1. Akore ty ahatreavagne tie tsy le tea ty saveregna’e o ndatio amy hinane zao?

FA NIREHAFE ty Baiboly miaolo fa “tsy ho tea ty saveregna’e” o ndatio amy ty andro fara’e. (2 Tim. 3:1, 3) Sambe magneke tika fa tanterake amo o androntikagne zao o faminaniagne iohoe. An-tapetrisa’e ohatse ty mpivaly misarake amy izao. Ty voka’e, manjare mifankalaigne iareo, hafara’e tsy misy mpidare ty ana iareo. Misy mpivaly ila’e ka tsy misarake faie tsy tena mifandrambe soa iareo keleian-draike. Hoe ze ndaty mpanoro hevetse o keleiagneo zay: “Tsy mifampirehake ty ndaty keleian-draike amy izao. Ndra aleo iareo mandany ty fotoa iareo amo o oridinaterao eo, ndra amy ty telefony iareo, ndra mihisa jeux. Agnara’e avao iareo tie tragno raike fa tsy mba mifakafantatse soa.”

2-3. a) Naho henteagne ty Romanina 12:10, ia ty toko’e hanehoantika hatea? b) Ino ty hodinehentikagne amy ty lahatsoratse toy ato?

² Tsy teantika ty hanahake ty ndaty amy ty tontolo toy. (Rom. 12:2) Maregne fa toko’e hampitombo ty hateantika o keleiantikagneo tika. Faie tsy ty hateantika iareo avao ro toko’e hampitomboentikagne fa ty hateantika o mpiharo finoagne amantikagneo ka. (Vakio ty Romanina 12:10.) Toko’e ho teantikagne manahake ty babantika naho ty renentika vaho ty rahalahy naho rahavaventika troke raike amantika o rahalahy naho o rahavaventikagne agnivo o fiangonagneo eò. Naho teantika manahake ty keleiantika o mpiharo finoagne amantikagneo, le hiharo saigne o fiangonagneo sady ho fale hanao ty fanompoagne i Jehovah ka.​—Mika 2:12.

³ Ino ty hagnampe antika hanagne o hatea iohoe sady hampiseho izay? Andao tika handineke ty raha azontika ianaragne boake amy i Jehovah naho amy ty mpanompo’e ila’e.

4. Nagnino ty Eksodosy 34:6 ro magnampe antika hahatsapa tie tena koko antika ty Jehovah?

⁴ Maro ty toetse i Jehovah fanjaka rehafe o Baibolio. Rehafe’e ohatse tie “Andrianagnahare hatea” reke. (1 Jaona 4:8) O toetse’e raike iohoe avao, le fa mahavy antika te hiharine aze. Faie rehafe ty Baiboly ka tie “feno hasoa fagnahy miharo hatea” ty Jehovah. (Vakio ty Eksodosy 34:6.) Trea amy io fa koko antika vata’e ty Jehovah. Tsy manohigne ty fontika vao ty mahafantatse izay?

5. Akore ty ampisehoa i Jehovah fa mamindra fo reke, le akore ty azontika anahafagne aze?

⁵ Mareho fa ampifandrambese ty Eksodosy 34:6 amy ty toetse i Jehovah hafa ty hatea’e. Agnisa izay zao ty famindram-po’e. (Jak. 5:11) Mahavy antika hiharine aze ka o toetse’e iohoe. Akore ty ampisehoa i Jehovah fa mamindra fo reke? Naho fa itika ohatse manao raha tsy mete, le mamela heloke antika reke. (Sal. 51:1) Faie naho ty Baiboly ro henteagne, le tsy tihoe mamela heloke avao ty ndaty mamindra fo. Ty anto’e, naho fa managne o toetse iohoe ty ndaty raike, le malahelo naho fa mahatrea ndaty raike mijale. Tsy vita izay avao fa manao raha ka reke mba hagnampeagne i ndatỳ. O reneo zao mitretré ty ana’e. Faie rehafe ty Baiboly fa mbe ambonembone izay ty fitretréza i Jehovah antika. (Isaia 49:15) Noho i Jehovah mamindra fo zay ty mahavy aze hagnampe antika naho fa misy raha manjò antika. (Sal. 37:39; 1 Kor. 10:13) Akore ka ty azontika anoroagne tie mamindra fo tika? Naho fa manao raha mahaboseke antika ohatse o rahalahio naho o rahavaventikagneo, le tsy toko’e hitagne am-po tika. (Efes. 4:32) Misy fomba lahibey hafa ka azontika ampisehoagne izay. Mila magnampe iareo tika naho fa miatreke raha sarotse iareo. Naho ty hatea ty mandrisike antika hamindra fo amy ty ndaty hafa, le atorontika amy izay tie manahake i Jehovah tika, i Andrianagnahare managne hasoa fagnahy miharo hatea tsy misy hoe’ey.​—Efes. 5:1.

6. Nanao akore ty fifandrambesa i Davida naho i Jonatana?

⁶ Maro ty ndaty rehafe ty Baiboly fa tena nimpiragnetse maifitse. Dineho ohatse ty Davida naho i Jonatana. Hoe ty Baiboly: “Nifamitragne amy ty tro i Davida ty tro i Jonatana. Le nikokoa’e manahake ty vata’e ty Davida.” (1 Sam. 18:1) Ino zao ty raha niseho naho fa tinendre i Jehovah ho mpanjaka handimbe i Saoly ty Davida? Nanjare nialogne i Davida ty Saoly naho fa tafara tatoy sady nitea’e hovonoegne ka ty Davida. Faie tsy nanohagne ze heven-drae’e zay ty Jonatana. Nanao fifagnekeagne aza ty Davida naho i Jonatana tie ho mpiragnetse naho hifanohagne avao iareo.​—1 Sam. 20:42.

7. Ino ty raha raike va’e ho nikalagne i Jonatana naho i Davida tsy ho mpiragnetse?

⁷ Maro ty raha va’e ho nahavy i Jonatana naho i Davida tsy ho nimpiragnetse maifitse. Faie mahalatsa fa tsy nahakalagne iareo zay. Ino iaby ohatse ty raha va’e ho nikalagne iareo? Ty tao iareo. Ty anto’e, zoke i Davida 30 taogne ty Jonatana. Afake nieretseretse areke ty Jonatana tie: ‘Ino ty hiragnetako amy ty ndaty zaiko lavitse hoe itiagne sady ie amy izao mbe tsy za-draha!’ Faie tsy nanao izay reke fa tena nagnaja i Davida avao.

8. Ino ty toetse nanagna i Jonatana, le nahavy aze ho tena ragnetse soa hoahy i Davida?

⁸ Azo i Jonatana natao ka ty nialogne i Davida. Fa nagnino? Naho ty toko’e ho ie, le ireke ty toko’e ho mpanjaka handimbe i Saoly. Ty anto’e, ie ty ana-dahy i Saoly voaloha’e. (1 Sam. 20:31) Faie naho fa i Davida ro tinendre i Jehovah ho mpanjaka handimbe an-drae’e, le tena nanohagne i Davida tamy ty fo’e reke. Trea amy izay fa ndaty niambane ty Jonatana sady tsy nivalike tamy i Jehovah. Tsy nivalike tamy i Davida ka reke, ndra tie nahavy i Saoly ho boseke ama’e aza zay.​—1 Sam. 20:32-34.

9. Nialogne i Davida vao ty Jonatana?

⁹ Ino ty nahavy i Jonatana tsy nialogne i Davida? Tena nitea’e ty Davida. Tena nahay folesidoro naho mpialy mahery fo ty Jonatana. Iareo aman-drae’e aza rehafe o ndatio tie “mahalay ambone o voromaherio” naho “mahery ambone o lionao.” (2 Sam. 1:22, 23) Azo i Jonatana natao areke ty nirehareha. Faie tsy nanao izay reke. Tsy mba nifaninagne tamy i Davida zao reke ndra nialogne i Davida noho ty raha soa natao’e. Noho i Davida bey herim-po naho natoky i Jehovah aza ty nandrisike aze ho tea i Davida. Tena maregne zay, satria tafara ty namonoa i Davida i Goliata ro nanomboke nitea i Jonatana ty Davida. Akore areke ty ampisehoantika fa teantika o rahalahio naho o rahavaventikagneo?

10. Ino ty dika tihoe “mifankatea amy ty fo”?

¹⁰ Mandrisike antika mba ‘hifankatea amy ty fo’ ty Baiboly. (1 Pet. 1:22) Magnomey modely antika amy izay ty Jehovah. Mitombo ty hatea i Jehovah antika naho fa tsy mivalike ama’e ohatse tika. Ty voka’e, “tsy hisy hahasarake antikagne amy ty hatea’e.” (Rom. 8:38, 39) Aseho o rehake amy i Petera ao iohoe fa mila mikezake mafe ty ndaty raike vaho hahavita haneho hatea. Itika ka mahatsapa fa tsy mora ty maneho hatea o mpiharo finoagne amantikagneo kindraike. Naho fa manao raha mahaboseke antika ohatse ty ndaty hafa, le ino ty raha toko’e hataontika? Toko’e hikezake avao tika mba ‘hahantate izay aman-katea, sady hikezake mafe hitagne ty maha raike ty fagnahy agnate ty filongoagne, i fehe mampiharo raikey.’ (Efes. 4:1-3) Naho itika mikezake mafe milongo soa avao amo o rahalahy  naho o rahavaventikagneo, le tsy hifantoke amy ty hadisoagne atao iareo. Trea amy izay ka fa mikezake mafe tika mba hanahake ty fivazohoa i Jehovah o mpiara-manompo amantikagneo ty fiheverantika iareo.​—1 Sam. 16:7; Sal. 130:3.

11. Nagnino ro tsy mora ty maneho hatea kindraike?

¹¹ Magneke tika iaby tie tsy mora ty maneho hatea o rahalahio naho o rahavaveo kindraike, lohotsie naho mifantoke amy ty hadisoa iareo tika. Hoe nanagne ze olagne zay ka ty Kristiana tamy ty taonjato voaloha’e. Nilamigne soa avao zao ty Eodia naho i Syntike tamy iareo ‘niara-niasa mafe tamy i Paoly tamy i fitoriagne i talily soaỳ.’ Faie nisy raha tsy nampifagnarake iareo mirahavave, le izay ty nahavy i Paoly nandrisike iareo mba ‘hiharo saigne amy i tompo ao.’​—Fil. 4:2, 3.

12. Ino ty hagnampe antika hifandrambe marine amo o rahalahio naho o rahavaveo?

¹² Ino ty hagnampe antika hifandrambe maifitse amo o rahalahio naho o rahavaveo? Mila mahafantatse soa iareo tika. Ty anto’e, izay ty hagnampe antika hahatakatse ty raha mahazo iareo naho tea iareo. Afake miragnetse amy iareo avao tika ndra tie tsy mitovy aza ty taontika naho ty kolotsaintika. Ko haligno fa zoke i Davida 30 taogne ty Jonatana faie le tena nimpiragnetse soa avao iareo. Ia zao ty ndaty mbe zai’o ndra fa zoke’o agnivo ty fiangonagne misy anareo eo azo’o iragnetagne? Naho miragnetse amy ze ndaty zay rehe, le mampiseho tie ‘tea’o iaby ty rahalahy amy ty finoagne ao.’​—1 Pet. 2:17.

13. Ho vitantika vao ty hifandrambe maifitse amy ty ndaty iaby agnivo o fiangonagneo eo?

¹³ Faie midika vao zay tie hifandrambe marine amantika iaby ze ndaty agnivo o fiangonagneo eo? Aha’a, tsy izay. Tsy ho vitantikagne ka zay. Ara-dalàna naho tena mifandrambe marine amantika ty ndaty ila’e naho oharegne amy ty ndaty hafa. Ty anto’e, mitovy raha teagne amy iareo tika. Nitokave i Jesosy tihoe ‘nama’e’ iaby ohatse i apostoli’e rey. Faie i Jaona ro “tena naifitse” aze. (Jaona 13:23; 15:15; 20:2) Faie ndra tie teo zay, le tsy tihoe niambake tamy ty fomba  nindesa’e i mpiana’e maroy ty fomba nindesa’e i Jaona. Naho fa nangatake tamy i Jesosy ohatse ty Jaona naho i Jakoba rahalahi’e tie meo toeragne miambake zahay naho fa amy i Fanjakàn’Andrianagnaharey ao, le hoe reke tamy iareo: “Ty hipetrake ankavanako naho ankaviako eo, le tsy anjarako ty magnomey izay.” (Mar 10:35-40) Manahake i Jesosy tika naho tsy indesentikagne amy ty fomba miambake ty ragnentika maifitse antika. (Jak. 2:3, 4) Naho itika manao izay, le tsy hiharo saigne o fiangonagneo.​—Joda 17-19.

14. Nagnino ty Filipianina 2:3 ro magnampe antika tsy hifaninagne amo o mpiara-manompo amantikagneo?

¹⁴ Naho itika managne hatea, le tsy hifaninagne amo o mpiharo finoagne amantikagneo. Ko haligno fa tsy nialogne i Davida ty Jonatana sady tsy nifaninagne tama’e ka reke. Azontika atao ka ty manahake i Jonatana. Amy ty fomba akore? Tsy toko’e hialogne o mpiara-manompo amantikagneo tika. Toko’e ‘hiambane avao tika, le hihevetse ty hafa ho ambone noho ty tegnantika.’ (Vakio ty Filipianina 2:3.) Ko haligno ka fa sambe afake manao raha tika tsikiraidraike mba hagnampeagne o fiangonagneo. Naho miambane avao tika, le hahatrea ty toetse soa o rahalahy naho o rahavaventikagneo, sady hitsikombe ze toetse soa iareo zay.​—1 Kor. 12:21-25.

15. Ino ty raha ianara’o boake amy i Tanya naho i keleia’ey?

¹⁵ Aseho i Jehovah tie tena tea antika reke naho fa itika miatreke raha sarotse. Risihe’e ohatse o mpiara-manompo amantikagneo mba hagnampe antika. Nisy keleiagne raike zay nagnatreke Havoriambey Iraisam-pirenena manao tihoe “Tsy ho Levogne Nainai’e ty Hatea” ta Etazonia agne tamy 2019. Ie naho fa  noly iareo naho fa nitapetse i fandaharagne tamy Sabotsỳ, le nisy tobile zay nidosy i tobile iareoy. Le hoe ty Tanya: “Tsy nagnahy iaby avao zahay. Faie tena nitampoke anay i rahay. Niakatse boake agnate i tobile’aỳ ao zahay, le nitsangagne tan-dalagne teo. Nisy ndaty raike amy izay nijanogne, le nitoka anay mba hizilike agnate tobile’e ao. Kay reke rahalahy sady nagnatreke havoriambey niarake ama’ay, faie fa handeha holy ka. Faie nisy rahalahy naho rahavave dime boake a Soeda tagne ka nijanogne tama’ay teo. Le namihigne ahy naho i anak’ampelakoy i rahavave rey. Tena nilae’ay zay. Nirehake tamy iareo raho tie ao fa tsy raha magnahy avao zahay, faie tsy nimete nandeha iareo. Nijanogne tama’ay teo avao iareo amparake ty niavia i dokotera vonje meke rey hikarakara anay. Tsy nandeha iareo naho tsy le niazo iareo antoke tie nilamigne iaby ze raha nilae’ay. Tsapa’ay tamy i raha sarotse nanjò anay igne fa tena tea anay ty Jehovah. Nampitombo ty hatea’ay o rahalahio naho o rahavaveo ka igne sady nahavy anay hankasitrake naho hampitombo ty hatea’ay i Jehovah ka.” Tsiaro’o vao tie ombia rehe ro niatreke raha sarotse, le nisy rahalahy naho rahavave naneho hatea tama’o tamy izay?

16. Nagnino tika ro toko’e haneho hatea amy ty ndaty hafa?

¹⁶ Ino iaby ty ho voka’e naho maneho hatea amy ty ndaty hafa tika? Naho fa misy raha sarotse manjò o rahalahio naho o rahavaveo, le hagnampe iareo tika. Hahazo fampaherezagne iareo naho manao izay tika. Ho fale iareo naho fa manompo i Jehovah sady hiharo saigne o fiangonagneo. Trea amy izay ka tie mpiana i Jesosy vata’e tika. Ty voka’e, hanjare te hanompo i Jehovah ze ndaty managne toe-po soa. Fa ty tena lahibey le tihoe, mampifale i Jehovah, i “Rae ty fitretrézagne naho Andrianagnahare ze kila fampionognagney” tika naho manao izay. (2 Kor. 1:3) Lonike areke tika iaby mba sambe ho tapa-kevetse hampitombo naho hampiseho ty hatea anagnantikagne!