1. Eaa te akaari maira e kare e aroa i roto i tetai au ngutuare i teia tuatau?

TOTOU te Pipiria, i taua tuatau openga ra, ka akaari te tangata i te tu “aroa kore.” (2 Timo. 3:1, 3) Te akatupuia nei teia totou i teia tuatau. Ei akaraanga, e mirioni ua atu ngutuare tei akatakakeia no tei tatara te nga metua e te noo riri ua ra raua, e te manako ra te tamariki e kare te nga metua e aroa ana ia ratou. Tetai au ngutuare, kare o ratou pirianga vaitata. Akakite tetai tangata tauturu ngutuare, “Kare te metua vaine, metua tane e te tamariki e tuatua ana ki tetai e tetai, e ka akapou i to ratou taime ki ta ratou computer, tablet, tereponi apaipai, e te au vitio kangakanga. Noatu te noo kapiti ra ratou, kare ratou i kite meitaki i tetai e tetai.”

2-3. (a) Ia Roma 12:10, ka akaari tatou i te aroa mou kiaai ma? (e) Eaa ta tatou ka uriuri i roto i teia apii?

² Kare tatou e inangaro i te aru i te tu aroa kore o teianei ao. (Roma 12:2) Mari ra, ka anoanoia tatou kia akatupu i te aroa mou no te ngutuare tangata e no te au taeake e te au tuaine i roto i te putuputuanga. (E tatau ia Roma 12:10.) Eaa ra te aroa mou? Te akataka maira te reira i te aroa piri mou no tetai e tetai i roto i te ngutuare. Ko teia te tu aroa ta tatou ka akaari ki te au taeake e te au tuaine i roto i te putuputuanga. Me akaari tatou i te aroa mou, ka tauturu tatou i te katoatoa kia tavini taokotai ia Iehova ma te rekareka.​—Mika 2:12.

³ Ei tauturu ia tatou kia akatupu e kia akaari i te aroa mou, akara tatou i te au apiianga mei te au akaraanga Pipiria.

4. Eaa ta Iakobo 5:11 e akakite maira no to Iehova aroa?

⁴ Akakite mai te Pipiria i to Iehova au tu manea. Ei akaraanga, karanga te reira e “ko te Atua oki te aroa.” (1 Ioa. 4:8) Ka akakeu teia ia tatou kia akavaitata atu kiaia. Akakite katoa te Pipiria e “kua ki te Atu [Iehova] i te aroa.” (E tatau ia Iakobo 5:11.) E pumaana tikai te kite i te oonu o tona inangaro no tatou!

5. Akapeea a Iehova te akaari anga i te tu takinga meitaki, e akapeea tatou me aru i tona akaraanga?

⁵ Akakite a Iakobo 5:11, e aere kapiti ana to Iehova aroa mou ki tetai akaou tu te ka akavaitata ia tatou kiaia—te tu takinga meitaki. (Exo. 34:6) Tetai mataara e akaari ana a Iehova i teia tu, na te akakore anga i ta tatou au ara. (Sala. 51:1) I roto i te Pipiria, ko te takinga meitaki, e maata atu te ō maira i te akakore anga i te ara. E tu inangaro teia te ka akakeu i te tangata kia tauturu i tetai ke tei rokoia e te taitaia. Akakite a Iehova e ko tona inangaro i te tauturu ia tatou, e maata atu te reira i to tetai metua vaine inangaro ki tana tamaiti. (Isa. 49:15) Me taitaia tatou, ka akakeu to Iehova tu takinga meitaki iaia kia tauturu ia tatou. (Sala. 37:39; 1 Kori. 10:13) Ka akaari tatou i te tu takinga meitaki ki te au taeake e te au tuaine na te akakore anga i ta ratou ara, e auraka e akamoupuku me akaririia mai tatou. (Ephe. 4:32) Tetai mataara no te akaari i te tu takinga meitaki, na te tauturu anga i te au taeake tei rokoia e te manamanata. Me akakeu te aroa ia tatou kia akaari i te tu takinga meitaki, te aru ra tatou ia Iehova, te akaraanga meitaki rava atu no te aroa mou.​—Ephe. 5:1.

6. Akapeea a Ionatana e Davida te akaari anga i te aroa mou no tetai e tetai?

⁶ Maata te au tua i roto i te Pipiria no runga i te aronga apa ua tei akaari i te aroa mou. Akamanako ana i te  akaraanga o Ionatana e Davida. Akakite te Pipiria: “Piri rava akera te ngakau o Ionatana ki te ngakau o Davida, aroa aturā Ionatana iaia mei te mea ko tona uaorai vaerua.” (1 Samu. 18:1) Kua ikiia a Davida ei ariki kia mono ia Saula. Muri mai, kua vareae a Saula ia Davida e kua tauta i te tamate iaia. Inara kare ta Saula tamaiti ko Ionatana i piri ki tona metua tane i te tauta anga i te tamate ia Davida. Taputou a Ionatana e Davida e ka vai ua rai raua ei oa e ka tauturu ua rai i tetai e tetai.​—1 Samu. 20:42.

7. Eaa tetai mea te ka arai ia Ionatana e Davida kia riro mai ei nga oa?

⁷ Manea tikai te tu aroa mou o Ionatana e Davida, me akamanako tatou i te au mea tei tupu, te ka arai ia raua kia riro mai ei nga oa. Ei akaraanga, e pakarikari atu a Ionatana ia Davida mei tetai 30 mataiti. Penei ka manako a Ionatana e kare e aite tana au mea ka inangaro ki ta tetai tangata mapu e te tu tamariki ua. Inara, kare a Ionatana i manako akapera ana, kua akangateitei rai aia ia Davida.

8. Eaa a Ionatana i riro ei e oa meitaki no Davida?

⁸ Penei ka vareae a Ionatana ia Davida. Ei tamaiti na te Ariki ko Saula, penei ka māro rai a Ionatana e koia tei tau kia riro mai ei ariki. (1 Samu. 20:31) Inara e tu akaaka to Ionatana, e kua vai tiratiratu aia kia Iehova. No reira kua āriki aia i ta Iehova ikianga e ko Davida te ariki ou. Kua vai tiratiratu katoa aia kia Davida, noatu ka akatupu te reira i te riri kia Saula.​—1 Samu. 20:32-34.

9. Kua vareae ainei a Ionatana ia Davida? Akamārama mai.

⁹ No to Ionatana aroa mou ia Davida, kare aia i vareae iaia. E tu karape to Ionatana i te taangaanga i te ana e te tu ngakau toa katoa. No runga iaia e Saula, karangaia e e “viviki maata to raua i to te aeto ra; e ririnui maata to raua i to te liona.” (2 Samu. 1:22, 23) Ka rauka ua ia Ionatana i te akapaapaa i tana au angaanga mataku kore i rave. Inara, kare aia i manako e e meitaki atu aia me kore i vareae ana ia Davida. Kua mareka a Ionatana i to Davida tu ngakau toa e te irinaki ia Iehova. Kua akamata a Ionatana i te akaari i tona aroa no Davida i muri ake te ta anga a Davida ia Golia. Akapeea tatou me akaari i te aroa mou ki te au taeake e te au tuaine?

10. Eaa te aiteanga “kia aroa maata kotou ia kotou uaorai ma te ngakau kinokino kore”?

¹⁰ Akakite te Pipiria e “kia aroa maata kotou ia kotou uaorai ma te ngakau kinokino kore.” (1 Pete. 1:22) Akanoo a Iehova i te akaraanga no tatou. E aroa maata tona no tatou e me vai tiratiratu tatou kiaia, kare aia e akamutu i te akaari mai i te aroa. (Roma 8:38, 39) Te tuatua Ereni no te “maata,” te oronga maira i te manako kia tauta i te akaari. Tetai au taime, ka anoanoia tatou kia “tauta” i te akaari i te aroa mou ki to tatou au taeake e te au tuaine. Me akaririia mai tatou, ka anoanoia tatou kia akakoromaki ua rai “tetai i tetai ma te aroa; Ma te matakite tikai oki kia vai rai te taokotaianga a te vaerua ra i te ruru o te au.” (Ephe. 4:1-3) Me tauta tatou i te taokotai ma te “ruru o te au,” kare tatou e akamou ki runga i te tarevake o te au taeake. Ka akara ra tatou ia ratou mei ia Iehova rai.​—1 Samu. 16:7; Sala. 130:3.

11. Eaa te tumu ka ngatā ei i te akaari i te aroa mou i tetai au taime?

 ¹¹ Kare i te mea māmā i te akaari i te aroa mou ki te au taeake e te au tuaine, me te kite atura tatou i to ratou au tarevake. Kua tupu ana teia ki te au Kerititiano i te anere mataiti mua. Ei akaraanga, ka rauka ua ia Euodia e Sunetuke i te angaanga kapiti kia Paulo no te rave i te “angaanga a te evangelia nei.” Inara, kare i rauka ana ia raua i te angaanga kapiti kia raua uaorai. No reira kua akamaroiroi a Paulo “kia okotai rai o raua ngakau i te Atu nei.”​—Phili. 4:2, 3.

12. Akapeea tatou me akaari i te aroa mou ki te au taeake e te au tuaine?

¹² Akapeea tatou me akaari i te aroa mou ki te au taeake e te au tuaine i teia tuatau? Me kite meitaki tikai tatou ia ratou, ka māmā i reira i te mārama i to ratou turanga e te akatupu i te aroa mou no ratou. Kare te tuke o toou mataiti e toou tupuanga e riro ei arairai anga. E akamaara, e pakarikari atu a Ionatana ia Davida mei tetai 30 mataiti; noatu ra kua akatupu aia i tetai pirianga oa kiaia. Ka rauka ainei ia koe i te akaoa atu ki tetai tei pakarikari​—me kore mapu atu​—ia koe? Me rave koe i te reira, te akaari ra koe i te aroa mou ki te “au taeake.”​—1 Pete. 2:17.

13. Eaa te tumu kare e rauka i te akavaitata ki te katoatoa i roto i te putuputuanga?

¹³ Me akaari tatou i te aroa mou ki te au taeake, ko te aiteanga ainei e e pirianga vaitata to tatou ki te katoatoa i roto i te putuputuanga? Kare. Kare i te mea tarevake kia akavaitata ki tetai pae e kare ki tetai no te mea kua aite ta kotou au mea e reka ana. Akakite a Iesu e ko tana au apotetoro, e au “oa” ratou nona, inara te akaperepere maata ra aia ia Ioane. (Ioa. 13:23; 15:15; 20:2) Noatu ra, kare a Iesu i manako ana e e meitaki atu a Ioane i etai ke. Ei akaraanga, te pati anga a Ioane e Iakobo i tetai taoonga ngateitei i roto i te Patireia, akakite a Iesu kia raua: “Te noo i taku rima katau,  e taku rima kaui, kare ïa e tika kia oronga atu au.” (Mare. 10:35-40) Kia aru i te akaraanga o Iesu, auraka e manako e meitaki atu to tatou au oa piri mou i tetai ke. (Iako. 2:3, 4) Me pera tatou, te akatupu ra tatou i tetai vaerua akatakake—kare teia tu e tau i roto i te putuputuanga Kerititiano.​—Iuda 17-19.

14. Ia Philipi 2:3, eaa te ka tauturu ia tatou kia kore e manako e meitaki atu tatou i tetai ke?

¹⁴ Me akaari tatou i te aroa mou ki tetai e tetai, kare tatou e tauta kia meitaki atu tatou i te au taeake i roto i te putuputuanga. E akamaara, kare a Ionatana i vareae ana ia Davida, e kare i tauta kia riro mai e koia te ariki. Ka rauka ia tatou pouroa i te aru i te akaraanga o Ionatana. Auraka e vareae i to kotou au taeake no te au mea i rauka ia ratou i te rave, “ei ngakau akaaka ra, i te manako akameitaki atu tetai ki tetai, auraka iaia uaorai.” (E tatau ia Philipi 2:3.) Ka rauka ia tatou tataki tai i te tauturu i te putuputuanga. Me akaari ua tatou i te tu akaaka, ka kite tatou i te au tu meitaki o te au taeake e te au tuaine e ka puapingaia tatou mei to ratou akaraanga tiratiratu.​—1 Kori. 12:21-25.

15. Eaa taau ka apii mai mei tei tupu kia Tanya e tona ngutuare?

¹⁵ Me tupu tetai tumatetenga kino kia tatou, ka akapumaana a Iehova ia tatou na roto i te tu aroa mou e te tauturu a te au taeake e te au tuaine. Akamanako i tei tupu ki tetai ngutuare tangata, i muri ake i te porokaramu o te Maanakai i ko i tetai 2019 “Love Never Fails!” Uruoaanga Pa Enua i Marike. “Te oki ra matou  ki te otera na runga i te motoka,” i karanga ai a Tanya, e metua vaine e toru ana tamariki, “i ū mai ei tetai motoka ki runga ia matou. Kare matou i mamae, kua eke mai ra matou no roto i te motoka e kua tu ua i te pae mataara ma te poitirere. Tareva mai tetai tangata ia matou kia aere ki ko iaia. Ko tetai taeake teia te oki ra ki te kainga mei te uruoaanga. Kua tapū katoa mai e rima au taeake e te tuaine no Sweden mai. Kua takave te au tuaine iaku e taku tamaine ei akapumaana ia maua! Akakite au kia ratou e ka mako ua matou, inara kare ratou i akaruke ana. Kua noo ratou e tae ua mai te tauturu a te are maki, e kua akono meitaki ia matou. I teia tumatetenga, kua kite tikai matou i to Iehova aroa. Kua riro teia i te akaketaketa i to matou aroa no te au taeake e te au tuaine, e to matou aroa e te tu āriki rekareka no Iehova.” Te maara ra ainei ia koe i tetai tuatau kua inangaro koe i te tauturu e kua akaari mai tetai taeake i te aroa mou kia koe?

16. Eaa te au tumu ka akaari tatou i te aroa mou ki tetai e tetai?

¹⁶ Akamanako i te meitaki ka tupu mai me akaari tatou i te aroa mou ki tetai e tetai. Ka akapumaana tatou i te au taeake e te au tuaine i to ratou tuatau tumatetenga. Ka akaketaketa tatou i te tu taokotai o te iti tangata o te Atua. E ka arataki mai teia i te aronga ngakau meitaki kia inangaro i te tavini ia Iehova. Tei maata atu, ka akapaapaa tatou i to tatou Metua, ko Iehova, “te tumu o te aroa, e ko te Atua nona anake te pumaana.” (2 Kori. 1:3) Kia rauka ua rai ia tatou pouroa te akatupu e te akaari i te aroa mou!