1. Khuyini etjengisa bona akunathando elaneleko emndenini namhlanjesi?

 IBHAYIBHELI labikezela bona emalangeni wokuphela abantu bazokuphelelwa ‘lithando lemvelo.’ (2 Thim. 3:1, 3) Namhlanjesi siyasibona isiphorofidwesi sizaliseka. Ngokwesibonelo, imindeni eminengi namhlanjesi iphadlhuke phakathi ngebanga lokutlhalana, ababelethi abazwani lokho kwenza abantwana bazizwe bangathandwa. Ngitjho nemindeni ehlala ndawonye ingazizwa kwanga ayazani. Omunye umeluleki wemindeni wathi: “Umma, ubaba nabantwana baphadlhuke phakathi ngebanga lokuthi basebenzisa isikhathi esinengi baqale amakhomphyutha, ama-tablet amafowunu namkha badlala ama-game, ngitjho nanyana bahlala endlini eyodwa abazani.”

2-3. (a) Ngokuya ngokomtlolo webeRoma 12:10, bobani ekufuze sibathande?(b) Sizokucoca ngani esihlokwenesi?

² Asifuni ukulingisa iphasi elinganathando. (Rom. 12:2) Kunalokho, sifuna ukwakha ithando ingasi lomndeni kwaphela kodwana nelalabo esilotjha nabo uJehova. (Funda kwebeRoma 12:10.) Liyini ithando esikhuluma ngalo lapha? Lithando eliba khona hlangana namalunga womndeni otjhideleneko. Okulithando ekufuze sibe nalo ngabafowethu nabodadwethu esilotjha kunye nabo uJehova. Nasinethandwelo sizokuba nesandla ebunyeni bebandla, okuyinto etjengisa ukulotjha kweqiniso.—Mik. 2:12.

³ Bona sifumane isizo lokwakha nokutjengisa ithandwelo, akhesibone iimbonelo eziseBhayibhelini.

4. UJakopo 5:11 usisiza njani bona sibone indlela uJehova asithanda ngayo?

⁴ IBhayibheli lisisiza sibone ubuntu obuhle bakaJehova. Ngokwesibonelo, ithi “uZimu ulithando.” (1 Jwa. 4:8) Lokho kusenza sitjhidelane naye. IBhayibheli libuye lithi uJehova “unethando khulu.” (Funda uJakopo 5:11.) Leyo yindlela ehle khulu uJehova asitjengisa ngayo ithando!

5. UJehova usitjengisa njani isirhawu begodu thina singamlingisa njani?

⁵ Tjheja bona uJakopo 5:11 uhlobanisa ithando elikhulu lakaJehova nobunye ubuntu obusitjhideza kuye, okusirhawu. (Eks. 34:6) Enye indlela uJehova atjengisa ngayo ukuthi uyasirhawukela kukuthi asilibalele nasenze imitjhapho. (Rhu. 51:3) EBhayibhelini, nakukhulunywa ngokurhawukela kukhulunywa ngokungaphezu kokulibalela. Ukurhawukela kumumuzwa owuzwa ngaphakathi nawubona umuntu atshwenyekile ngemva kwalokho, ufune ukumsiza. UJehova uhlathulula indlela afuna ngayo ukusisiza, njengedlula indlela umma afuna ukusiza ngayo umntwanakhe. (Isa. 49:15) Nasiqalene neentjhijilo, ukurhawukela kwakaJehova kumenza asisize. (Rhu. 37:39; 1 Kor. 10:13) Singalingisa isibonelo sakaJehova sokuba nesirhawu kubafowethu nabodadwethu, ngokuthi sibalibalele singababambeli amavunda nakwenzekile basiphatha kumbi. (Efe. 4:32) Indlela eyihloko etjengisa ukuthi siyabarhawukela abafowethu nabodadwethu kukuthi sibasekele nabaqalane nobudisi. Sisuke silingisa uJehova nasivumela ithando lisenze senzele abanye izenzo zomusa.—Efe. 5:1.

6. UJonathani noDavida batjengisa njani ukuthi bathandana khulu?

⁶ IBhayibheli lineembonelo zabantu abanesono kodwana abatjengisa ithando.  Akhucabange ngesibonelo sakaJonathani noDavida. IBhayibheli ithi: “ihliziyo kaJonathani yanamathela kuDavida ngombana wamkhathalela njengombana azikhathalela yena.” (1 Sam. 18:1-2) UDavida wazeswa bona abeyikosi ngemva kwakaSawula. Ngemva kwalokho, uSawula wasilingeka khulu wafuna ukubulala uDavida. Nanyana kunjalo, uJonathani indodana kaSawula akhenge ihlanganyele noyise ejimeni lokubulala uDavida. UJonathani noDavida bathembisana ukuhlala babangani begodu basekelane.—1 Sam. 20:42.

7. Khuyini into ebeyingakhandela uJonathani noDavida bona babebangani?

⁷ Ithando ebelihlangana kwakaJonathani noDavida, singalibuka khulu nasingacabanga ngezinto ebezingakhandela isingani sabo. Ngokwesibonelo, uJonathani bekadlula uDavida ngeminyaka okungenzeka ibe ma-30. UJonathani bekangaphetha ngokuthi ayikho into ebekangayenza nomuntu omncani kangaka kunaye begodu wazi izinto ezinengi ukudlula yena. Nanyana kunjalo, uJonathani akhenge anyaze uDavida.

8. Kubayini ucabanga ukuthi uJonathani bekamngani omuhle kuDavida?

⁸ UJonathani bekangamonakalela uDavida. Njengombana bekayindodana yeKosi uSawula bekangalwela bona kube nguye ikosi. (1 Sam. 20:31) Kodwana uJonathani bekathobekile begodu athembekile kuJehova. Yeke, wasekela isiqunto sakaJehova sokuthi uDavida abe yikosi ezokulandela. Bekathembekile kuDavida nanyana lokho bekuzokwatisa uSawula.—1 Sam. 20:32-34.

9. Sazi njani bona uJonathani bekangaqali uDavida njengesitha? Hlathulula.

⁹ UJonathani bekamthanda khulu uDavida, yeke akhenge amqale njengesitha. UJonathani bekasisilwi begodu anesibindi. Yena noyise uSawula bebaziwa ngokuthi ‘banebelo ukudlula amadlanga’ begodu “banamandla ukudlula amabhubezi.” (2 Sam. 1:22, 23) Koke lokho bekungenza uJonathani azikhakhazise. Kodwana kunalokho akhenge alinge ukuba ngcono kunoDavida namkha amumonakalele ngezinto ezihle azenzileko. Ngokuhlukileko, uJonathani wabuka uDavida ngokuba nesibindi nangokuthembela kuJehova. Kuhlekuhle, kungemva kokuthi uDavida abulele uGoliyadi, lapho uJonathani athoma ukumthanda njengombana azithanda yena. Singatjengisa njani bona sibathanda ngendlela leyo abafowethu nabodadwethu?

10. Kutjho ukuthini ‘ukuthandana khulu ngokusuka ehliziyweni’?

¹⁰ IBhayibheli ithi “thandanani khulu ngokusuka ehliziyweni.” (1 Pit. 1:22) UJehova usibekela isibonelo esihle khulu. Nasihlala sithembekile kuJehova angeze alise ukusithanda. (Rom. 8:38, 39) Ibizo lesiGrigi elitjhugululwe ngesiNdebele elithi “khulu” litjho ukulula namkha ukwenza ukudlula okulindelekileko. Ngezinye iinkhathi akusilula ukutjengisa ithando kubafowethu nabodadwethu. Abafowethu nabangasiphathi kuhle kuzokufuze ‘sibekezelelane ngethando, senze koke okusemandlenethu bona silonde ubunye bommoya nesibopho esibumbanisako sokuthula.’ (Efe. 4:1-3) Nasilwela ukuba “nesibopho esibumbanisako sokuthula,” angeze sidzimelele emitjhaphweni yabafowethu. Sizokulinga  ngaso soke isikhathi ukuqala abafowethu ngendlela uJehova abaqala ngayo.—1 Sam. 16:7; Rhu. 130:3.

11. Kubayini kungaba budisi ukutjengisa ithando ngezinye iinkhathi?

¹¹ Akusilula bona sitjengise ithando kubafowethu nabodadwethu ngaso soke isikhathi, khulukhulu lokha nasidzimelela emitjhaphwenabo. Kungenzeka lesi bekusitjhijilo esenzeka emaKrestwini wekadeni. Ngokwesibonelo, u-Eyodiya noSintike bebanganamraro wokusebenza ‘babambisene [noPowula] ngebanga leendaba ezimnandi.’ Kodwana bekunezinto ebezibenza bangazwani kuhle. UPowula wabayala bona “babe nomkhumbulo ofanako eKosini.”—Flp. 4:2, 3.

12. Khuyini esingayenza bona sibe nobuhlobo obuhle begodu sitjengise ithando kubafowethu nabodadwethu?

¹² Khuyini esingayenza ukutjengisa ukuthi siyabathanda abafowethu nabodadwethu? Nasizipha isikhathi sokwazi abafowethu nabodadwethu kungaba lula ngathi ukuthi sibathande. Iminyaka namkha isizinda akukafuzi kusivimbele sakhe ubungani obuhle. Khumbula ukuthi uJonathani wakha ubungani noDavida nanyana bekamdlula ngeminyaka engaba ma-30. Ungaba mngani nomuntu okudlulako ngeminyaka namkha omncani kunawe? Ngokwenza njalo uzabe utjengisa ukuthi ‘uthanda yoke ihlangano yabafowethu.’—1 Pit. 2:17.

13. Kubayini singeze satjhidelana nawo woke umuntu ebandleni?

¹³ Inga-kghani ukuba nethando ngabafowethu nabodadwethu kutjho ukuthi sizokutjhidelana nawo woke umuntu ebandleni? Awa akusinjalo, akusikumbi ukutjhidelana namanye amalunga webandla ukudlula amanye, ngebanga lokuthanda izinto ezifanako. UJesu wathi ebapostolini bakhe “nibangani bami,” kodwana bekatjhidelene khulu noJwanisi. (Jwa. 13:23; 15:15; 20:2) Nanyana kunjalo, uJesu akhenge akhethulule abanye. Ngokwesibonelo, lokha  uJwanisi nomfowabo uJakopo nababawa iinkhundla emBuswenakhe, uJesu wathi: “Ukuhlala ngesidleni sami namkha ngesinceleni sami akusingekwami bona ngingaphisana ngakho.” (Mar. 10:35-40) Nathi namhlanjesi singalingisa isibonelo sakaJesu sokungakhethululi. (Jak. 2:3, 4) Ukwenza njalo kungaphadlhula ibandla phakathi okuyinto engafunekiko ebandleni lobuKrestu.—Jud. 17-19.

14. Umtlolo webeFilipi 2:3, uthi yini engasisiza sibalekele ukuphikisana?

¹⁴ Lokha nasithandanako sivikela ibandla ukuthi lingaphikisani. Khumbula ukuthi uJonathani akhenge aphikisane noDavida ngebanga lesihlalo sobukhosi. Soke singasilingisa isibonelo sakaJonathani. Lisa ukuphikisana namanye amaKrestu ngebanga lamakghono anawo, ‘kodwana ngokuzithoba, uthathe abanye njengabakhulu kunawe.’ (Funda yebeFilipi 2:3.) Hlala ukukhumbula ukuthi soke kukhona esingakwenza bona sisize ibandla. Lokha nasizithobako sizokghona ukubona okuhle kubafowethu nabodadwethu begodu sizuze eembonelweni zabo.—1 Kor. 12:21-25.

15. Khuyini esiyifundako kilokho ekwenzeka kuTanya nemndeninakhe?

¹⁵ Nasiqalana neentjhijilo, uJehova uyasiduduza ngethando nangokusinikela isizo esilitlhogako ngabafowethu nabodadwethu. Cabanga ngalokho okwehlela umndeni omunye ngoMgqibelo lokha nababuya emhlanganweni ka-2019 weentjhabatjhaba obewunesihloko esithi “Ithando Ngeze Laphela!” e-United States. UTanya umma wabantwana abathathu uthi, “besitjhayela sibuyela ewotela lokha omunye umtjhayeli nakalahlekelwa  lilawulo lekoloyakhe weza phezukwethu wasitjhayisa. Akekho owalimalako kodwana saphuma ekoloyini, soke sihlangahlangene. Bekunomunye ngale kwendlela asibizela ekoloyinakhe bona sizokuphephela khona. Bekungumfowethu naye obekabuya emhlanganweni begodu bekungasuye yedwa owajamako. Abafowethu abahlanu ebebeze emhlanganweni abavela eSweden nabo bajama nathi. Basisingatha okuyinto mina nomntazanami ebesiyitlhoga ngaleso sikhathi. Sabaqinisekisa bona koke kulungile kodwana akhenge bakhambe, bahlala nathi kwabe kwafika abantu besizo elirhabako. Bebaqinisekisa bona sinayo yoke into esiyitlhogako. Kikho koke lokhu salibona ithando lakaJehova. Isenzakalwesi sasenza sathanda abafowethu nabodadwethu khulu begodu sithande besithokoze ngethando lakaJehova.” Uyakhumbula ngesikhathi utlhoga isizo, bese umfowenu namkha udadwenu wakutjengisa ithando?

16. Kubayini kufuze sithandane?

¹⁶ Cabanga ngomphumela wokuthandana. Siduduza abafowethu nabodadwethu nabaqalana nemiraro. Siqinisa ibumbano hlangana nabantu bakaZimu. Sitjengisa ukuthi sibafundi bakaJesu begodu lokhu kudosa abaneenhliziyo ezithambileko ukuthi balotjhe uZimu. Ngaphezu kwakho koke, sidumisa “uBaba wesirhawu noZimu wayo yoke induduzo,” uJehova. (2 Kor. 1:3) Kwanga soke singaragela phambili sisebenza budisi ekutjengiseni ithando!