ອງຄືກັບຮັກຄົນໃນຄອບຄົວ. ໃນບົດຄວາມນີ້ຈະຊ່ອຍເຮົາໃຫ້ຮັກພີ່ນ້ອງໃນປະຊາຄົມຫຼາຍຂຶ້ນ.
^ ຂໍ້ 55 ຄຳອະທິບາຍຮູບພາບ: ຜູ້ດູແລທີ່ຍັງໜຸ່ມໄດ້ຮັບປະໂຫຍດຈາກປະສົບການຂອງຜູ້ດູແລທີ່ອາຍຸຫຼາຍກວ່າ ແລະອີກຮູບໜຶ່ງແມ່ນຜູ້ດູແລທີ່ອາຍຸຫຼາຍກວ່າໄດ້ຊວນຜູ້ດູແລທີ່ຍັງໜຸ່ມກັບເມຍມາກິນເຂົ້າຢູ່ເຮືອນ.
