1. Tiheeni enooniherya wi mu imusi sincipale hiwaamomo osivela wawaakhwanela?

PIIPILIYA aahiloherya wi mmahiku ookuchula, achu yaahaala oyeleela “osivela wophachuwano.” (2 Tim. 3:1, 3, NN) Olelo ninnoona waakhwanela wa yooloherya yeela. Ntoko yootakiherya, ninnawoona atheli ancipale emwalanaka, ekhalaka ooximwa mukina ni mukhwaawe nave anaaya hanaakhela osivela yoowo anachunaaya. Ophiyerya wi achu aveemusini yaawo anakhala vaate vamoha hanakhalano onthamwene wawaacameleya. Ntoko yootakiherya, muchu mmoha onavaha ikano wa imusi ooloca: “Tiithi, mai, ni anaaya hanalocihana awo annamaliha elukuluku yincipale empharihelaka komputatore aya, tapleti, telefone, naari yaavonyaka axooku mu ikhankoonya saya. Naamwi achu yaala aveemusini ekhalaka vaate vamoha, hanasuwelana phaama mukina ni mukhwaawe.”

2-3. (1) Mwawiiwanana ni Aroma 12:10, taani nnaphwanelaahu omooniherya okhwela nniphwanya? (2) Tiheeni nnahaalaahu othokororya mmwaha yoola?

² Hiyo hinnachuna wuupiwa ni elapo yeela ehirino osivela. (Aro. 12:2) Moohiyana, nnaphwanela wooniherya niphwanya ohiya pahiru wa achu aveemusini vahu, nyenya tho wa anna ni arokora mmulokoni. (Mwaalakhanye Aroma 12:10.) Okhwelana mukina ni mukhwaawe nniphwanya tiheeni? Ori mukhalelo achu aveemusini anooniheryanaaya vaavaa anakhalaayano onthamwene waphaama wa mukina ni mukhwaawe. Ola mukhalelo wa osivela nnaphwanelaahu wooniherya wa emusi ahu yoomunepani, anna ni arokora ahu Eekristu. Vaavaa nnooniheryaahu okhwelana nniphwanya, ninnakhaviherya okhapelela wiiwanana yoowo ori woochuneya variyari va alapeli eeparipari.—Mik. 2:12.

³ Wi nikhaviheryeye wunnuwiha ni wooniherya okhwelana nniphwanya,  hankooni noone echu nnaphwanelaahu ohuserya orweela wa sootakiherya sa Mpiipiliyani.

4. Tiyako 5:11 onanikhaviherya hai othamalela osivela wawiiseela yoowo Yehova onanooniheryeiye?

⁴ Piipiliya onnanleela vooloca sa mikhalelo saphaama sa Yehova. Ntoko yootakiherya, Piipiliya onnanleela wi “Muluku ti osivela.” (1 Yoh. 4:8) Vaavaa nnasuwelaahu yeela vooloca sa Yehova, ninnachuna okhala asinthamwene awe. Nyenya tho Piipiliya onnanleela wi Yehova “taniphwanya ni ooreera murima.” (Mwaalakhanye Tiyako 5:11, BNM) Ala masu aphaamaxa yaawo anooniherya ophiyerya mweeryo taani Yehova onansiveleiye!

5. Yehova onooniherya hai ikharari wa hiyo, nave nni nimutakiherye hai?

⁵ Moone wi vaavaa Tiyako 5:11 onaloceiye sa niphwanya na Yehova, mu elukuluku emohamoha onnaloca tho mukhalelo mukina yoowo onaneeriha omwaacamela yoowo—ikharari sawe. (Muk. 34:6) Mukhalelo mmoha Yehova onooniheryeiye ikharari sawe wa hiyo ori moorweela wa onikhurumuwela wa soocheka seiho nnapakaahu. (Sal. 51:1) Mpiipiliyani, ikharari sinnavolowela ichu sincipale ohiya pahiru okhurumuwela. Ikharari moonelo woolipa yoowo muchu onakhaleiyeno vaavaa onamooneiye muchu yoowo onahooxeya nave sinnamuceenyerya omukhaviherya yoowo. Yehova onaloca wi nchuno ntokweene oreiyeno na onikhaviherya hiyo ti noolipa opwaha moonelo yoowo mai onakhaleiyeno wa mwanawe. (Isa. 49:15) Vaavaa nnakhalaahu oothanana, ikharari sa Yehova sinnamuceenyerya Owo onikhaviherya. (Sal. 37:39; 1 Kor. 10:13) Nnanwerya wooniherya ikharari ntakhara anna ni arokora ahu moorweela wa waakhurumuwela yaawo ni ohititelela okuha mathowa vaavaa anannyeenyeihaaya. (Éfe. 4:32) Nyenya mukhalelo mukina woochuneya nneeraahu nooniherye ikharari wa anna ni arokora ahu ori moorweela wa waakhaviherya elukuluku anahoolelaaya mikhalelo soovila. Vaavaa osivela onanceenyeryaaya okhala achu a ikharari, ninnamutakiherya Yehova, yoowo onooniherya niphwanya ntokweene ompwaha muchu vyakala.—Éfe. 5:1.

6. Yonata ni Tavite yoonihenrye hai niphwanya wa mukina ni mukhwaawe?

⁶ Piipiliya onnaloca sa achu yaawo yoonihenrye osivela wa mukina ni mukhwaawe ntoko asinthamwene awaacameleya. Muthokororye yootakiherya ya Yonata ni Tavite. Piipiliya onaloca wi: “Tavite amanle oloca ni Saawulu murima wa Yoonatani waahaataana ni wa Tavite, apacerya omukhwela yoowo ntoko mwaneene.” (1 Sam. 18:1) Yehova aahimuthanla Tavite ntoko mwene wi amuraceele Sawuli. Ohoolo waya, Sawuli aanamukhalela nrima Tavite nave aanachuna omwiipha. Nyenya mwaana a Sawuli, Yonata haakhavihenrye apapa awe vaavaa yeereryaaya omwiipha Tavite. Yonata ni Tavite yaahiroromelihana otitelele okhala asinthamwene ni okhaviheryana mukina ni mukhwaawe ilukuluku soothene.—1 Sam. 20:42.

7. Tiheeni yaahaala omweeriha Yonata ni Tavite ohikhala asinthamwene?

⁷ Ti yootikhiniha osuwela wi Yonata ni Tavite yaahikhalano onthamwene wawaacameleya nthowa nawi saahikhalavo ichu sincipale seiho saahaala oweeriha ohikhala asinthamwene. Ntoko yootakiherya, Tavite aari mukhaani naamulikanyihaka ni Yonata yoowo aapwanhe ni iyaakha 30. Yonata aanwerya wuupuwela wi haki apake onthamwene ni muchu yoowo aari mmiravo nave tho yoowo ahaarino mavyakelo. Ohiya yeeyo, Yonata haamonne naari omukhaliha Tavite ntoko muchu oohichuneya.

8. Ntakhara heeni Yonata aareiyeno onthamwene waphaama ni Tavite?

⁸ Yonata aanwerya omukhalelaka nrima Tavite. Ntoko mwaana a Mwene Sawuli, Yonata aanwerya olocaka wi owo taaphwanela okhala mwene oocharela. (1 Sam. 20:31) Nyenya Yonata aari awiiyeviha, nave aari oororomeleya wa Yehova. Mwawiihiiha, Yonata aahimukhaviherya Tavite yoowo aathanliwe ni Yehova wi akhale mwene oocharela. Owo aatitelela okhala oororomeleya wa Tavite naamwi mwene Sawuli aari oonyeenyeya ni yoowo.—1 Sam. 20:32-34.

9. Apwanne Yonata aamoona Tavite ntoko mwiicani? Mutharihe.

⁹ Yonata aahikhalano niphwanya ntakhara Tavite, mwa yeeyo haamonne owo ntoko mwiicani. Yonata aari oolipa murima nave aawaniha ikhoco sincipale nave tho aanasuwela opharihela phaama munra ni mavaka. Yonata ni tiithi awe, Sawuli, yaasuweliwe ntoko “awaakuveya ompwaha shawawe, akuru waapwaha amwaco.” (2 Sam. 1:22, 23) Naamwi hiihaa, Yonata hiiruminhe wanthowa na mavyakelo aareiyeno. Nave tho, Yonata haavaanyihanne ni Tavite naari okuha mathowa ntakhara yoowo. Moohiyana, Yonata aanamucicimiha Tavite nthowa na olipa murima ni omuroromela wawe Yehova. Mweeparipari, vaavaa Tavite aamwiiphaleiye Koliyati Yonata aahipacerya omusivela Tavite ntoko iisiveleiye. Nni niwerye hai wooniherya niphwanya ntoko nenla wa anna ni arokora ahu?

10. Enataphulela eheeni “osivelana mukina ni mukhweiye ni murima woothene”?

¹⁰ Piipiliya onnanleela ariki “mukhwelanake mukina ni mukhwawe ni murima wothene.” (1 Ped. 1:22) Yehova ootikitherya yootakiherya wa hiyo. Owo onnanisivela ni murima woothene nave wakhala wi nootitelela okhala oororomeleya wa Yoowo, hiyaavo enahaala ommaaliha onisivela. (Aro. 8:38, 39) Nsu na Ekriki nawi “ni murima woothene” ninnaneeriha wuupuwela sa muchu yoowo oniilipiserya vancipale wooniherya osivela. Mu ikwaha ikina, honakhala wookhweya wooniherya osivela wa anna ni arokora ahu. Vaavaa akina anannyeenyeihaaya, nnaphwanela otitelela okhala ‘oovilelana mukina ni mukhweiye mu osivela. Ni wiilipisherya okhapelela omoha onarweela wa Munepa ni olucelelana  wa murecele.’ (Éfe. 4:1-3) Vavaa nniilipiseryaahu “okhapelela olucelelana wa murecele,” hinni ntikitheryeye mu soohesa sa anna ni arokora ahu. Nyenya nnahaala wiilipiserya owoona anna ni arokora ahu hiihaa ntoko Yehova onawooneiye.—1 Sam. 16:7; Sal. 130:3.

11. Ntakhara heeni onamukhala woovila wooniherya niphwanya mu ilukuluku ikina?

¹¹ Wiiliwiili, honakhala wookhweya wooniherya niphwanya ntakhara anna ni arokora ahu, xaxaxa vaavaa nnasuwelaahu sa soohesa saya. Mwawooneya, nla naari nikacamiho wa Akristu a mu nsana noopacerya. Woonaru, Evotiya ni Sintike yaahikhalano nikacamiho “vaavaa yaalapaaya vamoha ni [Paulo] mmichaka yaphaama.” Nyenya wanthowa vyakala awo yaahikhalano makacamiho emwalamwala. Mwawiihiiha, Paulo aahaalopola wi “yiiwananeke mwa Apwiya.”—Fil. 4:2, 3.

12. Nni niwerye hai otitelela wooniherya niphwanya wa anna ni arokora ahu?

¹² Nni ntitelele hai wooniherya niphwanya wa anna ni arokora ahu olelo? Vaavaa nnaasuwelaahu phaama anna ni arokora ahu, onamukhala wookhweya wa hiyo owiiwexexa yaawo ni otitelela wooniherya niphwanya ntakhara yaawo. Nnanwerya opaka onthamwene ni yaawo moohipwacha waakhanle wi tawunnuwelavo naari amiravo naari waakhanle wi aakhalano sookhovelela soohiyana ni sawihu. Muupuwele wi Yonata aari awunnuwelavo yoowo ampwaha Tavite ni iyaakha 30, naamwi hiihaa, owo aahunnuwiha onthamwene wawaacameleya ni yoowo. Apwanne mmulokoni mwanyu ookhalamo awunnuwelavo—mmiravo—naari mwali yoowo mwaahaalaanyu ochuna opakano onthamwene? Moorweela wa weerano yeela, munahaala wooniherya wi ‘munnaakhwela naari waasivela anna.’—1 Ped. 2:17.

13. Ntakhara heeni nnanwerya okhalano onthamwene wawaacameleya ni akina waapwaha tho akina mmulokoni?

¹³ Apwanne wooniherya niphwanya wa anna ni arokora ahu enataphulela wi nnahaala okhalano onthamwene wawaacameleya ni muchu ori oothene mmulokoni? Hooye, eyo tahi yooweryeya. Tahi yoonanara okhalano onthamwene wawaacameleya ni achu akina waapwaha tho akina akhweya othowa nawi awo annasiveliwa ni ichu imohamoha seiho nnasiveliwaahuno. Yesu  aahiloca wa arummwa awe oothene wi yaari “asinthamwene awe,” nyenya owo aanooniherya osivela wavameekhaaya wa Yohani. (Yoh. 13:23; 15:15; 20:2) Naamwi hiihaa, Yesu haamukhaliha Yohani moohiyana ni akina. Ntoko yootakiherya, vaavaa Yohani ni munnawe Yakopo yaavenkaaya Yesu wi aavahe murici woochuneya mu Omwene wa Muluku, Yesu aawaakhula ariki: “Nto wi mukilaathi moono woolopwana nari woothiyana tahi miyo kinavaha.” (Mar. 10:35-40) Moolikana ni Yesu, hinnaphwanela omukhaliha nthamwene ahu moophwanelelaxa waapwaha akina. (Tiy. 2:3, 4) Wakhala wi noheerano yeeyo, hinni nikhaviherye muloko okhala wa murecele.—Yuda 17-19.

14. Filipi 2:3, oni anikhaviherye hai oheererya wiiseera achu oophwanelelaxa waapwaha akina?

¹⁴ Wakhala wi ninnooniherya niphwanya wa mukina ni mukhwaawe, hinni neererye wiiseera achu oophwanelelaxa mmulokoni. Muupuwele wi Yonata haamukhalenle nrima Tavite nave owo heerenrye wiiseera mwene ompwaha Tavite. Oothene ahu nnanwerya ochariha yootakiherya ya Yonata. Muhaakhalele nrima anna ni arokora anyu nthowa na mavyakelo aya, “nto mwiiyeviheke; mmoha ni mmoha amweereke mukhwaawe wi tompwaha.” (Mwaalakhanye Filipi 2:3.) Muupuwele wi mmoha ti mmoha a hiyo onanwerya opaka echu enahaala okhaviherya muloko. Moorweela wa otitelela okhala awiiyeviha nnanwerya woonaka ichu saphaama mwa anna ni arokora ahu ni ophura orweela wa yootakiherya aya yaphaama.—1 Kor. 12:21-25.

15. Tiheeni muhusenryaanyu orweela wa Tanya ni emusi awe?

¹⁵ Vaavaa nnahoolelaahu makacamiho oohiwehereryeya, Yehova onnanihakararya orweela mwa niphwanya nawe ni onivaha nikhaviheryo nawooneya nenlo nnaakhelaahu orweela wa anna ni arokora ahu. Muthokororye yeeyo yeeren’ye  ni emusi emoha emanle woona muthukumano wa Muceche wa ilapo soohiyanahiyana mu 2019 yoowo waari ni muru “Osivela Honamalaru!” O Estatu Unitu. Tanya mai a anamwane araru ooloca: “Naari mu ekaaro nikhumaka o hoteli, nave ekaaro emoha yaahiyeleela makupa aya epheruwela makupa neecaahuwo nave ekhumula ekaaro ahu. Haavo aanyenyen’ye, nyenya hinaasiveliwe ni yeeyo, naahikhuma mukaaroni neemela okhwipi wa muxewe. Nave muchu mukina aari mmakupa makina a muxewe aanuuvela ntata wi nawele mukaaroni mwawe ni okhala ookhapeleleya. Owo aari mmoha a annihu yoowo tho aari va muthukumano yoole wa muceche. Nyenya tahi wi aari yooworu eemenle. Nave tho anna ni arokora athanu yaawo yaakhumme o Suwesiya yaaheemela. Arokora awo yaahaakhupaarela anaaka vamoha ni miyo moosivela, nave eyo yaaneeriha woona phaama! Kaahaaleela anna ni arokora awo wi naahaala okhala phaama nyenya hiyaanihin’ye. Awo yaahititelela okhala vamoha ni hiyo ophiyerya akhaviheryi a okumi ephin’ye, nave yaahiroromela wi nookhalano echu eri yoothene naachunaahu. Variyari va elukuluku yeele yookacamiha, naahoona osivela wa Yehova. Yaweereya yeele, yaahilipiha osivela wahu ntakhara anna ni arokora, nave yaahunnuwiha osivela wahu ni othamalela ntakhara Yehova.” Apwanne munnuupuwela elukuluku mwaahoolenlaanyu nikacamiho nave anna ni arokora yooniherya niphwanya ntakhara nyuwo?

16. Mathowa taani ananeeriha wooniherya niphwanya wa mukina ni mukhwaawe?

¹⁶ Muupuwele vooloca sa sookhumelela saphaama inakhalavo vaavaa nnooniheryaahu niphwanya wa mukina ni mukhwaawe. Ninnaahakararya anna ni arokora ahu vaavaa anahoolelaaya makacamiho. Ninnalipiha wiiwanana variyari va achu a Muluku. Ninnooniherya wi na oohuserya a Yesu, nave ela ennaweeriha yaale arino murima waphaama achuna omurumeela Yehova. Opwaha soothene, ninnamucicimiha “tiithi a ikharari ni Muluku onanlipiha mu soothene” Yehova. (2 Kor. 1:3) Oothene ahu nnaphwanela okhala oolakelela wunnuwiha ni wooniherya niphwanya!