1. O ā auala ua tatou vaaia ai le leai o se lotoaiga i aso nei?

NA VALOIA i le Tusi Paia o aso e gata ai o le a leai se “lotoaiga” i tagata. (2 Timo. 3:1, 3) Ua tatou vaaia le faataunuuina o lenā valoaga i aso nei. O se faataʻitaʻiga, e faitau miliona aiga ua taapeape ona ua tatala faaipoipoga. O le iʻuga ua faatupuina ai le feitagaʻi i le va o mātua ma lē lagona ai e fanau le alofa faapelepele. E oo lava foʻi i aiga e nonofo faatasi i le fale e tasi ae atonu e lē māfana la latou faiā. Ua faapea mai se faufautua mo aiga, “Ua faaalu uma e tamā, tinā ma le fanau o latou taimi i le faaaogāina o komepiuta, tablet, telefoni ma taaloga vitiō, ma ua leai so latou taimi e fesootaʻi ai o se aiga. E ui e nonofo lenei aiga i le fale e tasi ae e lē iloa lelei e le tasi le isi.”

2-3. (a) E tusa ai ma le Roma 12:10, o ai e tatau ona tatou faaalia i ai le alofa faapelepele? (e) O le ā o le a tatou iloiloina i lenei suʻesuʻega?

² E tatou te lē mananaʻo e taaʻina i tatou i uiga lē alofa o lenei lalolagi. (Roma 12:2) Ae e tatau ona tatou atiaʻe le alofa faapelepele i o tatou tauaiga faapea lo tatou aiga i le faatuatua. (Faitau le Roma 12:10.) O le ā le alofa faapelepele? O se faaupuga patino e faaaogā e faamatala ai le faauōga māfana i va o tauaiga vavalalata. E tatau ona tatou faaalia lenei ituaiga alofa i lo tatou aiga faaleagaga o uso ma tuafafine Kerisiano. Pe a tatou faaalia le alofa faapelepele, o le a tatou saosaolaumea ai i le faatumauina o le autasi, o se vaega tāua o le tapuaʻiga moni.​—Mika 2:12.

 ³ Ina ia fesoasoani iā i tatou e atiaʻe ma faaalia le alofa faapelepele, seʻi o tatou iloiloina faaaʻoaʻoga mai i le Tusi Paia.

4. E faapefea ona fesoasoani le Iakopo 5:11, e tatou te talisapaia ai le loloto o le alofa o Ieova mo i tatou?

⁴ Ua faailoa mai i le Tusi Paia uiga matagofie o Ieova. O se faaaʻoaʻoga ua faapea mai “o le Atua o le alofa lava ia.” (1 Ioa. 4:8) O lenā faaupuga e tatou te tosina atu ai iā te ia. Ae ua taʻua foʻi i le Tusi Paia “e alofa faapelepele” Ieova. (Faitau le Iakopo 5:11.) Maʻeu le māfana o le auala o loo faamatalaina ai le loloto o le alofa o Ieova mo i tatou!

5. E faapefea ona faaalia e Ieova le alofa mutimutivale, ma e faapefea ona tatou faaaʻoaʻo iā te ia?

⁵ Seʻi mātau, o loo faafesootaʻi atu e le Iakopo 5:11 le alofa faapelepele o Ieova i se tasi o ona uiga e tatou te tosina atu ai iā te ia, o lona alofa mutimutivale. (Eso. 34:6) O se tasi o auala e faaalia ai le alofa mutimutivale o Ieova iā i tatou o le faamagalo o a tatou mea sesē. (Sala. 51:1) I le Tusi Paia, e tele mea e aofia ai i le alofa mutimutivale nai lo o le tau ina faamagalo atu. O le alofa mutimutivale, o se faalogona malosi e puna aʻe i totonu o se tasi pe a ia vaaia se tagata ua mafatia ma uunaʻia ai o ia e fesoasoani atu i lenā tagata. O loo faamatala e Ieova le sili atu ona malosi o lona faanaunauga e fesoasoani iā i tatou nai lo o faalogona o se tinā i lana tama. (Isa. 49:15) Pe a tatou mafatia, e uunaʻia Ieova e lona alofa mutimutivale e fesoasoani iā i tatou. (Sala. 37:39; 1 Kori. 10:13) E tatou te faaalia le alofa mutimutivale i o tatou uso ma tuafāfine pe a faamagalo i latou, ma lē teulotoina le ita pe a faatigā mai. (Efe. 4:32) O le isi auala tāua e tatou faaalia ai le alofa mutimutivale, o le fesoasoani lea i o tatou uso ma tuafāfine pe a latou fesagaʻia faafitauli. Pe a uunaʻia i tatou e le alofa e faaalia le alofa mutimutivale i isi, ua tatou faaaʻoaʻo la iā Ieova le faaaʻoaʻoga silisili o le faaalia o le alofa faapelepele.​—Efe. 5:1.

6. Na faapefea ona faaalia e Ionatana ma Tavita le alofa faapelepele o le tasi i le isi?

⁶ O loo iai i le Tusi Paia faaaʻoaʻoga o tagata lē lelei atoatoa na faaalia le alofa faapelepele. Seʻi o tatou iloiloina le faaaʻoaʻoga a Tavita ma Ionatana. Ua faapea mai le Tusi Paia: “Ona pipiimau lea o le loto o Ionatana i le loto o Tavita, ua alofa foʻi Ionatana iā te ia e pei o ia lava.” (1 Samu. 18:1) Na faauuina Tavita e avea ma tupu e sosoo iā Saulo, ae na matuā lotoleaga Saulo iā Tavita ma taumafai e fasioti o ia. Ae e leʻi auai Ionatana le atalii o Saulo i lenei faufauga leaga e fasioti Tavita. Na osia e Ionatana ma Tavita se feagaiga e faatumauina pea le la faigāuō ma fesoasoani le tasi i le isi.​—1 Samu. 20:42.

7. O le ā se mea na ono taofia ai Ionatana ma Tavita i le avea ma uō?

⁷ E matuā mataʻina le alofa faapelepele o Ionatana ma Tavita, pe a mafaufau i mea na ono taofia ai i laʻua mai i le avea ma uō. O se faaaʻoaʻoga, e 30 tausaga e matua ai Ionatana iā Tavita. Na ono faapea ifo Ionatana e lē mafai ona ia faauō iā Tavita ona e laʻitiiti tele ma e leai sona poto masani i le olaga. Ae e leʻi mafaufau faapena Ionatana, na ia matuā faaaloalo iā Tavita.

8. O le ā sou manatu, o le ā na avea ai Ionatana o se uō lelei iā Tavita?

⁸ Na ono lotoleaga Ionatana iā Tavita. Ona o ia o le atalii o le tupu o Saulo, na ono finau mai la Ionatana o ia e tatau ona avea ma tupu e sosoo ai. (1 Samu. 20:31) Ae na lotomaulalo Ionatana ma faamaoni iā Ieova. O lea, na ia lagolagoina atoatoa ai le filifiliga a Ieova e avea Tavita ma tupu e sosoo iā Saulo. Na ia faamaoni foʻi iā Tavita e ui lava na matuā ita ai Saulo iā te ia.​—1 Samu. 20:32-34.

9. Pe na faatautavā Ionatana iā Tavita? Ia faamatala.

⁹ Na alofa faapelepele Ionatana iā Tavita, o lea e leʻi faatautavā o ia iā Tavita. E lelei tele le fanafana aū a Ionatana ma o ia foʻi o se toa lototele. O loo faamatalaina i le Tusi Paia i laʻua ma lona tamā o Saulo e sili atu lo la “saosaoa nai lo o aeto” ma “e sili atu foʻi lo la malolosi nai lo o leona.” (2 Samu. 1:22, 23) O lea, na ono faalialiavale Ionatana ona o mea tetele na ia faia. Peitaʻi, e leʻi faatautavā Ionatana pe lotoleaga foʻi iā Tavita. Ae na maofa Ionatana i le lototele o Tavita ma lona faalagolago iā Ieova. O le mea moni, na amata ona pipii le loto o Ionatana i le loto o Tavita ina ua uma ona fasiotia e Tavita Koliata. E faapefea ona tatou faaalia lenā ituaiga alofa faapelepele i o tatou uso ma tuafāfine?

10. O le ā le uiga o le “matuā alofa o le tasi i le isi mai i le loto”?

¹⁰ Ua taʻu mai i le Tusi Paia iā i tatou ia “matuā alofa le tasi i le isi mai i le loto.” (1 Pete. 1:22) Ua faataatia e Ieova le faaaʻoaʻoga mo i tatou. E matuā malosi le alofa o Ieova mo i tatou, o lea, e lē mafai e se mea ona taofia le alofa o Ieova mo i tatou pe a tatou faamaoni iā te ia. (Roma 8:38, 39) O le upu Eleni ua faaliliu mai ai le upu “matuā” e uiga atu i le aapa atu o se tasi i se mea po o le faia e se tasi o taumafaiga malolosi e faaalia atu le alofa. E iai taimi e ono manaʻomia ai ona tatou “aapa atu” pe “faia ni taumafai malolosi” ina ia faaalia atu ai le alofa faapelepele mo tatou uso ma tuafāfine. Pe a faatigā mai se tasi iā i tatou e tatau  ona “onosaʻi le tasi i le isi i le alofa, ia matuā naunau e tausia le autasi i le agaga i le fusi o le filemu.” (Efe. 4:1-3) Pe a tatou taumafai e faatumauina le “fusi o le filemu,” o le a tatou lē uaʻi atu la i mea sesē a o tatou uso. O le a tatou faia foʻi le mea sili e vaai ai i o tatou uso e pei o le silasila a Ieova.​—1 Samu. 16:7; Sala. 130:3.

11. Aiseā e faigatā ai i nisi taimi ona faaalia le alofa faapelepele?

¹¹ E lē faigofie i taimi uma ona faaalia le alofa faapelepele mo tatou uso ma tuafāfine, aemaise lava pe a tatou iloa o latou masei. O le luʻi lenā na fesagaʻia ma Kerisiano o le uluaʻi senituri. O se faaaʻoaʻoga, o Evotia ma Sunetui, e lē o se luʻi iā i laʻua le galulue faatasi ma Paulo i le tala lelei. Ae o se luʻi mo i laʻua lo la galulue faatasi. O lea, na apoapoaʻi atu ai Paulo iā i laʻua ina ia “tutusa o la manatu i le autasi i le Alii.”​—Fili. 4:2, 3.

12. E faapefea ona tatou atiaʻe le alofa faapelepele mo tatou uso ma tuafāfine?

¹² E faapefea ona tatou atiaʻe le alofa faapelepele mo tatou uso ma tuafāfine i aso nei? Pe a tatou taumafai e iloa lelei o tatou uso ma tuafāfine, e ono faigofie la ona tatou malamalama lelei iā i latou ma atiaʻe le alofa faapelepele mo i latou. E lē tatau ona avea o tatou tausaga ma o tatou tulaga e taofia ai a tatou faauōga. Ia manatua e 30 tausaga e matua ai Ionatana iā Tavita, ae na la atiaʻe lava se faauōga māfana. Pe e mafai ona e faauō atu i se tasi e matua pe laʻitiiti ifo iā te oe? O lou faia o lenā mea e faailoa atu ai lou alofa i le ʻauuso atoa.​—1 Pete. 2:17.

13. Aiseā e tatou te lē ono vavalalata atu ai i tagata uma o le faapotopotoga?

¹³ Po o le faaalia o le alofa faapelepele i uso ma tuafāfine e uiga atu i le iai o sa tatou faauōga vavalalata ma tagata uma o le faapotopotoga? E leai, e lē mafai ona tupu lenā mea. E lē sesē lo tatou mafuta vavalalata atu i isi ona e tutusa mea e tatou te fiafia i ai. Na taʻua e Iesu ona aposetolo o ana “uō” ae na matuā māfana atu o ia iā Ioane. (Ioa. 13:23; 15:15; 20:2) Peitaʻi, e leʻi faaʻauʻau Iesu iā  Ioane. O se faataʻitaʻiga, ina ua talosaga atu Ioane ma lona uso o Iakopo mo so la tulaga faapitoa i le Malo o le Atua, na fetalai atu Iesu iā i laʻua: “Ou te lē filifilia po o ai e nofo i loʻu itu taumatau ma loʻu itu tauagavale.” (Mare. 10:35-40) Ia tatou faaaʻoaʻo iā Iesu, e lē tatau ona tatou faaʻauʻau i a tatou uō vavalalata. (Iako. 2:3, 4) O lo tatou faia o lenā mea o le a tatou faatupu ai fevaevaeaʻiga i le faapotopotoga Kerisiano.​—Iuta 17-19.

14. E tusa ai ma le Filipi 2:3, o le ā e fesoasoani iā i tatou e ʻalofia ai le agaga faatautavā?

¹⁴ Pe a tatou faaalia le alofa faapelepele o le tasi i le isi, ua tatou puipuia ai le faapotopotoga mai i le iai o le agaga faatautavā. E leʻi faatautavā Ionatana iā Tavita ma taumafai e faoa le tulaga tautupu o Tavita. E mafai e i tatou uma ona faaaʻoaʻo i le faaaʻoaʻoga a Ionatana. Ia aua le faatautavā i o tatou uso ma tuafāfine ona o latou tomai ma agavaa, ae ia “lotomaulalo, i le manatu ua sili isi iā te outou.” (Faitau le Filipi 2:3.) Aua neʻi galo, e mafai e uso ma tuafāfine uma ona faia se mea e fesoasoani ai i le faapotopotoga. O le faaalia pea o le lotomaulalo, o le a tatou iloa ai uiga lelei o tatou uso ma tuafāfine ma o le a aogā iā i tatou lo latou faamaoni.​—1 Kori. 12:21-25.

15. O le ā e te aʻoaʻoina mai i le mea na tupu iā Tanya ma lona aiga?

¹⁵ Pe a tutupu faafuaseʻi faafitauli iā i tatou, e faamāfanafanaina e Ieova i tatou e ala i le alofa faapelepele ma gaoioiga alofa a o tatou uso ma tuafāfine. Seʻi mātau se mea na tupu i se aiga na auai i le Aso Toonaʻi i le Tauaofiaga Faavaomalo 2019, “E lē Uma le Alofa!” i le Iunaite Setete. Na taʻua e Tanya o se tinā e toʻatolu ona alo, “A o matou toe foʻi  atu i le faletalimālō na matou nonofo ai, na faafuaseʻi ona oso mai se taavale i le itu o loo matou malaga ai ma soʻa la matou taavale. E leai se isi o i matou na lavea, ae na matou ō i fafo ma le taavale ua matou fefefe ma tutū i le auala. Na talotalo mai se tasi i le isi itu o le auala e matou te ō atu i totonu o lana taavale mo lo matou saogalemu. O se uso o lea faatoʻā foʻi mai i le fonotaga. E toʻalima isi sui usufono mai i Suetena na tutū e fesoasoani iā i matou. Na fusimau i maʻua ma laʻu tama teine e tuafāfine, o se mea na ma manaʻomia tele i lenā taimi. Na ou fai i ai e ō latou e aua le popole iā i matou, ae e latou te leʻi tuua i matou. Na latou i ai pea i inā i le taimi atoa na taunuu ai le taavale a le falemaʻi, ma na latou faamautinoa na matou maua mea uma na manaʻomia. Na matou lagonaina le alofa o Ieova i lenā taimi atoa. O lenei mea na tupu e faamalosia ai lo matou alofa i uso ma tuafāfine ma ua faalolotoina ai lo matou alofa ma le talisapaia o Ieova.” Pe e te manatua le taimi na e manaʻomia ai le fesoasoani ae na faaalia atu e se uso po o se tuafāfine le alofa faapelepele?

16. O ā māfuaaga e tatou te faaalia ai le alofa faapelepele o le tasi i le isi?

¹⁶ Seʻi mafaufau i iʻuga lelei o le alofa faapelepele o le tasi i le isi. E tatou te faamāfanafana i o tatou uso ma tuafāfine i taimi e latou te fesagaʻia ai faafitauli. E tatou te faamalosia le autasi o tagata o le Atua. E tatou te faamaonia atu foʻi o i tatou o soo o Iesu, ma o le a tosina mai ai tagata lotofaamaoni i le tapuaʻiga moni. Ae e sili ai o le a tatou faamamaluina ai “le Tamā o le alofa mutimutivale, ma le Atua o faamāfanafanaga uma” o Ieova. (2 Kori. 1:3) O lea, seʻi faaauau ona tatou atiaʻe ma faaalia le alofa faapelepele!