EKICWEKA KY’OKWEGA 4
Ikara n’Okurakurana omu Kugonza
“Omu kugonzangana muganjane hamu.”—BAR. 12:10.
EKIZINA 109 Tugonzangane Kuruga ha Mutima
EBITURAYEGA *
1. Kiki ekirukwoleka ngu eka ezirukukira obwingi omu kasumi kanu tizirumu kugonza?
BAIBULI ekaranga ngu omu biro ebya ha mpero, abantu bakubaire ‘abatagonza bene babu.’ (2 Tim. 3:1, 3) Niturora obunabbi bunu nibuhikirra omu kasumi kanu. Amaka maingi gabaganiziibwemu habw’okugaitururwa, ekiretiire abazaire kukwatirwangana ekiniga kandi n’abaana kwehurra nk’abatarukugonzebwa. N’abantu ab’omu ka emu kandi abarukwikara omu nju emu nibasobora kutaba n’enkoragana enungi. Ekyokurorraho, omuhi w’amagezi omu ha nsonga z’amaka n’agamba ati: “Maama, taata, hamu n’abaana tibabaza hamu, kandi obwire bwabo oburukukira obwingi babumarra ha kompyuta, tabuleeti, amasimu, rundi ha vidiyo geemu. Nobukiraaba ngu abantu abarukwikara omu maka ga mulingo ogu baikara omu nju emu, tibamanyirengana kurungi.”
2-3. (a) Kusigikirra ha Abarumi 12:10, nibaha abatusemeriire kwoleka okugonza? (b) Nitwija kubazaaho ki omu kicweka kinu?
2 Titurukugonza kufooka nk’abantu b’ensi abataine kugonza. (Bar. 12:2) Baitu nitwetaaga kukurakuraniza okugonza hali ab’omu maka gaitu, kandi na hali ab’oruganda na banyaanya itwe omu kitebe. (Soma Abarumi 12:10.) Tusemeriire kugonza muno Abakristaayo bagenzi baitu nk’oku tugonza ab’omu maka gaitu. Oku nukwo okugonza okutusemeriire kwoleka ab’oruganda na banyaanya itwe omu kitebe. Obutuba n’okugonza nk’oku, tukonyera buli omu wena kuheereza Yahwe omu bumu n’okusemererwa.—Mik. 2:12.
3 Kutukonyera kutunga okugonza nka kunu, leka turole ekitusobora kwegera ha byokurorraho kuruga omu Baibuli.
YAHWE ‘AGONZA’ ABAHEEREZA BE
4. Isaya 63:9 nirutukonyera ruta kusiima habw’okugonza Yahwe okw’atwiniire?
4 Baibuli n’etugambira ngu Yahwe aine emiringo enungi. Ekyokurorraho, n’etugambira ngu “Ruhanga nukwo kugonza.” (1 Yoh. 4:8) Obutwega ensonga enu hali Yahwe kituletera kugonza kufooka banywani be. Baibuli eyongera etugambira ngu Yahwe ‘agonza’ abaheereza be. (Soma Isaya 63:9.) Gunu mulingo murungi ogw’okusoborra okugonza Yahwe okwatwiniire!
5. Yahwe atwoleka ata okuganyira, kandi nitusobora tuta kuhondera ekyokurorraho kye?
5 Wetegereze ngu Isaya 63:9 n’eyoleka ngu okugonza kwa Yahwe kwine akakwate n’omulingo gwe ogundi ogutwiriza haihi na uwe, ogu nugwo ogw’okuganyira. (Kurug. 34:6) Omulingo gumu Yahwe atwoleka ngu mali aganyira nugwo ogw’okutuganyira obutusobya. (Zab. 51:1) Omu Baibuli, kuganyira tikurukumanyisa kuganyira omuntu ow’akozere ensobi kyonka. Baitu nikimanyisa n’enyehurra ey’amaani omuntu ey’atunga obw’arora omuntu ow’ali omu bujune kandi ekamuleetera kugonza kumukonyera. Yahwe n’agamba ngu agonza muno kutukonyera kukira omulingo nyina mwana agonza kukonyera omwana we. (Is. 49:15) Obutuba tuli omu bujune, okuganyira kwa Yahwe kumuletera kugonza kutukonyera. (Zab. 37:39; 1 Kol. 10:13) Naitwe nitusobora kwoleka ab’oruganda na banyaanya itwe okuganyira kuraba omu kubaganyira obubatusobeza kandi n’okutabahurra enzigu obubatubiihiza. (Bef. 4:32) Baitu omulingo omukuru ogutusobora kwolekamu ab’oruganda na banyaanya itwe okuganyira nugwo ogw’okubakonyera obubarukuba baine ebizibu. Okugonza obukutuletera kuganyira abandi, tuba nituhondera ekyokurorraho kya Yahwe.—Bef. 5:1.
YONASANI NA DAUDI—BAKABA BANYWANI NFE NA NFE
6. Yonasani na Daudi bakoolekangana bata okugonza?
6 Baibuli erumu ebyokurorraho bingi eby’abantu abatahikiriire abayolekerengana okugonza okw’amaani. Tekerezaaho ekyokurorraho kya Daudi na Yonasani. Baibuli n’etugambira eti: “Omutima gwa Yonasani gwaterana nomutima gwa Daudi, kandi Yonasani yamugonza nkobwomezibwe wenka.” (1 Sam. 18:1) Yahwe akakoma Daudi kufooka mukama Saulo obw’aliba arugireho. Hanyuma y’eki, Saulo akakwatirwa Daudi ihali ly’amaani kandi y’alengaho kumwita. Baitu mutabani wa Saulo Yonasani atasagike ise obuyalengereho kwita Daudi. Yonasani na Daudi bakaba baraganizengana kwikara bali banywani kandi n’okusagikagangana.—1 Sam. 20:42.
Yonasani na Daudi bakaba banywani nfe na nfe n’obukiraaba ngu Yonasani akaba nakira muno Daudi emyaka (Rora akacweka 6-9)
7. Nsonga ki emu ey’ekaba n’esobora kulemesa Yonasani na Daudi kufooka banywani?
7 Nikihuniriza muno kurora ngu Daudi na Yonasani bakaba bali banywani nfe na nfe, habwokuba hakaba haroho ebintu bingi ebikaba nibisobora kubalemesa kufooka banywani. Ekyokurorraho, Yonasani akaba n’akiza Daudi emyaka nka 30. Yonasani akaba nasobora kutekereza ngu tasobora kufooka munywani w’omuntu ow’arukukira obukuru kandi ow’akaba atakarabire omu bingi. Baitu Yonasani atatekereze ati, akaba n’ateekamu muno Daudi ekitiinisa.
8. Kiki ekyafoire Yonasani omunywani murungi hali Daudi?
8 Yonasani akaba n’asobora kukwatirwa Daudi ihali. Nk’oku akaba ali mutabani w’Omukama Saulo, Yonasani akaba n’asobora kuhambiriza ngu nuwe asemeriire kuba mukama arukwongeraho. (1 Sam. 20:31) Baitu Yonasani akaba ali mwebundaazi, kandi mwesigwa hali Yahwe. Nahabweki akasagikira kimu encwamu ya Yahwe ey’okukoma Daudi kuba mukama arukwongeraho. Akaikara ali mwesigwa hali Daudi, kinu n’obukiraaba ky’abihiize muno Saulo.—1 Sam. 20:32-34.
9. Nitumanya tuta ngu Yonasani atakwatirwe Daudi ihali?
9 Yonasani habwokuba yagonzaaga muno Daudi, atamukwatirwe ihali. Yonasani akaba ali mukugu omu kukozesa obusaali kandi akaba ali murwani w’amaani. Uwe hamu na Saulo ise, bakaba bamanyirwe ‘nk’abakiraga isamba okwanguha’ kandi ‘nk’abakiraga entale amaani.’ (2 Sam. 1:22, 23) Nahabweki Yonasani akaba nasobora kwehaisa habw’ebintu eby’obumanzi eby’akaba akozere. Baitu Yonasani atalengeho kukira Daudi, kandi atakwatwe ihali habw’ebintu ebirungi Daudi y’akozere. Yonasani, akagonza muno Daudi habw’obumanzi bwe hamu n’omulingo yayesigamuga Yahwe. Ekyokurorraho, Daudi hanyuma y’okwita Goliasi, Yonasani nubwo y’atandikire kugonza muno Daudi nk’oku yayegonzaaga wenka. Nitusobora tuta kwoleka ab’oruganda na banyaanya itwe okugonza nk’oku?
NITUSOBORA TUTA KWOLEKA OKUGONZA OMU KASUMI KANU?
10. Nikimanyisa ki ‘kugonzangana omu mutima n’okugonza okwingi’?
10 Baibuli n’etugambira ngu “mugonzangane omu mutima nokugonza kwingi.” (1 Pet. 1:22) Yahwe atuteriireho ekyokurorraho. Yahwe habwokuba n’atugonza muno busaho kintu kyona ekisobora kutubaganiza hali uwe, kakuba twikara tuli besigwa hali uwe. (Bar. 8:38, 39) Ekigambo eky’Oruyonaani ekihindurwa okugonza “okwingi” nikimanyisa kuteekamu amaani maingi kusobora kwoleka okugonza. Obwire obumu, tikitwanguhira kwoleka ab’oruganda na banyaanya itwe okugonza. Abantu abandi obubatubiihiza, nitwetaaga kugumizaamu ‘nituculerrangana omu kugonzangana, omu kwekamba okwerinda obumu obw’omwoyo omu nsengo z’obusinge.’ (Bef. 4:1-3) Obuturalengaho muno kwikazaaho obusinge hagati yaitu n’Abakristaayo bagenzi baitu, titurukwija kuteeka muno omutima ha nsobi zaabo. Nitwija n’okulengaho muno kurora ab’oruganda bagenzi baitu nk’oku Yahwe abarora.—1 Sam. 16:7; Zab. 130:3.
Paulo akatererra Ewodiya na Suntuke kufooka banywani. Obwire obumu kitugumira kukoragana kurungi n’ab’oruganda hamu na banyaanya itwe (Rora akacweka 11)
11. Habwaki obwire obumu nikisobora kuguma kwoleka okugonza?
11 Tikikira kwanguha kugonza ab’oruganda na banyaanya itwe kukira muno obutuba tumanyire ensobi zaabo. Nikizooka, kinu kyali kizibu ky’Abakristaayo abamu omu kyasa eky’okubanza. Ekyokurorraho, Ewodiya na Suntuke kikabanguhira kukora “emirimo hamu [na Paulo] omu njiri.” Baitu haroho ensonga ey’abalemeseze kukoragana kurungi. Nahabweki Paulo akabatererra “okutekereza ekigambo kimu omu Mukama waitu.”—Baf. 4:2, 3.
Abagurusi b’ekitebe abato hamu n’abakuru nibasobora kufooka banywani nfe na nfe (Rora akacweka 12)
12. Nitusobora tuta kukurakuraniza okugonza hali ab’oruganda na banyaanya itwe?
12 Nitusobora tuta kukurakuraniza okugonza hali ab’oruganda na banyaanya itwe omu kasumi kanu? Obuturayeyongera kumanya kurungi Abakristaayo bagenzi baitu, nikisobora kutukonyera kubetegereza kurungi kandi n’okubagonza. Nitusobora kufooka banywani baabo n’obukiraaba ngu nibatukira obukuru rundi bato baitu rundi nibaruga omu biikaro ebindi. Ijuka ngu Yonasani akaba n’akiza Daudi emyaka nka 30; baitu akafooka munywani we nfe na nfe. Haroho omuntu omu kitebe kyanyu ow’arukukukira omu myaka rundi omuto wawe ow’osobora kunywana? Obw’orakora eki, noija kwoleka ngu n’ogonza Abakristaayo bagenzi baawe boona.—1 Pet. 2:17.
Rora akacweka 12 *
13. Habwaki nikisobora kutasoboka kufooka munywani nfe na nfe na buli omu wena omu kitebe?
13 Tugambe ngu kugonza Abakristaayo bagenzi baitu nikimanyisa kufooka munywani nfe na nfe wa buli omu wena omu kitebe? Nangwa, ekitikirukusoboka. Kya buli kiro kugonza muno abantu abamu habwokuba bagonza ebintu ebitugonza. Yesu akeeta abakwenda be boona “enganjani” ze, baitu yagonzaaga Yohana omu mulingo ogw’embaganiza. (Yoh. 13:23; 15:15; 20:2) Baitu, Yesu tiyamutwazaaga kurungi kukira abandi. Ekyokurorraho, Yohana na mugenzi we Yakobo obubamusabire ebiikaro eby’ekitiinisa omu Bukama bwa Ruhanga, Yesu akabagambira ati: “Okuikarra ha mukono gwange ogwobulyo, rundi ha mukono ogwemoso, tali nyowe nkugaba.” (Mar. 10:35-40) Nka Yesu, titusemeriire kutwaza kurungi banywani baitu nfe na nfe kukira abandi. (Yak. 2:3, 4) Kakuba tukikora nituba tutakukurakuraniza omwoyo ogw’obusinge omu kitebe.—Yud. 17-19.
14. Kusigikirra ha Abafiripi 2:3, kiki ekiratukonyera kwerinda kulengaho kukira abandi?
14 Obuturaaba nitugonzangana, titurukwija kulengaho kukira abandi omu kitebe. Ijuka ngu Yonasani atakwatirwe Daudi ihali, kandi atalengeho kufooka mukama omu kiikaro kya Daudi. Itwena nitusobora kwegera ha kyokurorraho kya Yonasani. Otakwatirwa ab’oruganda bagenzi baawe ihali habw’ebisembo ebibaine, “baitu omu buculezi omuntu wena omulinywe atekereze mutahiwe okumukira.” (Soma Abafiripi 2:3.) Oijuke ngu buli muntu wena omu kitebe aine eky’asobora kukora kukonyera ekitebe. Kakuba twikara tuli bebundaazi, nitwija kusobora kurora emiringo y’ab’oruganda na banyaanya itwe enungi kandi nitwija kugasirwa omu byokurorraho byabo eby’obwesigwa.—1 Kol. 12:21-25.
15. Kiki ekyorukwega kuruga omu kyokurorraho kya Tanya hamu n’eka ye?
15 Obutuhikwaho ebirengo ebitubaire tutarukunihira, Yahwe atuhuumuza kurabira omu kugonza n’obukonyezi bw’ab’oruganda na banyaanya itwe. Tekerezaaho eky’ahikire ha ka emu obw’ekaba n’eruga ha Rusorrokano Orukooto orw’Ensi Yoona omu Amerika orwa 2019 orwali orwine omutwe “Okugonza Tikuhwaho!” Kiro kyamukaaga obubali nibavuga motoka nibagaruka nambere bararaga motoka endi ekalemererwa yabatahiramu. Mama w’abaana basatu arukwetwa Tanya nagamba ati: “Busaho n’omu ayahutaire, baitu tukatiina muno, twaruga omu matoka kandi twayemerra omu muhanda hagati. Omuntu ondi akatweta tugende omu matoka ye nukwo tutahikwaho akabi. Akaba ali w’oruganda ow’akaba nubwo yaruga ha rusorrokano orukooto. Tali nuwe wenka ayayemeriire. N’Abakaiso ba Yahwe abandi batano kuruga Sweden abakaba baizire ha rusorrokano runu nabo bakemerra. Banyaanya itwe bakagwa nyowe na muhara wange omu kifuba, eky’atuletiire kwehurra kurungi! Nkagambira ab’oruganda na banyaanya itwe nitwija kuba kurungi nibasobora kugumizaamu nibagenda, baitu bakanga kutusigaho. N’ab’obujanjabi obubaizire ab’oruganda bakaikara naitwe, kandi bakagumya ngu tutungire byona ebiturukwetaaga. Omu kasumi ako akagumangaine tukarora okugonza kwa Yahwe. Ekintu eki kikatuletera kweyongera kugonza ab’oruganda na banyaanya itwe, kandi n’okweyongera kugonza Yahwe hamu n’okumusiima.” Naiwe haroho akasumi ak’orukwijuka nambere okaba noyetaaga obukonyezi kandi Omukristaayo mugenzi wawe y’akwoleka okugonza?
16. Nsonga ki ezisemeriire kutuleetera kwolekangana okugonza?
16 Tekerezaaho ebirungi ebirugamu obutwolekangana okugonza. Tuhuumuza ab’oruganda na banyaanya itwe obubahikwaho ebizibu. Tugumya obumu obuli hagati y’abantu ba Yahwe. Twoleka ngu tuli begeswa ba Yesu, kandi kinu nikisobora kuleetera abantu abaine emitima enungi kugonza kuheereza Yahwe. Kukira byona, tuhaisa Yahwe ekitiinisa “Isitwe owokuganyira, kandi Ruhanga owokuhumuza kwona.” (2 Kol. 1:3) Leka itwena tugumizeemu nitukurakuraniza kandi nitwoleka okugonza!
EKIZINA 130 Oganyirege
^ kac. 5 Yesu akagambira abegeswa be ngu abantu bakubamanyiriire habw’okugonzangana. Itwena tulengaho kworobera ekiragiro eki. Nitusobora kweyongera kugonza ab’oruganda bagenzi baitu kuraba omu kukurakuraniza okugonza okurukusisana n’okugonza okuba hagati y’abantu abainehongana obuzaale. Ekicweka kinu nikiija kutukonyera kumanya nk’oku tusobora kweyongera kugonza ab’oruganda na banyaanya itwe omu kitebe.
^ kac. 55 KUSOBORRA EBISISANI: Omugurusi w’ekitebe omuto n’abaza nasigikirra ha bintu ebiyayegere kuruga ha mugurusi omukuru omu myaka, kandi omugurusi omukuru amutangirra n’okusemererwa omu ka ye. Ubo n’abakazi baabo bolekangana okugonza kandi bakunirangana.
