1. Бийнонти астӕу уарзондзийнадӕ ке нӕбал ес, е цӕмӕй бӕрӕг ӕй?

БИБЛИЙ раги финст ӕрцудӕй, бийнонти астӕу уарзондзийнадӕ ке нӕбал уодзӕй (2 Тим. 3:1, 3). Ӕма абони ӕцӕгӕйдӕр уотӕ ’й. Хъӕбӕр берӕ бийнонтӕ рахецӕн унцӕ ӕма кӕрӕдземӕн знӕгти хузӕн исунцӕ, сӕ сувӕллӕнттӕмӕ ба уотӕ фӕккӕсуй, ӕма некебал гъӕунцӕ. Фал еумӕ ка фӕццӕруй, еци бийнонтӕ дӕр арӕх бийнонти хузӕн нӕ фӕуунцӕ. Бийнонти консультантӕй ка косуй, еу уӕхӕн нӕлгоймаг, загъта: «Мадтӕлтӕ, фидтӕлтӕ ӕма сувӕллӕнттӕ кӕрӕдземӕй раидард ӕнцӕ ӕма сӕ планшетти ма телефонти ранигъулдӕнцӕ. Кӕд еу хӕдзари фӕццӕрунцӕ, уӕддӕр кӕрӕдземӕн цума неке ’нцӕ, уотӕ фӕуунцӕ».

2, 3. а) Ромӕгтӕмӕ 12:10 куд финст ӕй, уомӕ гӕсгӕ фӕлмӕн уарзтӕй ке гъӕуама уарзӕн? б) Аци статьяй цӕмӕ ӕркӕсдзиан?

² Фал мах гъӕуама аци дуйней хузӕн уазалзӕрдӕ ма уӕн (Ром. 12:2). Гъӕуама нӕ бийнонти дӕр, удта ӕмбурди хуӕртӕ ӕма ӕнсувӕрти дӕр «фӕлмӕн уарзтӕй» уарзӕн. (Бакӕсӕ Ромӕгтӕмӕ 12:10.) Дзурдбаст «фӕлмӕн уарзтӕй» уарзун амонуй, бийнонти астӕу ци уарзондзийнадӕ фӕууй, уомӕ. Мадта ӕмбурди дӕр гъӕуама еу бийнонти хузӕн уӕн. Уотемӕй нин ӕнцондӕр уодзӕй ӕмбурди еудзийнадӕ гъӕуай кӕнун ӕма Йеговӕн, куд ӕмбӕлуй, уотӕ лӕггадӕ кӕнун (Мих. 2:12).

 ³ Цума нин еци гъуддаги ци банхус кӕндзӕй? Ӕркӕсӕн Библийӕй цалдӕр хабаремӕ?

4. Йеговӕ нӕ куд уарзуй, уой туххӕй Иакови 5:11 ци финст ес?

⁴ Библийӕй нӕ бон ӕй базонун, Йеговӕ цӕхуӕн Хуцау ӕй, уой. Зӕгъӕн, апостол Иоанн ниффинста: «Хуцау ӕй уарзондзийнадӕ» (1 Иоан. 4:8). Апостол Иаков ба загъта, Йеговӕ нӕ «фӕлмӕн уарзтӕй» ке уарзуй. (Бакӕсӕ Иакови 5:11.) Айдагъ гъе уой туххӕй дӕр нӕ фӕндуй Йеговӕмӕ хӕстӕгдӕр кӕнун.

5. Йеговӕ фӕлмӕнзӕрдӕ ке ӕй, е цӕмӕй бӕрӕг ӕй, ӕма ’й нӕ бон фӕнзун куд ӕй?

⁵ Иакови 5:11 ма финст ӕй, Йеговӕ фӕлмӕнзӕрдӕ дӕр ке ӕй (Рац. 34:6). Ӕма е бӕрӕг ӕй, нӕ рӕдудтитӕ нин ке хатир кӕнуй, уомӕй (Пс. 51:1). Библи куд зӕгъуй, уомӕ гӕсгӕ фӕлмӕнзӕрдӕдзийнадӕ айдагъ уомӕй бӕрӕг нӕ фӕууй. Еци менеуӕг ма адӕймаги фӕрразӕнгард кӕнуй, зин уавӕри ка бахаудтӕй, уомӕн банхус кӕнунмӕ. Йеговӕ ба ӕхуӕдӕг зӕгъуй, мадӕ ӕ бӕдоли куд фӕууарзуй, уомӕй дӕр нӕ хъӕбӕрдӕр ке уарзуй (Ис. 49:15). Ӕма алли хатт дӕр зин уавӕрти ку бахауӕн, уӕд уобӕл фӕййархайуй, цӕмӕй нин банхус кӕна (Пс. 37:39; 1 Кор. 10:13). Мах дӕр гъӕуама фӕлмӕнзӕрдӕ уӕн ӕма хуӕртӕ ма ӕнсувӕртӕн хатир кӕнӕн, нӕ зӕрдихудти нин ку бацӕуонцӕ, уӕд (Еф. 4:32). Фал уомӕй сӕйрагдӕр ба ӕй, цӕмӕй син зиндзийнӕдти рӕстӕг ӕнхус кӕнӕн. Уотӕ ку архайӕн, уӕд Йегови дессаги уарзондзийнадӕ ӕма фӕлмӕнзӕрдӕдзийнадӕ фӕнздзиан (Еф. 5:1).

6. Давид ӕма Ионафан цӕхуӕн ӕмбӕлттӕ адтӕнцӕ?

⁶ Библи хуарз ӕвдесуй, ӕнӕнхӕст адӕни бон дӕр ке ӕй ӕцӕг ӕмбӕлттӕ исун. Ӕргъуди кӕнӕн Ионафан ӕма Давиди  хабар. Библий финст ӕй: «Давид Ионафани зӕрдӕн гъе уотӕ адгин иссӕй, ӕма ’й куд ӕхе уод, уотӕ бауарзта» (1 Сам. 18:1). Фӕстӕдӕр ба Йеговӕ Саули бӕсти паддзахӕн Давиди равзурста. Уой туххӕй Саул Давидмӕ хъӕбӕр мӕстгун кодта, рамарунмӕ дӕр ма ’й гъавта. Фал ӕ фурт Ионафан ба еци гъуддаги ӕ фиди фарс не ’слӕудтӕй ӕма Давидмӕ лӕгъуз цӕстӕй нӕ ракастӕй. Ионафан ӕма Давид кӕрӕдземӕн дзурд равардтонцӕ, алкӕддӕр ӕмбӕлттӕ ке уодзӕнцӕ (1 Сам. 20:42).

7. Ионафан ӕма Давиди лимӕндзийнадӕн къулумпий хуасӕ ци не ’ссӕй?

⁷ Ионафан ӕма Давиди ӕцӕг ӕмбӕлттӕ исунмӕ неци бахъор кодта. Кӕд Ионафан Давидӕй 30 анзи хестӕр адтӕй, уӕддӕр уотӕ нӕ расагъӕс кодта: «Айӕ мӕ рази сувӕллон ӕй ӕма мин ӕ хӕццӕ еумӕйагӕй ци гъӕуама уа?» Ионафан Давиди хъӕбӕр нимадта.

8. Ионафан Давидӕн хуарз ӕмбал цӕмӕн адтӕй?

⁸ Ионафан Саули фурт ке адтӕй, уомӕ гӕсгӕ ӕ фӕсте паддзах е гъӕуама иссайдӕ. Фал Йеговӕ Давиди ку равзурста, уӕд имӕ соцъа кӕнун нӕ райдӕдта (1 Сам. 20:31). Ионафан Йеговӕбӕл еузӕрдон адтӕй, удта адтӕй сӕрниллӕг ӕма, Йеговӕ ци унаффӕ рахаста, уобӕл исарази ӕй. Уомӕй уӕлдай ма Ионафан еузӕрдон адтӕй Давидбӕл дӕр, кӕд ӕй уой туххӕй ӕ фидӕ бафхуардта, уӕддӕр (1 Сам. 20:32–34).

9. Уотӕ зӕгъӕн цӕмӕн ес, ӕма Ионафан Давидмӕ нӕ соцъа кодта?

⁹ Ионафан Давиди берӕ ке уарзта, уомӕ гӕсгӕ имӕ соцъа нӕ кодта. Ӕхуӕдӕг дӕр дӕсни фатӕхсӕг ӕма бӕгъатур ӕфсӕддон адтӕй. Адӕн Саул ӕма Ионафани худтонцӕ, «цӕргӕстӕй цӕрдӕгдӕр» ӕма «домбӕйттӕй хъаурӕгиндӕр» (2 Сам. 1:22, 23) Мадта уой бон дӕр адтӕй ӕхе растаун, цӕйбӕрцӕ ин бантӕстӕй, уомӕй, фал имӕ уӕхӕн миутӕ н’ адтӕй. Ионафани зӕрдӕмӕ хъӕбӕр цудӕй, Давид цӕхуӕн нифсхаст адтӕй ӕма Йеговӕбӕл куд федарӕй ӕууӕндтӕй, е. Голиафи ку рамардта гъе уой фӕсте иссӕй ӕ зӕрдӕн уӕхӕн хъазар. Мах бон ба куд ӕй ӕвдесун, хуӕртӕ ӕма ӕнсувӕрти уӕхӕн «фӕлмӕн уарзтӕй» ке уарзӕн, уой?

10. «Кӕрӕдзей ӕгас зӕрдӕй» ке уарзӕн, е цӕмӕй бӕрӕг уодзӕй?

¹⁰ Библи нӕ разӕнгард кӕнуй: «Кӕрӕдзей ӕгас зӕрдӕй уарзетӕ» (1 Пет. 1:22). Еци гъуддаги нин Йеговӕ ӕхуӕдӕг ӕй фӕнзуйнаг. Йеговӕ дӕр ӕ лӕггадгӕнгути хъӕбӕр берӕ уарзуй, ӕма еци уарзт некӕд фесӕфдзӕй, еузӕрдон ибӕл ку уонцӕ, уӕд (Ром. 8:38, 39). Дзурдбаст «кӕрӕдзей уарзун» ци грекъаг дзурдӕй ратӕлмац кодтонцӕ, е ма нисан кӕнуй «исивазун» кенӕ «тухӕй-фудти райвазун». Ӕма ӕцӕгӕйдӕр еуӕй-еухатт зин фӕууй хуӕртӕ ӕма ӕнсувӕрти фӕлмӕн уарзтӕй уарзун, уӕлдайдӕр ба нин нӕ зӕрдӕ ку фӕрресун кӕнунцӕ, уӕд. Фал сӕ уӕддӕр гъӕуама уарзӕн, цӕмӕй «еудзийнади цӕрӕн» ӕма «кӕрӕдзебӕл баст уӕн фарни тӕгтӕй» (Еф. 4:1–3). Кӕд нӕ фӕндуй фӕрнӕй цӕрун, уӕд син гъӕуама сӕ рӕдудтитӕ ма гъӕуай кӕнӕн, фал сӕмӕ Йегови цӕстӕй кӕсӕн (1 Сам. 16:7; Пс. 130:3).

11. Хуӕртӕ ӕма ӕнсувӕрти уарзун хатгай ӕнцон цӕмӕннӕ фӕууй?

¹¹ Хуӕртӕ ӕма ӕнсувӕрти уарзун алкӕд ӕнцон нӕ фӕууй, уӕлдайдӕр ба син сӕ  рӕдудтитӕ ку фӕууинӕн, уӕд. Фиццаг ӕноси киристон ӕмбурди дӕр адтӕй уӕхӕн хабӕрттӕ. Зӕгъӕн, Еводи ӕма Синтихи Павели хӕццӕ цийнӕгӕнгӕй ӕмгуст кодтонцӕ, фал кӕрӕдзей хӕццӕ ба нӕ федудтонцӕ. Ӕма сӕ Павел дӕр разӕнгард кодта, цӕмӕй «Хецауи хӕццӕ еудзийнади ке ’нцӕ, уомӕ гӕсгӕ ӕмхузӕн гъуди кодтайуонцӕ» (Фил. 4:2, 3).

12. Нӕ бон ци ӕй кӕнун, цӕмӕй хуӕртӕ ӕма ӕнсувӕрти фӕлмӕн уарзтӕй уарзӕн?

¹² Мадта нӕ бон ци ӕй кӕнун, цӕмӕй хуӕртӕ ӕма ӕнсувӕрти фӕлмӕн уарзтӕй уарзӕн? Гъӕуама сӕ хуӕздӕр базонӕн. Ӕма сӕ гъе уӕд хуӕздӕр лӕдӕрдзиан ӕма сӕ уарзун дӕр ӕнцондӕр уодзӕй. Удта ци кари ’нцӕ, е дӕр нин гъӕуама хъори хуасӕ ма уа. Ионафан Давидӕй 30 анзи хестӕр адтӕй, фал сӕ е некуд бахъор кодта ӕцӕг ӕмбӕлттӕ исунмӕ. Дӕу бон дӕр ӕй ӕмбурди лимӕн кӕнун, хестӕр ди ка ӕй кенӕ ди кӕстӕр ка ӕй, уони хӕццӕ. Уотемӕй бавдесдзӕнӕ, «ӕнсувӕрти еугурейдӕр ке уарзис» (1 Пет. 2:17).

13. Адӕймагӕн еуӕй-еу ӕмбӕлттӕ уӕлдай хӕстӕгдӕр цӕмӕн фӕуунцӕ?

¹³ Цума е уобӕл дзорӕг ӕй, ӕма ӕмбурди еугурӕйдӕр гъӕуама исуонцӕ нӕ хуӕздӕр ӕмбӕлттӕ? Нӕ, уомӕн гӕнӕн дӕр нӕййес. Кедӕр хӕццӕ нин еумӕйагӕй фулдӕр цидӕртӕ фӕууй ӕма еци адӕймаги уарзгӕ дӕр фулдӕр фӕккӕнӕн. Киристе дӕр ӕ апостолти е ’мбӕлттӕ худта, фал Иоанни ба уӕлдай уарзт кодта (Иоан. 13:23; 15:15; 20:2). Фал ӕй уӕддӕр иннетӕй уӕлдӕр ба нӕ ӕвардта. Зӕгъӕн, Иоанн ӕма е ’нсувӕр Иаков сӕхецӕн Хуцауи Паддзахади кадгин бунӕттӕ ку байагурдтонцӕ, уӕд син Йесо ӕргом загъта: «Мӕ рахез фарс ӕма мӕ галеу фарс ка ӕрбатдзӕй, е мӕнӕй кӕнгӕ нӕй» (Мар. 10:35–40). Мах дӕр ӕмбурди алкӕмӕдӕр ӕмхузӕн цӕстӕй ку кӕсӕн ӕма не ’мбӕлтти иннетӕй уӕлдӕр ку нӕ ӕвӕрӕн, уӕд Йесой фӕнздзиан (Иак. 2:3, 4). Уотӕ ку нӕ архайӕн, удта ӕмбурди фарнӕ ӕма еудзийнадӕ ихӕлгӕ кӕнуй (Иуди 17–19).

14. Филиппӕгтӕмӕ 2:3 финст дзурдтӕ нин куд банхус кӕндзӕнцӕ нӕхемӕ раст цӕстӕй кӕсун?

 ¹⁴ Кӕрӕдзей «фӕлмӕн уарзтӕй» ку уарзӕн, уӕд нӕхемӕ иннетӕй хуӕздӕр некӕд кӕсдзиан. Ионафан дӕр ӕхе Давидӕй уӕлдӕр нӕ ӕвардта, удта паддзахи бунатмӕ дӕр нӕ гъавта. Мах дӕр ӕй ку уинӕн, хуӕртӕ ӕма ӕнсувӕртӕ цӕхуӕндӕр гъуддӕгти ӕнтӕстгун ке ’нцӕ, уӕд сӕмӕ гъӕуама соцъа ма кӕнӕн, фал Ионафани хузӕн сӕрниллӕг уӕн ӕма иннети нӕхецӕй уӕлдӕр ӕвӕрӕн. (Бакӕсӕ Филиппӕгтӕмӕ 2:3.) Алли адӕймаг дӕр ӕмбурди цидӕр пайда хӕссуй, ӕма уой гъӕуама макӕд иронх кӕнӕн. Сӕрниллӕг ку уӕн, уӕд хуӕртӕ ӕма ӕнсувӕртӕн сӕ хуарз менеугутӕ уиндзиан ӕма сӕ фӕнздзиан (1 Кор. 12:21–25).

15. Нӕ хуӕрӕ Танябӕл ци хабар ӕрцудӕй, уомӕй цӕбӕл ахур кӕнӕн?

¹⁵ Зин уавӕрти ку бахауӕн ӕма нин хуӕртӕ ӕма ӕнсувӕртӕ зӕрдиагӕй ку фенхус кӕнунцӕ, уӕд уоми Йегови къох фӕууинӕн. Зӕгъӕн, хуӕрӕ Таня 2019 анзи е ’ртӕ сувӕллоней хӕццӕ адтӕй Еугонд Штатти ӕхсӕнадӕмон конгресси, «Уарзондзийнадӕ алкӕддӕр уодзӕй», зӕгъгӕ. Ӕма сабати изӕрӕй гостиницӕмӕ ку цудӕнцӕ, уӕд надбӕл аварий бахаудтӕнцӕ. Таня зӕгъуй: «Нӕ надмӕ еу машинӕ рагӕпп ласта ӕма нӕ ниццавта. Некӕмӕн ни неци адтӕй, фал хъӕбӕр фӕттарстан. Машинӕй ку рахизтан, уӕд кӕсун, ӕма нӕмӕ нади билӕй кадӕр амонуй, рауайтӕ махмӕ, зӕгъгӕ. Е ба не ’нсувӕр разиндтӕй. Ӕма нӕмӕ айдагъ е не ’рлӕудтӕй, фал ма никкидӕр фондз адӕймаги. Етӕ ба конгресмӕ Швецийӕй ӕрцудӕнцӕ. Хуӕртӕ ’й балӕдӕрдтӕнцӕ, куд тухст адтан, уой ӕма нӕ нихъхъури кодтонцӕ. Дзурдтон сӕмӕ, цотӕ, неци бал нин ӕй, зӕгъгӕ, фал етӕ ба нӕ  кумдтонцӕ, цалинмӕ дохтиртӕ не ’рбацудӕнцӕ ма нин ӕцӕгӕйдӕр ке неци адтӕй, уой не ’сбӕрӕг кодтонцӕ, уӕдмӕ. Еци бон ӕй ӕргом фӕууидтан, Йеговӕ нӕбӕл куд батухстӕй, уой. Еци хабари фӕсте хуӕртӕ ӕма ӕнсувӕртӕн никки хъӕбӕрдӕр райдӕдтон аргъ кӕнун. Удта Йеговӕй дӕр ӕ фӕлмӕн уарзти туххӕй хъӕбӕр боз дӕн». Ӕвӕдзи, дӕу бон дӕр ӕй ӕргъуди кӕнун, хуӕртӕ ма ӕнсувӕртӕ дин куд банхус кодтонцӕ, уӕхӕн хабар.

16. Хуӕртӕ ма ӕнсувӕрти фӕлмӕн уарзтӕй цӕмӕн гъӕуама уарзӕн?

¹⁶ Мадта кӕрӕдзей фӕлмӕн уарзтӕй уарзун ӕцӕгӕйдӕр хъӕбӕр ӕхсидзгӕ ӕй. Еци уарзт нӕ разӕнгард кӕндзӕй, цӕмӕй зин уавӕрти ка ӕй, еци хуӕртӕ ӕма ӕнсувӕртӕн ӕнхус кӕнӕн, удта Хуцауи адӕни астӕу ци еудзийнадӕ ес, уой гъӕуай кӕнӕн. Уомӕй уӕлдай ма кӕрӕдзей ку уарзӕн, уӕд уомӕй ӕвдесдзиан, Киристей фӕдбӕлдзӕугутӕ ке ан, уой ӕма уотемӕй кӕдзосзӕрдӕ адӕнӕн Хуцауи базонунмӕ ӕнхус кӕндзиан. Фал сӕйрагдӕр ба е ӕй, ӕма уотемӕй Йегови кадгин кӕндзиан, «уодӕнцойнӕдӕттӕг Хуцауи» (2 Кор. 1:3). Гъӕйдӕ мадта идарддӕр дӕр хуӕртӕ ма ӕнсувӕрти фӕлмӕн уарзтӕй уарзӕн!