1. Nyen la afa so, na yâ ti asewa mingi, azo aye terê mingi ape?

BIBLE afa so na lâ ti nda ni, azo ayeke ‘ye amba ti ala zo’ pëpe (2 Tim. 3:1, 3). E bâ so prophétie so ayeke ga tâ tënë laso. Na tapande, ababâ na amama mingi asara divorce asara si bê ti ala ason na terê ti mba nga amolenge ti ala abâ so a ye ala ape. Même azo ti sewa so angbâ na yâ ti da oko ayeke peut-être na kpengba songo na popo ti ala ape. Na tapande, mbeni wamungo wango na ndö ti sewa atene: “Mama, babâ, nga na amolenge ayeke sara lisoro na popo ti ala ape, nga ala mû mingi ti ngoi ti ala ti sara kua na a-ordinateur, atablette, atéléphone wala ti sara na ajeu vidéo. Atâa so ala lango da oko, ala hinga mba nzoni ape.”

2-3. (a) Ti gue oko na aRomain 12:10, azo wa la e doit ti ye ala na tâ yengo terê? (b) Nyen la e yeke bâ na yâ ti article so?

² E ye pëpe ti ga tongana azo mingi na yâ ti dunia so, so aye amba ti ala ape (aRom. 12:2). Me e doit ti gi ti ye azo ti sewa ti e nga na aita ti congrégation na tâ yengo terê. (Diko aRomain 12:10.) Tâ yengo terê ayeke nyen? A yeke mbeni tënë so afa mbilimbili kpengba songo ti kamarade so ayeke na popo ti azo ti sewa so aye terê mingi. So ayeke mara ti ndoye so e doit ti gi ti duti na ni ndali ti aita ti e ti congrégation. Tongana e ye aita na tâ yengo terê, a yeke mû maboko na e kue ti sara na Jéhovah beoko nga na ngia.—Mi. 2:12.

³ Ti mû maboko na e ti duti na mara ti ndoye so, zia e bâ aye so e lingbi ti manda na lege ti tapande ti Jéhovah nga na ti azo so Bible asara tënë ti ala.

4. Jacques 5:11 afa na e nyen na ndö ti ndoye ti Jéhovah?

⁴ Bible afa na e apendere sarango ye ti Jéhovah. Na tapande, Bible atene: “Nzapa ayeke ndoye.” (1 Jean 4:8). Tënë so apusu e ti ga nduru na lo. Me Bible atene nga so Jéhovah “ayeke tâ na ndoye mingi”. (Diko Jacques 5:11.) So ayeke mbeni pendere fason ti fa so Jéhovah aye e mingi.

5. Jéhovah ayeke sara nzoni bê na e tongana nyen? Tongana nyen la e lingbi ti mû tapande ti lo?

⁵ Bâ so Jacques 5:11 atingbi tâ yengo so Jéhovah aye na e na nzoni bê ti lo, mbeni pendere sarango ye ti lo nde so agboto e na mbage ti lo (Ex. 34:6). Mbeni lege so Jéhovah ayeke sara nzoni bê na e ayeke so lo yeke pardonné afaute so e sara (Ps. 51:1). Bible afa so nzoni bê angbâ gï na ndö ti pardon ape. Nzoni bê ayeke nga kota nzara so mbeni zo ayeke na ni ti mû maboko na mbeni zo so ayeke na yâ ti ngangu kpale, na a yeke pusu lo ti gi ti mû maboko na zo ni. Jéhovah atene so kota nzara so lo yeke na ni ti mû maboko na e ahon ti so mbeni mama ayeke na ni ti mû maboko na molenge ti lo (És. 49:15). Na ngoi so e yeke na yâ ti ngangu kpale, nzoni bê ti Jéhovah ayeke pusu lo ti mû maboko na e (Ps. 37:39; 1 aCor. 10:13). E lingbi ti sara nzoni bê na aita ti e tongana e pardonné ala nga e ngbâ ti sara ngonzo na terê ti ala ape tongana ala son bê ti e (aÉph. 4:32). Mbeni kpengba lege so e lingbi ti sara nzoni bê na aita ti e ayeke ti mû maboko na ala na ngoi so ala yeke na yâ ti akpale. Tongana ndoye apusu e ti sara nzoni bê na azo, andâ e yeke mû tapande ti Jéhovah, so ayeke na tâ ndoye mingi ahon azo kue.—aÉph. 5:1.

6. Tongana nyen la Jonathan na David afa so ala yeke na tâ yengo terê na popo ti ala?

⁶ Bible asara tënë ti azo so ayeke mbilimbili-kue ape, so ayeke na tâ yengo terê na popo  ti ala. Bâ tapande ti Jonathan na David. Bible atene: “Kamba ti kota songo ti kamarade abungbi Jonathan na David, na Jonathan aye lo tongana terê ti lo wani.” (1 Sam. 18:1). Jéhovah asoro lani David ti ga gbia na place ti Saül. Na pekoni, Saül abata David na bê ti lo na lo gi ti fâ lo. Me Jonathan, molenge ti Saül, amû lani maboko na babâ ti lo ape na ngoi so lo gi ti fâ David. Jonathan na David amû zendo ti ngbâ akamarade nga ti ngbâ lakue ti mû maboko na mba.—1 Sam. 20:42.

7. Mbeni ye wa la alingbi lani ti kanga lege na Jonathan na David ti ga akamarade?

⁷ Tâ yengo terê so ayeke na popo ti Jonathan na David apika bê mingi ndali ti so ambeni ye ayeke lani dä so alingbi ti kanga lege na ala ti ga akamarade. Na tapande, Jonathan ahon lani David na ngu 30 tongaso. Jonathan alingbi lani ti tene so lo lingbi pëpe ti ga kota kamarade ti mbeni zo so ade maseka mingi nga so ahinga ye mingi tongana lo ape. Me Jonathan apensé tongaso ape. Lo ne lani David mingi.

8. Ngbanga ti nyen la mo pensé so Jonathan ayeke lani mbeni nzoni kamarade ndali ti David?

⁸ Jonathan alingbi lani ti sara bê na terê ti David. So Jonathan ayeke lani molenge ti Gbia Saül, lo lingbi lani ti tene so lo la lo yeke na droit ti ga gbia na peko ti lo (1 Sam. 20:31). Me Jonathan asara lani terê ti lo kete, nga lo yeke be-ta-zo na Jéhovah. Tongaso, na bê ti lo kue, lo mû maboko na David, so Jéhovah asoro lo ti ga gbia ande. Lo ngbâ nga lani be-ta-zo na David, atâa so a son bê ti Saül ngangu.—1 Sam. 20:32-34.

9. Eskê Jonathan abâ lani David tongana wato ti lo? Mo tene tongaso ngbanga ti nyen?

⁹ Jonathan aye lani David na tâ yengo terê asara si lo bâ lo tongana wato ti lo ape. Jonathan ahinga lani ti sara kua nzoni mingi na kokora nga lo yeke ngangu zo ti bira so asara ye na mbeto ape. Azo atene lani so lo na babâ ti lo ‘ayapu na kpengo loro ahon a-aigle,’ nga “ala yeke ngangu ahon abamara.” (2 Sam. 1:22, 23). Tongaso, Jonathan alingbi lani ti pika kate ndali ti akpengba ye so lo sara. Ye oko, lo gi lani ti sara mandako na David ape nga lo sara bê na terê ti lo ape. Me lo ye lani David mingi ndali ti so lo sara ye na mbeto ape nga lo zia bê ti lo na Jéhovah. Na tapande, na peko ti so David afâ Goliath, Jonathan akomanse ti ye lo mingi. Tongana nyen la e lingbi ti ye aita ti e na tâ yengo terê?

10. Ti “ndoye terê ngangu mingi na ndoye so alondo na bê” aye ti tene nyen?

¹⁰ Bible atene na e ti “ndoye terê ngangu mingi na ndoye so alondo na bê.” (1 Pi. 1:22). Jéhovah azia na e tapande ni. Jéhovah andoye e ngangu mingi, ni la tongana e yeke be-ta-zo na lo, ye oko alingbi ti kangbi e na ndoye ti lo ape (aRom. 8:38, 39). Tënë ti Grec so a kiri peko ni na “ngangu mingi” aye ti sara tënë ti mbeni zo so ayeke sara kue ti sara ye na ndoye. Na ambeni ngoi, a yeke kete ye na e ape ti ye aita na tâ yengo terê. Na ngoi so aita ason bê ti e, a lingbi e ngbâ ti “kanga bê na mba na yâ ti ndoye, [e] sara ngangu ti bata beoko ti yingo na yâ ti kamba ti siriri so abungbi [e] oko.” (aÉph. 4:1-3). Tongana e gi ti bata “kamba ti siriri” so, e yeke bâ gï afaute ti aita ape. E yeke sara kue ti bâ ala tongana ti so Jéhovah abâ ala.—1 Sam. 16:7; Ps. 130:3.

11. Ngbanga ti nyen la na ambeni ngoi a lingbi ti duti ngangu na e ti ye aita ti e na tâ yengo terê?

¹¹ A lingbi ti duti ngangu na e ti ye aita ti e  na tâ yengo terê, mbilimbili tongana e bâ afaute ti ala. Na bango ni, a yeke lani kpale so ambeni kozo Chrétien awara. Na tapande, peut-être Évodie na Syntyche ayeke lani na kpale ape ti sara kua “na terê ti [Paul] ndali ti nzoni tënë”. Me ndali ti mbeni raison, ala mä lani terê ape. Tongaso, Paul awa ala ti “duti na oko bibe na yâ ti Seigneur.”—aPhil. 4:2, 3.

12. Tongana nyen la e lingbi ti ye aita ti e na tâ yengo terê?

¹² Tongana nyen la laso e lingbi ti ye aita ti e na tâ yengo terê? Tongana e hinga aita ti e nzoni, a lingbi ti duti ngangu na e ape ti comprendre ala nga ti ye ala na tâ yengo terê. E lingbi ti ga akamarade ti ala atâa ngu ti ala ahon ti e wala ti e ahon ti ala, wala ngobo ti ala ayeke nde na ti e. Girisa ape so Jonathan ahon lani David na ngu 30 tongaso, me lo lë kpengba songo ti kamarade na lo. Eskê mo lingbi ti sara kamarade na mbeni zo ti congrégation ti mo so ngu ti mo ahon ti lo, wala so ngu ti lo ahon ti mo? Tongana mo sara ni, mo yeke fa so mo “ndoye sewa ti e ti aita kue”.—1 Pi. 2:17.

13. Ngbanga ti nyen la e lingbi ti duti akota kamarade ti ambeni ita na yâ ti congrégation?

¹³ Eskê ti ye aita na tâ yengo terê aye ti tene so e yeke ga akota kamarade ti azo kue na yâ ti congrégation? Ên-ën, a yeke ngangu. A yeke na lege ni ti duti akota kamarade ti ambeni ita ndali ti so aye so agbu bê ti e na ala ayeke oko. Jésus atene lani so abazengele ti lo kue ayeke “akamarade” ti lo, me lo ye lani Jean mingi (Jean 13:23; 15:15; 20:2). Ye oko, Jésus asara lani ye na Jean nzoni mingi ahon atanga ni ape. Na tapande, na ngoi so Jean na ita ti lo Jacques ahunda kota ndo na yâ ti Royaume ti Nzapa, Jésus atene na ala: “Ti duti na mbage ti maboko ti mbi ti koli wala na mbage ti maboko ti mbi ti wali, a yeke ti mbi ti mû ni pëpe.” (Marc 10:35-40). Legeoko tongana Jésus, a lingbi e sara ye na akota kamarade ti e nzoni mingi ahon tanga ti aita ape (Jacq. 2:3, 4). Tongana e sara tongaso, e yeke maï bibe ti kangbi, mbeni ye  so adoit ti duti na yâ ti congrégation ape.—Jude 17-19.

14. Ti gue oko na aPhilippien 2:3, nyen la ayeke mû maboko na e ti ke bibe ti mandako?

¹⁴ Tongana e ye aita na tâ yengo terê, a yeke sara si bibe ti mandako alï na yâ ti congrégation ape. Girisa ape so Jonathan agi lani pëpe ti sara mandako na David, nga lo bâ lo pëpe tongana zo so lo na lo ayeke gbugburu mbata ti gbia. E kue e peut ti sara ye tongana Jonathan. Sara bê pëpe na terê ti amba ti mo awakua ndali ti akode ti ala, ‘me sara terê ti mo kete na bâ amba ti mo tongana azo so ayeke kota ahon mo’. (Diko aPhilippien 2:3.) Girisa ape so zo oko oko alingbi ti sara mbeni ye ti mû maboko na congrégation. Tongana e ngbâ ti sara terê ti e kete, e lingbi ti bâ anzoni sarango ye ti aita ti e nga e yeke bâ nzoni na lege ti tapande ti dutingo be-ta-zo ti ala.—1 aCor. 12:21-25.

15. Nyen la ye so asi na Tanya nga azo ti sewa ti lo afa na mo?

¹⁵ Na ngoi so e wara mbeni tara so e ku terê ti e na ni ape, Jéhovah ayeke dë bê ti e na lege ti aita so aye e na tâ yengo terê nga ala mû maboko na e. Bâ ye so asi na mbeni sewa na peko ti so ala hunzi kapa ti samedi ti Assemblée Internationale “Ndoye ayeke hon lâ oko pëpe”! ti ngu 2019, na États-Unis. Tanya, so ayeke mama ti amolenge ota, atene: “E yeke lani na yâ ti oto e yeke kiri na hôtel. Mbeni oto so akomanse ti kpe kirikiri aga akpo oto ti e. Mbeni zo awara kä ape, me e sigi na yâ ti oto ni e luti na terê ti lege; li ti e akpe kue. Mbeni zo so ayeke na terê ti lege asara maboko na e ti ga na terê ti oto ti lo si  e wara sioni ape. A yeke mbeni ita-koli so lo kue lo yeke kiri na peko ti kota bungbi ni. Me gï lo oko la lo luti ape. Aita oku so alondo na Suède aluti nga. Aita-wali agbu mbi na molenge ti mbi ti wali na kate ti ala, na a sara e nzoni mingi. Mbi tene na ala so e yeke nzoni, me ala ke ti hon. Ala ngbâ na terê ti e même na peko ti so azo ti hôpital aga, ala sara kue ti tene e wara aye kue so e bezoin ni. Na ngoi ti ngangu kpale so, e bâ ndoye ti Jéhovah. Ye so asi so asara si e kiri e ye aita ti e mingi nga asara si e kiri e ndoye Jéhovah mingi nga e kiri singila na lo mingi.” Eskê mo dabe ti mo na mbeni ngoi so mo yeke lani na bezoin ti tene mbeni zo a-aidé mo na mbeni ita ti mo afa so lo ye mo na tâ yengo terê?

16. Araison wa la e yeke na ni ti ye mba na tâ yengo terê?

¹⁶ Gbu li na ndö ti anzoni ye so ayeke si tongana e ye mba na tâ yengo terê. E yeke dë bê ti aita ti e na angoi ti kpale. E yeke sara si beoko amaï na popo ti awakua ti Nzapa. E yeke fa so e yeke adisciple ti Jésus, na ye so ayeke gboto azo so aye ti sara na Jéhovah ti ga na yâ ti tâ vorongo Nzapa. Nga ye so ayeke kota mingi ayeke so e yeke gonda “Babâ so ayeke sara nzoni bê mingi na zo nga Nzapa ti dengo bê kue,” Jéhovah (2 aCor. 1:3). Zia e kue e ngbâ ti gi ti duti na tâ yengo terê.