1. ¿Tleka tikijtouaj ika miyekej xok tetlasojtlaj?

BIBLIA yokijtoka ika ipan itlamiyan tonaltin miyekej “xkintlajsojtlaskej oksekimej” (2 Tim. 3:1, TNM; 2 Tim. 3:3). Tikitaj ika aman ijkon nochiujtika. San matitlanemilikan itech yejuin, melak miyekej familias xnemij ika inyojlo pampa tajtin yonokaujkej niman notlauelitaj. Niman, yejuin yokichiuj ika inkoneuan makimachilikan ika xakaj kintlasojtla. Niman oksekimej familias, maski san sekan chantij, nion xnonotsaj. Se ixtlamatki akin kinpaleuiya familias kijtoua: “Miyekej nantin, tajtin niman kokonej nion xnonotsaj, se kitstok icomputadora, okse kimapixtok itableta noso iteléfono, niman okse nauiltijtika ika videojuegos. Maski san sekan chantij, nion xnoixmatij”.

2, 3. a) Ijkon ken kijtoua Romanos 12:10, ¿akinomej noneki tikintlasojtlaskej? b) ¿Tlenon tikitaskej ipan yejuin tlamachtijli?

² Xtiknekij tikchiuaskej ijkon ken akin xkitekichiuiliaj Jehová, tejuamej tiknekij nochipa titetlasojtlaskej (Rom. 12:2). San ika, xsan noneki tikintlasojtlaskej tochanejkauan, noijki noneki tikintlasojtlaskej tokniuan akin nemij ipan tlanechikojli (xpoua Romanos 12:10). Noneki tikintlasojtlaskej tokniuan ijkon ken tikintlasojtlaj tochanejkauan. Tla ijkon tikchiuaj, xtotlauelitaskej imiuan tokniuan niman kuajli tiktekichiuiliskej Jehová (Miq. 2:12).

 ³ Ipan yejuin tlamachtijli, titlajtoskej intech sekimej itekipanojkauan toTajtsin akin yeuejkaui onenkej. Tlen okichiujkej techpaleuis más matitetlasojtlakan.

4. ¿Tlenon techajsikamachiltia Salmo 103:8, 11?

⁴ Biblia techijlia tlen kualtsin kichiua Jehová. San se matikteneuakan, 1 Juan 4:8 kijtoua ika “Dios yejua tetlajsojtlalistli”. Ijkuak tikasikamatij yejuin, más tiknekij tikixmatiskej. Niman Biblia noijki techijlia ika Jehová kipiya “ueyi tetlajsojtlalistli” (xpoua Salmo 103:8, 11). ¡Kuajli tikitaj ika Jehová melak techtlasojtla!

5. ¿Kenon techititia Jehová ika techiknelia, niman kenon uelis tikchiuaskej ijkon ken yejua?

⁵ Salmo 103:8, 11 xsan kijtoua ika Jehová tetlasojtla, noijki kijtoua ika yejua teiknelia (Éx. 34:6). Jehová techititia ika techiknelia pampa techtlapopoluiya (Sal. 51:1). Aman tej, Biblia kijtoua ika yakaj akin teiknelia xsan tetlapopoluiya, noijki kichiua itlaj okse. ¿Tlenon más kichiua? Ijkuak kita ika yakaj tlajyouijtika, melak kineki kipaleuis. Biblia techititia ika Jehová sa kinektika techpaleuis niman ika más techtlasojtla xijkon ken se nantli kitlasojtla ikoneuj (Is. 49:15). Ijkuak Jehová kita ika titlajyouiyaj, techiknelia niman techpaleuiya (Sal. 37:39; 1 Cor. 10:13). Tejuamej noijki uelis titeikneliskej ijkon ken Jehová tla tikintlapopoluiyaj tokniuan niman tla xtikintlauelitaj ijkuak techyolkokouaj (Efes. 4:32). San ika, melak kuajli tikteititiskej ika titeikneliaj tla tikinpaleuiyaj tokniuan ijkuak kixnamikiskej tlen ouijtika. Tla titeikneliaj pampa titetlasojtlaj, tikchiujtoskej ijkon ken Jehová (Efes. 5:1).

6. ¿Kenon Jonatán niman David onoititijkej ika notlasojtlayaj?

⁶ Biblia kinteneua miyekej itekipanojkauan toTajtsin akin melak onotlasojtlakej.  Matitlajtokan itech Jonatán niman David. Biblia kijtoua ika yejuamej melak kuajli onouikakej. Jonatán sajnoye kitlasojtlaya David ijkon ken yejua notlasojtlaya (1 Sam. 18:1). Jehová okitlapejpeni David niman ijkon matekiuajti ipan ikalpan. Ajsiskia se tonajli ijkuak yejua kitekipatlaskia Saúl, itaj Jonatán. Ijkuak Saúl okimat yejuin, opeuj kinexikolita David niman hasta kinekiya kimiktis. San ika, Jonatán xokipaleui itaj ijkuak kinekiya kimiktis David. Jonatán niman David okijtokej ika nochipa kuajli nouikaskiaj niman nopaleuiskiaj (1 Sam. 20:42).

7. ¿Tleka techmojkatlachialtia ijkuak tikitaj ika Jonatán niman David melak kuajli onouikakej?

⁷ Techmojkatlachialtia ijkuak tikitaj kenon Jonatán niman David melak kuajli onouikakej. ¿Tleka? Pampa Jonatán más iueyi katka xijkon ken David, kitlantiaya kanaj ika 30 xiuitl. Kuakon, Jonatán ueliskia kinemilis ika xueliskia nouikas iuan se telpochtli akin xmás itlaj kimatiya. San ika, Jonatán nochipa okitlakaitak David.

8. ¿Tleka Jonatán melak kuajli iuan onouikak David?

⁸ Jonatán ueliskia kinexikolitas David niman ueliskia kijtoskia ika yejua kinamikiya tekiuajtis pampa yejua katka ikoneuj tekiuaj (1 Sam. 20:31). San ika, yejua xijkon okichiuj. Jonatán yolyemanki katka niman nochipa kinekiya kitlakamatis Jehová. Ipampa yejon, Jonatán xokualan ijkuak Jehová okitlapejpeni David para matekiuajti. Niman, maski Saúl melak okualan ijkuak okimat ika Jonatán kipaleuiaya David, Jonatán xkeman okitlalkaui David (1 Sam. 20:32-34).

9. ¿Kenon tikmatstokej ika Jonatán xokitlauelitak David?

⁹ Jonatán melak kitlasojtlaya David niman xkeman okitlauelitak. Jonatán melak kuajli tlamotlaya ika iarco niman xnomojtiaya ijkuak ontlauijsokiya ipan guerra. Miyekej kijtouayaj ika yejua iuan itaj más totoka notlalouayaj xijkon ken “on águilas ijkuak patlanij” niman ika más kojtikej katkaj xijkon ken “on leones” (2 Sam. 1:22, 23). Ipampa nochi yejuin, Jonatán ueliskia noueyimatis. San ika, xkeman okinek notlatlanis iuan David niman xkeman okinexikolitak. Yejua melak kitlakaitaya David pampa kitaya ika yolchikauak katka niman ika tlaneltokaya itech Jehová. Sakin ika David okimikti Goliat, Jonatán opeuj kitlasojtla David. ¿Kenon uelis tikintlasojtlaskej tokniuan ijkon ken Jonatán okitlasojtlak David?

10. ¿Tlenon kijtosneki ijkuak Biblia kijtoua: “Sanoyej xmotlajsojtlakan inuan oksekimej ikan nochi nemoyojlo”?

¹⁰ Biblia kijtoua: “Sanoyej xmotlajsojtlakan inuan oksekimej ikan nochi nemoyojlo” (1 Ped. 1:22). Jehová ijkon techtlasojtla niman kijtoua ika tla xkeman tiktlalkauiyaj, nochipa techtlasojtlas (Rom. 8:38, 39). Ika griego, tlajtojli “sanoyej” tlen nikan notekitiltia kiteasikamachiltia ika noneki melak tokojtiliskej titetlasojtlaskej. ¿Nemij sekimej tokniuan akin ouijtika tikitaj tikintlasojtlaskej? Biblia techijlia tlenon tikchiuaskej tla kemantika yakaj techyolkokoua: “Xmijyouilikan nochi iuan cada se ikan tetlajsojtlalistli. Xchiuakan kanika para on Espíritu Santo ma mechpiya san sekan ikan yolseuilistli” (Efes. 4:1-3). Tla nochipa tiknekij tinemiskej ika “yolseuilistli” imiuan tokniuan, xnoneki san tikitstoskej kenon nopopolouaj, yej noneki tikintlasojtlaskej ijkon ken Jehová kintlasojtla (1 Sam. 16:7; Sal. 130:3).

11. ¿Tleka kemantika ouijtika tikitaj tikintlasojtlaskej tokniuan?

¹¹ Kemantika ouijtika tikitaj tikintlasojtlaskej tokniuan, niman más ijkuak san tikitstokej  kenon nopopolouaj. Yejon tlen inpan onochiuj sekimej tokniuan akin onenkej ipan kachtopa siglo. Matitlanemilikan itech Evodia niman Síntique. Maski yejuamej nochipa kuelitayaj kitekichiuiliskej toTajtsin iuan Pablo, yejuin omemej tokniuan siuamej xmás kuajli nouikayaj. Ika yejon, Pablo okimijli “ma kipiyakan san se inyojlo ken iknijtin itech toTEKO” (Filip. 4:2, 3).

12. ¿Tlenon noneki tikchiuaskej niman ijkon más tikintlasojtlaskej tokniuan?

¹² ¿Tlenon noneki tikchiuaskej niman ijkon más tikintlasojtlaskej tokniuan? Noneki más kuajli tikimixmatiskej. Tla ijkon tikchiuaj, xtechtekiyomakas tikimasikamatiskej niman tikintlasojtlaskej. Tejuamej uelis imiuan touikaskej maski tla iuejueyimej, tla ok telpokamej noso tla oksekan ualeuaj. Matikilnamikikan ika Jonatán melak kuajli onouikak iuan David maski kitlantiaya kanaj ika 30 xiuitl. ¿Nemi ipan motlanechikol se tokniuj akin más iueyi noso akin ok telpochtli? ¿Ueliskia yes moamigo? Tla ijkon tikchiua, tikteititis ika tikintlasojtla nochimej tokniuan (1 Ped. 2:17).

13. ¿Tleka kemantika san sekimej tokniuan más kuajli imiuan touikaj?

¹³ Yotikijtokej ika tla tikintlasojtlaj tokniuan, uelis yeskej toamigos. San ika ¿kijtosneki yejuin ika nochimej melak kuajli imiuan touikaskej? Ka, xyejon kijtosneki. ¿Tleka? Pampa nochipa nemiskej sekimej tokniuan akin más kuajli imiuan touikaskej pampa noijki kuelitaj tlen tejuamej tikuelitaj. Hasta Jesús noijki ijkon ipan onochiuj. Maski yejua kimitaya nochimej iapóstoles ken iamigos, más kitlasojtlaya apóstol Juan (Juan 13:23; 15:15; 20:2). San ika, yejon xkijtosnekiya ika san apóstol Juan melak kitlakaitaya. Ijkuak Juan niman Santiago okitlajtlanilijkej Jesús makinmaka se ueyi tekitl ne iluikak, yejua okinnankili: “Para nemotlaliskej noyekmakopa niman ipan noopochmakopa nejua xniuelis ompa nemechtlalis” (Mar. 10:35-40). Tejuamej noijki matikchiuakan ijkon ken Jesús, maka san sekimej toamigos  más matikintlakaitakan (Sant. 2:3, 4). Maka matitechikoitakan, pampa tla ijkon tikchiuaj, titexexeloskej. Niman yejuin itlaj tlen xnoneki panos ipan tlanechikojli (Jud. 17-19).

14. Itech tlen kijtoua Filipenses 2:3, ¿tlenon noneki tikchiuaskej niman ijkon xtotlatlaniskej imiuan tokniuan?

¹⁴ Tla tikintlasojtlaj tokniuan, xtiknekiskej imiuan totlatlaniskej. Matikilnamikikan ika Jonatán xkeman okinek notlatlanis iuan David niman xkeman okinemili ika David xkinamikiya tekiuajtis. Noijki ijkon matikchiuakan, maka matikinnexikolitakan tokniuan ijkuak tikitaskej ika yejuamej miyek tlemach ueli kichiuaj, yej matikchiuakan tlen okijto Pablo: “Ikan yolyemanilistli xmomatikan ika oksekimej más uejueyixtokej xken nemejuamej” (xpoua Filipenses 2:3). Matikilnamikikan ika tinochimej titlapaleuiyaj ipan tlanechikojli. Tla tiyolyemankej, tikitaskej tlen kuajli kichiuaj tokniuan niman tiknekiskej tikchiuaskej ken yejuamej (1 Cor. 12:21-25).

15. ¿Tlenon tiueli itech tlen inpan onochiuj Tanya niman ichanejkauan?

¹⁵ Ijkuak tikixnamikij tlen ouijtika, Jehová techyolseuiya niman techpaleuiya intechkopa tokniuan. Matikitakan tlenon inpan onochiuj sekimej tokniuan ijkuak oyajkaj ipan se ueyi tlanechikojli tlen itoka katka “¡Tlasojtlalistli xkeman tlamis!” tlen onopanolti ne Estados Unidos ipan xiuitl 2019. Ipan tonajli sábado, ijkuak Tanya niman imiuan yeyimej ikoneuan nokueptoyaj ipan hotel, se carro okantikis incarro. Tokniuj okijto: “Xakaj onokoko, san ika, ijkuak otiuajkiskej ipan tocarro, melak tomojtijtoyaj niman xtikmatiyaj tlenon tikchiuaskej. Kuakon, otikitakej ika se carro onotelkets. Akin ompa yaya otechuajnots para ompa matiakan niman ijkon  techpaleuis. Katka se tokniuj akin noijki oyajka ipan ueyi tlanechikojli. San ika, xsan yejua onotelti; noijki onoteltijkej makuijli tokniuan akin ualeuayaj Suecia. Nejua iuan nochpoch melak otiyolseujkej ijkuak tokniuan siuamej otechnapalojkej. Melak kuajli otomachilijkej pampa tiknekiyaj yakaj matechyolseui. Maski otikimijlikej ika kuajli tinemiyaj, yejuamej touan onokaujkej. Xoyajkej maski yoyejkokaj ambulancias. Tokniuan okitakej maka itlaj matechpolo. Ijkuak otikixnamijkej yejuin, otikitakej kenon Jehová melak techtlasojtla. Yejuin okichiuj más matikintlasojtlakan tokniuan. Noijki, más opeuj tiktlasojkamachiliaj niman tiktlasojtlaj Jehová”. Niman tejua, ¿tikilnamiki kenon omitspaleui se tokniuj ijkuak otikixnamik tlen ouijtika?

16. ¿Tlenon panos tla nochipa tikintlasojtlaj tokniuan?

¹⁶ Tla nochipa tikintlasojtlaj tokniuan, tikinyolseuiskej ijkuak tlajyouijtoskej niman tikinpaleuiskej manemikan ika yolseuilistli. Noijki, tikteititiskej ika yemelak tikchiuaj ken Cristo, niman más miyekej kinekiskej kitekichiuiliskej Jehová. Niman, tlen más ueyi kijtosneki, tikueyiteneuaskej Jehová, akin nochipa “techiknelijtikaj niman nochipa techyoltlalijtikaj” (2 Cor. 1:3). Ika yejon, nochipa matokojtilijtokan más tikintlasojtlaskej tokniuan.