1. I auala fea e lavea ei ne tatou a te foliki o te alofa masani i ‵tou aso nei?

NE ‵VALO mai te Tusi Tapu me i aso fakaoti, ka foliki te “alofa masani” e maua ne tino. (2 Timo. 3:1, 3) E lavea ne tatou te fakataunuga o te valoaga tenei i ‵tou aso nei. E pelā me se fakaakoakoga, ko ‵nofo mavae‵vae a te fia miliona o kāiga ona ko te ‵talaga o avaga, ko kaitāua a mātua ki a latou eiloa, kae ko tama‵liki ko ‵nofo mo te lagonaga i a latou ko sē alofagina. Ke oko ki kāiga kolā e ‵nofo i se fale e tasi, e fai pelā me ne tino e se masani. “A te mātua, te tamana mo tama‵liki e se fai‵pati, me ko uke atu olotou taimi e fakamāumāu ki olotou komupiuta, tivaisi mo tafaoga i komupiuta,” ko pati a se tino fakatonutonu kāiga. “E tiga loa e ‵nofo tasi a kāiga konei i se fale e tasi, e se iloa faka‵lei ne te suā tino a te suā tino.”

2-3. (a) E ‵tusa mo te Loma 12:10, ko oi a tino e ‵tau o fakaasi ne tatou ki ei te alofa? (e) Ne a mea ka onoono tatou ki ei i te mataupu tenei?

² E se ma‵nako tatou ke fai pelā mo tino o te lalolagi nei kolā e se a‵lofa. (Loma 12:2) I lō te fai penā, e ‵tau o fakatau a‵lofa tatou e se ki tino fua o ‵tou kāiga kae penā foki ki taina mo tuagane i te fakapotopotoga. (Faitau te Loma 12:10.) Se a te fakatau a‵lofa? Ko te tugapati telā e fakamatala mai ei te alofa telā e maua i va o kāiga ‵pili. E ‵tau o ati aka ne tatou te alofa tenā ki ‵tou kāiga faka-te-agaga, telā ko ‵tou taina mo tuagane Kelisiano. Kafai e fakatau a‵lofa tatou, ko fakatumau ne tatou a te ‵kau fakatasi telā se vaega tāua o te tapuakiga tonu.—Mika 2:12.

³ Ko te mea ke mafai o ati aka te fakatau a‵lofa kae ke fakaasi  foki ne tatou, ke onoono ki mea e mafai o tauloto ne tatou mai tala i te Tusi Tapu.

4. E fesoasoani mai pefea a te Iakopo 5:11 ke lavea ne tatou a te ‵poko o te alofa o te Atua mō tatou?

⁴ E fakaasi mai i te Tusi Tapu a uiga ‵gali o Ieova. E pelā me se mea e tasi e fai mai me “i te Atua ko te alofa.” (1 Ioa. 4:8) A te fakamatalaga fua tenā e fai ei ke fia fakapili‵pili tatou ki a ia. Kae e fai mai foki te Tusi Tapu i a Ieova e lasi ‵ki tena “alofa atafai.” (Faitau te Iakopo 5:11.) Ko oko loa te gali o te fakaasimaiga o te ‵poko o te alofa o Ieova mō tatou!

5. E fakaasi atu pefea ne Ieova te alofa fakamagalo, kae mafai pefea o fakaakoako tatou ki a ia?

⁵ E soko ne te Iakopo 5:11 a te alofa atafai o Ieova ki te suā uiga telā e fai ei ke fia fakapili‵pili tatou ki a ia—tena alofa fakamagalo. (Eso. 34:6) A te auala e tasi e fakaasi mai ne Ieova te alofa fakamagalo ko te fakamagaloga o mea ‵se e fai ne tatou. (Sala. 51:1) I te Tusi Tapu, e uke atu a mea e aofia i te alofa fakamagalo i lō te fakamagaloga fua o se mea ‵se a se tino. A te alofa fakamagalo se lagonaga malosi telā e sae aka i se tino māfai e lavea ne ia se tino e mafatia kae gasue a ia o fesoasoani. E fakamatala mai ne Ieova me i te manakoga i loto i a ia ke fesoasoani mai ki a tatou e sili fakafia atu i lagonaga o se mātua ki tena tama. (Isa. 49:15) Kafai ko mafatia tatou, ko te alofa fakamagalo o Ieova e fai ne ia ke gasue a ia o fesoasoani mai. (Sala. 37:39; 1 Koli. 10:13) E mafai o fakaasi atu ne tatou te alofa fakamagalo ki ‵tou taina mo tuagane mai te fakamagalo atu latou kae ke mo a ma ita fakamoemoe māfai ne fai ne latou se mea ke kaitāua tatou. (Efe. 4:32) Kae ko te suā auala tāua ke fakaasi atu te alofa fakamagalo ko te ‵lago atu ki ‵tou taina mo tuagane māfai ko fe‵paki mo tulaga faiga‵ta. Kafai e fakamalosi aka ne te alofa a tatou ke fakaasi atu te alofa fakamagalo ki nisi tino, ko fakaakoako tatou ki a Ieova, telā e sili atu tena alofa i lō so se tino aka.—Efe. 5:1.

6. Ne fakaasi atu pefea ne Ionatana mo Tavita a te fakatau a‵lofa o lāua ki a lāua eiloa?

⁶ E maua i te Tusi Tapu a tala o tino sē ‵lei katoatoa kolā ne fakaasi atu te fakatau a‵lofa. Mafaufau ki te tala o Ionatana mo Tavita. E fai mai te Tusi Tapu: “Ne fai a Ionatana mo Tavita e pelā me ne taugasoa ‵pili, kae ne kamata a Ionatana o alofa ki tou tagata e pelā mo ia ki a ia eiloa.” (1 Samu. 18:1) Ne ‵tofi a Tavita ke sui ne ia te tupu ko Saulo. Mai tua ifo, ne loto masei a Saulo ki a Tavita kae taumafai o tamate a ia. Kae ko Ionatana, te tama a Saulo, ne seki ‵lago ki te taumafaiga a tena tamana ke tamate a Tavita. Ne fai te tautoga a Ionatana mo Tavita ke fakatumau te lā va fakataugasoa kae ke fakatau fesoasoani lāua.—1 Samu. 20:42.

7. Se a te pogai e tasi ne mafai ei o taofi aka te va fakataugasoa o Ionatana mo Tavita?

⁷ E fakaofoofogia ‵ki a te fakatau a‵lofa ne fakaasi ne Ionatana mo Tavita māfai e mafaufau koe ki nisi pogai kolā ne mafai o taofi aka ei te fai o lāua pelā me ne taugasoa pele. E pelā mo Ionatana, e 30 tausaga te matua atu i a Tavita. Ne mafai fua o fakaiku aka ne Ionatana me e seai ne mea e ‵pau ei lāua mo te tamataene sē atamai tenei. Kae ne seki kilo fatauva atu a Ionatana ki a Tavita.

8. Se a tau fakatau, kaia ne fai ei a Ionatana pelā me se taugasoa ‵lei o Tavita?

⁸ Ne mafai fua o loto masei a Ionatana ki a Tavita. E pelā me ko te tama tagata a te Tupu ko Saulo, ne mafai o kinau atu a Ionatana me ko ia te tino e ‵tau o fai mo fai te tupu. (1 Samu. 20:31) Kae ko Ionatana se tino loto maulalo, kae ne fakamaoni a ia ki a Ieova. Tela la, ne ‵lago katoatoa a ia ki te filifiliga a Ieova ke fai a Tavita mo fai te tupu i aso fakamuli. Ne fakamaoni a ia ki a Tavita, faitalia me ne fai ne te mea tenei ke kaitaua a Saulo.—1 Samu. 20:32-34.

9. E iloa pefea ne tatou me ne seki loto masei a Ionatana ki a Tavita? Fakamatala mai.

⁹ Ne alofa malosi a Ionatana ki a Tavita, kae ne seki loto masei tou tagata ki a ia. A Ionatana se tagata poto i te sana matasana kae se toa loto malosi. Ne lauiloa a lāua mo tena tamana ko Saulo me “ma‵kini atu lāua i aeto,” kae “ma‵losi atu i leona.” (2 Samu. 1:22, 23) Tela la, ne mafai fua o faipati fakamatamata a Ionatana e uiga ki mea ne fai ne ia. Kae ko Ionatana e seai se uiga fakatau‵fai i a ia io me ita fakamoemoe. I lō te fai penā, ne tavae ne Ionatana a te loto malosi o Tavita mo tena fakalagolago faeloa ki a Ieova. Ko te taimi eiloa ne tamate ei ne Tavita a Koliata, tenā ne kamata ei o alofa a Ionatana ki a Tavita e pelā mo tena alofa ki a ia eiloa. E mafai pefea o a‵lofa malosi tatou ki ‵tou taina mo tuagane?

10. Se a te uiga o te “fakatau a‵lofa malosi la koutou i a koutou eiloa i otou loto”?

¹⁰ E fai mai te Tusi Tapu “ke fakatau a‵lofa malosi la koutou i a koutou eiloa i otou loto.” (1 Pe. 1:22) Ne tuku mai ne Ieova se fakaakoakoga. E malosi ‵ki tena alofa kae kafai e fakamaoni tatou ki a ia, ka tumau eiloa a tena alofa ki a tatou. (Loma 8:38, 39) A te pati Eleni telā ne ‵fuli ki te “malosi” e fakasino ki se tino telā e taumafai malosi o fakaasi atu te alofa. I nisi taimi, kāti e ‵tau o taumafai malosi tatou ke fakaasi te alofa ki ‵tou taina tali‵tonu. Kafai e fai ne nisi tino a tatou ke ita, e ‵tau mo tatou o “fakatau fa‵ki koutou i otou mea ‵se i te alofa, i te otou taumafai malosi ke fakatumau ne koutou te tasi o te agaga telā ko te fusi o te filemu.” (Efe. 4:1-3) I te taimi e ga‵lue ei tatou o fakatumau te “fusi o te filemu,”  ka se ‵kilo tatou ki mea ‵se a ‵tou taina. Ka taumafai malosi tatou ke maua ne tatou te kilokiloga a Ieova ki ‵tou taina.—1 Samu. 16:7; Sala. 130:3.

11. Kaia e faigata ei ke fakaasi atu te alofa i nisi taimi?

¹¹ E sē se mea faigofie ke fakaasi atu te alofa ki ‵tou taina mo tuagane, maise māfai e iloa ne tatou olotou vāivāiga. Tenā loa te fakalavelave ne tupu ki nisi Kelisiano i te senitenali muamua. E pelā mo Evotia mo Sunetui kāti ne seai se fakalavelave māfai e “ga‵lue fakatasi [mo Paulo] i te tala ‵lei.” Kae isi faeloa se fakalavelave māfai ko ga‵lue fakatasi lāua. Tenā ne fakamalosi atu a Paulo ki a lāua “ke tasi lā mafaufau i te Aliki.”—Fili. 4:2, 3.

12. E mafai pefea o ati aka ne tatou a te alofa ki ‵tou taina mo tuagane?

¹² E fakaasi atu pefea ne tatou a te alofa ki ‵tou taina mo tuagane i aso nei? Kafai ko masani faka‵lei tatou mo taina tali‵tonu, ka mafai o malamalama tatou i a latou kae fai ke a‵lofa tatou ki a latou. E se ‵tau o taofi aka tatou ne ‵tou tausaga io me ko fenua ne ‵mai ei mai te fai taugasoa ki a latou. Masaua me i a Ionatana e 30 ana tausaga e matua atu i a Tavita; kae ne ati aka ne ia se va fakataugasoa mo ia. E mata, e mafai o fai taugasoa koe ki se tino telā e matua atu—io me foliki ifo—i a koe? Mai te fai penā, ko mafai ei o fakaasi atu ne tatou te “a‵lofa ki te kautaina kātoa.”—1 Pe. 2:17.

13. Kaia e se mafai ei o ‵pau te ‵pili o ‵tou va mo tino katoa i te fakapotopotoga?

¹³ Kafai ko a‵lofa tatou ki ‵tou taina tali‵tonu e mata e fakauiga i ei me ka ‵pau eiloa te ‵tou va fakataugasoa mo tino katoa i te fakapotopotoga? Ikai, ka se mafai o tupu te mea tenā. E sē se mea masei māfai e ‵pili atu ‵tou va ki nisi tino ona ko te ‵pau o mea e fia‵fia tatou ki ei. Ne taku ne Iesu ana apositolo katoa me ko ana “taugasoa,” kae ne sili atu tena alofa ki a Ioane. (Ioa. 13:23; 15:15; 20:2) Kae ne seki fapito a Iesu ki a Ioane. E pelā mo te taimi ne fakamolemole atu a Ioane mo tena taina ko Iakopo ke maua ne nofoga fakapito o lāua i te Malo o te Atua, ne fai atu a Iesu ki a  lāua: “E seai saku pule ki te tino ka sagasaga i toku feitu fakaatamai mo toku feitu fakamaui.” (Male. 10:35-40) E pelā mo Iesu, e se ‵tau o fapito tatou ki ‵tou taugasoa ‵pili. (Iako. 2:3, 4) Kafai e fai tatou penā ko fakamāfua ne tatou a mavae‵vaega—se mea telā e se ‵tau o maua i te fakapotopotoga Kelisiano.—Iuta 17-19.

14. E fesoasoani mai pefea te Filipi 2:3 ke seai se uiga fakatau‵fai i a tatou?

¹⁴ Kafai e fakatau fakaasi atu ne tatou a te alofa, ko puipui ne tatou te fakapotopotoga ke seai se uiga fakatau‵fai i ei. Masaua la, me ne seki loto masei a Ionatana ki a Tavita io me fakatau‵fai ki a Tavita ke fai a ia mo tupu. E mafai ne tatou katoa o fakaakoako ki a Ionatana. Ke mo a ma loto masei koe ki tino e ga‵lue tasi mo koe ona ko te lotou atamai, kae ke ‵kilo atu ki a latou “i te loto maulalo mo te manatu me e tāua atu a nisi tino i a koutou.” (Faitau Filipi 2:3.) Ke masaua me isi faeloa se mea aoga e mafai o fai ne tino taki tokotasi mō te ‵lei o te fakapotopotoga. Kafai e tumau tatou i te loto maulalo, ka mafai o lavea ne tatou a mea ‵lei e fai ne ‵tou taina mo tuagane kae maua ne tatou a mea aoga mai i olotou fakaakoakoga ‵lei.—1 Koli. 12:21-25.

15. Ne a au mea ne tauloto mai te tala o Tanya mo tena kāiga?

¹⁵ Kafai ko fe‵paki tatou mo tofotofoga kolā e seki fakamoe‵moe ki ei, e fakamafanafana ne Ieova tatou e auala i te a‵lofa mo te fesoasoani e maua ne tatou mai ‵tou taina mo tuagane. Mafaufau ki te mea ne tupu ki se kāiga i te otiga ne ‵kau atu ki te polokalame i te Aso Ono o te fono ko “Te Alofa e se Mafai o Gata!” i te 2019 i te Iunaite Sitete. “A matou na ko ‵foki o ‵tele ki te motou hotel,” ko pati a  Tanya, se mātua e tokotolu ana tama, “kae ‵tui matou ne te suā motoka telā ne tele ‵se mai ki te motou auala. E seai se tino ne pakia, ne ‵poi matou kae ne ‵tu matou ki tua mo te motoka kae tu‵tu fua i te auala. E isi se tino i te suā feitu o te auala ne tatalo mai ke olo atu matou ki tena motoka. A ia se tokotasi o ‵tou taina telā ko foki mai foki i te fono. Kae e se ko ia fua ne tu mai. Ne ‵tu mai foki a nisi sui e tokolima mai Sweden. Ne ‵sai ne tuagane konā a au mo aku tama fāfine, ko te mea eiloa ne ma‵nako malosi matou ki ei! Ne fai au ki a latou me e mafai latou o olo i a matou e ‵lei loa, kae ne seki mafai o tiaki ne latou a matou. Ne faka‵tali latou mo matou ke oko ki te taimi ne oko mai te kau o te fakaimasaki, kae fakamautinoa foki ne latou me maua ne matou a mea katoa e ma‵nako matou ki ei. Ne lagona ne matou te alofa o Ieova i te taimi kātoa ne tupu ei te fakalavelave. Ne fakamalosi aka ne te mea ne tupu a te motou a‵lofa ki ‵tou taina mo tuagane kae fai foki ei ke ‵poko kae loto fakafetai malosi matou ki a Ieova.” E masaua ne koe se taimi ne manako malosi koe ki se fesoasoani kae ne fakaasi atu ne se taina talitonu te alofa ki a koe?

16. Ne a pogai e fakamalosi mai ki a tatou ke fakatau fakaasi atu te alofa?

¹⁶ Mafaufau ki mea e mafai o iku mai māfai e fakatau fakaasi atu ne tatou te alofa. E fakamafanafana atu tatou ki ‵tou taina mo tuagane māfai ko fe‵paki latou mo fakalavelave. E faka‵mautakitaki ne tatou te ‵kau fakatasi o tino o te Atua. E fakamaoni atu ne tatou i a tatou ko soko o Iesu, kae e fai ne te mea tenei ke fia ‵kau mai a tino loto ‵lei ki te tapuakiga tonu. Kae sili i mea katoa, e fakaaloalo eiloa tatou ki “te Tamana o te alofa fakamagalo mo te Atua o fakamafanafanaga katoa,” ko Ieova. (2 Koli. 1:3) Ke na ati aka eiloa ne tatou a te alofa kae ke fakaasi atu foki ki nisi tino!