1. San e sori taki sma na ini furu osofamiri no lobi makandra trutru?

BIJBEL e taki dati na ini den lasti dei, sma no ben o lobi trawan (2 Tim. 3:1, 3). Wi e si taki a profeititori disi e kon tru na ini na ten disi. Milyunmilyun osofamiri prati fu di a papa nanga mama broko trow. Nofo tron, disi e meki taki den ati e bron nanga makandra èn taki den pikin e firi leki den no lobi den. Awinsi den sma e tan na ini wán oso, toku den no sabi makandra bun. Wan sma di e yepi osofamiri di abi problema e taki: „Papa, mama, nanga pikin, no e luku makandra nanga wan ai. Heri dei den de nomo na tapu den computer, tablet, telefon, noso den e plèi video game. Aladi den e tan na ini wán oso, toku den no sabi makandra bun.”

2-3. (a) Gi suma wi musu sori lobi, soleki fa Romesma 12:10 e sori? (b) San wi o leri na ini na artikel disi?

² Wi no wani kon de leki sma fu a grontapu disi di no e sori lobi (Rom. 12:2). Na presi fu dati, wi wani lobi makandra trutru, ma a no na ini na osofamiri wawan, wi wani du dati srefi na ini a Kresten gemeente. (Leisi Romesma 12:10.) Ma fu sortu lobi Bijbel e taki dyaso? Disi na a sortu lobi di e meki taki sma na ini na osofamiri de bun nanga makandra èn taki den e libi leki bun mati fu makandra. Disi na a lobi di wi musu sori tu gi wi Kresten brada nanga sisa di wi musu si leki wi famiri. Te wi e sori a lobi disi, dan wi e yepi makandra fu dini Yehovah leki wán bigi famiri.​—Mika 2:12.

³ Meki wi go luku wan tu eksempre na ini Bijbel di o leri wi fa wi kan sori trutru lobi gi makandra.

4. Fa Yakobus 5:11 e yepi wi fu frustan o furu Yehovah lobi wi?

⁴ Bijbel e fruteri wi sortu moi fasi Yehovah abi. Fu eksempre, a e taki dati „Gado na lobi” (1 Yoh. 4:8). A sani dati wawan e meki kaba taki yu wani tron wan mati fu en. Bijbel e taki tu taki Yehovah „lobi sma trutru”. (Leisi Yakobus 5:11.) Te wi e leisi den sani disi, dan wi e firi o furu Yehovah lobi wi.

5. Fa Yehovah e sori sari-ati èn fa wi kan teki na eksempre fu en?

⁵ Boiti taki Yakobus 5:11 e sori taki Yehovah lobi wi trutru, a e taki tu taki a abi sari-ati. Dati na wan tra moi fasi di e meki taki wi lobi en (Eks. 34:6). Wan fasi fa Yehovah e sori wi sari-ati, na taki a e gi wi pardon fu den fowtu di wi e meki (Ps. 51:1). Te Bijbel e taki fu sari-ati, dan dati no wani taki nomo dati yu e gi wan sma pardon fu di a meki wan fowtu. Wan sma di abi sari-ati e firi gi wan trawan di de na nowtu èn a wani yepi a sma dati. Yehovah e taki dati a firi di a abi fu yepi wi te wi de na nowtu, tranga moro a firi di wan mama abi fu yepi en pikin di de na nowtu (Yes. 49:15). Te wi de na nowtu, dan a sari-ati fu Yehovah e meki taki a yepi wi (Ps. 37:39; 1 Kor. 10:13). Sobun, te wi e gi wi brada nanga sisa pardon èn te wi no e hori den na ati te den du wan sani di wi no lobi, dan na so wi e sori sari-ati gi den (Ef. 4:32). Ma ete wan prenspari fasi fa wi kan sori sari-ati, na te wi e yepi den brada nanga sisa fu wi te den de na nowtu. Te wi e sori sari-ati gi wi brada nanga sisa fu di wi lobi den, dan wi e teki na eksempre fu Yehovah di e sori lobi moro leki iniwan tra sma.​—Ef. 5:1.

6. Fa Yonatan nanga David sori taki den lobi makandra trutru?

⁶ Na ini Bijbel wi e leisi fu sondu sma di ben lobi makandra èn di ben de bun  mati fu makandra. Prakseri na eksempre fu Yonatan nanga David. Bijbel e taki: „Yonatan kon lobi David nanga en heri ati. A kon lobi en leki fa a ben lobi ensrefi” (1 Sam. 18:1). Yehovah ben salfu David fu tron kownu baka Saul. Bakaten, Saul kon dyarusu tapu David èn a pruberi fu kiri en. Ma Yonatan, a manpikin fu Saul, no ben horibaka gi en papa na ini a tori disi. Yonatan nanga David pramisi makandra taki den o tan mati fu ala ten èn taki den o tan horibaka gi makandra.​—1 Sam. 20:42.

7. San na wán sani di ben kan meki taki Yonatan nanga David no tron mati fu makandra?

⁷ A kan fruwondru sma taki Yonatan nanga David ben de bun mati fu makandra, fu di furu sani ben de di ben kan meki taki den no tron mati. Fu eksempre, Yonatan ben owru sowan 30 yari moro David. Yonatan ben kan prakseri taki a no kan tron wan mati fu wan man di yongu moro en èn di no abi so furu ondrofeni leki en. Toku Yonatan no ben prakseri so fu David. Na presi fu dati, a ben abi lespeki gi en.

8. Fu san ede yu denki taki Yonatan ben de so wan bun mati fu David?

⁸ Yonatan ben kan dyarusu tapu David. Leki manpikin fu Kownu Saul, a ben kan feni taki a ben abi a reti fu tron kownu baka di en papa dede (1 Sam. 20:31). Ma Yonatan ben abi sakafasi èn a ben tan gi yesi na Yehovah. Dati meki a horibaka gi a bosroiti di Yehovah ben teki fu poti David leki kownu. A ben e horibaka gi David tu, awinsi disi ben meki taki Saul ati bron nanga en.​—1 Sam. 20:32-34.

9. Fa wi du sabi taki Yonatan no ben e dyarusu tapu David? Fruklari dati.

⁹ Fu di Yonatan ben lobi David trutru, meki a no ben e si David leki en feanti. Yonatan ben sabi sutu nanga bo èn te feti ben de a ben e feti nanga deki-ati. Sma ben taki dati en nanga en papa Saul „ben gaw moro aka” èn den „ben tranga moro lew” (2 Sam. 1:22, 23). Yonatan ben kan meki bigi fu den sani di a du èn fu a deki-ati di a ben abi. Ma Yonatan no ben wani sori taki a bun moro David èn a no ben dyarusu tapu den bun sani di David ben man du. Na presi fu dati, Yonatan ben abi lespeki gi David fu di a ben si taki David ben abi deki-ati èn taki a ben e frutrow tapu Yehovah. Te yu luku en bun, dan na baka di David kiri Goliat, Yonatan kon lobi en leki fa a ben lobi ensrefi. Fa wi kan sori a srefi lobi disi gi wi brada nanga sisa?

10. San a wani taki fu ’lobi makandra nanga wi heri ati’?

¹⁰ Bijbel e taigi wi taki wi musu ’lobi makandra nanga wi heri ati’ (1 Petr. 1:22). Yehovah na wan bun eksempre gi wi na ini a tori disi. A lobi di Yehovah abi gi wi tranga so te, taki solanga wi e tan gi yesi na en, noti no man tapu en fu sori lobi gi wi (Rom. 8:38, 39). Te Bijbel e taki dati wi musu lobi makandra nanga wi heri ati, dan dati e sori taki wi musu du furu muiti fu sori a lobi dati. Son leisi a no makriki fu sori wi brada nanga sisa taki wi lobi den. Ma te sma du sani nanga wi di hati wi, wi musu man frudrage makandra. Wi musu ’libi bun nanga makandra èn wi musu du ala muiti fu tan abi a wánfasi di wi kisi nanga yepi fu a santa yeye’ (Ef. 4:1-3). Te wi e du muiti fu „tan abi wánfasi”, dan wi no o luku  den fowtu fu wi brada nanga sisa nomo, ma wi o du ala muiti fu si brada nanga sisa soleki fa Yehovah e si den.​—1 Sam. 16:7; Ps. 130:3.

11. Fu san ede a kan muilek son leisi fu sori trutru lobi?

¹¹ A no ala ten a makriki fu sori lobi gi wi brada nanga sisa, spesrutu te wi sabi den swakifasi fu den. A sori leki disi ben de wan problema tu gi den fosi Kresten. A no ben muilek gi Eyodia nanga Sentike fu wroko „makandra nanga [Paulus] gi a bun nyunsu”. Ma den tu uma disi no ben man feni en nanga makandra. Dati meki Paulus gi den a deki-ati fu „meki a denki fu den kruderi nanga makandra te den e du a wroko fu Masra”.​—Fil. 4:2, 3.

12. San wi kan du fu tron bun mati fu wi brada nanga sisa èn fu sori den taki wi lobi den trutru?

¹² Fa wi kan sori trutru lobi gi wi brada nanga sisa na ini a ten disi? Te wi e kon sabi wi brada nanga sisa moro bun, dan a e kon moro makriki fu frustan den èn fu lobi den. Wi kan tron mati fu den awinsi wi owru noso yongu moro den, noso awinsi wi kweki tra fasi leki den. No frigiti taki Yonatan ben owru 30 yari moro David. Toku den ben kon tron bun mati fu makandra. Yu kan pruberi fu tron mati nanga wan sma na ini yu gemeente di owru noso yongu moro yu? Te yu e du dati, dan yu e sori taki yu „lobi ala brada”.​—1 Petr. 2:17.

13. Fu san ede a de wan gewoon sani taki a wan sma na ini a gemeente e hari wi moro a tra sma?

¹³ Ma te Bijbel e taki dati wi musu lobi makandra trutru, dan disi wani taki dati wi o de bun mati fu ala sma na ini a gemeente? Nôno, wi no kan fruwakti dati. Na wan gewoon sani taki a wan sma e hari wi moro a tra sma, fu di wi lobi den srefi sani. Yesus ben kari ala den apostel fu en „mati”. Ma a ben de moro bun nanga Yohanes (Yoh. 13:23; 15:15; 20:2). Ma disi no wani taki dati Yesus ben lobi Yohanes moro den trawan. Fu eksempre, di Yohanes nanga en brada Yakobus ben aksi Yesus fu  kisi hei posisi na ini Gado Kownukondre, dan Yesus taigi den: „A no mi musu taki suma kan go sidon na mi reti-anusei noso suma kan go sidon na mi kruktu-anusei” (Mark. 10:35-40). Neleki Yesus, wi wani libi bun nanga ala sma. Wi no wani libi bun nomo nanga den bun mati fu wi (Yak. 2:3, 4). A sani disi kan tyari prati kon èn disi no ben o bun gi a gemeente.​—Yud. 17-19.

14. Fa Filipisma 2:3 kan yepi wi fu no strei nanga makandra?

¹⁴ Te wi e sori lobi, dan wi no o strei nanga tra sma na ini a gemeente. No frigiti taki Yonatan no ben dyarusu tapu David èn a no ben feni taki na en ben musu tron kownu na presi fu David. Wi alamala kan leri wan sani fu Yonatan. No dyarusu tapu yu brada nanga sisa, ma abi sakafasi èn si trawan moro hei leki yusrefi. (Leisi Filipisma 2:3.) Hori na prakseri taki wi alamala man du wan sani di kan yepi a gemeente. Efu wi abi sakafasi, dan wi o man si den bun sani fu den brada nanga sisa fu wi èn wi o man leri fu a bun eksempre fu den.​—1 Kor. 12:21-25.

15. San yu kan leri fu a sani di pasa nanga Tanya nanga en famiri?

¹⁵ Furu tron te wan sani miti wi, wi brada nanga sisa e sori lobi gi wi èn den e yepi wi. Na a fasi dati Yehovah e trowstu wi. Luku san pasa nanga wan osofamiri di ben go na wan fu den „Lobi no e kaba noiti!” Internationaal Kongres di hori na ini Amerkankondre na ini 2019. Na a kaba fu a programa fu satra, den ben e rèi go na oso. Tanya di abi dri pikin e fruteri: „Wi ben e rèi go baka na a hotel fu  wi. Ne wan wagi rèi langalanga kon naki wi. Koloku taki nowan sma kisi mankeri. Wi komoto na ini a wagi èn wi tanapu tapu a strati. Wi no ben man bribi san pasa. Ne wi si wan sma na sei pasi e wai anu gi wi fu kon sidon na ini a wagi fu den. A ben de wan fu den brada fu wi di ben e komoto na a kongres tu. En no ben de a wan-enkri sma di stop. Baka dati, ete feifi sma fu Sweden di ben kon na a kongres tu ben stop gi wi. Den sisa gi mi nanga den umapikin fu mi wan waran brasa, èn na dati wi ben abi fanowdu. Mi taigi den taki den kan gowe èn taki den no abi fu broko den ede nanga wi. Ma den no ben wani libi wi drape. Den tan nanga wi teleki na ambulans kon èn den gi wi ala san wi ben abi fanowdu. A heri pisi ten dati, wi firi taki Yehovah lobi wi. A sani disi meki taki wi kon lobi wi brada nanga sisa moro srefi èn a meki taki wi kon abi moro lobi nanga warderi gi Yehovah tu.” Yu kan memre wan ten di yu ben de na nowtu èn di wan brada noso sisa sori lobi gi yu?

16. Fu san ede wi musu sori taki wi lobi makandra trutru?

¹⁶ Luku fa a switi te wi e sori lobi gi makandra. A lobi disi e meki taki wi e trowstu wi brada nanga sisa te den abi problema. Wi e yepi den fu dini Yehovah nanga prisiri makandra nanga wi. Wi e tyari wisrefi na wan fasi di e sori taki wi na bakaman fu Yesus, èn disi e meki taki reti-ati sma wani dini Yehovah. Èn san moro prenspari, na taki wi e gi grani na Yehovah, „a Tata di abi furu sari-ati, a Gado fu ala trowstu” (2 Kor. 1:3). Meki wi alamala tan sori lobi gi makandra, èn meki a lobi disi kon moro tranga.