1. Cunan punllacunapica ¿imata ashtahuanbachaca pactarijun?

BIBLIAPICA tucurimui punllacunapica ‘pitapash na juyaj’ gentecunami tianga nircami (2 Tim. 3:1, 3). Cai shimicunaca cunanbimi ashtahuanbachaca pactarijun. Por ejemplo, ashtaca ashtaca familiacunapimi taitamamacunaca na juyarin, huahuacunapash paicunalla sintirishpami pipash na juyahuanllu nin. Ashtaca divorciocunapashmi tian. Shinallata ashtaca familiacunaca paicunapurapash na rijsirinshnami portarin. Shuj consejero familiarca ninmi: “Taitapash, mamapash, huahuacunapash na paicunapura parlarinllu. Paicunaca cada unomi computadorapi, tabletpi, celularpi, videojuegocunata pugllashpa yalin. Chai huasipillata causashpapash na rijsirinshnallatami portarin” nishpa.

2, 3. a) Romanos 12:10​pi nishca shinaca ¿picunatata juyana capanchi? b) Cunanga ¿imatata yachajupashun?

² Ñucanchicunaca na juyarishpa causanajuj gentecunashna cangapaca na munapanchichu (Rom. 12:2). Chaipa randica congregacionmanda huauquipanicunata, ñucanchi familiatapashmi ashtahuan juyana capanchi (Romanos 12:10, liingui). Griego shimipi ‘huauquipurashna juyarina’ nishpaca congregacionmanda huauquipanicunata ñucanchi familia ucupuracunatashna juyana cashcatami shina nijun. Congregacionmanda ñucanchi huauquipanicunapashmi ñucanchi familia can. Paicunata juyashpami Jehová Diostaca shujlla shina tandanajushpa sirvi ushapashun (Miq. 2:12).

³ Cunanga Bibliapi parlashca huaquin sirvijcuna imashina juyaihuan shujcunata tratashcata, paicunamanda imacunatalla yachajui ushashcatapashmi yachajupashun.

4. Santiago 5:11​pica Jehová Dios ¿imashina juyashcatata ricuchijupan?

⁴ Bibliapica Jehová Dios imashina cashcatami ricuchin.  Por ejemplo, “Taita Diosca, ninandapacha juyajmi” can ninmi (1 Juan 4:8). Jehová Dios shina cajta yachashpaca paipa amigocuna cangapami munapanchi. Pero Bibliapica Jehová Diosca ‘ninanda llaquishpa juyaj’ cajtapashmi ricuchijupan (Santiago 5:11, liingui). Caita yachashpami ñucanchita Jehová Diosca ninanda juyashcata ricupanchi.

5. a) Jehová Diosca ¿imashinata llaquij cashcata ricuchin? b) ¿Imata rurashpata Jehová Dioshna cashcata ricuchi ushapanchi?

⁵ Santiago 5:11​pica Jehová Dios juyaj cashpapash llaquij cashcatapashmi ricuchijun (Éx. 34:6). Jehová Diosca pai llaquij cashcataca ñucanchi pandarishcacunata perdonashpami ricuchin (Sal. 51:1). Bibliapica llaquinamanda parlashpaca na perdonanamandallachu parlajun. Pitapash llaquishpaca shungumandami llaquipanchi. Llaquimandami pipash sufrijujta ricushpaca ayudangapaj esforzaripanchi. Por ejemplo, shuj mamaca paipa churicunata tucuipimi ayudangapaj munan. Shinapash Jehová Diosca shuj mamatapash yalimi paita sirvijcunataca tucuipipacha ayudangapaj munan (Is. 49:15). Ñucanchicuna llaquicunahuan o problemacunahuan sufrijujta ricushpaca, Jehová Diosca ñucanchita llaquimandami ayudangapaj munan (Sal. 37:39; 1 Cor. 10:13, TNM). Shinaca, ñucanchi huauquipanicunata perdonashpa, paicunahuan na resentirishpami Jehová Dioshna llaquij cashcata ricuchi ushapashun (Efes. 4:32). Ashtahuanbachaca ñucanchi huauquipanicuna llaquicunata charijpi paicunata ayudashpami, paicunata llaquishcataca ricuchipashun. Shujcunata llaquishpami Jehová Dioshna llaquij cashcata ricuchipanchi (Efes. 5:1).

6. Jonatanhuan Davidhuanga ¿imashinata huauquipurashna juyarishcata ricuchirca?

⁶ Huauquipurashna juyarishpa causanamandaca Bibliapica huaquin Jehová Diospa sirvijcunamandami parlan. Por ejemplo, Jonatanba Davidpa causaimanda. Bibliapica  ‘Jonatanba shunguca, Davidpa shunguhuan huatarishcashna’ tucurca o alipacha amigocuna tucurca ninmi. Shinallata “Jonatanga, quiquin juyarinshnallata ninandapacha Davidta juyarca” nijunmi (1 Sam. 18:1). Saulpa randi cati rey cachunga Davidtami Jehová Diosca agllarca. Saulca, Jonatanba taitami carca. David rey canata yachashpaca Saulca ninandami culirarca. Chaimi Davidta huañuchingapapash munarca. Shinapash Jonatanga na paipa taitata apoyarcachu. Chaipa randica Davidhuan ali amigocuna tucushpa, Davidta siempre apoyanatami Jonatanga decidirca (1 Sam. 20:42).

7. ¿Imamandata Jonatanga na Davidhuan amigo tucuita ushanman carca?

⁷ Jonatán y Davidca ashtaca cosascunamandami na amigocuna tucuita ushanman carca. Por ejemplo, Jonatanga Davidpaca 30 huatacunahuanmi mayor carca. Chaimi Jonatanga imatapash na yachaj huambraguhuanga imapata amigo tucusha nishpa pensanmanlla carca. Shinapash Jonatanga na shina pensarcachu, Davidtaca ninandami respetarca.

8. ¿Imashpata Jonatanga Davidhuan ali amigo carca?

⁸ Shinallata Jonatanga ñucami rey Saulpa churi cani, ñucami cati rey cana cani nishpapash Davidhuan culiranmanllami carca (1 Sam. 20:31). Shina ninapa randica, Jehová Dios Davidta rey cachun agllashcatami apoyarca. Shinami Jonatanga humilde, Jehovata cazuj cashcatapash ricuchirca. Shinallata paipa taita Saúl ninanda culirajpipash, Davidtami apoyarca (1 Sam. 20:32-34).

9. Jonatán Davidta na envidiashpa ricun cashcataca ¿imashpata seguro capanchi?

⁹ Davidta huauquitashna juyashcamandami, Jonatanga Davidtaca na envidiashpa ricurca. Jonatanga flechacunata ali manejaj, alipacha macanajujmi carca. Paipash paipa taita Saulpash “jatun angatapash yali, ñapash calpajcunami carca. Leongunatapash yali shinllicunami carca” (2 Sam. 1:22, 23). Chaimi Jonatanga ali macanajuj caimandaca jariyanmanlla carca. Shinapash paica Davidta yalimi cani yashpaca na pensanllu carca. Paica Davidpa ali ruraicunatapash cushijushpami ricun carca. Jonatanga David Jehová Diospi confiashcata, na manllaj cashcatapash valichishpami ricun carca. David Goliatta huañuchijpimi, Jonatanga huauquitashna juyai callarirca. Ñucanchicunaca ¿imashinata congregacionmanda huauquipanicunataca ñucanchi familiatashna juyashcata ricuchi ushapanchi?

10. Tucui shunguhuambacha juyarishpa causangapaca ¿imatata rurana capanchi?

¹⁰ Bibliapica, ‘tucui shunguhuambacha caishuj chaishuj juyarishpa causanajuichi’ ninmi (1 Ped. 1:22). Jehová Diosca ñucanchita ninandami juyan. Paita cazushpa causajpica nima na paimandaca caruyachita ushangachu (Rom. 8:38, 39). Griego shimipi “tucui shunguhuambacha” nishpaca, shujcunata juyangapaj ninanda esforzarina cashcatami ningapaj munan. Huaquinbica huaquin huauquipanicunata juyanaca na fácil canllu. Chaimi Bibliapica, ‘caishujhuan chaishujhuan na ñapash fiñarishpa, juyarishpa aliguta causana canguichi. Shujllashnalla tucushpa causachun, Diospa espíritu yachachijujtami catina canguichi. Casilla [o tranquilo] aliguta causashpami, shujllashnalla causanguichi’ ninmi (Efes. 4:1-3). ‘Shujllashnalla causangapaca’ ñucanchi huauquipanicunapa pandarishcacunataca na ricujunachu capanchi. Sino Jehová Dios paicunata ricunshnallata  ricungapami esforzarina capanchi (1 Sam. 16:7; Sal. 130:3).

11. ¿Imashpata huaquinbica huauquipanicunata juyanaca na fácil can?

¹¹ Huaquinbica congregacionmanda huauquipanicunapa pandarishcacunata ricujuimandami, familia ucupuracunatashna juyaitaca na ushapanchi. Apostolcunapa punllacunapipashmi shina pasashca. Por ejemplo, Evodia, Síntique shuti panigucunaca apóstol Pablohuanga ‘ali villaitaca na manllashpa aligutapachami villachin’ carca. Shinapash ishcandi ali llevaritaca na ushanllu carca. Chaimi apóstol Pabloca paicunataca “Apunchi Jesusmanda shujlla cashcata yarishpa causapaichi ninimi” nirca (Filip. 4:2, 3).

12. Congregacionmanda huauquipanicunata juyangapaca ¿imatata rurana capanchi?

¹² Congregacionmanda huauquipanicunata juyangapaca ¿imatata rurana capanchi? Paicunata ashtahuan rijsingapami esforzarina capanchi. Shinami paicunata ashtahuan rijsishpa, paicunata intindishpa ashtahuan juyai callarishun. Ñucanchi huauquipanicuna mashna huatacunata charijpipash, ima costumbrecunata charijpipash paicunapa amigocunami caita ushapanchi. Jonatanga Davidpaca 30 huatacunahuan mayor cashpapashmi, Davidpa ali amigo tucurca. Ñucanchicunapashmi congregacionmanda shuj mayorlla o jovenlla huauquihuan o panihuan ali amigocuna cangapaj esforzarina capanchi. Shina rurashpami “crijpurapash, juyarinami canguichi” nishca shimicunata pactachijupashun (1 Ped. 2:17).

13. ¿Congregacionbica tucuicunahuanllu fácil llevarita ushapanchi?

¹³ Shinapash na tucui huauquipanicunahuanllu alipacha llevaritaca ushapashun. Huaquinbica ñucanchishnallata caj huauquipanicunahuanmi ali sintirishpa paicunahuan ashtahuan ali llevaripashun. Jesuspashmi paipa apostolcunata paipa amigocunatashna ricushpapash, Juandaca ashtahuan juyarca (Juan 13:23; 15:15; 20:2). Shina juyashpapash Jesusca tucuicunatallatami igual  tratarca. Por ejemplo, Juan paipa huauqui Santiagopash Diospa Reinopi shuj importante puestota mañajpica Jesusca caitami nirca: “Ali ladopi, lluqui ladopi tiarichunga, na ñuca cunachu cani” nishpa (Mar. 10:35-40). Ñucanchipashmi Jesushna tucui huauquipanicunata igual tratana capanchi. Na agllashpallachu ali tratana capanchi (Sant. 2:3, 4). Pitapash agllashpa ali tratashpaca, congregación ucupica tranquilo, cushilla tandanajuitaca na ushapanchimanllu (Jud. 17-19).

14. Filipenses 2:3​pi nishca shinaca ¿imatata rurana capanchi?

¹⁴ Congregacionbi huauquipanicunata juyashpaca na shujcunata yalimi cani nishpaca pensapashunllu. Yaripashunchi, Jonatanga na Davidtaca paipa contratashna ricurcachu. Ñucami rey cana cani nishpapash na pensarcachu. Ñucanchica Jonatanshnami cana capanchi, ñucanchi huauquipanicunataca na contracunatashnaca ricunachu capanchi. Paicuna imata ali rurashcatami ricuna capanchi. Shinallata apóstol Pablo imata nishcatapashmi yarina capanchi. Paica nircami: “Paimi ñucatapash yali ashtahuan ali yashpami, na jariyashpa tucuicunatallata alicachina canguichi” nishpa (Filipenses 2:3, liingui). Tucui huauquipanicuna congregacionbi ashtacata ayudajtaca siempremi yarina capanchi. Paicunapa ali cualidadcunata ricushpaca, humildecunami cashun. Shinallata huauquipanicunamandapashmi ashtacata yachajupashun (1 Cor. 12:21-25).

15. Tanyata, paipa familiatapash shujcuna ayudashcamandaca ¿imatata yachajupangui?

¹⁵ Llaquicunahuan cajpica, ñucanchi huauquipanicunata utilizashpami Jehová Diosca ñucanchita juyashcata, ayudajushcatapash  ricuchin. Huata 2019​pi, Estados Unidos llactapi, shuj Internacional jatun tandanajuiman rijpi shuj familiata ima pasashcata ricupashunchi. Paicunaca, “Juyaica, ima horapash na tucurinllu” nishca jatun tandanajuimanmi rishcarca. Tanyaca quimsa huahuacunatami charin. Paicunaca sábado punllami paicuna cashca hotelman tigranajurca. Shinapimi shuj carro cruzarishpa paicunata chocarca. Tanyaca ninmi: “Antsicarin pipash na llaqui aparcanchichu, pero manllarishcacunami carromandaca llujshircanchi. Shinapimi chaishuj lado callepica shuj carromanda pichari cayajushcata ricurcanchi. Shuj turigumi cashcarca. Paipashmi jatun tandanajuimanda tigrajushcarca. Suecia llactamanda 5 turiñañacunapashmi ñucanchita ayudangapaca shayarirca. Ñañagucunaca ñucata, ñuca ushigutapashmi ugllarca. Chaitapachami minishtinajurcanchi. Alimi capanchi, nijpipash paicunaca ñucanchihuanmi quidarca. Emergenciamandacuna chayamujpipash ñucanchita cumbashpami quidarca. Chai viajeca Jehová Dios ñucanchita juyashcatami ricuparcanchi. Ñucanchi turiñañacunatapash ashtahuan juyanatami yachajuparcanchi. Jehová Diosta agradicimandapashmi paitaca ashtahuan juyapanchi” nin. ¿Quiquin minishtijuj horaspipacha shuj huauqui o shuj pani quiquinda ayudashcataca yaripanguichu?

16. ¿Imamandata familia ucupurashna juyarina capanchi?

¹⁶ Congregacionmanda huauquipanicunata familia ucupuratashna juyashpaca ¿imatata rurapashun? Huauquipanicuna llaquicunahuan sufrinajujta ricushpaca paicunata ayudangapami munapashun. Shinallata shujllashna Jehová Diosta sirvishpa catichunbashmi ayudapashun. Jesuspa ali catijcuna cashcatapashmi ricuchipashun. Shinami shuj gentecunapash Jehová Diosmanda yachajungapaj munanga. Ashtahuanbachaca, “ñucanchita ninanda llaquij, tucuipi cushichij Taita Dios” Jehovatami alabashun (2 Cor. 1:3). Chaimandami tucuicunallata huauquipurashna juyarishpa causangapaj esforzarina capanchi.