1. Xaa yannara batinye maate giddo baxillu bainota leellishannori maati?

 QULLAAWU MAXAAFI goofimarchu barra mannu “baxillu nookkiha” ikkannota masaalino. (2 Xim. 3:1, 3) Xaa yannara tini masaalo woꞌmitanna laꞌnanni heeꞌnoommo. Lawishshaho, lowo miliyoone ikkanno minaannuwinna minaamuwi adhamansa diigihu gedensaanni mimmitoho aaraawanno daafira, oosonsa baxannonkehu dino yite heddanno. Mitto mine heedhanno maate nafa mimmitunniwa aantannokkire ikkitara dandiitanno. Mittu maatete daafira amaalanno manchi togo yiino: “Annu, amanna ooso kompiyutere, taabileetenna silke qaqqasiꞌranni woy viidiyote geeme godoꞌlanni mimmitu ledo xaada agurino. Tini maate mitto mine heedhannoha ikkirono mimmitu ledo hakkeeshshi geeshsha diegennantino.”

2-3. (a) Roomu Sokka 12:10 ayeoo lubbora baxa hasiissannonketa kultanno? (b) Konni birxichira maa ronseemmo?

² Ninke baalunku tenne baxillu nookki alame faale haꞌra dihasiꞌneemmo. (Rom. 12:2) Hatteentenni maatenke miilla ledo calla ikkikkinni ammanate roduuwinke ledono lubbora baxama hasiissannonke. (Roomu Sokka 12:10 nabbawi.) Lubbora baxate yaa mayyaate? Togoo baxilli maatete miilla mereero heeꞌrannoho. Ammanate roduuwinkera togoo baxille leellisha hasiissannonke. Ammanate roduuwanke lubbora banxeemmota leellinsheemmoha ikkiro, baalunku mittimmatenni Yihowa magansiꞌranno gede kaaꞌlineemmo.—Mik. 2:12.

³ Hanni mimmitu ledo lubbora baxammeemmo gede kaaꞌlannonkeha Qullaawu Maxaafi giddo kulloonni lawishsha laꞌno.

4. Faarso 103:8 Yihowa lowo geeshsha baxannonketa anfeemmo gede kaaꞌlitannonkehu hiittoonniiti?

⁴ Qullaawu Maxaafi Yihowara baxissanno akatta noosita kulanno. Lawishshaho, “Maganu baxilleho” yaanno. (1 Yoh. 4:8) Tini hedo calla nafa isiwa shinqeemmo gede assitannonke. Qoleno Qullaawu Maxaafi Maganunnihu ‘bagamannokki baxilli batiꞌra’ ikkinota kulanno. (Faarso 103:8 nabbawi.) Tini, Yihowa lowo geeshsha baxannonketa leellishshanno.

5. Yihowa maarannota leellishannohu hiittoonniiti? Ninke isi lawishsha harunsa dandiineemmohu ma garinniiti?

⁵ Faarso 103:8te Yihowaha bagamannokki baxille isiwa shinqeemmo gede assannonkehu wolu akatisi yaano maarosi ledo xaadinse kulloonnita wodanche. (Ful. 34:6) Yihowa maarosi leellishannonke doogga giddo mitte loonsoommo cubbira gatona yeeti. (Far. 51:1) Qullaawu Maxaafi giddo kulloonni garinni, maarote yaa soꞌro loosino manchira gatona yaa calla diꞌꞌikkitino. Maarote yaa mitto yaaddo amaddinosi mancho laꞌnummoro, mararre kaaꞌlineemmosi gede assitannonkete giddiidi hedooti. Yihowara ninke kaaꞌlate noosi hasatto mitte ama qaaqqose kaaꞌlate noose hasattonni roortannota coyiꞌrino. (Isa. 49:15) Yihowa maarannonke daafira yaaddo amaddannonke woyite kaaꞌlannonke. (Far. 37:39; 1 Qor. 10:13) Roduuwinke koffi assitannonke woyite gatona yinenna koma amada agurre maarreemmonsata leellisha dandiineemmo. (Efe. 4:32) Maarreemmonsata leellinsheemmoti qara doogo roduuwinkera qarru iillannonsa woyite kaaꞌlineeti. Baxillunni kaꞌne woloota maarreemmoha ikkiro bagamannokki baxilli noosi Magani lawishsha harunsineemmo.—Efe. 5:1.

6. Yoonaataaninna Daawiti mimmitu ledo lubbora baxantinohu hiittoonniiti?

⁶ Qullaawu Maxaafi giddo guuntete xeꞌne noonsa manni mimmitu ledo lubbora baxaminota leellishshanno xagge no. Hanni Yoonaataaninna Daawiti xagge laꞌno. Qullaawu  Maxaafi, “Yoonaataani ledo lamunku lubbote jaalla ikkitu; Yoonaataanino [Daawiti] lowo geeshsha baxisi” yaanno. (1 Sam. 18:1) Daawiti Saaoolinni aane moote ikkanno gede buuraminoho. Hakkunni gedensaanni Saaooli Daawiti hinaasino daafira shaasira woꞌnaalino. Saaooli beetti Yoonaataani kayinni, annisira halame Daawiti shaate dikaino. Yoonaataaninna Daawiti jaalla ikkite heedharanna woꞌmanka woyite mimmito kaaꞌlitara qaale eꞌino.—1 Sam. 20:42.

7. Yoonaataaninna Daawiti jaalla ikkitannokki gede assara dandaannohu mittu coyi maati?

⁷ Yoonaataaninna Daawiti jaalla ikkitannokki gede assara dandaanno coyi noota wodanchineemmo woyite, insa mimmitu ledo lubbora baxamansa dhagge ikkitannonke. Lawishshaho, Yoonaataani Daawiti mito 30 diro bayiranno. Yoonaataani, konni qaaqqunna woꞌnaalshu noosikkihu ledo jaalooma dihasiissannoe yaara dandaanno. Ikkollana, Yoonaataani Daawiti woffi asse dilaino.

8. Yoonaataani Daawitira dancha jaala ikkinohu mayira lawannohe?

⁸ Woleteemmero Yoonaataani Daawiti hinaasara dandaanno. Yoonaataani Moote Saaooli beetto ikkino daafira anniꞌya zuufaane ragiꞌrate qoosso nooehu aneeti yee heewisamara dandaanno. (1 Sam. 20:31) Isi kayinni isonooto heeshshi assannohonna Yihowara ammanaminoho. Konnira, isi Yihowa albillitte moote ikkara doorinoha Daawiti woꞌmunni woꞌma kaaꞌlino. Saaooli hanqissannoha ikkirono isi Daawitira ammanamino.—1 Sam. 20:32-34.

9. Yoonaataani Daawiti iso hettisanni noohu gede asse hedinoni? Xawisi.

⁹ Yoonaataani Daawiti lubbora baxanno daafira Daawiti iso hettisanni noohu gede asse dihedino. Yoonaataani, digaana olate fushshiꞌrinohonna worba olamaanchooti. Mannu Yoonaataaninna annasi Saaooli, “Allamurchunni roore rakkannoreeti; doobbiichunni roore jawaattinoreeti” yaanno. (2 Sam. 1:22, 23) Yoonaataani assinoha dhagge ikkanno coye kuꞌle naaxxara dandaanno. Ikkollana, isi diheewisamino woy dihinaasino. Hatteentenni Daawiti worbanna Yihowa addaxxannoha ikkino daafira naadinosi. Isinni, Daawiti Goliyaadi shiihu gedensaanni Yoonaataani iso umisi gede asse baxa hanafino. Ninkeno roduuwanke lubbora banxeemmota leellisha dandiineemmohu hiittoonniiti?

10. “Mimmitiꞌne ledo wodaninni seekkitine . . . baxamme” yaa mayyaate?

¹⁰ Qullaawu Maxaafi “mimmitiꞌne ledo wodaninni seekkitine . . . baxamme” yee kulannonke. (1 Phe. 1:22) Yihowa dancha lawishsha ikkinonke. Isira ammanamme heeꞌnummo geeshsha isi ninke baxannokki gede assara dandaannori horo dino. (Rom. 8:38, 39) “Seekkitine” yitanno tiro afiꞌrinohu Giriikete Afii qaali alba hinge hiixata woy sharrama leellishanno. Hakko daafira, roduuwinke ledo lubbora baxamate mito woyite “hiixata” woy “sharrama” hasiissannonkeha ikkara dandaanno. Wolootu koffi assitannonke woyite, “Mimmitoꞌne baxillunni duqqe! Maganu Ayyaani aanno keerinni mitteenni usurantine mittimma agadhate jawaatte” yine amaalloonninke amaale harunsa hasiissannonke. (Efe. 4:1-3) ‘Keerinke’ baꞌꞌannokki gede sharrammeemmoha ikkiro, roduuwinke soꞌro diꞌꞌillachinsheemmo. Roduuwanke Yihowa laꞌꞌanno garinni laꞌꞌate sharrammeemmo.—1 Sam. 16:7; Far. 130:3.

11. Mito woyite roduuwanke lubbora baxa qarra ikkitannonkehu mayira ikkara dandaanno?

 ¹¹ Roduuwinke hakko iso soꞌro loossinota anfummoro insa lubbora banxeemmonsata leellisha mito woyite shota diꞌꞌikkitannonke. Umi xibbi diro heeꞌrinohu mitu Kiristaanirano togoo coyi tuncu yiinsakkinni digatino. Lawishshaho, Ewoodiyanna Siinxiki Phaawuloosi “ledo dancha duduwo mitteenni” qarru nookkiha duduwinoha ikkara dandaanno. Ikkirono lamentera coyi kawa kaꞌaa higannonsa gede assannori kalaqamino. Konnira Phaawuloosi insa ‘Mootichunni sumuu yee heeꞌranno gede’ amaalinonsa.—Fil. 4:2, 3.

12. Roduuwanke albinni roore lubbora baxa dandiineemmohu hiittoonniiti?

¹² Xaa yannara roduuwanke albinni roore lubbora baxate kaaꞌlannonkere maa assa dandiineemmo? Roduuwanke seekkine anfummo kiiro, qarransa huwatanna insara noonke baxilli lexxanno gede assiꞌra qarrisa hooggankera dandiitanno. Dirinsanna lophitino gari insara jaalla ikkineemmota hoolankera diwodhineemmo. Yoonaataani Daawiti mito 30 diro bayirannota qaango; ikkirono isi Daawiti ledo lubbora jaaloomino. Songoꞌne giddo jaala ikkitinara dandiitinannihu kiꞌnera diro bayirannohu woy maaꞌnannohu no? Insa ledo jaalooꞌmitine roduuwu maamara baala ‘baxxinannita’ leellisha dandiitinanni.—1 Phe. 2:17.

13. Songote giddo noohu baalunkuwa taalo aana dandiineemmokkihu mayiraati?

¹³ Ammanate roduuwanke lubbora banxeemmo yaa songote giddo noohu baalunkuwa taalo aanneemmo yaateni? Deeꞌni, hatto yaa diꞌꞌikkino. Ninkete gedee hasatto noonsariwa roore aana soꞌro diꞌꞌikkitino. Yesuusi soqqamaasinesi baalanta “jaallaꞌya” yiinoha ikkirono, Yohaannisi ledo kayinni roore aananno. (Yoh. 13:23; 15:15; 20:2) Ikkirono Yesuusi Yohaannisira baxxinore diassino. Lawishshaho, Yohaannisinna rodiisi Yaiqoobi Maganu Mangistera ayirrado bayicho aansara xaꞌmidhu woyite, Yesuusi togo yiino: “Qiniiteꞌyaanninna guraꞌyaanni . . . ofoshshiisheemmohu ane diꞌꞌikkoommo.” (Maq. 10:35-40) Ninkeno Yesuusi lawishsha harunsineemmo daafira  muli jaallankera roorsiꞌne woloota mallaada dihasiissannonke. (Yai. 2:3, 4) Hatto assineemmoha ikkiro Kiristaanu songo giddo babbadooshshu kalaqamanno gede assineemmo.—Yih. 17-19.

14. Filiphisiyusi Sokka 2:3 kultanno garinni, heewisammeemmokki gede kaaꞌlannonkeri maati?

¹⁴ Mimmito lubbora banxeemmota leellinsheemmoha ikkiro, songote giddo heewo heedhannokki gede assineemmo. Yoonaataani ‘Moote ikka hasiissannoehu aneeti’ yee Daawiti ledo heewisaminokkita qaango. Ninke baalunku Yoonaataani lawishsha harunsa dandiineemmo. Ledoꞌne loossannorira dandoo noonsa daafira hinaassinoonte; “hatteentenni wolu manni kiꞌnenni roorinohu gede assitine hedde.” (Filiphisiyusi Sokka 2:3 nabbawi.) Songote giddo noohu mittu mittunku halashshaanchi kaaꞌlannori noota deꞌinoonte. Ninkeneeto heeshshi assineemmore ikkinummoro, roduuwinketa dancha akatta illachinsheemmo; hattono danchu lawishshinsanni horo afiꞌneemmo.—1 Qor. 12:21-25.

15. Taaniyenna maatesera roduuwu assitinorinni maa ronseemmo?

¹⁵ Hendoommokki fonqoli iillannonke woyite, Yihowa roduuwinke leellishshannonke baxillinna kaaꞌlo widoonni sheshifachishannonke. Hanni mitte maate Ameerikaho assinoonniha 2019ha “Baxillu Geedonniho” yaannoha Daga Dagiyyote Gambooshshe hadhe higganna, Qidaamete barra iillinonsare laꞌno. Taaniye yinanniti sase ooso ama togo yitino: “Gambooshshuwiinni galleemmo hoteele makeenunni haꞌnanni heeꞌneenna wolu makeeni makeenanke gaaccaino. Gawajjaminohu nookkiha ikkirono, makeenu giddonni  fulle doogote uurrinoommo. Mittu manchi makeenisi giddora eꞌnammora woshshinke. Isino gambooshshuwiinni haꞌranni noo rodoonkeeti. Uurrinohu iso calla diꞌꞌikkino. Wolu Siwiidinete dayinohu ontu roduuwino uurrino. Meya roduuwi anenna qaaqqoꞌya rimmi asse hanqafe jawaachishinonke. Gantoommo yee kuloommansaha ikkirono, insa kayinni agurte dihadhinonke. Insa akimootu dagguhu gedensaannino ninkewiinni dibaxxitino; hasiisannonkeri baaluri nootanna teꞌee buuxxino. Tenne qarru yannara Yihowa baxannonketa buunxoommo. Tini, roduuwinkera noonke baxilli lexxanno gedenna Yihowa albinni roore banxeemmonna galanteemmo gede assitinonke.” Roduuwiꞌne kaaꞌlite baxille leellishshinoꞌne yanna qaagginanni?

16. Mimmito lubbora banxeemmota leellinsheemmohu mayiraati?

¹⁶ Mimmito lubbora banxeemmota leellinshummoro afiꞌneemmo atoote hendo. Qarru iillannonsa woyite roduuwanke sheshifachinsheemmo. Maganu manni mereero noo mittimma kaajjitanno gede assineemmo. Yesuusi rosaano ikkinoommota leellinsheemmo; tini suwashshu wodani noonsari halaalu minira dagganno gede assitanno. Baalunkunni roore “maarote Anni, jawaante baalate Magani” Yihowa ayirranno gede assineemmo. (2 Qor. 1:3) Ninke baalunku, roduuwinkera noonke baxilli lexxanno gede assiꞌranna konne baxille leellisha agurroonke.