1. Niinzi chitondeezya kuti bantu tabachikwe luyando pe mazubaano?

BBAYIBBELE lyakaamba kuti kumazuba aakumamanino bantu tabachinoolikwe “luyando lwakuzyalwa andulo.” (2 Tim. 3:1, 3) Bupolofita oobu bulookuzuzikizigwa mazubaano. Muchikozyano, bantu biingi bakwetene balikulekana mazubaano. Eezi zipa kuti bakkale kabazondana akuti bana balimvwe kabatayandwi pe. Alubo bamwi bantu bamumpuli bakkala amwi pesi tabayandani pe. Umwi sikupa lulayo mumpuli wakati: “Mwaalumi amwanakazi wakwe abana babo tabajani chiindi chakwaambuula pe. Umwi awumwi nga ulikuchita zyakwe aakkompiyuta, tebbuleti, fooni naakuti kusaana mavidiyo geemu.” Alubo wakayungizya kuti, “nikuba kuti bantu aaba bakkala aamwi pesi nga tabazibene kabotu pe.”

2-3. (a) Kweendelana alugwalo lwa Baroma 12:10, mbaani mbitweelede kuyanda kapati? (b) Tulalanga-langaanzi muchiiyo eechi?

² Tatweelede kutobelezya bantu bali munyika batakwe luyando. (Rom. 12:2) Tweelede kutondeezya luyando kutali kubantu bamumpuli zyesu luzutu pesi akubakombima. (Bala Baroma 12:10.) Chaambaanzi kuyandana kapati? Chaamba kuyandana mbuli mbubachita bantu bamumpuli iimwi. Oolu nduluyando ndutweelede kubaalo kubakwesu abachizi. Kuti twayandana munzila iili boobo ziyoopa kuti tubelekele Jehova katujisini.—Mik. 2:12.

³ Kuti tukonzye kuyandana kapati, atubone nzitukonzya kwiiya kuzwa kuzikozyano zijanika muBbayibbele.

4. Lugwalo lwa Jakobo 5:11 lutugwasya biyeni kubona kuti Jehova ulatuyanda kapati?

⁴ Bbayibbele litubuzya buntu bubotu mbwalaabo Jehova. Muchikozyano, lyaamba kuti “Leza nduyando.” (1 Joh. 4:8.) Kuziba eezi kupa kuti tuswene aafwiifwi anguwe. Alubo Bbayibbele lyaamba kuti Jehova “ulaalubomba kapati.” (Bala Jakobo 5:11.) Eezi zitondeezya kuti Jehova ulatuyanda kapati.

5. Jehova utufwida biyeni luse alubo nga tulamutobelezya biyeni?

⁵ Lugwalo lwa Jakobo 5:11 lwaamba kuti Jehova ulaalubomba aluse. Luse andulo lupa kuti tuswene aafwiifwi anguwe. (Kul. 34:6) Imwi nzila Jehova njatufwida aayo luse nkutulekelela milandu yesu. (Int. 51:1) Pesi kufwida luse kwaamba zyiingi kutali kulekelela luzutu. Luse ninzila muntu njamvwaayo kuti wabona umwi kali mumapenzi, iimutuma kuti ayande kumugwasya. Bbayibbele lipandulula kuti chiyandisyo chakutugwasya Jehova nchalaacho chiinda mbalimvwa mwanakazi kumwanaakwe. (Is. 49:15) Kuti twaswaanana amapenzi, luse lwaJehova lupa kuti ayande kutugwasya. (Int. 37:39; 1 Kor. 10:13) Tulakonzya kubafwida luse bakwesu abachizi kwiinda mukubalekelela amoyo woonse kuti batubisizya. (Ef. 4:32) Pesi imwi nzila iiyandikana mbutukonzya kubafwida luse bakombima nkubagwasya chiindi nibali mumapenzi. Kuti twabafwida luse bakombima, tunootobelezya Jehova, chikozyano chiinda zyoonse chakutondeezya luyando kapati.—Ef. 5:1.

6. Jonatani aDavida bakatondeezya biyeni kuti bakali kuyandana kapati?

⁶ MuBbayibbele muli zikozyano zyabantu bakayandana kapati nikuba kuti bakali aachibi. Atubone chikozyano chaJonatani aDavida. Bbayibbele lyaamba kuti: “Jonatani a Davida bakamvwana kapati, eelyo Jonatani wakatalika kumuyanda Davida mbubonya mbwaliyanda  mwini.” (1 Sam. 18:1) Jehova wakasala Davida kuti azoobe mwaami nikwazozwa Sawulu. Sawulu wakamunyemena Davida zyakuti wakeezya kumujeya. Pesi Jonatani taakwe naakagwasizya wisi kuti ajaye Davida. Jonatani aDavida bakasyomezyania kuti bakali kuyoozumanana kuyandana akugwasyania.—1 Sam. 20:42.

7. Nkaakali kaambo kakali kukonzya kupa kuti Jonatani aDavida batamvwanani?

⁷ Kuyandana kwaJonatani aDavida kulagambya, kuti twalanga zintu zyakali kukonzya kupa kuti batamvwanani. Muchikozyano, Jonatani wakali mupati aminyaka iisika ku30 kwiinda Davida. Jonatani wakali kukonzya kwaamba kuti takwe zintu nzibakonzya kweendelana amuntu uuchizwa malili aampemo alubo uutakwe luzibo. Pesi Jonatani teembaakachita pe, wakali kumulemeka Davida.

8. Nkamboonzi nitwaamba kuti Jonatani wakali mweenzinyina wachoonzyo kuli Davida?

⁸ Jonatani wakali kukonzya kumuchitila bbivwe Davida. Mbukunga wakali mwana waMwaami Sawulu, wakali kukonzya kuyeeya kuti nguwe wakeelede kuzooba mwaami. (1 Sam. 20:31) Pesi Jonatani wakali kulibombya alubo wakali kusyomeka kuli Jehova. Nkinkaako, wakagwasya Davida wakali wasalwa aJehova kuti azoobe mwaami. Wakasala kusyomeka kuli Davida nikuba kuti kuchita oobo kwakamunyemya Sawulu.—1 Sam. 20:32-34.

9. Tuzizi biyeni kuti Jonatani taakamuchitila bbivwe pe Davida?

⁹ Jonatani wakali kumuyanda kapati Davida, nkinkaako taakwe naakamuchitila bbivwe pe. Jonatani wakali aachibindi alubo wakali kukonzya kubelesya buta amimvwi kunkondo. Jonatani awisi bakazibidwe kuti “bakali alubilo kwiinda basikwaze” akuti “bakali anguzu kwiinda basyuumbwa.” (2 Sam. 1:22, 23) Nkinkaako, Jonatani wakali kukonzya kulisumpula akaambo kazintu nzyaakali kuchita kunkondo. Pesi Jonatani taakwe naakalikozyanisya aDavida naakuti kumuchitila bbivwe. Nikuba boobo, Jonatani wakali kumuyanda Davida akaambo kachibindi nchakalaacho akusyoma Jehova. Muchikozyano, Jonatani wakatalika kuyanda Davida kuzwa naakajaya Goliyati. Nga tulatondeezya biyeni kuti tulabayanda kapati bakwesu abachizi mbuli mbaakachita Jonatani kuli Davida?

10. Nga tulatondeezya biyeni kuti ‘tulabayanda bamwi kazizwa aansi aamoyo’?

¹⁰ Bbayibbele litubuzya kuti: “Amuyandane kapati kuzwa ansi aamoyo.” (1 Pet. 1:22) Jehova nchikozyano chibotu nchitweelede kutobela. Ulatuyanda kapati zyakuti kuti twasyomeka taakwe chintu chikonzya kupa kuti aleke kutuyanda. (Rom. 8:38, 39) Bbala lyachiGrikki lyakasandululwa kuti “kapati” litondeezya muntu uubeleka changuzu kuti atondeezye bamwi luyando. Chimwi chiindi teekuuba pe nkinkaako, tweelede kubeleka changuzu kuti tutondeezye kuti tulabayanda bakwesu abachizi. Kuti bamwi batunyemya, tweelede kuzumanana ‘kubeengelela caluyando. Akusoleka camoyo woonse kuzumanana alukamantano lwamuuya mucaanzyo caluumuno.’ (Ef. 4:1-3) Kuti twazumanana kukkala katuli ‘aluumuno’ abakwesu abachizi tatunoolangi kubisya kwabo pe. Tunooyezya kubabona mbuli mbababona Jehova.—1 Sam. 16:7; Int. 130:3.

11. Nkamboonzi chimwi chiindi nikukonzya kutuyumina kubatondeezya luyando bamwi?

¹¹ Chimwi chiindi kulakonzya kutuyumina  kubatondeezya luyando bakwesu abachizi, kapati kuti twaziba kulubizya kwabo. Eezi nzizyo zyakachitika kuli aamwi maKristu bamumwaanda wakusaanguna. Muchikozyano, kweelede kuti Yuwodiya aSintikke teekwakali kubakataazya pe “kubeleka canguzu [kabali aPawulu] kujatikizya makani mabotu.” Pesi kubonekaanga kuli zintu zyakali kupa kuti batamvwanani pe kabali babili. Nkinkaako, Pawulu wakabasungwaazya kuti “babe amuzeezo omwe mu Mwami.”—Flp. 4:2, 3.

12. Kujana twachita biyeni kuti tukonzye kubatondeezya luyando bakwesu abachizi?

¹² Kujana twachita biyeni kuti tukonzye kubatondeezya luyando bakwesu abachizi mazubaano? Tweelede kubaziba kabotu bakwesu abachizi. Kuti twabaziba kabotu ziyootugwasya kuti tukonzye kubatondeezya luyando. Tatweelede kulanga minyaka njalaayo muntu ooyo naakuti uzwa kuli. Mutalubi kuti Jonatani wakali mupati kuli Davida aminyaka iisika ku30 pesi bakali kumvwanana loko. Mumbungano yanu kuli muntu mupati na naakuti muniini ngukonzya kumvwanana aawe? Kuti wachita oobo uyootondeezya kuti uli “aluyando kuciinga coonse cabakwesu.”—1 Pet. 2:17.

13. Niinzi chikonzya kupa kuti kutuyumine kuyanda bakwesu boonse munzila iikozyenie?

¹³ Kubayanda kapati bakombima zyaamba kuti tunoobayanda munzila iikozyenie na boonse bakwesu bali mumbungano? Peepe, eezi zilakonzya kutuyumina. Teekubi pe kumvwanana loko awumwi muntu akaambo kakuti zintu nzimuyandisya zileendelana. Muchikozyano, Jesu wakali kwaamba baapostolo bakwe boonse kuti ‘mbeenzinyina.’ Nikuba boobo wakali kumuyandisya loko Johane. (Joh. 13:23; 15:15; 20:2) Pesi Jesu taakali kubona Johane kayandikana loko kwiinda bamwi baapostolo. Muchikozyano, chiindi Johane amukulanaakwe Jakkobo nibakakumbila kuti bakapegwe zyuuno zisumpukide muBwaami bwaLeza, Jesu wakati: “Pele kujatikizya makani aakukkala kujanza lyangu lyalulyo naa kujanza lyangu lyalumwensyi tandili ndime ndisala pe.” (Mk. 10:35-40) Mbuli Jesu tatweelede kubona bakombima  mbituyandisya kabayandikana loko kwiinda bamwi. Kuchita oobo nkusaluula. (Jak. 2:3, 4) Alubo eezi zilakonzya kupa kuti mbungano itajatani.—Jud. 17-19.

14. Kweendelana alugwalo lwa Bafilipi 2:3, niinzi chikonzya kupa kuti tutabachitili bbivwe bamwi?

¹⁴ Kuti twayandana kapati abakombima zilapa kuti kutabi kuzundaana mumbungano. Mutalubi kuti Jonatani taakwe naakamuchitila bbivwe pe Davida nikuba kweezya kumunyeya chuuno chabwaami. Toonse tweelede kutobelezya chikozyano chaJonatani. Utabachitili bbivwe pe bakombinyokwe akaambo kazintu nzibakonzya kuchita ‘pesi chita zintu zyoonse cakulicesya akubona bamwi kuti balakwiinda.’ (Bala Bafilipi 2:3.) Utalubi kuti umwi awumwi uli aamulimu uuyandikana ngwachita mumbungano. Kubona kuti kuli zimwi zintu nzitutakonzyi pe kuchita kuyootugwasya kubona zintu zibotu zichitwa abakwesu abachizi akuti tuyande kutobelezya chikozyano chabo chibotu.—1 Kor. 12:21-25.

15. Wayiyaanzi kuzwa kuchikozyano chaMuchizi Tanya abana bakwe?

¹⁵ Kuti twachitikilwa penzi, Jehova ulatuumbulizya akutugwasya kabelesya bakwesu abachizi batuyanda. Atubone zyakachitikila umwi muchizi utegwa Tanya abana bakwe batatu chiindi nibakachayizya muMugibelo kuzwa kuMuswaangano Wazisi wamu2019 kuUnited States. Tanya wakati: “Nitwakachayizya katubweeda kuhotela nkutwakali kukkala, imwi moota yakabbuvula moota yesu. Takwe wakalichisa pe pesi twakazwa mumoota akwiimikila kumbali aamugwagwa katuyoowede. Kuzwa waawo, twakabona umwi muntu wakaliimvwi kubbazu limbi lyamugwagwa wakali kutwiita kuti tunjile  mumoota yakwe. Twakazoobona kuti muntu ooyo wakali mukwesu wakali kuzwa kumuswaangano. Teenguwe pe alikke wakayimikila. Bamwi bakwesu bali 5 bazwa kuSweden ambabo bakayimikila. Bachizi bakatumbundila alubo eezi zyakatuumbulizya loko. Ndakababuzya kuti tulaba kabotu pesi taakwe nibakatusiya pe. Bakazumanana kukkala andiswe nikuba chiindi nitwakamaninsya kulangwa-langwa aamadokotela. Alubo bakali kuyanda kuba aachoonzyo chakuti tulaazyo zintu zyoonse zyakali kuyandikana. Zintu zyoonse zyakali kuchitika nitwakali muchiimo eechi chiyumu zyakatugwasya kubona kuti Jehova ulatuyanda. Penzi eeli lyakatuchitikila lyakapa kuti tubayande loko bakwesu abachizi akuti tumulumbe akumuyanda loko Jehova.” Kuli nwaakali waswaanana aapenzi na mpawo umwi mukwesu naakuti muchizi wakugwasya?

16. Niinzi zikonzya kuchitika kuti twatondeezya kuti tulayandana kapati?

¹⁶ Niinzi chikonzya kuchitika kuti twatondeezya kuti tulayandana kapati? Tulawumbulizyania chiindi nituli mumapenzi. Tulapa kuti kube kujatana mumbunga yaJehova. Tulatondeezya kuti tuli basikwiiya baJesu alubo eezi ziyoopa kuti bantu balaamyoyo ibombede baze mukasimpe. Kwiinda zyoonse tulapa kuti Jehova “Taata siluse a Leza siluumbulizyo loonse” alemekwe. (2 Kor. 1:3) Toonse atubeleke changuzu kuti tuzumanane kuyandana kapati.