1. Dahme kasalehda me limpoak en nan peneinei uhdahn tikitik rahnpwukat?

PAIPEL kohpada me ni imwin rahn pwukat, aramas akan pahn “sempoak.” (2 Tim. 3:1, 3) Kitail kilang kokohp wet eh pweida rahnwet. Karasepe, pwopwoud tohto kin mweipeseng, oh irail kin lingeringer pahn emenemen, oh neirail seri kan kin medewe me sohte me poakohng irail. Pil peneinei kan me kin kousoan nan ihmw ehute ele sohte kin ahneki nanpwungmwahu keren. Karasepe, emen toahkte me kin kihda kaweid ong peneinei kan koasoia: “Nohno, pahpa oh seri kan sohte kin koasoipene, oh re kin doadoahngkihla arail ahnsou ong neirail computer, tablet, sehlpwohn, oh mehn mwadong kan. Mendahki arail kin mihpene nan ehute ihmw, irail sohte uhdahn ese emenemen.”

2-3. (a) Nin duwen me Rom 12:10 mahsanih, ihs me kitail anahne limpoak ong? (b) Dahme kitail pahn koasoiapene nan iren onop wet?

² Kitail sohte men duwehte aramas tohto nan sampah wet me sohte kin ahneki limpoak. (Rom 12:2) Ahpw, kitail anahne sukuhlki en kalaudehla atail limpoak ong tohn atail peneinei oh pil ong riatail Kristian kan nan mwomwohdiso. (Wadek Rom 12:10.) Soangen limpoak dahieu met? Limpoak wet iei me kin kamwakid tohn peneinei kan en ahneki nanpwungmwahu keren rehn emenemen. Soangen limpoak wet iei me kitail en ahneki ong riatail Kristian kan nan mwomwohdiso. Ni atail kin kasalehda limpoak, kitail kin sewese koaros en miniminpene oh papah Siohwa ni peren.​—Maika 2:12.

 ³ Pwehn sewese kitail en ahneki soangen limpoak wet, kitail pahn kilang dahme kitail kak sukuhlkihsang mehn kahlemeng kan en Paipel.

4. Dahme Seims 5:11 padahkihong kitail duwen sapwellimen Siohwa limpoak?

⁴ Paipel kin padahkihong kitail duwen sapwellimen Siohwa irair kaselel kan. Karasepe, e mahsanih me “Koht iei limpoak.” (1 Sohn 4:8) Ni atail kin sukuhlki met, kitail kin men wiahla kompoakepah. Ahpw Paipel pil mahsanih me Siohwa “me diren limpoak.” (Wadek Seims 5:11.) Met wia irair kaselel ehu me kasalehda ia uwen Siohwa eh ketin poakohng kitail!

5. Ia duwen Siohwa eh kin ketin kasalehda kadek kalahngan, oh ia duwen atail kak kahlemengih ih?

⁵ Seims 5:11 kadokepene sapwellimen Siohwa limpoak ong ehu irair me kin kakerenihkitailla reh, me iei sapwellime kadek kalahngan. (Eks. 34:6) Ehu ahl me Siohwa ketin kasalehiong kitail kadek kalahngan iei sang ni eh ketin mahkohng sapwung kan me kitail kin wiahda. (Mel. 51:1) Nan Paipel, kadek kalahngan kin pidada laudsang ihte mahkohng emen me wiahda sapwung. E pil kin wehwehki pepehm kehlail me emen ahneki ni eh kilang aramas emen eh nsensuwedla oh song en sewese. Siohwa ketin mahsanih me pepehm kehlail me e ketin sapwellimanki pwehn sewese kitail uhdahn laudsang pepehm me nohno men kin ahneki ong nah seri. (Ais. 49:15) Ni ahnsou me kitail kin pwunod, sapwellimen Siohwa kadek kalahngan kin kamwakid ih en ketin sewese kitail. (Mel. 37:39; 1 Kor. 10:13) Kitail kak kasalehda kadek kalahngan ong riatail Kristian kan sang ni atail mahkohng irail oh sohte kolokol lingeringer ni arail kansensuwedihala kitail. (Ep. 4:32) Pil ehu ahl kesempwal en kasalehda kadek kalahngan iei sang ni atail sewese riatail Kristian kan ni arail lelohng kahpwal kan. Ni limpoak eh kamwakid kitail en kasalehda kadek kalahngan ong meteikan, kitail kin kahlemengih Siohwa me kin ketin kasalehda limpoak laudsang meteikan.​—Ep. 5:1.

6. Ia duwen Sonadan oh Depit ara kasalehda limpoak ong emenemen?

⁶ Paipel padahkihong kitail duwen aramas soh unsek kan me kin kasalehda limpoak. Tehk mehn kahlemeng en Sonadan oh Depit. Paipel mahsanih: “Sonadan, inenen poakepoakehla Depit duwehte eh poakohng pein eh mour.” (1 Sam. 18:1) Siohwa ketin pilada Depit en wiahla nanmwarki mwurin Sohl. Mwurin mwo, Sohl uhdahn peirinkihda Depit oh song en kemehla. Ahpw nein Sohl pwutako Sonadan sohte utung eh papaho ni ahnsou me Sohl song en kemehla Depit. Sonadan oh Depit inoukihda me ira pahn kolokol ara kompoakepahnki emenemen oh ahnsou koaros utung emenemen.​—1 Sam. 20:42.

7. Dahme kakete kauhdihsang Sonadan oh Depit en kompoakepahnki emenemen?

⁷ E kapwuriamwei me Sonadan oh Depit wia kompoakepah keren kei pwehki soahng tohto kak kahrehiong ira en sohla kompoakepahnki emenemen. Karasepe, Sonadan ele sounpar 30 laudsang Depit. Sonadan kakete medewe me e sohte kak karanihala emen me uhdahn tikitiksang ih oh sohte lelohng soahng tohto nan eh mour. Ahpw, Sonadan sohte medewe met. E uhdahn wauneki Depit.

8. Dahme kahrehda ke medewe me Sonadan wia kompoakepah mwahu men ong Depit?

⁸ Sonadan kakete peirinki Depit. Nin duwen nein Nanmwarki Sohl pwutak, Sonadan kakete ngihtehtehki me ih me ahneki pwuhng en wiahla nanmwarki mwurin Sohl. (1 Sam. 20:31) Ahpw Sonadan aktikitik, oh e loalopwoat ong Siohwa. Eri e utungada douluhl sapwellimen Siohwa pilipil me Depit me pahn wiahla nanmwarki. E pil loalopwoat ong Depit, mendahki met uhdahn kalingeringerihada Sohl.​—1 Sam. 20:32-34.

9. Ia duwen atail ese me Sonadan sohte peirinki Depit? Menlau kawehwehda.

⁹ Pwehki Sonadan poakohng Depit, e sohte peirinki ih. Sonadan kommwad oh kin pei nan mahwen tohto oh uhdahn koahiek en doadoahngki ketieu oh arep. Aramas kin nda me ih oh eh papaho, Sohl, “marahra sang ikel” oh “kehlailasang laion.” (2 Sam. 1:22, 23) Ihme kahrehda, Sonadan kakete suweiki duwen kommwad me e wia. Ahpw e sohte song en mwahusang Depit oh sohte peirinki soahng mwahu kan me Depit wiahda. Weksang met, e kin wauneki Depit pwehki Depit kin eimah oh likih Siohwa. Karasepe, mwurin Depit eh kemehla Kolaiad, Sonadan tepida uhdahn karanihala Depit. Ia duwen atail kak kasalehda soangen limpoako ong riatail Kristian kan?

10. Ia wehwehn en “poakpene mehlel sang nan mohngiong”?

¹⁰ Paipel padahkihong kitail en “poakpene mehlel sang nan mohngiong.” (1 Pit. 1:22) Siohwa ketin wia mehn kahlemeng mwahu ong kitail. Sapwellime limpoak me inenen laud me kahrehda ma kitail loalopwoat ong ih, e sohte pahn ketin uhdihsang poakohng kitail. (Rom 8:38, 39) Lepin lokaiao “uhdahn” kin wehwehki emen eh nanti laud en kasalehda limpoak. Ekei pak e sohte kin mengei en kasalehda limpoak ong riatail Kristian kan. Ni meteikan ar kansensuwedihkitailla, kitail anahne pousehlahte ‘kanengamahiong emenemen ni limpoak, oh popohl nanpwungatail oh nantihong kolokol ehupene me kitail alehsang sapwellimen Koht manaman.’ (Ep. 4:1-3) Ma kitail nanti laud en kolokol ‘popohl nanpwungatail,’ kitail sohte pahn kilikilangete sapwung en riatail kan. Kitail pahn wia  uwen atail kak koaros en kilengwohng riatail Kristian kan duwehte me Siohwa kin ketin wia.​—1 Sam. 16:7; Mel. 130:3.

11. Dahme kahrehda e kin apwal ekei pak en kasalehda limpoak?

¹¹ E sohte mengei en kasalehda limpoak ong riatail Kristian kan ahnsou koaros, ahpw mehlel ahnsou me kitail esehda arail sapwung kan. Met wia mehkot apwal ehu ong ekei tepin Kristian ko. Karasepe, Iuodia oh Sindiki ele sohte ahneki kahpwal en “iang [Pohl] doadoahk laud ong rongamwahwo.” Ahpw ira apwalki en ehupene nanpwungara. Eri Pohl kangoangehkin ira “en ahneki madamadauteieu rehn Kauno.”​—Pil. 4:2, 3.

12. Ia duwen atail kak kalaudehla atail limpoak ong riatail Kristian kan?

¹² Ia duwen atail kak kalaudehla limpoak ong riatail Kristian kan rahnwet? Ni atail esehla mwahu irail, ele kitail pahn esehda me e mengei en wehwehkin irail oh kalaudehla atail limpoak ong irail. Kitail kak wiahla kompoakparail mehnda ma irail mah de pwulopwul de arail tiahk weksang atail. Tamataman me Sonadan ele sounpar 30 laudsang Depit; ahpw e kakairada eh nanpwungmwahu reh. Mie emen nan omw mwomwohdiso me mah de pwulopwul sang uhk me ke kak kompoakepahnki? Ni omw wia met, ke kasalehda me ke ‘poakohng riomw kan koaros.’​—1 Pit. 2:17.

13. Dahme kahrehda kitail ele sohte kak ahneki nanpwungmwahu keren rehn koaros nan mwomwohdiso?

¹³ Ia duwe, en ahneki limpoak ong riatail Kristian kan kin wehwehki me kitail pahn ahneki nanpwungmwahu keren rehn koaros nan mwomwohdiso? Soh, met sohte kak wiawi. Kitail kin ahneki nanpwungmwahu keren rehn ekei aramas pwehki dahme kitail kin perenki duwepenehte. Sises ketin wiahki sapwellime wahnpoaron ko koaros ‘kompoakepah,’ ahpw e uhdahn ketin karanih Sohn. (Sohn 13:23; 15:15; 20:2) Ahpw Sises sohte ketin wiahki Sohn me e mwahusang meteiko. Karasepe, ni Sohn oh rie pwutako Seims ara peki rehn Sises en ketikihong ira wasa kesempwal ehu nan Wehin Koht, Sises mahsanihong ira: “En mwohndi ni palimaun de palimeingi  kaidehn ngehi me pahn koasoanehdi.” (Mark 10:35-40) Duwehte Sises, atail wiewia ong kompoakepatail keren kan en dehr mwahusang atail wiewia ong meteikan. (Seims 2:3, 4) Ma kitail wia met, kitail sohte pahn sewese mwomwohdiso en ahneki popohl.​—Sud 17-19.

14. Ia duwen Pilipai 2:3 eh kak sewese kitail en dehr song en mwahusang meteikan?

¹⁴ Ni atail kin kasalehda limpoak ong emenemen, kitail sohte pahn song en mwahusang meteikan nan mwomwohdiso. Tamataman me Sonadan sohte peirinki Depit, oh sohte song en wiahla nanmwarki. Kitail koaros kak alasang en Sonadan mehn kahlemeng. Ke dehr peirinki riomw Kristian kan pwehki arail koahiek, ‘ahpw ni aktikitik, kumwail wiahki meteikan lapalapasang kumwail.’ (Wadek Pilipai 2:3.) Tamataman me kitail koaros kak wia mehkot me pahn sewese mwomwohdiso. Ma kitail kin aktikitik, kitail pahn kak kilang ahn riatail Kristian kan irair mwahu kan.​—1 Kor. 12:21-25.

15. Dahme ke sukuhlkihsang dahme wiawihong Tanya oh eh peneineio?

¹⁵ Ni atail kin lelohng kahpwal kan ni soh kasikpe, Siohwa kin ketin kansenamwahwihkitailla sang ni limpoak oh sawas kan me kitail kin ale sang rehn riatail Kristian kan. Tehk dahme wiawihong peneinei ehu mwurin arail iang towehda prokram en Rahn Kaunop ni mihting tohrohr en pahr 2019 me oaralape “Limpoak me Poatopoat!” me wiawi nan Wehin Amerika. Tanya, nohno men me naineki seri silimen koasoia: “Ni aht kohkohlahng ni hotel me se kin mi ieo, sidohsa pwoat loiong warat sidohsao. Sohte me ohla reht, ahpw se uhdahn pwuriamweila,  oh pedoisang nan sidohsao oh kesihnen nan ahlo. Mie me ndaiong kiht sen kohla ni were sidohsao pwe sidohsa de lel kiht. Aramaso iei emen riatail brother me pil ahpwtehn kohkohsang wasahn mihting tohrohro. Oh kaidehn ih kelehpw me uhdi. Sounkadehde limen me kohsang Sweden pil iang uhdi. Sister ko pwoaleiehdi oh nei serepeino, me kahrehiong ie en nsenamwahula. I ndaiong riei Kristian ko me soahng koaros pahn mwahu oh me re kak kohkohla, ahpw re sohte wia met. Irail mihmihte reht mwurin aht ale sawasepen wini, oh irail tehk mwahu me se ale soahng koaros me se anahne. Erein ahnsou apwalo, se pehm sapwellimen Siohwa limpoak. Dahme wiawi kakehlakahla aht limpoak ong riat Kristian kan, oh e kalaudehla aht limpoak oh kalahngan ong Siohwa.” Mie pak ke taman me ke anahne sawas oh riomw Kristian men kasalehiong uhk limpoak?

16. Kahrepe dah kan me kitail ahneki pwehn kasalehda limpoak ong emenemen?

¹⁶ Medewehla soahng mwahu kan me kin wiawi ni atail kin kasalehda limpoak ong emenemen. Kitail kin kansenamwahwihala riatail Kristian kan ni arail kin lelohng kahpwal kan. Kitail kin sewese riatail Kristian kan en iang papah Siohwa ni peren. Kitail kin kasalehda me kitail iei sapwellimen Sises tohnpadahk kan, oh met kin kahrehiong irail kan me ahneki mohngiong mwahu en men papah Siohwa. Oh me keieu kesempwal, kitail kin kawauwih Siohwa, “Semen kupwurkalahngan oh Koht en kansenamwahu koaros.” (2 Kor. 1:3) Kitail koaros en koasoanehdi teng en pousehlahte kasalehda limpoak!