1. Ginani gi yeyedzago gu khigyo omu nya dzindranga nya dzingi muhuno gu mwalo lihaladzo?

BHIBHILIYA yi profetide gu khiyo matshiguni nyo hegise gu na ba guri ni vathu “nyambana lihaladzo.” (2 Thim. 3:1, 3) Hi ngu wona giprofeto gegi na gi gu tadzisega muhuno. Khu giyeyedzo, vavelegi nya vangi va ngu tshula mitshadho va bwe va vegeyana giviti nigu isoso sa gu gira gu sanana sawe si dzipwa na si si haladzwi. Vathu va ndranga mweyo si nga gira gu va si khali dzipari. Singalagadzi moyo nya nyamayi wari khuye: “Mamayi, papayi ni sanana, va mwalo tepo nyo bhule vatshavbo kholu va gu vbedza tepo nya yingi avba nya dzikomputadhori dzawe, dzithabhileti, dzitelefoni mwendro gu jogari dzivhidhiyu ghemi. Ambari olu va vbanyago ndranga mweyo avo kha va tivani gwadi.”

2-3. a) Guya khu Varoma 12:10, hi yede gu yeyedza lihaladzo nya wundruye ga va mani? b) Hi na bhula ku ginani avba nya ndrima yeyi?

² Ethu kha hi vbweti gu landriseya mavbanyelo nya litigo leli nya mba na lihaladzo. (Rom. 12:2) Wulangani nya isoso, ethu gu vbwetega hi hevbuleya gu haladza sivbango nya ndranga yathu hi bwe hi haladza vandriyathu libandlani. (Leri Varoma 12:10.) Ginani lihaladzo nya wundruye? Lihaladzo eli sivbango nya ndranga si yeyedzanago. Ilolo khilo lihaladzo hi yedego gu li yeyedza ga vandriyathu libandlani. Ha gu yeyedza lihaladzo nya wundruye hi na phasa vatshavbo gu thumeya Jehovha na va tsakide. — Mik. 2:12.

³ Gasi hi si kodza gu yeyedza lihaladzo nya wundruye, hongoleni hi wona esi hi si hevbulago avba nya siyeyedzo nya Bhibhiliya.

4. Ginani esi Jakobe 5:11 a hi embeyago maningano ni lihaladzo la Jehovha?

⁴ Bhibhiliya yi ngu hi embeya makhalelo nyo mbure ya Jehovha.  Khu giyeyedzo, iyo yari khiyo “Nungungulu lihaladzo.” (1 Joh. 4:8) Tepo hi hevbulago maningano ni Jehovha sa gu hi gira hi vbweta gu khala dzipari dzaye. Ganiolu, Bhibhiliya yi ngu ganeya gambe gu khiyo “tade khu wuwadi.” (Leri Jakobe 5:11.) Esi sa gu yeyedza edzi Jehovha a hi haladzago khidzo.

5. Jehovha a gu yeyedza kharini wuhindzi nigu hi nga mu pimedzeya kharini?

⁵ Wona gu khuwe Jakobe 5:11 a gu pwananisa wuwadi wa Jehovha ni limbe likhalelo li hi girago hi hidzimeya gwaye, a gu wuhindzi. (Ekiso. 34:6) Mweyo nya dzindziya eyi Jehovha a hi yeyedzago khiyo wuhindzi waye khu gu hi divaleya sighoho sathu. (Ndzi. 51:1) Omu nya Bhibhiliya, wuhindzi wa gupata silo nya singi gu vbindra basi gu divaleya muthu nyo khaguri a nga hi ghoheya. Wuhindzi wa gu thula gambe gu garadzega ogu muthu a gupwago a gu wona mumbe muthu na gu tshaniseka, khu kharato, a kutsega gu mu phasa. Jehovha a gu ganeya gu khuye, gu dogoreya ogu a gu nago nya gu hi phase, gukhongolo ngudzu gu vbindra ogu mamayi a gu nago khu gyanana gyaye. (Isa. 49:15) Tepo hi garadzegago, wuhindzi wa Jehovha wa gu mu kutsa gu hi phasa. (Ndzi. 37:39; 1 Kor. 10:13) Hi nga yeyedza wuhindzi ga vandriyathu khu gu hi va divaleya tepo va hi ghoheyago hi bwe hi si va vegeyi giviti va gu tshuka va hi gandra ginyalana. (Efes. 4:32) Yimbe ndziya nya lisima hi nga yeyedzago khiyo wuhindzi ga vandriyathu khu gu va phasa tepo va emisanago ni sigaradzo. Tepo lihaladzo li hi kutsago gu yeyedza wuhindzi vambe, ha gu pimedzeya Jehovha, oyu a yeyedzago wuwadi vathu. — Efes. 5:1.

6. Jonatane ni Dhavhidhe va yeyedzanide kharini lihaladzo nya wundruye?

⁶ Bhibhiliya yi ngu ganeya khu vathu nya mba vbeleya va yeyedzidego lihaladzo nya wundruye. Wona giyeyedzo gya Jonatane ni Dhavhidhe. Bhibhiliya yari khiyo: “Jonatane a di manega na gu gola ngudzu Dhavhidhe; Jonatane a di gola Dhavhidhe kha nga idzo a  dzi golago khidzo wurumba waye.” (1 Sam. 18:1) Jehovha a di hathide Dhavhidhe gasi gu a khala pfhumu hwane ga Sawule. Hwane nya isoso, Sawule a di pweya lidiwo Dhavhidhe a bwe a zama gu mu songa. Ganiolu, Jonatane gyanana gya Sawule kha phasedzeya papayi waye tepo a nga zama gu songa Dhavhidhe. Jonatane ni Dhavhidhe va di tumbisana gu simama na vari dzipari ni gu seketeyana dzitepo dzatshavbo. —  1 Sam. 20:42.

7. Ginani adzina gi nga hadzi gira gu Jonatane ni Dhavhidhe va si khali dzipari?

⁷ Si ngu samadzisa gu ba Jonatane ni Dhavhidhe va khade dzipari kholu gu diri ni silo nya singi si nga hadzi tandregisa wupari wawe. Khu giyeyedzo, Jonatane a di gu vbindra Dhavhidhe khu 30 myaga. Jonatane a dzina na pimiside gu khuye kha na nga thanga wupari ni gyanana nya gidugwana gi gu mwalo ni matshangu nya gu vbanye. Ganiolu, Jonatane kha pimisa khu ndziya yoyo, uye a di gu ninga githawo Dhavhidhe.

8. Ina Jonatane a diri pari nya yadi ga Dhavhidhe?

⁸ Jonatane adzina na pwede lidiwo Dhavhidhe. Kha nga gyanana gya Pfhumu Sawule, Jonatane adzina na gurumedzide gu khuye, khuye a yedego gu khala pfhumu yi landreyago. (1 Sam. 20:31) Ganiolu, Jonatane a di gu dzinogisa nigu a di gu tumbega ga Jehovha. Khu kharato, uye a di seketeya esi Jehovha a hungidego, a gu gu hatha Dhavhidhe kha nga pfhumu yi landreyago. Uye a tumbegide gambe ga Dhavhidhe, ambari olu isoso si nga ba si gorosa Sawule. — 1 Sam. 20:32-34.

9. Ha gu dziti kharini gu khethu Jonatane a di si pweyi lidiwo Dhavhidhe? Tshamuseya.

⁹ Jonatane a di gu haladza Dhavhidhe, khu kharato, uye kha nga ba a mu pweya lidiwo. Jonatane a di gu tiya hwambo, dwanide dzinyimbi nya dzingi nigu a di gu kodza gu thumisa gwadi wulaho ni litshari. Vathu va di khavo uye ni papayi waye “va di gu vbuvba gu vbindra maghama, ni tshivba gu vbindra dzingala.” (2 Sam. 1:22, 23) Khu kharato, Jonatane adzina na dzikhusedzide khesi a giridego. Ganiolu, Jonatane kha zama gu palisana ni Dhavhidhe nigu kha pweya lidiwo Dhavhidhe khu silo nya sadi a nga ba a gira. Gu hambana ni isoso, Jonatane a di gu samadziswa khu gu tiya hwambo ga Dhavhidhe ni gu tumba a nga ba ari nago ga Jehovha. Khu giyeyedzo, hwane nya gu ba Dhavhidhe a songide Gholiya, Jonatane a di pheya gu haladza ngudzu Dhavhidhe. Hi nga yeyedza kharini gu khethu hi ngu haladza ngudzu vandriyathu nya nga edzi Jonatane a haladzidego khidzo Dhavhidhe?

10. Malito ma gu khayo “haladzanani khu gyanu khu myonyo yanu yatshavbo”, ma gu thula ginani?

¹⁰ Bhibhiliya ya gu hi embeya gu khiyo, “haladzanani khu gyanu khu myonyo yanu yatshavbo.” (1 Ped. 1:22) Jehovha a hi vegede giyeyedzo. Lihaladzo laye likhongolo ngudzu nigu ha gu tumbega gwaye uye gima kha na nga diga gu hi haladza. (Rom. 8:38, 39) Lito “khu myonyo yanu yatshavbo” la gu ganeya khu muthu nyo khaguri a dzi garadzago ngudzu gasi gu yeyedza lihaladzo. Dzimbe dzitepo si nga hi garadzeya gu yeyedza lihaladzo vandriyathu. Ambari vambe va gu tshuka va hi gandra ginyalana hi yede gu simama ‘gu yeyedzana lihaladzo vbakari gwathu. Hi dzigaradza gu sayisa wuhengeyi hi ningwago khu Liphuvbo nya Guage, hi vbanya khu gurula vbakari gwathu.’ (Efes. 4:1-3) Ha gu dzigaradzeya gu sayisa gurula ni vandriyathu kha hi na nga vega gupima avba nya sihoso sawe. Hi na dzigaradzeya gu wona vandriyathu kha nga  edzi Jehovha a va wonago khidzo. — 1 Sam. 16:7; Ndzi. 130:3.

11. Khu ginani dzimbe dzitepo si nga garadzago gu haguleya lihaladzo nya wundruye?

¹¹ Khandri tepo yatshavbo si vbevbugago gu yeyedza lihaladzo nya wundruye ga vandriyathu ngudzungudzu ha gu ba hiti sihosohoswana sawe. Gigaradzo gegi, khatsi khigyo gya gimwegyo gi dugeledego maKristo nya lizana myaga nyo pheye. Khu giyeyedzo, Evhodhiya ni Sintiki si di gu gira khatsi si ngu va gimbileya gwadi tepo va nga ba va thuma “gomogo ni [Pawulo] thumoni nya gutivise Mahungu nya Yadi.” Ganiolu, khu kotani nya sighelo nyo khaguri si va garadzede gu vbanyisana gwadi. Khu kharato, Pawulo a di va gengedza gu khuye va di yede gu vbanya “khu gupwanana kha nga edzi a golago khidzo Pfhumu.”— Filp. 4:2, 3.

12. Hi nga haguleya kharini gu yeyedza lihaladzo nya wundruye ga vandriyathu?

¹² Hi nga haguleya kharini gu yeyedza lihaladzo nya wundruye ga vandriyathu muhuno? Tepo hi yago hi vati gwadi vandriyathu si na hi vbevbugeya gu va pwisisa hi bwe hi haguleya gu va yeyedza lihaladzo nya wundruye. Hi nga gira wupari ni vandriyathu ambari ha gu ba hi hambanide khu tanga mwendro tumbunugo. Dundruga gu khuwe Jonatane a di gu vbindra Dhavhidhe khu 30 myaga, ambari ulolo, avo va diri dzipari nya dzikhongolo ngudzu. Ina libandlani gwago womo muthu a gu khongolo gwago mwendro a gu dugwana u nga girago wupari naye? Wa gu gira wupari navo u na yeyedza gu khuwe u ngu ‘haladza vandriyago nya gukhodwe.’ — 1 Ped. 2:17.

13. Khu ginani adzina hi nga khalago dzipari nya vandriyathu nyo khaguri libandlani gu vbindra vambe?

¹³ Gu yeyedza lihaladzo nya wundruye ga vandriyathu ina so thula gu khiso hi na gira wupari ni wevbini libandlani? Ahihi, isoso kha si kodzegi. Si olovelegide gu hi gira wupari ni vathu nyo khaguri gu vbindra vambe kholu hi pwanago avba nya silo nyo khaguri. Jesu ranide vatshavbo vapostoli vaye gu khuye “dzipari”, ganiolu, uye a diri pari nya yikhongolo ya Johane. (Joh. 13:23; 15:15; 20:2) Ambari ulolo, Jesu a di si phari Johane khu ndziya nyo hathege ngudzu guvbindra  vambe. Khu giyeyedzo, tepo Johane ni ndriyaye Jakobe va nga lomba Jesu gu khavo a va ninga sikhalo nyo hathege avba nya Mufumo wa Nungungulu, uye a di va embeya gu khuye: “Gu khala nyamudye mwendro nyambade gwangu kha si tidwi kheni.” (Marko 10:35-40) Gu fana ni Jesu, kha hi yeli gu phara dzipari dzathu khu ndziya nyo hathege ngudzu gu vbindra vambe. (Jak. 2:3, 4) Kholu ha gu phara dzipari dzathu khu ndziya nyo hathege ngudzu gu vbindra vambe kha hi na nga phasa libandla gu manega ni gurula. — Judha 17-19.

14. Guya khu Vafilipi 2:3, ginani gi na hi phasago gu potsa mapalisana?

¹⁴ Ha gu yeyedzana lihaladzo nya wundruye kha hi na nga zama gu palisana ni vambe libandlani. Dundruga gu khuwe Jonatane kha nga ba a pweya lidiwo Dhavhidhe ni gu uye kha nga zama gu dzegeya gikhalo nya wufumu Dhavhidhe. Hatshavbo hi yede gu dzegeleya giyeyedzo gya Jonatane. Kha hi yeli gu pweya lidiwo vandriyathu khu kotani nya makodzelo yawe nyo gire silo, ganiolu, “khu gu dzi sodzisa, [hi yede gu] dzi gira va nyalidede ga vathu vatshavbo.” (Leri Vafilipi 2:3.) Dundruga gu khuwe hatshavbo hi nga gira gilo nyo khaguri gasi gu phasa libandla. Ha gu simama hi dzinogisa, hi na wona makhalelo nya yadi ya vandriyathu hi bwe hi phasega khu giyeyedzo gyawe nya gu tumbege. — 1 Vakorinto 12:21-25.

15. Ginani u gi hevbulago khesi si dugeledego Tanya ni ndranga yaye?

¹⁵ Tepo hi tshanganago ni sigaradzo nyo khaguri guvbanyani gwathu, Jehovha a ngu hi thaveleya khu gu thumisa lihaladzo nya wundruye a bwe a hi ninga giphaso hi gi vbwetago khu gu thumisa vandriyathu. Wona esi si dugeledego ndranga mweyo hwane nyo wone  tshangano nyo hathege wu giregidego Estados Unidos khu 2019 wu nga ba wuri ni hungo nya mahungu wu gu khuwo: “Lihaladzo gima kha livbeyi!” Tepo Tanya ni sanana saye va nga ba va bweleya hotel khu sabhadho, movha nyo khaguri yi di ta veta movha yawe. Tanya wari khuye: “Mwalo a nga bayiswa, ganiolu, hi di duga, movha yi tshala muestradhani. Ndriyathu moyo a nga ba ari nuye tshanganotunu a di hi rana gasi hi beya movhani gwaye nigu khandruye basi a nga ema. 5 vandriyathu va Suécia va nga ba vari navo tshanganotunu va di ema. Vandriyathu nya vanyamayi va di nyi barasar eni ni gyanana gyangu nya gyadzyana nigu isoso si hi giride hi dzipwa gwadi. Eni nyi di embeya vandriyathu gu kheni hi vadi, ganiolu, avo kha va dzumeya gu hi tshiya honga. Avo va di simama ni ethu ambari tepo gu nga vboha vadhogodheya nigu va di gu vbweta gu tiyisega gu khavo hi na ni satshavbo hi si vbwetago gani. Ndrani nya tepo yeyi nyo garadze hi pwide lihaladzo la Jehovha. Esi si giregidego si tiyiside lihaladzo lathu khu vandriyathu si bwe si engedzeya gu bonga gwathu ni lihaladzo lathu khu Jehovha. Ina u ngu dundruga khu tepo nyo khaguri u nga vbweta giphaso, khu kharato ndriyathu a gu yeyedza lihaladzo nya wundruye?

16. Sighelo muni hi gu naso nya gu yeyedze vambe lihaladzo nya wundruye?

¹⁶ Hongoleni hi bhula khu mihandro hi yi manago khu gu yeyeda lihaladzo nya wundruye. Hi ngu tiyisa vandriyathu tepo va tshanganago ni sigaradzo. Hi ngu phasa vandriyathu gu thumeya hatshavbo Jehovha na hi tsakide. Hi ngu yeyedza gu khethu hi vapizane va Jesu nigu esi si ngu gira gu vathu va vbweta gu thumeya Jehovha. Nya lisima ga satshavbo khu gu ha gu rungudza Jehovha “Babe nya wuhindzi [ni] Nungungulu nya guthavelele gwatshavbo.” (2 Kor. 1:3) Hatshavbo gu vbwetega hi dziemiseya gu simama gu yeyedza lihaladzo nya wundruye.