1. Tae-e ra ǁgau omaridi nētsē ǀnamgu tama hâsa?

ELOBMÎS ge ge mî ǀuni tsēdi ǃnân khoena nî “ǀnamoǃnâ” ti. (2Tim. 3:1, 3) Nē kēbos ge nēsi ra dīǀoaǀoahe. Miliundi ǃgammegu ge ge ǀgora. Tsîn ge ǁgûna ǁaixa-ū gu hâ, tsîn ge ǀgôana ǀnam-e taman hâ khami ra tsâ. Omaris ǁanin hîna ǀguiba ra hân tsîn ge ǃgâise ǂangu tama hâ. “ǁGûn tsî ǀgôan hoan ge ǁîn di tabletan, komputeran tsî gamedi ai ǀgui ra ǂnû” tib ge ǀnî khoeb hîna omaride ra huiba ra mî. “ǀGui oms ǃnân ga hâ xawes ge nē omarisa a ǀūgu.”

2-3. (a) Romeǁîn 12:10 ǃoagu da ham-e ǀgaisa ǀnamma nî ūhâba? (b) Tae-e da nē ǁkhāǁkhāǃâs ǃnâ nî ǁkhāǁkhāsen?

² ǂGui khoen nē ǃhūbaib ǃnâ ǀnamoǃnâ khami da ge ī ǂgao tama. (Rom. 12:2) ǁGūtsâ da ge nî î da sida omaris ǁanin tsî sida di ǀhaohâb ǃgâsan tsîna ǀgaisase ǀnam. (Romeǁîn 12:10 sa khomai re.) ǀGaisa ǀnamma a tae? Nēb ge ǀnammi hînan ǀgū omaris ǁanina ūhâba gu hâba. ǁNāti ī ǀnamma da ge sida di Xristeǁî ǃgasan hîna sida gagasi omarisa ra kuruǂuina nî ūhâba. O da ge hoada, ǀguiba Jehovaba ǂkhîb ǃnâ a ǃoaba ǁkhā.—Mix. 2:12.

³ Nēti ī ǀnamma ūhâs ǃaroma da ge Elobmîsa xu hâ aiǁgaude xu nî ǁkhāǁkhāsen.

4. Matis Jakobub 5:11 sa ra huida î da Jehovab di ǀnamma ǃgôaǃgâ?

⁴ Elobmîs ge Jehovab di îsa ǀgaugu xa ra mîba da. Aiǁgause i ge ra mî, “Elob ge a ǀnam.” (1Jhn. 4:8) ǁNās  xa da ra ǁkhāǁkhāsen o, o da ge ra Jehovab di ǀhō kai ǂgao. Elobmîs ge Jehovab a “ǀkhomxa” tamas ka io ǃgam ǀnamma ra ǁgau dis tsîna ra mî. (Jakobub 5:11 sa khomai re.) Nēs ge a ǁgauǁgau matikōseb Jehovaba a ǀnam dasa.

5. Jehovaba mati ra ǀkhomxa da tsî mati da ǁîba a ǁgae ǁkhā?

⁵ Jakobub 5:11 ǃnâ da ge ra mû, Jehovab di ǀnammi ǀkhomxaǂgaosib ǀkha ra ǂgaiǀhaohe ǃkhaisa. Nē ǀgaub tsîn ge sida ǁîba ǃoa ra ǂgae. (Eks. 34:6) ǀGui ǀgaub Jehovab ǀkhomxaǂgaosiba ra ǁgaudab ge, sida dīsān ǃaroma ǀûba dasa. (Psa. 51:1) Elobmîs ǃnâ i ǀkhomxas xa ra ǃhoahe o, o i ge khoe-e ǀûbas xa ǀgui ǃhoahe tama hâ. ǀKhomxaǂgaosib ge khoe-i ǂganagaba xu hâ. Tsî i ge khoe-i hîna huiba ǂhâ hâ-e i ga mû o, o ra hui ǂgao. Jehovab ge ra mî ǁîb ra hui ǂgao ob ra tsâ ǀgaus ge mamasas ǁîn ôana ra hui ǂgaos xa a ǃnāsa. (Jes. 49:15) ǃGomsina da ga ūhâ o, ob ge Jehovaba ǀkhom dab ra amaga ra huida. (Psa. 37:39; 1Kor. 10:13) Sida ǃgâsana da ge ǀkhomxaǂgaosiba a ǁgau ǁkhā ǁîna da ga ǀûba tsî ǁaixa ū tama io. (Efe. 4:32) Xawe ǀnîhâ ǀgaub hîna da sida ǃgâsana ǀkhomxaǂgaosiba a ǁgau ǁkhās ge ǁîna ǂkhâǃnâsa ǃgoman ga hōǃgâ o. ǀNammi ga ǁgari da o, î da ǀkhomxaǂgaosiba nau khoen ǃoagu ǁgau, o da ge Jehovaba ra ǁgae. ǁÎb ge nau khoen hoan xa ǃnā hâ ǃgam ǀnamma ra ǁgau da.—Efe. 5:1.

6. Jonatanni tsî Davib tsîna mati ge ǁgau ǀgū ǀhōsagusisa kha ge ūhâ-i sa?

⁶ Elobmîs ge ra mîba da ǀoasa kurusa ūhâ tama khoen hîna ge ǃgam ǀnamma gere ǁgaugun xa. Jonatanni tsî Davib di aiǁgausa kō re. Elobmîs ge ra  mî: “Os ge Jonatanni di ǀomsa Davib di ǀoms ǀkha ge ǃgaeǁaesen; ob ge Jonatanna ǁîb di ǀoms ǂhanis khami ge ǀnam bi.” (1Sam. 18:1) Davib ge Saulab nî gaose ǃkhōǃkhunise ge ǁgaumâihe. ǁNās khaoǃgâb ge Saula Daviba ge suri tsoatsoa tsî ǁîba gere ǃgam ǂgao. Jonatanni ge ǁîb dadasab ǀkha ge ǀguiǂâixa tama hâ-i Daviba ǃgams ǃaroma. Jonatanni tsî Davib tsîn ge ge mîba gu, i ga ǀhōsaguse hâ tsî hoaǁae ǂkhâǃnâgu.—1Sam. 20:42.

7. Tae-e ga ǁkhae hâ Jonatanni tsî Davib tsîna ǀhōsagu kaisa?

⁷ Jonatanni tsî Davi hâkha di ǀhōsagusa ga ǁkhae hâ xūn xa da ra ǂâi o, o da ge ra mû matikōses ǁîkha di ǀhōsagusisa ge ǀō-aisa īsa. Aiǁgause Jonatanni ge Daviba 30 kurina ge kaiba i. Jonatanni ge ǀnîsi ga mî hâ, ǂkham khoe-i hîna ǂansa ūhâ tama i ǀkha ǀhōsagus a īǁoasa. Xawe Jonatanni ge ǁnāti ge ǂâi tama hâ i. Tsî kaise kai ǃgôasiba Daviba ge ūba hâ-i.

8. Tae-i ǃaroma kha ge Davib tsî Jonatanni tsîna ǃgâi ǀhōsagu i?

⁸ Jonatanni ge Daviba ga suri hâ. Gao-aob Sauli di ôab aseb ge Jonatanna ga mî hâ ǁîb a ǂhanu khoe gaosisa hōs diba. (1Sam. 20:31) Xawe Jonatanni ge ge ǃgamǃgamsenxa i, tsî Jehovab ǃoa-ai ge ǂgomǂgomsa i. ǁNā-amagab ge Daviba Jehovab xa saora gaob ase ǁhûihe o, ob ge ǁîba ge ǂkhâǃnâ. ǁÎb ge Davib ǃoa-ai ge ǂgomǂgomsa i, Sauli gere ǁaixa xawes tsîna.—1Sam. 20:32-34.

9. Mati da a ǂan Jonatanni ge Daviba suri tama hâ-i sa?

⁹ Jonatanni ge Daviba ge ǀnam-i, ǁnā-amagab ge ǁîba ge suri tama hâ-i. Jonatanni ge ǂgui toroga ge dan hâ-i tsî khās ǃnâ ge ǃgâi i. ǁÎb tsî Sauli tsîn ge “ǃariǃkhādi ǃgâ-ai ǃhae” tsî “xamgu xa ǀgaisa” se ge ǂansa i. (2Sam. 1:22, 23) ǁNā-amagab ge Jonatanna ga koasen hâ ǁîb ge dī xūn ǃgao. Xaweb ge Jonatanna Daviba ge suri tama hâ i, ǁîb ra dī xūn ǃgao. Xaweb ge Jonatanna Davib ge ǁkhoaǂgao i tsî Jehovab ai gere ǂgomǃgâ ǃkhais xa ge ǃgâibahe i. Aiǁgauseb ge Daviba Goliata ǃgam toas khaoǃgâb ge Jonatanna ǁîba ge ǀnam tsoatsoa. Mati da ǁkhā ǀgaub ǃnâ sida ǃgâsana nî ǀnam?

10. Tae-e i ra ǂâibasen ‘ǂgaoba xu ǀaexase ǀnamgusa’?

¹⁰ Elobmîs ge ra mîba da î da “ǃanu ǂgaoba xu ǀaexase ǀnamgu.” (1Pet. 1:22) Jehovab ge ǃgâi aiǁgausa ra māda. ǁÎb di ǀnammi ge ǁnātikōse a ǀgaisa tsî da ga ǁîb ǃoagu ǂgomǂgomsase hâ o, o i ge xū-i xare-e ǁîba xu a ūbe da ǁoa. (Rom. 8:38, 39) Xrike gowab di mîs “ǀaexase” di ra ǂnûiǃkhunihes ge ǀhōǂuisens tamas ka io ǁgūtsâs di ra ǂâibasen. ǀNî ǁaegu ai da ge nî “ǁgūtsâ” tsî nî “ǀhōǂuisen,” î da sida ǃgâsana ǃgamse ǀnam. Khoe-i ga ǁaiǁai da o, o da ge “ǃnūǃnâxasib ǀkha ǀnammi ǃnâ tanigu” tsî nî dītsâ “gagab di ǀguiǂâixasiba ǃkhōǀgaipesa ǂkhîb di ǃgaeǁaresa xu.” (Efe. 4:1-3) Dītsâ da ga o sida ǃgâsan ǀkha ǂkhîba ūhâsa o da ge ǁîn dīsān ai sida di ǂâide ǂnûi tide. Dītsâ da ge nî  î da Jehovab sida ǃgân xa ra ǂâi khami ǁîn xa ǂâi.—1Sam. 16:7; Psa. 130:3.

11. Tae-i ǃaroma i ǃgam ǀnamma ǀnî ǁaegu ai ǁgausa a ǃgom?

¹¹ Hoaǁae i ge supu tama hâ sida ǃgâsan ǃoagu ǃgam ǀnamma ǁgausa, ǁîn di dīsāde da ga ǂan o. Tsî nēs ge ge ǃgomsi ǂgurokam ǁaeb Xristeǁîn tawa. Aiǁgause Euodias tsî Sintixes tsîn ge ǃgomsi-e ge ūhâ tama hâ-i, Paulub ǀkha ǀguiba “ǃgâiǂhôasa” aoǁnâs ǃnâ. Xawe ra ge ǁîra ǀnî ǃaroma-i ai ge ǁnâugu tama hâ-i. Tsîb ge Pauluba ǁîra ge mîba “î ra ǃKhūb ǃnâ ǀguiǂâixa.”—Fil. 4:2, 3.

12. Mati da ǃgam ǀnamma sida ǃgâsana a ǁgau ǁkhā?

¹² Mati da ǃgam ǀnamma sida ǃgâsan ǃoagu nētsē a ǁgau ǁkhā? Sida di ǃgâsana da ga ǃgâise ga ra ǂan o, o i ge supu ǁîna ǁnâuǃā tsî ǁîna ǃgam ǀnamma ǁgausa. Khoe-i di kuri-i tsî khaoǃhū-i ge xū-e ǀkharaǀkhara tama hâ. ǂÂihō re Jonatanni ge Davib xa 30 kurina kai i ǃkhaisa. Xaweb ge ǀgū ǀhōsagusisa ǁîb ǀkha ge omkhâi. Kurin ǃnâ kai khoen ǃnâ ǃgâiǃgâibasen-e ūhâ i du nî, tamas ka io sadu xa a ǂkham i ǃnâ? Nēsa da ga dī o, o da ge ‘ǃgâsasiba ǀnamma’ ra ǁgau.—1Pet. 2:17.

13. Tae-i ǃaroma da ǀhaohâb ǃnâ ǀnîn tawa ǀgui ǀgūguse ra tsâ?

¹³ ǃGam ǀnamma da ga ūhâ o, o i ra ǂâibasen ǀguitikōse da ǀhaohâb ǃnâ hâ hoa ǃgâsan ǀkha nî ǀhōsagusa? Hî î, ǁnās ge īǁoa. Sida ra dī xūn xa ǃgâibahe khoen ǀkha hâs xa da ge sida tsîna a ǃgâibahe. Jesub ge ǁîb di ǁkhāǁkhāsabega ‘khoegu’ tamas ka io ti ǀhōgu ti ge ǂgai. Xaweb ge ǀgū ǀhōsagusisa Johaneb ǀkha ge ūhâ-i. (Jhn. 13:23; 15:15; 20:2) Xaweb ge Jesuba hoa apostelga ǀgui ǀgaub ǃnâ gere hâ-ū. Aiǁgause Johaneb tsî Jakobub tsîn ge ǀgapi ǃharosa a ǂganbasen o, ob ge Jesuba ge mî: “Ti amǀkhāb tsî ti ǁareǀkhāb ai ǂnûsa  mās ge ti” tama. (Mrk. 10:35-40) Jesuba ǁgaes ǃaroma da ge tā sida ǀhōsan ǀguina ǃgâise nî hâ-ū. (Jak. 2:3, 4) Ti da ga dī o, o da ge Xristeǁî ǀhaohâb ǃnâ ǀgorasa nî dī, tsî ǁnās ge ǁnapa ī tide.—Jud. 17-19.

14. Matis Filipeǁîn 2:3 sa a huida ǁkhā î da tā nau ǃgâsan ǀkha ǀnûgu?

¹⁴ ǀHaohâb ǃnâ da ga ǀnamgu o, o da ge hoada kō aigu tide. Jonatanni ge Davib ǀkha ge kō aigu tama hâ i. Tsî ǁnās ǀkha aitsama gao-aose ge ǁgaumâisen tama hâ-i. Hoade ge Jonatanni di aiǁgausa a ǁgae ǁkhā. A da tā sida di ǃgâsana suri re, ǁîn ūhâ ǁkhāsigu ǃaroma. Xawe a da “ǃgamǃgamsens ǃnâ nē-e nau-e ǁî-i ǃgâ-ai ǀgapise ǃgôa” re. (Filipeǁîn 2:3 sa khomai re.) ǂÂis ǃnâ ūhâ re mâ khoe-i hoa-i ge ǀhaohâb ǃnâ xū-e a ǂâibasen ǁkhā. ǃGamǃgamsens ǀkha da ga hâ o, o da ge ǃgâina sida di ǃgâsan ǃnâ a mû ǁkhā. Tsî da ge ǃgâi aiǁgauna ǁnapaxu a ǁkhāǁkhāsen ǁkhā.—1Kor. 12:21-25.

15. Tae-e du ra ǁkhāǁkhāsen Tanyas di omaris aiǁgausa xu?

¹⁵ ǃÂubasen tama da hâ ǃgomsi-e da ga hōǃgâ o, ob ge Jehovaba ra ǂkhâǃnâ da, sida di ǃgâsan ra mā huib ǃnâ-ū. Aiǁgausa da ge ūhâ omaris hîna ge 2019ǁî kurib di ǀkharib kai ǀhaosa a hâǃnân disa. Amerikab ǃnâ ge hâ-i ǀkharib kai ǀhaos ge. “Sida ra hâǃnâ hotelsa ǃoa da ge ge ǃnari garu i,” tis ge Tanyasa ra mî. “ǀNîhâ audos ge sida audos hâ daob ǃnâ ge ǂgâ tsî sida ǃnâ ge ǃkhoeǂgâ. Khoe-i ge ge tsû tama hâ-i xawe da ge ǃhurib xa audosa xu ǂoa tsî daob  xōǀkhā ge mâ i. Daob nauǀkhab ai ge mâ i audos tawan ge khoena gere ǂgaida î da ǁnapa sī. Sida di ǃgâsan ge ge i hîna ge ǁîn tsîna kai ǀkharib ǀhaosa xu gere ǃnarina. ǁÎb ǀguib ge ǁnapa ge mâ tama hâ i. Koro ǃgâsan Swedena xu hā hân tsîn ge ǁnapa ge mâ i. ǃGâsadi ge kaise ǀgaisase tita tsî ti ôas tsîna ge ǁnamǂgā, ǂhâm ge hâ-ise. ǃGâsadi tsî ǃgâsagu tsîna da ge ge mîba hoa xūn a ǂhanu tsîn a īǁkhā ǃkhaisa. Xawen ge ge ī ǂgao tama hâ-i. ǁÎn ge noxopa ǀaeǃkhō-aon ge ǀkhīs tsîna ge hâ-i. Tsî ǂhâ da hâ xūn ǀkha ge huida. Nēti ī ǃgom ǁaeb ǃnâ da ge Jehovab di ǀnamma ge hōǃâ. Nēti ī hōǃâdi ge sida tsî sida ǃgâsan di ǀnamma ra ǀgaiǀgai. Sida di ǃgôasib hîna da Jehovaba ūba hâb tsîna.” ǂÂihō i du ra ǁae-i hîna i ge ǃgâsa-e sadu ǃgam ǀnamma a ǁgau-e, sado huis ǃnâ-ū?

16. Tae-i ǃaromasa da ūhâ î da ǃgam ǀnamma ǁgaugu?

¹⁶ Sida ǃgâsana da ga ǃgam ǀnamma a ǁgau o, o ra ī ǃgâi xūn xa ǂâi re. Sida ǃgâsana da ge ǃgom ǁaegu ǃnâ ra mâxōǀkhā. Tsî da ge ǁnās ǀkha sida tsîna ǀgū ǀhōsagusisa ǁîn ǀkha ra omkhâi. Tsî da ge ra ǁgau Jesub di ǁkhāǁhāseba da a ǃkhaisa. Tsî ǁnās ǀkhan ge nau ǂhauǃnâ ǂgaoga ūhân tsîna Jehovaba nî ǃoaba tsoatsoa. Tsî hoan ǂam-ai da ge “ǁGûb ǀkhomxaǂgaosigu dib tsî Elob ǁkhaeǂgaob hoab diba” ra koa. (2Kor. 1:3) A da hoada dītsâ re ǃgam ǀnamma hoaǁae ǁgausa.