1. ¿Tuku limasiya pi kkinkilhtamakujkan nialh anan tapaxkit kfamilia?

BIBLIA xlichuwinanit pi kxaʼawatiya kilhtamaku nialh xʼamaka “lapaxkikan kfamilia” (2 Tim. 3:1, 3). Uma kgantaxtuma kkinkilhtamakujkan. Akgtum liʼakxilhtit, lhuwa familias lu lipatinamakgolh xlakata lakxtlawakgonit xtamakgaxtokgatkan, xanatlatni ni laʼakxilhputunkgo chu xalakkamanan makgkatsikgo pi ni kapaxkikan. Nachuna, wilakgolh familias tiku akxtum wilakgolh, pero nitlan latalalinkgo. Chatum tiku kamakgtaya familias lichuwinan: «Xatse, xatlat chu xalakkamanan ni latachuwinankgo, wata lhuwa kilhtamaku limaklakaskinkgo xcomputadoraskan, xtabletaskan, xteléfonoskan o likgamanankgo videojuegos. Maski akxtum wilakgolh, ni lalakgapaskgo».

2, 3. 1) Chuna la wan Romanos 12:10, ¿tiku xlilat nakapaxkiyaw? 2) ¿Tuku na’akxilhaw k’uma artículo?

² Ni lakaskinaw pi nalikatsiyaw chuna la uma kakilhtamaku chu nialh nalimasiyayaw tapaxkit (Rom. 12:2). Wata talakaskin nakakgalhiniyaw tapaxkit kifamiliajkan, chu nachuna kinatalankan xalak congregación (kalikgalhtawakga Romanos 12:10). ¿Tuku kilhchanima uma tapaxkit? Ktachuwin xagriego, kilhchanima tapaxkit nema kakgalhiniyaw kifamiliajkan, tiku kiʼamigoskan kaliʼakxilhaw. Wa uma tapaxkit nema kinkalikgalhinitkan kinatalankan xalak congregación, tiku kifamiliajkan xaʼespiritual litaxtukgo. Komo nalalimasiyaniyaw tapaxkit, nalamakgtayayaw chuntiya akxtum naskujnaniyaw Jehová (Miq. 2:12).

³ Kʼuma artículo naʼakxilhaw xliʼakxilhtitkan makgapitsi  tiku kalichuwinan Biblia nema nakinkamakgtayayan nakgalhiyaw chu nalimasiyayaw tapaxkit.

4. ¿La kinkamakgtayayan Santiago 5:11 naʼakgatekgsaw la xlilhuwa kinkapaxkiyan Jehová?

⁴ Biblia kinkalitachuwinanan lakglilakgatit xtayat Jehová. Akgtum liʼakxilhtit, kinkawaniyan pi «Dios tapaxkit» (1 Juan 4:8). Uma tlawa pi natalakatsuwiniputunaw. Pero Biblia na wan pi «Jehová lu paxkinan» (kalikgalhtawakga Santiago 5:11). ¡Lu tlan kinkamamakgkatsiniyan pi Jehová kinkawaniyan tuku makgkatsi kimpalakatakan!

5. ¿La limasiya Jehová talakgalhaman, chu la tlan nastalaniyaw xliʼakxilhtit?

⁵ Kaʼakxilhwi pi Santiago 5:11 tamalakxtumi xtapaxkit Jehová atanu xtayat nema lu lakgatiyaw: xtalakgalhaman (Éx. 34:6). Pulaktum la limasiya Jehová uma tayat wa akxni kinkatapatiyan kintalakgalhinkan (Sal. 51:1). Pero akxni Biblia wan pi wi tiku lakgalhamanan ni kaj kilhchanima pi tapatinan. Talakgalhaman akgtum tayat nema taxtuyacha kxnaku chatum lataman chu makgpuwantini namakgtaya tiku patinama. Biblia wan pi tuku makgpuwantini Jehová nakinkamakgtayaputunan tlakg tliwakga nixawa tuku makgkatsi chatum tse xpalakata kskgata (Is. 49:15). Akxni patinanaw, Jehová kinkamakgtayaputunan xlakata kinkalakgalhamanan (Sal. 37:39; 1 Cor. 10:13). Akinin na tlan nalakgalhamananaw chuna la Jehová komo nakatapatiyaw kinatalankan chu nialh nakasitsiniyaw komo kinkatlawanikgon tuku nitlan (Efes. 4:32). Pero tlakg nakalimasiyaniyaw pi kalakgalhamanaw komo nakamakgtayayaw akxni natitaxtukgo taʼakglhuwit. Akxni tapaxkit tlawa pi nalakgalhamananaw, tlawamaw chuna la Jehová, tlakg xatlan li’akxilhtit xlakata tiku paxkinan (Efes. 5:1).

6. ¿La lalimasiyanikgolh tapaxkit Jonatán chu David?

⁶ Biblia kalichuwinan lhuwa latamanin tiku lalimasiyanikgolh tapaxkit. Kaʼakxilhwi  xliʼakxilhtitkan Jonatán chu David. Biblia lichuwinan pi «Jonatán lu tlan tsukulh talalin David, chu Jonatán tsukulh paxki xtachuna la xlatamat» (1 Sam. 18:1). Jehová laksakli David xlakata wa xtsukulh mapakgsinan xlakgxokgo Saúl, xtlat Jonatán. Saúl lu lisitsilh chu asta xmakgniputun David. Pero Jonatán ni tatayalh xtlat xlakata xmakgnilh David. Jonatán chu David lamalaknunikgolh pi ankgalhin amigos xʼamakgo litaxtukgo chu xʼamakgo lamakgtayakgo (1 Sam. 20:42).

7. ¿Tuku max tlan xtitlawalh pi Jonatán chu David ni amigos xwankgolh?

⁷ Chuna la xlatalalinkgo Jonatán chu David tlakg kaks malakawaninan akxni lilakpuwanaw tuku max xtitlawalh pi ni xlatalalinkgolh. Akgtum liʼakxilhtit, Jonatán 30 kata tlakg lankata xwanit nixawa David. Uma max xtitlawalh pi xlakpuwa pi nila xtalalilh tiku tlakg kgawasaku xwanit chu ni lhuwa tuku xkatsini xlakata latamat. Pero maski chuna, Jonatán nikxni lakpuwa pi David nitu xlitaxtu.

8. ¿Tuku tlawalh pi Jonatán lu tlan xtalalilh David?

⁸ Nachuna, Jonatán tlan xtilakgsitsilakalh David chu lu xtiliskujli xlakata wa xmapakgsinalh xlakgxokgo xtlat xlakata wa xkgawasa Saúl xwanit (1 Sam. 20:31). Pero Jonatán taktujulh chu ni makgxtakgli Jehová, wa xlakata makgamakglhtinalh tuku laksakli Jehová xlakata David wa mapakgsina xlitaxtulh. Nachuna ni makgxtakgli David, maski Saúl lu lisitsilh (1 Sam. 20:32-34).

9. ¿Tuku likatsiyaw pi Jonatán ni xtalamakgasitsin xliʼakxilha David?

⁹ Tapaxkit nema Jonatán xkgalhini David tlawalh pi ni xtalamakgasitsin xliʼakxilhli. Jonatán lu tlan xlimaklakaskin arco chu chatum lu tliwakga soldado xwanit tiku ni xpekuan. Xwankan pi xla chu xtlat “tlakg lakapala xʼankgo nixawa águilas” chu “tlakg lakgtliwakgan xwankgonit nixawa leones” (2 Sam. 1:22, 23). Wa xlakata Jonatán max tlan xtilitlankajwanalh putum tuku xtlawanit akxni xʼan kʼguerras. Pero nikxni wi tiku xtalatlajaputun chu nipara lisitsilh tuku tlan xkitaxtuni David. Wata lu tlan liʼakxilhli xlakata ni xpekuan chu xlipawan Jehová. Jonatán tsukulh paxki David akxni xla makgnilh Goliat. ¿La tlan nachuna nakalimasiyaniyaw uma tapaxkit kinatalankan?

10. ¿Tuku kilhchanima “lu nalapaxkiyaw xliputum kinakujkan”?

¹⁰ Biblia lichuwinan: «Lu kalapaxkitit xliputum minakujkan» (1 Ped. 1:22). Jehová kinkawiliniyan xaliʼakxilhtit. Xla lu kinkapaxkiyan, wa xlakata komo ni namakgxtakgaw, nitu katitlawalh pi nialh nakinkapaxkiyan (Rom. 8:38, 39). Tachuwin xagriego nema matitaxtikan «xliputum» kilhchanima pi lu naliskujaw xlakata nalimasiyayaw tapaxkit, chu wa uma tuku max lakgachunin kilitlawatkan xpalakatakan makgapitsin natalan. Biblia kinkawaniyan tuku kilitlawatkan akxni wi tiku ni lu tlan talalinaw: «Kalimasiyatit tapaxkit akxni latatayaniyatit chatunu chatunu. Makxtum wilatit xpalakata espíritu santo. Lu kaliskujtit xlakata chuntiya makxtum natawilayatit, ni nalatakgalhiyatit taʼakglhuwit chatunu chatunu» (Efes. 4:1-3). Xlakata “chuntiya makxtum natawilayaw” ni wa kuentajkilitlawatkan tuku nitlan tlawakgo kinatalankan, wata lu naliskujaw xlakata nakaʼakxilhaw chuna la kaʼakxilha Jehová (1 Sam. 16:7; Sal. 130:3).

11. ¿Tuku xlakata min kilhtamaku tuwa makgkatsiyaw nalimasiyayaw tapaxkit?

¹¹ Min kilhtamaku tuwa makgkatsiyaw  nakalimasiyaniyaw tapaxkit kinatalankan, liwaka akxni wa kuentajtlawayaw tuku nitlan tlawakgo. Uma nachuna xlama kxapulana siglo. Akgtum liʼakxilhtit, Evodia chu Síntique tlan akxtum xtaskujkgo Pablo xlakata “natalichuwinankgo xatlan tamakatsinin”. Pero tuwa xmakgkatsikgo akxtum nalatalalinkgo. Wa xlakata Pablo kawanilh pi “watiya talakapastakni xkgalhikgolh akxni kskujnanikgolh Malana” (Filip. 4:2, 3).

12. ¿Tuku kilitlawatkan xlakata nakapaxkiyaw kinatalankan?

¹² ¿Tuku kilitlawatkan xlakata nakapaxkiyaw kinatalankan? Tlakg nakalakgapasaw. Chuna tlakg ni tuwa katimakgkatsiw nakaʼakgatekgsniyaw chu nakapaxkiyaw. Xkatakan chu niku xala kinatalankan ni xlitlawat pi ni nakapaxkiyaw. Kalakapastakwi pi Jonatán xʼamigo litaxtulh David maski 30 kata tlakg lankata xwanit nixawa xla. ¿Tlan xlilakpuwanti chatum tala xalak mincongregación tiku tlakg lankata o tlakg aktsujku nixawa wix, chu xʼamigo nalitaxtuya? Komo chuna natlawaya, nalimasiyaya pi kapaxkiya «putum natalanin» (1 Ped. 2:17).

13. ¿Tuku xlakata max ni lakxtum nakatalalinaw putum kinatalankan xalak congregación?

¹³ Akxni lichuwinanaw pi nakapaxkiyaw kinatalankan, ¿wamputun pi putum lu tlan nakatalalinaw? Ni. Xlakata max wi tiku tlakg tlan talalinaw xlakata watiya tuku lakgatiyaw chu uma ni talakgalhin. Jesús xʼamigos xkaliʼakxilha putum xʼapóstoles, pero tlakg xpaxki Juan (Juan 13:23; 15:15; 20:2). Maski chuna, Jesús ni tlakg tlan likatsinilh Juan nixawa amakgapitsin. Akgtum liʼakxilhtit, akxni Juan chu Santiago skinikgolh pi wi tuku lu xlakaskinka xkalakgayawalh kxTamapakgsin Dios, Jesús kakgalhtilh: «Akit ni kilakgchan nakwan tiku nakimpaxtutawila kkimpakgastakat chu kkimpakgxwiki» (Mar. 10:35-40). Kilistalanitkan xliʼakxilhtit Jesús chu ni tlakg xlakaskinka nakaʼakxilhaw kiʼamigoskan nixawa amakgapitsin (Sant. 2:3, 4). Tlakg tlan kalikatsinikan amakgapitsin tlawa pi naʼanan tapapitsit,  chu uma nichuna xlilat kcongregación (Jud. 17-19).

14. Chuna la wan Filipenses 2:3, ¿tuku natlawa pi ni tlakg xlakaskinka nalitaxtuputunaw nixawa amakgapitsin kcongregación?

¹⁴ Tapaxkit natlawa pi ni tlakg xlakaskinka nalitaxtuputunaw kcongregación nixawa amakgapitsin. Kalakapastakwi pi Jonatán ni xtalatlawaputun David chu ni xtalamakgasitsin liʼakxilhli xlakata mapakgsina xwa. Kastalaniw xliʼakxilhtit chu ni kintalamakgasitsinkan kakaliʼakxilhwi kinatalankan xlakata tuku xlakan tlan tlawakgo. Wata katlawaw tuku wa Pablo: «Katataktujutit chu amakgapitsin tlakg xlakaskinka kakaʼakxilhtit nixawa wixin» (kalikgalhtawakga Filipenses 2:3). Kalakapastakwi pi putum natalan wi tuku tlan tlawakgo kcongregación. Komo taktujuyaw, wa naʼakxilhaw lakwan tayat nema kgalhikgo kinatalankan chu nalitamakgtayayaw lu xatlan xliʼakxilhtitkan (1 Cor. 12:21-25).

15. ¿Tuku masiyaniyan tuku titaxtulh Tanya chu xfamilia?

¹⁵ Akxni titaxtuyaw tuku tuwa, Jehová kinkalimakgoxamixiyan xtapaxkit chu kamaklakaskin natalan xlakata nakinkamakgtayakgoyan. Kaʼakxilhwi tuku titaxtulh akgtum familia akxni kitaspitkgolh sábado kʼasamblea internacional «Tapaxkit nikxni sputa» nema tatlawalh kʼEstados Unidos kkata 2019. Tanya, tiku kgalhi kgalhtutu kamanan, lichuwinan pi akxni xtaspitmakgolh kʼhotel akgtum putlaw titiyalh xputlawkan. Xla wan: «Niti takgawilh, pero ktaxtuw kputlaw chu ktiji ktayaw, ni xakkatsiyaw tuku naktlawayaw. Chu kakxilhwi pi kxaʼalakgaputu tiji wi tiku xkinkamakawaniman xlakata xakkaw kxputlaw chu nitu xkinkaʼakgspulan. Chatum  tala xwanit, tiku na aku xkitaspitnit kʼasamblea. Ni kaj xʼakstu tachokgolh; nachuna tachokgokgolh kgalhkitsis natalan xalak Suecia. Natalan kinkaʼakgpixtiyakgon kintsumat chu akit. Wa tuku xakmaklakaskimaw. Ni kinkamakgxtakgkgon maski chilh ambulancia o makuchinanin. Liskujkgolh xlakata nitu xkinkatsankganin. Akxni chuna xaktitaxtumaw, kmakgkatsiw xtapaxkit Jehová. Tuku ktitaxtuw matliwakglhli tapaxkit nema kkakgalhiniyaw natalan. Nachuna tapaxkit nema kkgalhiniyaw Jehová tlakg tatliwakglhli». ¿Lakapastaka akxni chatum tala limasiyanin tapaxkit akxni lu xmaklakaskimpat?

16. ¿Tuku xlakata tlan nalalimasiyaniyaw tapaxkit kinchatunukan?

¹⁶ ¿Tuku tlan nakitaxtu komo nalalimasiyaniyaw tapaxkit? Nakamakgoxamixiyaw kinatalankan akxni patinamakgolh nawan chu xkachikin Dios makxtum natawila. Nachuna, nalimasiyayaw pi xaxlikana kstalaninanin Cristo litaxtuyaw, chu uma natlawa pi tlakg lhuwa latamanin tiku kgalhikgo tlan naku naskujniputunkgo Jehová. Pero tuku tlakg xlakaskinka wa pi namaxkiyaw kakni «Tlat tiku kgalhi lhuwa talakgalhaman chu Dios tiku tlan kamamakgkatsini latamanin xliputum tuku titaxtukgo» (2 Cor. 1:3). Wa xlakata, kimputumkan chuntiya kaliskujwi nakgalhiyaw chu nalalimasiyaniyaw tapaxkit chuna la akgtum familia.