1. So mothovi amenđe avdije so ko but porodice nane but mangipe?

I BIBLIJA prorekninđa so ko poslednja dive, o manuša na ka mothoven mangipe premali pi porodica (2. Tim. 3:1, 3). Amen dikhaja so akava proročanstvo ispunini pe avdije. Na primer, but roditeljija tane razvedime. Sebepi soj tane holjame jekh upro aver, o ćhave trpinena sose osetinena pe so nane mangle. Čak, iako disave porodice živinena zajedno, nane paše jekh jekheja. „I daj, o dad hem o ćhave nane povezime jekh jekheja, ama tane povezime e kompjutereja, e tableteja, e telefoneja ja jekhe video igricaja“, phenela jekh porodično savetnik. „Iako živinena ko isto ćher, on jedva penđarena jekh jekhe.“

2-3. (a) Premalo Rimljanima 12:10, kas valjani te manga? (b) So ka dikha ko akava članko?

² Niko amendar na mangela te ovel sar o manuša ko akava sveto kola na mothovena mangipe premalo avera (Rimlj. 12:2). Umesto odova, amen valjani te sikljova sar šaj pana pobuter te manga amare porodica hem amare phralen hem phenjen ki skupština. (Čitin Rimljanima 12:10.) Savo tano odova mangipe? Odova mangipe podstaknini sarinen ki porodica te oven paše jekh jekheja. Sar so mangaja svakone andi amari porodica, ađahar valjani te manga svakone phrale ja phenja andi amari duhovno porodica. Ked ađahar mangaja averen, ka pomožina averenđe te oven bahtale đi služinena e Jehovase (Mih. 2:12).

³ Te bi šaj te barjaćera hem te mothova asavko mangipe, hajde te dikha so šaj te sikljova ando disave e biblijake primerija.

4. So Jakovljeva 5:11 phenela ando e Jehovaso mangipe?

⁴ I Biblija vaćeri amenđe ando e Jehovase šuže osobine. Na primer, oj phenela so „o Devel tano mangipe“ (1. Jov. 4:8). Ked odova đanaja, odova šaj te pašaćeri amen e Jehovaja. Ama, i Biblija phenela soj tano o Jehova hem „but samilosno.“ (Čitin Jakovljeva 5:11.) Odova ćaće mothovi kobor o Jehova mangela amen!

5. Sar o Jehova mothovi milosrđe hem sar šaj te oponašina le?

⁵ Zapazin so ki Jakovljeva 5:11, odova so o Jehova tano samilosno, povezini pe odoleja soj tano milosrdno. Odija tani pana jekh osobina koja pašaćeri amen olese (Izl. 34:6). Jekh način sar o Jehova mothovi po milosrđe tano ađahar so oprostini amenđe ked ćeraja greške (Ps. 51:1). Ama ki Biblija, o milosrđe uključini diso pobuter odolestar. Odova tano jekh but zoralo osećanje kova jekh osoba isi la andral ked dikhela nekas ko isi le problemi hem kova podstaknini le te pomožini lese. O Jehova phenela so olesi želja te pomožini amenđe tani pozorali ando osećanja kola jekh daj isi la premalo po ćhavo (Is. 49:15). Ked hijam ko problemi, e Jehovaso milosrđe podstaknini le te pomožini amenđe (Ps. 37:39; 1. Kor. 10:13). Amen mothovaja milosrđe amare phralenđe hem e phenjenđe ked oprostinaja lenđe hem ked na ićeraja holi ked razočarinena amen (Ef. 4:32). Ama, najšukar način te mothova lenđe milosrđe tano te ova uzo lende ked isi len problemija. Ked o mangipe podstaknini amen te ova milosrdna premalo avera, amen oponašinaja e Jehova kova tano najbaro primer ando mangipe (Ef. 5:1).

6. Sar dićhilo so o Jonatan hem o David tane paše amala?

⁶ I Biblija vaćeri amenđe ando nesavršena manuša kola hine paše amala. Zapazin  o primer ando Jonatan hem o David. I Biblija phenela: „O Jonatan hem o David ulje paše amala hem o Jonatan zamanglja le sar kokri pes“ (1. Sam. 18:1). O Jehova birinđa e Davide te ovel kralj palo Saul. Odolese, o Saul ulo but ljubomorno hem pokušinđa te mudari le. Ama e Sauleso ćhavo, o Jonatan, na podržinđa pe dade ked ov pokušinđa te mudari e Davide. O Jonatan hem o David obećinđe jekh jekhese so ka aćhon amala hem so uvek ka pomožinen jekh jekhese (1. Sam. 20:42).

7. So šajinđa te ćhinavi e Jonatane hem e Davide te oven amala?

⁷ Zanimljivo tano so o Jonatan hem o David hine paše amala iako hine but buća kola šajinđe te ćhinaven len te oven amala. Na primer, o Jonatan hine oko 30 berš pophureder ando David. O Jonatan šajinđa te mislini so nane le ništa zajedničko oleja, sose o David hine poterno olestar hem na hine le nisavo iskustvo ko životi. Ama, o Jonatan na dikhlja ađahar upro David. Umesto odova, ov but poštujinđa le.

8. Sose o Jonatan hine odobor šukar amal e Davidese?

⁸ O Jonatan šajinđa te ovel ljubomorno upro David. Sar ćhavo ando kralj Saul, ov šajinđa te borini pe te nasledini e Saule, ko so hem hine le pravo (1. Sam. 20:31). Ama, o Jonatan hine ponizno hem odano e Jehovase. Odolese, ov potpuno podržinđa e Davide, kas o Jehova birinđa te nasledini e Saule. O Jonatan hine odano hem e Davidese, iako odova but holjanćerđa olese dade, e Saule (1. Sam. 20:32-34).

9. Da li o Jonatan hine ljubomorno upro David? Objasnin.

⁹ Sebepi so manglja e Davide, o Jonatan na hine ljubomorno upro leste. O Jonatan hine but šukar strelco hem hrabro ratniko. Ov hem oleso dad, o Saul, hine penđarde sar „posigutne ando orlija“, hem „pozorale ando lavija“ (2. Sam. 1:22, 23). Odolese, o Jonatan šajinđa te hvalini pe odoleja so hine uspešno ko mariba. Ama, ov na takmičinđa pe e Davideja hem na hine ljubomorno upro leste sebepi o šukar buća kola o David ćerđa. Umesto odova, ov hine oduševimo sebepi e Davidesi hrabrost hem oleso pouzdanje ko Jehova. Na primer, ked o David mudarđa e Golijate, o Jonatan pana pobuter zamanglja le. Sar amen šaj te mothova so mangaja amare phralen hem e phenjen?

10. So značini hor te manga jekh jekhe, celone vileja?

¹⁰ I Biblija podstaknini amen: „Hor mangen jekh jekhe, celone vileja“ (1. Petr. 1:22). O Jehova aćhavđa amenđe but šukar primer. Ov but mangela amen. Ako hijam verna olese, ništa našti te ćhinavi le te mangel amen (Rimlj. 8:38, 39). O grčko lafi kova tano prevedimo sar „hor“, prenosini i misao ando odova neko te del sa pestar te mothovi o mangipe. Podijekh puti, nane lokho te mothova mangipe premalo amare phralja hem phenja. Ked avera holjanćerena amen, amen valjani hem ponodri „te podnosina jekh jekhe mangipaja“, hem te „da sa amendar te ićera o jekhipe, kova isi amen sebepi o sveti duh, ađahar so arakhaja o mir kova povezini amen“ (Ef. 4:1-3). Ked daja sa amendar te arakha „o mir kova povezini amen“, na ka usredsredina amen ko greške ando amare phralja. Umesto odova, ka da sa amendar te dikha upro amare phralja sar so o Jehova dikhela (1. Sam. 16:7; Ps. 130:3).

11. Sose podijekh puti šaj te ovel amenđe pharo te manga jekh jekhe?

 ¹¹ Nane uvek lokho te manga amare phralen hem phenjen, pogotovo ked đanaja olenge mane. Izgleda so asavko izazov hine len hem o hrišćanija ko prvo veko. Na primer, i Evodija hem i Sintihija, na hine len problemi odoleja te sarađujinen e Pavleja ki služba. Ama, ando nesavo razlog, hine lenđe pharo te sarađujinen jekh jekhaja. Odolese, o Pavle podstakninđa len „te služinen složno e Gospodese“ (Fil. 4:2, 3).

12. Sar šaj te manga amare phralen hem phenjen?

¹² Sar šaj avdije te manga amare phralen hem phenjen? Ked pana pošukar ka penđara amare phrale ja phenja, ka ovel amenđe polokho te haljova len hem te zamanga len. Amen šaj te ova amala olencar bizo obzir da li tane pophureder ja potikneder amendar ja bizo obzir andi koja kultura avena. Na valjani te bistra so iako o Jonatan hine 30 berš pophureder ando David, ov ipak ulo paše amal oleja. Da li bi hem tu šaj te ove amal nekasa andi ti skupština kova tano pophureder ja potikneder tutar? Ako ka ćere odova, ka mothove so mangeja „sa e phralen“ (1. Petr. 2:17).

13. Sose neko ki skupština šaj te ovel amenđe popaše amal ando avera?

¹³ Da li te manga e phralen ki skupština značini so svakone olendar ka ova paše amala? Na, odova nane realno. Normalno tano so nekasa hijam popaše sose šaj interesujinena amen ista buća. E Isusese, sa o apostolija hine amala, ama ov posebno manglja e Jovane (Jov. 13:23; 15:15; 20:2). Ama, o Isus na ponašinđa pe premalo oleste pošukar nego li premalo avera apostolija. Na primer, ked o Jovan hem oleso phral, o Jakov, rodinđe olestar te del len posebna thana ko e Devleso Kraljevstvo, o Isus phenđa lenđe: „Me našti te dav tumenđe te bešen ki mi desno hem ki mi levo strana“ (Mar. 10:35-40). Sar o Isus, ni amen na valjani te ponašina amen pošukar premalo amare amala nego li premalo avera phralja  hem phenja (Jak. 2:3, 4). Ako bi ađahar ponašinaja amen, bi ćeraja podele, a odolese nane than ki skupština (Jud. 17-19).

14. Premalo Filipljanima 2:3, so ka pomožini amen te na takmičina amen averencar ki skupština?

¹⁴ Ked iskreno mangaja jekh jekhe, tegani na ka takmičina amen averencar ki skupština. Setin tut so o Jonatan na hine ljubomorno upro David hem so na pokušinđa te ovel kralj umesto oleste. Sare amen šaj te oponašina e Jonataneso primer. Ma ov ljubomorno upro te phralja hem phenja sebepi olenge sposobnostija. Umesto odova, „ov ponizno hem dikh upro avera sar pobare tutar.“ (Čitin Filipljanima 2:3.) Ićer ki godi so svako amendar isi le po than ki skupština. Ako aćhovaja ponizna, odova ka pomožini amen te dikha o šukar buća ko amare phralja hem phenja hem te sikljova ando olengo šukar primer (1. Kor. 12:21-25).

15. So sikljiljan ando iskustvo kotar i phen Tanja hem ando olake ćhave?

¹⁵ Ked isi amen dijekh kušnja ko amaro životi, o Jehova tešini amen prekalo phralja hem phenja kola mothovena amenđe mangipe hem kola pomožinena amenđe ko praktično način. Jekh porodica ko 2019. berš, hine ko međunarodno kongres ki Amerika, e temaja: „O mangipe niked na ćhinavđola.“ Zapazinen so doživinđe ki subota palo program. „Ði vordancar irinđam amen ko hotel“, phenela i Tanja, i daj ando trin ćhave, „disave vorda našalđe i kontrola, nakhlje ki amari traka hem khuvđe ko amare vorda. Niko na hine povredimo, ama sare hijam le šokirime. Ikljiljam avrijal hem hijam le ko drumo. Tegani, neko mašinđa  amenđe ando vorda kola zaustavinđe pe uzalo drumo, hem vićinđa amen te khuva ko olese vorda, sose na hine bezbedno te aćhova ko drumo. Odova hine jekh phral kova isto irinđa pe ando kongres. Ama, ov na hine jedino kova zaustavinđa pe. Panđ delegatija andi Švedska isto terdilje vordancar. O phenja zagrlinđe me ćhaja hem man, a odova hine diso so ćaće valjanđa amenđe. Phenđum lenđe so hijam šukar hem so on slobodno šaj te nastavinen, ama on na manglje ta aćhaven amen. On aćhilje amencar čak hem ked alji i hitna pomoć hem trudinđe pe te ovel amen sa so valjani amenđe. Ki odija phari situacija, osetinđam e Jehovaso mangipe. Odova so ulo, pana poviše zorjaćerđa amaro mangipe premalo phralja hem phenja. Hem sebepi odova pana pobuter zamangljam e Jehova hem amari zahvalnost premalo leste hine pana pobari.“ Šaj li te setine tut ki jekh situacija ked tuće hine pharo hem ked dijekh phral ja phen pomožinđa tuće?

16. Sose valjani te manga jekh jekhe?

¹⁶ Zapazinen sose tano šukar ked jekh jekhese mothovaja mangipe. Amen utešinaja amare phralen hem phenjen ked tano olenđe pharo. Zorjaćeraja o jekhipe maškaro e Devleso narodo. Amen mothovaja so hijam e Isusese učenikija, a odova e iskreno manušen, pašaćeri e Jehovaja. Soj tano najvažno, odoleja slavinaja e Jehova kova tano „o Dad ando milosrđe hem o Devel andi svako uteha“ (2. Kor. 1:3). Odolese, hajde te da sa amendar te razvijina hem te mothova iskreno mangipe jekh jekhese.