1. Canan wichanga, ¿familiapuranochu runacuna cuyanacärin?

BIBLIAGA wilacurgannami canan wichancunacho “mana cuyapäcoj” runacuna capäcunanpaj (2 Tim. 3:1, 3, TDI). Cumplicaycangantaga ricaycanchimi. Familia rurincho imayca problemacuna caycan, waquincuna raquinacärin; waquincuna pelialacho carcaycan churincunata mana casushpan. O pipis ninmanmi “familiäwanga alimi goyäcö”, chayno captinpis jucnin jucnincunaga manami shumajga parlanacärinchu. Juc runa cayno nirgan: “Mama cajpis, tayta cajpis, wamra cajcunapis manami shumajga parlapänacärinchu, celularnincunalata aptarashmi carcaycan, o waquin maquinancunata ricaraycarlami. Juc wasilacho cawaycarpis japa runacunanomi carcaycan”.

2, 3. 1) ¿Pïcunatataj familianchitano cuyashwan Romanos 12:10 texto nishganno? 2) ¿Pïcunapitataj canan yachacushun?

² Cuyacuyninnaj cay mundo runacunano ama cashunchu (Rom. 12:2). Rasunpa cuyacoj carga manami familianchicunalatachu cuyashun, lapan hermanunchicunatapis cuyashunmi (leiriy Romanos 12:10). Familiano cuyanacushun nirga parlaycan castanchi rurincho shongupita jucninchi jucninchi alapa cuyanacunapaj. May chaycho caycaj hermanunchicunapis familianchimi, paycunatapis chaynolami cuyashwan. Chayta rurarga mana raquicaypa Taytalanchi Jehovata sirviycäshun (Miq. 2:12).

 ³ Mayna munaycunchi pï maytapis cuyayta. Canan yachacurishun Jehovapita y waquin sirvejnincunapita.

4. ¿Imatataj Salmo 103:8 wilacun Jehová imano cuyapämashganchipita?

⁴ Bibliaga imayca alicunatami Diospita wilapämanchi. Payga “cuyacojmi” nin (1 Juan 4:8). Shacyächicunmi cayta musyarga, jina ‘amatar cuyacoj’ cashgantapis Biblia wilacunmi (leiriy Salmo 103:8). Jehovaga cuyaycälämanchimi, cayga ¡cushichimanchi!

5. ¿Imatataj Jehová ruran amatar cuyacoj cashpan, y imatataj noganchicunapis rurashwan?

⁵ Salmo 103:8 texto wilacun Jehová amatar cuyacoj cashganta (Éx. 34:6). Chayno pasaypa cuyacoj captinmi juchanchicunatapis perdunaycämun (Sal. 51:1). Pero Diosga manami perdunamanchilachu, payga ricaycanmi sirvejnincunata cuyashpan imano yanapänanpaj, masraj nacarcaycaptin. Bibliaga claro wilacun Jehová imano cuyapamashganchipita, juc mama wamranta cuyashganpitapis masraj (Is. 49:15). Y ali shonguyoj cashpanmi nacaycashganchi hora jucla yanaparcamanchi (Sal. 37:39; 1 Cor. 10:13). Noganchicunapis chayta rurashwan hermanunchicunawan; ofendiramaptinchipis ali nawilanchiwan ricaycashwan (Efes. 4:32). ¿Ima mastataj rurashwan hermanunchicunapaj? Problemacunapa pasaycashgan hora jucla yanaparcushwan, chayta rurarga Jehová rurashgannola ruraycashwan, payga amatar cuyacojmi (Efes. 5:1).

6. ¿Imanirtaj ninchi Jonatanwan David amatar cuyanacäringanta?

⁶ Bibliaga parlanmi amigucuna imano cuyanacäringanta. Davidpita y  Jonatanpita parlarishun. Paycunapaj parlarmi Biblia nin “ishcan fiyupa amïguna ricacur pasaypa cuyanacuran” (1 Sam. 18:1, TDI). Jehovaga Davidta acrargan Saulpa trucan rey cananpaj, chaypita alapa piñacur Saulga wanuchiytarä Davidta munash. Pero Jonatanga yarpaylapis yarparganchu chayta rurananpaj. Payga Davidwanmi awninacärirgan imaypis cuyanacärinanpaj y yanapänacur cawapäcunanpaj (1 Sam. 20:42).

7. ¿Imatataj Davidpita mana yarparganchu Jonatán?

⁷ Jonatanwan David amigo cashganman yarparga alapa alimi, ¿imanir? Jonatanga 30 watapa mayornin cargan, y capaz ninman cargan ‘imataj puriycäshaj cay jovinwanga, imata yachachimanga payga’; chayno yarparganchu. Shulcan captinpis respetarganmi.

8. ¿Imanir-raj Jonatanga cuyapaylapa tratargan Davidta?

⁸ Jonatanga manami nirganchu ‘nogami derechuyoj caycä papanï trucan rey canäpaj’ (1 Sam. 20:31). Jonatanga Diosta cuyaj, ñanpu shongu cargan, chaymi respetulawan ricargan rey cananpaj Davidta Jehová acrashganta. Papanin Saúl pasaypa rabiacuptinpis Jonatanga cuyapaylapa tratargan Davidta (1 Sam. 20:32-34).

9. ¿Davidtaga chiquiparganchuraj Jonatán?

⁹ Davidta alapa cuyashpanmi Jonatanga chiquiparganchu. Jonatanga mana manchacuypämi piwanpis peliaj. Taytannoshi ‘¡ancacunapitapis masraj cörrej!, ¡liyuncunapitapis mas sinchish caj!’ (2 Sam. 1:22, 23). Jonatanga ali tucurganchu imayca rurashganpita. David rurashganta ricarpis cushicurganmi. Payga valurwanmi imatapis ruraj. Juc cutichomi Goliat jutiyoj runata wanuycachirgan, chaypitanash Jonatanpis masraj cuyaycorgan. Paycunanolami noganchicunapis cuyanacushwan hermanunchicunawan.

10. ¿Imataj rurartaj casucunchi “llapan shonguyquicunawan cuyanacur caway” nishganta?

¹⁰ Biblia cayno nin: “Llapan shonguyquicunawan cuyanacur caway” (1 Ped. 1:22). Quiquin Jehovami cuyapämanchi y amatar cuyapämashpanchiga imanir-raj paypita raquicäcushwan (Rom. 8:38, 39). “Llapan shonguyquicunawan” nirga parlaycämun janan shongula mana canapaj, calpachacunanchirämi cristiano masinchicunata cuyanapäga. Öraga pilapis piñarcachimashwanmi, pero Bibliaga caytami wilacun: “Jucniqui-jucniquipis pasinsacuy, awantacuy. Juc famillyano alli ricanacur [...] piwanpis mana chiquinacuyllapa caway” (Efes. 4:1-3). Chaurasga, hermanunchicuna pantashganlataga ricarashwanchu, Jehová ricashganno ricashwan (1 Sam. 16:7; Sal. 130:3).

11. ¿Imanirtaj sasa ticracurinman alapa cuyacoj canapaj?

¹¹ Pipis pantashga cajlaman yarpararga sasa ticracurinman paycunata alapa cuyanapaj. Evodia y Síntique  cristiana warmicunapaj Biblia parlamun. Pabluwan caycarga cushi cushilami arupäcoj Diospita yachachicur, pero ishcalan caycarga mana shumaj apanacärejchu. Chaychi Pablo cayno escribergan: “Evodiawan Sintiquepis mana chiquinacuypana Jesucristo munashanno cawachun” (Filip. 4:2, 3).

12. ¿Imatataj rurashwan lapan shongunchiwan hermanunchicunata cuyanapaj?

¹² ¿Imatataj rurashwan hermanunchicunata shongupita cuyanapaj? Paycunata más reguiytami calpachacushwan, más reguirga masraj cuyashun. Y cuyanapäga manami ricashwanchu edäninta ni maypita cashganta. Yarpay Davidwan Jonatanta pasashganta. 30 watacunapa mayornin caycarpis ali amigunman ticrargan. Chaynola, ¿imanirtaj gampis congregaciunniquicho mayorniqui o menorniqui hermanucunapa amigun ticranquichu? Chayta rurarga lapan hermanucunatami cuyaycanqui (1 Ped. 2:17).

13. ¿Congregaciunchoga juclacu amiguta rurarinchi piwanpis?

¹³ Rasun cajchoga lapan hermanunchicunata cuyarpis waquincunalawanmi más amiguga canchi. Chaynolami Jesustapis pasargan. Lapan apostulnincunata cuyarpis Juanwanmi más amiguga cargan (Juan 13:23; 15:15; 20:2). Pero manami chayraycurchu paylata más yanapargan. Juc cutichomi Juan, wawguin Santiaguwan mañacurgan tronunpa laduncho jamacunanpaj, pero Jesusmi cayno nir contestargan: “Ichanga manami aunëmanchu ichoj caj lädöman, derëchu caj lädöman jamanayquipaj” (Mar. 10:35-40). Noganchipis Jesusnolami cashun, manami amigulanchicunatachu yanapäshun o imatapis goshwan (Sant. 2:3, 4). Chayno cashgaga raquinacuymanmi chayächimashwan y  chayga manami Jehovapa marcancho canmanchu (Jud. 17-19).

14. Filipenses 2:3 texto nishganno, ¿imataj yanapämäshun congregaciuncho mana chiquinacunapaj?

¹⁴ Shongupita cuyanacushganchiga yanapämäshun hermanunchicunapita más mejor cayta mana ashinapämi. Davidwan Jonatanta pasashganta ricärishun. Jonatanpa trucan David rey cananpaj cajta musyaycarpis manami chiquirganchu, chaynola noganchipis cashun. Y hermanunchicuna noganchipita más yachaj o noganchino mana yachaj captinga manami chiquishwanchu. Apóstol Pablo cayno nishganga alapa alimi: “Waquintapis quiquin canganpita mas alicagtanuy ricapäcuchun” (leiriy Filipenses 2:3, Ambo-Pasco). Humilde cashpanchiga hermanunchicunapa más ali caynintami ricashun y ali rurashgancunapitami yachacushun. Lapanchipis yanapanacunapämi congregaciunchoga caycanchi (1 Cor. 12:21-25).

15. ¿Imatataj gam yachacunqui Tanyata y familianta pasashganpita?

¹⁵ Problemacunapa pasashganchi horami Jehovaga hermanucunapa cuyacuyninwan yanapämanchi. Asamblea usharir juc familia ima pasashganta ricärishun. Tanya, quimsa wamrancunawan hotelninpa carrunwan cutircaycaptinmi, juc carru chocaycunaj. “Manchacashga pistacho ichircaycaptëmi juc ladupita hermanucuna gayacamargan, y manami paycunalachu, sino juc-caj naciunpita shamoj  hermanucunapis. Nogata y wamrätami paycuna macalacarcaycamargan, chaymi alapa yanapämargan manchacashga caycashgäpita. ‘Alimi carcaycä’ niycaptëpis hermanucunaga manami cachamarganchu, hospitalmanpis apapäcamarganraj. Lapan necesitashgätami gopäcamargan. Cay lapanchomi ricacargan Jehovaga alapa cuyamashgan. Jinamanpis hermanucunata y Jehovata más cuyanapami yanapämashga”. ¿Gam yarpanquichu más necesitashgayqui hora maygan hermanulapis yanapashushgayquita?

16. ¿Imanirtaj amatar cuyanacushwan?

¹⁶ Lapan shongunchiwan hermanunchicunawan cuyanacurga, nacashganchi horami yanapänacushun, may chaycho carpis juc shongula caycänapaj. Jinamanpis Jesuspa rasunpa caj gatejnincuna cashgannomi cashun, chayta ricarmi runacunapis Jehovata sirviyta munanga. Y masga cuyapämajninchi y shacyächimajninchi Jehovapa jutintami altuman churashun (2 Cor. 1:3). Chaymi, amatar cuyanacur siguishun.