1. Wanem samting i soim olsem ol manmeri i no gat pasin bilong laikim ol wanfamili?

BAIBEL i tok profet olsem long taim bilong las de, ol manmeri bai i no gat “pasin bilong laikim ol wanfamili.” (2 Tim. 3:1, 3) Yumi lukim truim bilong dispela tok profet long nau. Olsem, long nau planti milion marit i divos, dispela i mekim na planti papa na mama i belhat long narapela narapela na ol pikinini bilong ol i pilim olsem papamama i no laikim ol. Maski ol famili i stap long seim haus, ol i no pas gut wantaim narapela narapela. Wanpela kaunsela bilong ol famili i tok: “Mama, papa, na ol pikinini i no save toktok long narapela narapela, ol i bisi long yusim kompiuta, ol teblet, ol smatfon, na pilaim ol vidio gem. Ol dispela famili i stap long seim haus, tasol ol i no save gut long narapela narapela.”

2-3. (a) Olsem Rom 12:10 i kamapim, yumi mas sori na laikim husat? (b) Yumi bai skelim wanem samting long dispela atikol?

² Yumi no laik bihainim pasin bilong ol manmeri bilong dispela graun em ol i no save laikim ol narapela. (Rom 12:2) Yumi mas kisim pasin bilong sori na laikim ol wanfamili bilong yumi na ol wanbilip bilong yumi. (Ritim Rom 12:10.) Pasin bilong sori na laikim narapela i makim wanem samting? Dispela kain pasin laikim i save stap namel long ol wanfamili em ol i pas gut tru wantaim. Yumi mas kisim na soim dispela kain pasin laikim long famili bilong yumi long sait bilong bilip—em ol bratasista Kristen bilong yumi. Taim yumi sori na laikim ol, yumi strongim pasin wanbel namel long yumi na dispela i bikpela samting long lotu i tru.—Mai. 2:12.

 ³ Bilong helpim yumi long kisim pasin bilong sori na laikim ol narapela, yumi ken skelim sampela eksampel long Baibel na luksave long skul yumi inap kisim.

4. Olsem wanem tok bilong Jems 5:11 i helpim yumi long pilim tru pasin laikim bilong Jehova?

⁴ Baibel i tokim yumi long ol naispela pasin bilong Jehova. Olsem, Baibel i tok “God em i pasin laikim.” (1 Jon 4:8) Dispela tok i kirapim yumi long i go klostu long em. Baibel i tok tu olsem Jehova “i gat pasin bilong sori tru.” (Ritim Jems 5:11.) Dispela em wanpela naispela tok we i soim klia bikpela pasin laikim Jehova i gat long yumi!

5. (a) Long wanem rot Jehova i save soim pasin marimari long yumi? (b) Hau bai yumi inap bihainim pasin bilong Jehova?

⁵ Tok bilong Jems 5:11 i stori long pasin sori bilong Jehova, na em i stori tu long narapela pasin bilong Jehova we i kirapim yumi long i go klostu long em—pasin marimari bilong em. (Kis. 34:6) Wanpela rot Jehova i soim pasin marimari long yumi em taim em i save fogivim ol rong bilong yumi. (Sng. 51:1) Long Baibel dispela tok marimari i makim pasin bilong fogivim narapela, na i no dispela tasol. Taim man i marimari long narapela, dispela i makim olsem em i pilim sori tru insait long bel bilong em taim em i lukim narapela i karim hevi, na dispela i kirapim em long helpim dispela man. Jehova i tok em i laik tru long helpim yumi na dispela laik i strong moa winim pasin bilong mama long laikim pikinini bilong em. (Ais. 49:15) Pasin marimari bilong Jehova i kirapim em long helpim yumi taim yumi karim hevi. (Sng. 37:39; 1 Kor. 10:13) Yumi inap soim pasin marimari long ol wanbilip bilong yumi long rot bilong fogivim ol na yumi no holim yet bel kros long ol taim ol i mekim yumi bel hevi. (Efe. 4:32) Tasol nambawan rot yumi inap soim pasin marimari long ol wanbilip bilong yumi em long sambai long ol taim ol i karim hevi. Taim pasin laikim i kirapim yumi long marimari long ol narapela, yumi bihainim pasin bilong Jehova, em i stap nambawan gutpela eksampel long soim pasin sori.—Efe. 5:1.

6. Hau na Jonatan na Devit i soim olsem ol i laikim na sori long narapela narapela?

⁶ Baibel i stori long ol man i no gutpela olgeta em ol i laikim na sori long narapela narapela. Tingim eksampel bilong Jonatan na Devit. Baibel i tok: “Jonatan na Devit i kamap gutpela pren na ol i laikim tru narapela narapela.” (1 Sml. 18:1) God i makim Devit long kisim ples bilong Sol long mekim wok king. Bihain long dispela, Sol i jeles long Devit na em i traim long kilim em i dai. Tasol pikinini man bilong Sol, em Jonatan, em i no sapotim plen bilong papa bilong em long kilim i dai Devit, nogat. Jonatan na Devit i mekim tok promis olsem tupela bai stap gutpela pren na oltaim ol bai sapotim narapela narapela.—1 Sml. 20:42.

7. Wanem wanpela samting inap pasim Jonatan na Devit long stap gutpela pren?

⁷ Pasin laikim i stap namel long Jonatan na Devit i narapela kain tru bikos planti samting inap pasim tupela long stap gutpela pren. Olsem, Jonatan i gat 30 krismas moa winim krismas bilong Devit. Jonatan inap tingting olsem i no gat rot long em inap kamap gutpela pren bilong wanpela yangpela man husat i no gat planti ekspiriens long laip. Maski i olsem, Jonatan i no holim kain tingting olsem, nogat, em i rispektim tru Devit.

8. Wai na Jonatan i stap gutpela pren bilong Devit?

⁸ Jonatan inap kisim pasin bilong jeles long Devit. Jonatan em i pikinini man bilong King Sol, olsem na em inap ting olsem i stret long em i kamap king. (1 Sml. 20:31) Tasol Jonatan i gat pasin daun na em i stap gut long Jehova. Olsem na em i sapotim disisen bilong Jehova long makim Devit long kamap king. Na tu, Jonatan i stap gut long Devit, maski dispela i mekim na Sol i belhat nogut tru long em.—1 Sml. 20:32-34.

9. Yu ting Jonatan i jeles long Devit? Stori long dispela.

⁹ Jonatan i sori na laikim tru Devit, olsem na em i no jeles long em. Jonatan em hapman bilong sut long banara na em i bin strongim bel na insait long planti pait. Em na papa bilong em Sol i gat nem olsem ol man i save “spit tru winim ol tarangau” na “strong bilong tupela i winim strong bilong ol laion.” (2 Sml. 1:22, 23) Dispela inap kirapim Jonatan long hambak na apim nem bilong em yet. Tasol Jonatan i no mekim pasin resis, nogat. Em i laikim pasin bilong Devit long strongim bel na trastim Jehova. Bihain long Devit i kilim i dai Goliat, Jonatan i kirap long laikim tru Devit olsem em i laikim em yet. Olsem wanem yumi inap bihainim pasin bilong Jonatan long laikim tru ol bratasista bilong yumi?

10. Dispela tok “laikim tru narapela narapela long bel olgeta” i makim wanem samting?

¹⁰ Baibel i tokim yumi long “laikim tru narapela narapela long bel olgeta.” (1 Pita 1:22) Jehova i stap gutpela eksampel em yumi ken bihainim. Pasin laikim bilong em long yumi i strong tru, olsem na sapos yumi stap gut long em, i no gat wanpela samting inap tekewe yumi long pasin laikim bilong God. (Rom 8:38, 39) Dispela tok “laikim tru” i makim olsem yumi mas taitim bun o wok strong tru long laikim ol narapela. Sampela taim, yumi mas subim yumi yet long soim pasin laikim long ol wanbilip bilong yumi. Taim ol narapela i mekim yumi bel hevi, yumi mas wok yet long “karim hevi ol arapela i putim long [yumi] na mekim wantaim pasin laikim. Na wok strong long holimpas pasin wanbel bilong holi spirit na stap bel isi, em pasin i save bungim yumi wantaim.” (Efe. 4:1-3) Taim yumi wok strong long holimpas “pasin  wanbel,” yumi bai tingim ol gutpela pasin bilong ol na yumi no tingim ol rong bilong ol. Yumi bai holim wankain tingting olsem bilong Jehova long ol wanbilip bilong yumi.—1 Sml. 16:7; Sng. 130:3.

11. Wai na sampela taim yumi inap pilim hatwok long sori na laikim tru ol narapela?

¹¹ Yumi inap pilim hatwok long sori na laikim tru ol bratasista bilong yumi, moa yet taim yumi luksave long ol popaia bilong ol. Sampela Kristen long taim bilong ol aposel i gat dispela hevi. Olsem, Yuodia na Sintike i amamas long wok “wantaim [Pol] long wok bilong gutnius.” Tasol sampela samting i mekim na tupela i no stap wanbel. Olsem na Pol i kirapim tupela long “kamap wanbel na pas wantaim Bikpela.”—Fili. 4:2, 3.

12. Olsem wanem yumi inap kisim pasin bilong sori na laikim tru ol bratasista bilong yumi?

¹² Olsem wanem yumi inap kisim pasin bilong sori na laikim tru ol bratasista bilong yumi long nau? Taim yumi save gut moa long ol wanbilip bilong yumi, yumi inap kliagut moa long pasin bilong ol na kisim pasin bilong sori na laikim tru ol. Yumi inap kamap gutpela pren bilong ol, maski krismas na bekgraun bilong yumi i no wankain. Tingim, Jonatan i gat olsem 30 krismas moa winim krismas bilong Devit, tasol em i pas gut tru wantaim Devit. Yu ting yu inap kamap gutpela pren bilong wanpela yangpela o wanpela i gat bikpela krismas moa long yu? Taim yu mekim olsem, yu soim olsem yu “laikim tru olgeta wanbilip bilong [yu].”—1 Pita 2:17.

13. Wai na yumi inap pilim olsem yumi no pas gut wantaim olgeta insait long kongrigesen?

¹³ Yumi sori na laikim tru ol wanbilip bilong yumi, tasol yu ting dispela i makim olsem yumi bai pilim olsem yumi pas gut wantaim olgeta wanbilip insait long kongrigesen? Nogat, em bai hatwok long mekim olsem. Em nomol long yumi pas gut moa wantaim sampela bratasista bikos yumi laikim ol wankain samting. Jisas i kolim olgeta aposel bilong em olsem ol “pren,” tasol em i pilim olsem em i pas gut moa wantaim Jon. (Jon 13:23; 15:15; 20:2) Maski i olsem, Jisas i no mekim wansait pasin. Olsem, taim Jon na brata bilong em Jems i askim  Jisas long givim ol wok i gat namba long Kingdom Bilong God, Jisas i tokim tupela olsem: “Husat bai sindaun long rait sait o left sait bilong mi, em i no wok bilong mi long makim.” (Mak 10:35-40) Yumi mas bihainim pasin bilong Jisas na yumi no ken mekim wansait pasin long ol pren em yumi pas gut tru wantaim ol. (Jems 2:3, 4) Sapos yumi mekim wansait pasin, yumi no inap strongim pasin wanbel insait long kongrigesen Kristen.—Jut 17-19.

14. Olsem Filipai 2:3 i kamapim, wanem samting bai helpim yumi long abrusim pasin bilong resis wantaim ol narapela?

¹⁴ Taim yumi sori na laikim tru narapela narapela, yumi helpim kongrigesen long daunim pasin bilong resis wantaim narapela narapela. Tingim, Jonatan i no traim long resis wantaim Devit na traim long kisim ples bilong em olsem king, nogat. Yumi olgeta i ken bihainim eksampel bilong Jonatan. Abrusim pasin bilong resis wantaim ol wanwok bilong yupela bikos ol i gat save long mekim gut ol wok, “yupela i mas daunim yupela yet na tingim olsem ol arapela i winim yupela.” (Ritim Filipai 2:3.) Tingim olsem olgeta insait long kongrigesen i ken mekim ol wok bilong helpim kongrigesen. Taim yumi wok yet long daunim yumi yet, yumi bai lukim ol gutpela pasin bilong ol wanbilip bilong yumi na kisim helpim long gutpela eksampel bilong ol.—1 Kor. 12:21-25.

15. Yu kisim wanem skul long ekspiriens bilong Tanya na famili bilong em?

¹⁵ Taim hevi i painim yumi, Jehova i save mekim isi bel bilong yumi long rot bilong pasin laikim na pasin helpim yumi kisim long ol wanbilip bilong yumi. Tingim samting i bin kamap long wanpela famili bihain long ol i pinis long Sarere program bilong “Pasin Laikim i No Inap  Pinis!” Kibung Intenesenel bilong 2019 long Amerika. Tanya i gat 3-pela pikinini, na em i tok: “Mipela i draiv i go bek long hotel bilong mipela na draiva bilong narapela kar i no stiaim gut kar, so kar bilong em i ron i kam long hapsait bilong rot na bamim kar bilong mipela. I no gat wanpela i kisim bagarap, tasol mipela i kirap nogut tru, olsem na mipela i kam ausait long kar na sanap long rot. Wanpela man i stap long sait bilong rot i tromoi han na tokim mipela long go long kar bilong em. Dispela man i tromoi han em wanpela brata husat i bin pinis long wankain kibung na i kam. Na i no em tasol i stop. Faivpela deleget bilong Swiden tu i stop. Ol dispela sista i holimpasim mi na pikinini meri bilong mi, na mipela i kisim bel isi! Mi tokim ol olsem mipela bai orait na ol i ken lusim mipela na go. Tasol ol i stap wantaim mipela i go inap long medikal tim i kam, na ol i sekim sapos mipela i gat olgeta samting mipela i nidim. Long dispela taim bilong hevi, mipela i pilim tru pasin laikim bilong Jehova. Dispela ekspiriens i strongim pasin laikim bilong mipela long ol wanbilip bilong mipela, na i strongim tu pasin bilong mipela long laikim na tenkyu long Jehova.” Yu inap tingim wanpela taim we yu bin nidim helpim na wanpela wanbilip i soim olsem em i sori na laikim yu tru?

16. I gat wanem ol risen na yumi mas sori na laikim tru narapela narapela?

¹⁶ Tingim gutpela samting i kamap taim yumi sori na laikim tru narapela narapela. Yumi mekim isi bel bilong ol wanbilip bilong yumi taim ol i karim hevi. Yumi strongim pasin wanbel namel long ol manmeri bilong God. Yumi soim klia olsem yumi ol disaipel bilong Jisas, na dispela i save kirapim ol manmeri i gat gutpela bel long kam insait long lotu i tru. Bikpela samting moa, yumi givim glori long Jehova, em “Papa bilong marimari na God bilong mekim isi bel bilong ol man long olgeta kain taim.” (2 Kor. 1:3) Yumi olgeta i ken wok yet long kisim na soim pasin bilong sori na laikim tru narapela narapela!