1. Кытысь адӟиське, семьяосын яратон сӥяз шуыса?

 БИБЛИЫН азьло ик гожтэмын вал, берпум нуналъёсы тросэз адямиос «гажан-жалянэз тодӥсьтэмесь» луозы шуыса (2 Тим. 3:1—3). Озьы ик луэ: трос миллион кузпалъёс люкисько, анай-атайёс ог-огзэс адӟемпотостэм каро, нош нылпиос шӧдо, соос нокинлы но кулэ ӧвӧл шуыса. Со семьяосын но, кудъёсаз ваньзы огазьын уло, ог-огенызы матысь кусыпъёссы ӧвӧл. Одӥг психолог вераз: «Анайёс, атайёс но нылпиос ог-огзылэсь палэнскизы, соос электрон тӥрлыкъёсазы учкыса гинэ пуко. Соос одӥг липет улын уло кадь, но ог-огзэс умой-умой уг тодо».

2, 3. а) Римъёслы 12:10 гожтэмъя, кинэ ми агай-вынъёсмес кадь яратыны кулэ? б) Мае ми эскеромы та статьяын?

² Та дуннеысь адямиослэн яратонзы сӥя. Милям соослэсь адӟем кареммы уг поты (Рим. 12:2). Ми валаськомы, милемлы семьямес но, огъя оскисьёсмес но агай-вынъёсмес кадь яратыны кулэ шуыса. (Лыдӟе Римъёслы 12:10.) «Агай-вынъёс кадь яратэ» веран возьматэ шуныт кусыпъёсты, кудъёсыз матысь ӵыжы-выжыосты огазеяло. Озьыен, кенешын ми ог-огмылы семья кадь луыны кулэ. Соку ми быгатомы огкылысь но шумпотыса Иеговалы ужаны-тыршыны (Мих. 2:12).

³ Нош кызьы будэтоно сыӵе яратонэз? Милемлы юрттозы Библиысь куд-ог примеръёс.

4. Макем юн яратэ милемыз Иегова, Иаковлэн 5:11 верамъя?

⁴ Библиысь ми тодӥськомы, Иеговалэн паймымон сямъёсыз сярысь. Кылсярысь, отын гожтэмын: «Инмар —  со яратон» (1 Иоанн 4:8). Тае тодыса, милям мылкыдмы ӝутске соин эшъяськыны. Со сяна, Инмарлэн Кылаз вераське, Иегова «ӟеч сюлэмо» шуыса. (Лыдӟе Иаковлэсь 5:11.) Ваньмыз та возьматэ: Иегова милемыз туж яратэ!

5. Кызьы Иегова гажась-жалясь луэмзэ возьматэ но кызьы ми солэсь адӟем карыны быгатӥськомы?

⁵ Висъялэ саклыктэс, Иаковлэн 5:11 озьы ик вераське Иеговалэн гажан-жалянэз сярысь но (Пот. 34:6). Иегова та сямез возьматэ, куке милесьтым янгышъёсмес простить каре (Пс. 50:3). Но Библия вера, та сямез возьматон понна, эшшо мар ке но кароно на шуыса. Та сям милесьтым мылкыдмес ӝутэ юрттыны соослы, кинъёс кыӵе ке куректонэн пумиськизы. Иегова вера, солэн яратонэз анайлэн нылпизэ яратэмезлэсь но юнгес шуыса (Ис. 49:15). Соин ик, ми шуг-секытъёсын пумиськиськомы ке, Иегова милемлы котьку но юрттыны тырше (Пс. 36:39; 1 Кор. 10:13). Ми гажан-жалянмес возьматӥськомы, куке вын-агайёсмес но сузэр-апайёсмес простить кариськомы. Соос милемыз вӧсь каризы ке но, ми соослы вожмес ум поттӥське (Еф. 4:32). Со сяна, та сям милесьтым мылкыдмес ӝутэ огъя оскисьёсмылы юрттыны, куке соос шуг-секытъёсын пумисько. Озьы ми Иеговалэсь адӟем кариськомы, кызьы яратонэз но гажан-жалянэз возьматоно (Еф. 5:1).

6. Вералэ, кыӵе кусыпъёссы вал Ионафанлэн но Давидлэн.

⁶ Библиысь ми тодӥськомы, тырбыдэстэм адямиос но юн эшъяськыны быгато шуыса. Тодамы ваёмы Ионафанэз но Давидэз. 1 Эксэйлыкъёслэн 18:1 гожтэмын: «Ионафан лулыныз-сюлмыныз со борды лякиськиз, Ионафан сое ас лулзэ кадь яратӥз». Саул интые Давид эксэй луыны зырӟемын вал. Собере, кӧня ке дыр ортчыса, Саул сое адӟемпотостэм кариз но виыны турттӥз. Нош Сауллэн пиез, Ионафан,  атаез сямен, Давидэз адӟемпотостэм ӧз кары. Ионафан но Давид ог-огзылы кылзэс сётӥзы, пумтэм вапумъёс ӵоже эшъёс луозы шуыса (1 Экс. 20:42).

7. Мар люкетыны быгатысал эшъяськыны Ионафанлы но Давидлы?

⁷ Ионафанлэн но Давидлэн эшъяськонзы туж паймымон, малы ке шуоно соослы эшъяськыны трос шуг-секытъёс люкетыны быгато вал. Кылсярысь, Ионафан Давидлэсь 30 ареслы бадӟымгес вал. Ионафан малпаны быгатысал, солы Давидэн эшъяськыны тунсыко уз луы шуыса, малы ке шуоно Давид солэсь трослы егитгес но со кадь улонэз адӟемын ӧвӧл на. Но Ионафан озьы ӧз малпа, со туж гажаз Давидэз.

8. Кызьы тӥ малпаськоды, малы Ионафан Давидлы умой эш вал?

⁸ Со сяна, Ионафан Давидлы вожъяськыны быгатысал, малы ке шуоно, Сауллэн пиез луыса, Ионафан эксэй луыны кулэ вал (1 Экс. 20:31). Нош со зӥбыт-востэм но Иеговалы оскымон адями вал, соин ик соглаш луиз Иеговалэн кутэм ужпуменыз — Давидэз эксэе пуктыны. Озьы ик Ионафан Давидлы оскымон вал, соин сэрен атаез со вылэ туж вожзэ поттыса улӥз ке но (1 Экс. 20:32—34).

9. Учкиз-а Ионафан Давид шоры аслаз тушмонэз шоры кадь? Валэктэ.

⁹ Ионафан туж яратӥз Давидэз. Со шоры аслаз тушмонэз шоры кадь со ӧз учкы. Ионафан пукыӵен быгатыса ыбылӥськиз но кышкатэк ожмаськиз. Со сярысь но Саул атаез сярысь веразы, соос «ӧрӟиослэсь шаплыесьгес, левъёслэсь но кужмоесьгес вал» шуыса (2 Экс. 1:22, 23). Кылсярысь, Ионафан ушъяськыны быгатысал вормонъёсыныз. Нош со Давидлы ӧз вожъяськы но солэсь умойгес луыны ӧз тыршы. Ионафанлы туж кельше вал Давидлэн кышкасьтэм луэмез но Иеговалы юн оскемез. Тунсыко, куке Давид Голиафез вормиз, Ионафан сое туж яратыны кутскиз. Нош кызьы ми вын-агайёсмылы но сузэр-апайёсмылы сыӵе ик яратонмес возьматыны быгатӥськомы?

10. Мае возьмато «котьку но... чылкыт сюлэмен яратэлэ» кылъёс?

¹⁰ Библия милемыз ӧте: «Котьку но огдэс огды чылкыт сюлэмен яратэлэ» (1 Пётр 1:22). Та пумысен Иегова милемлы умой адӟем карон возьматэ. Со ужась-тыршисьёссэ сокем зол яратэ, соосты яратэмысь со ноку уз дугды (Рим. 8:38, 39). Грек кыл, кудӥз татын «котьку» шуыса берыктэмын, вера адями сярысь, кудӥз туж тырше яратэмзэ возьматыны. Зэм но, вын-агайёсмес яратон понна, куддыръя туж тыршыны кулэ. Соос милемыз вӧсь каро ке но, милемлы соосты чидано но яратоно, малы ке шуоно Библиын гожтэмын: «Одӥг духен тупаса, огмылкыдын улыны тырше» (Еф. 4:1—3). Ми вань сюлмысьтымы тупаса улыны тыршиськомы ке, соку ог-огмылэн тырмымтэосмылы саклыкмес ум висъялэ, нош вын-агайёсмы шоры Иегова сямен учкыны тыршомы (1 Экс. 16:7; Пс. 129:3).

11. Малы куддыръя вын-агайёсмылы но сузэр-апайёсмылы яратонмес возьматыны капчи ӧвӧл?

¹¹ Куддыръя вын-агайёсмылы но сузэр-апайёсмылы яратонмес возьматыны капчи ӧвӧл, тужгес но соку, куке ми соослэсь тырмымтэоссэс адӟиськомы. Озьы вал нырысетӥ даурысь христиан кенешын но. Еводия но Сӥнтихия кыӵе ке но дыре апостол Павелэн ӵош ужазы-тыршизы, вылды,  но кыӵе ке но мугъёсын сэрен ог-огенызы тупаса ӧз улэ. Соин ик Павел куриз соосты «Кузё-Инмарлы тыршыса, огмылкыдын» улыны (Флп. 4:2, 3).

12. Мар юрттоз милемлы вын-агайёсты но сузэр-апайёсты яратыны?

¹² Мар юрттоз милемлы кенешысь вын-агайёсты но сузэр-апайёсты яратыны? Милемлы соосты валаны но яратыны капчигес луоз, ми соосын умойгес тодматскимы ке, кыӵе гинэ арлыдзы соослэн медаз луы но кыӵе гинэ калыкысь соос медаз потэ. Тодамы ваёмы, Ионафан Давидлэсь 30 ареслы бадӟымгес вал шуыса. Но со ӧз люкеты соослы юн эшъяськыны. Нош быгатӥськоды-а тӥ эшъяськыны кенешысь агаен яке сузэрен, кудӥз тӥлесьтыд бадӟымгес яке егитгес? Озьы тӥ возьматоды, быдэс вынлыкез яратӥськоды шуыса (1 Пётр 2:17).

13. Малы малпано ӧвӧл, кенешысь вань вын-агайёс но сузэр-апайёс милемлы матысь эшъёс луозы шуыса?

¹³ Возьматэ-а со, кенешысь вань вын-агайёс но сузэр-апайёс милемлы матысь эшъёс луозы шуыса? Уг, дыр. Номыр уродэз ӧвӧл, милемлы кельше ке эшъяськыны соосын, кинъёсын милям трос огкадез вань. Кылсярысь, Иисус вань апостолъёссэ эшъёс шуыса нимаз. Но Иоанн солы тужгес но дуно вал (Иоанн 13:23; 15:15; 20:2). Озьы ке но со уг возьматы, Иисус Иоаннэз нимысьтыз висъяз шуыса. Куке Иоанн но солэн Иаков выныз Инмарлэн Эксэйлыказ асьсэлы дано инты Иисуслэсь куризы, Иисус соослы шуиз: «Бурпалам, я паллян палам пуктыны — Мынам эрике ӧвӧл» (Марк 10:35—40). Ми Иисуслэсь адӟем кариськомы но тыршиськомы кенешысь вань агайёсты но сузэръёсты яратыны, эшъёсмес нимысьтыз висъятэк (Иак. 2:3, 4). Озьы ми кенеше тупаса но огкылысь улон ваёмы (Иуда 17—19).

14. Кызьы Филиппыослы 2:3 юрттоз милемлы ог-огмылы вожъяськытэк улыны?

¹⁴ Куке ми кенешын ог-огмес яратӥськомы, соку вын-агайёсмылэсь но сузэр-апайёсмылэсь  умойгес луыны ум тырше. Тодады возе, Ионафан Давидлы ӧз вожъяськы но со интые эксэй луыны ӧз тыршы. Милям но уг поты вын-агайёсынымы но сузэр-апайёсынымы ӵошатскеммы но соослэн быгатонлыкъёссылы вожъяськеммы. Со интые, ми зӥбыт-востэм луэммес возьматӥськомы но мукетъёссэ асьмелэсь вылӥегес пуктӥськомы. (Лыдӟе Филиппыослы 2:3.) Ойдолэ ум вунэтэ, кенешын котькудӥз дуно шуыса. Зӥбыт-востэм сям юрттоз милемлы вын-агайёсмылэсь но сузэр-апайёсмылэсь умой сямъёссэс адӟыны но соослэсь адӟем карыны (1 Кор. 12:21—25).

15. Малы дышетэ милемыз Таня сузэренымы луэм учыр?

¹⁵ Шуг-секытъёсын пумиськыкумы, вын-агайёс но сузэр-апайёс милемлы яратэмзэс возьмато ке но уж вылын юртто ке, ми ас выламы шӧдӥськомы Иеговалэсь сюлмаськемзэ. Тани мар луиз Таня нимо сузэренымы. 2019-тӥ арын со куинь нылпиосыныз ӵош Огазеяськем Штатъёсын ортчись «Яратон ноку уг ортчы» калыккуспо конгрессын вал. Кӧснуналэ ӝыт соос машинаен гостиницаязы берытско вал. Таня вера: «Шӧдтэк шорысь ми борды шуккиськиз милемлы пумит мынӥсь машина. Нокудмы но вӧсь ӧм луэ, но ми туж кышкамы. Машинаысь потыса, ми сюрес вылэ султӥмы. Собере ми адӟимы, сюрес дурын кин ке но милемлы киыныз шона но машинаяз ӧте шуыса. Со вал агаймы, кудӥз со конгрессысь ик берытске вал. Озьы ик милемлы мукетъёсыз но юрттэтсэс ӵектӥзы. Со агай сяна, дугдӥзы на Швециысь вить кузя агайёс но сузэръёс.  Та сузэръёс монэ но нылме туж шуныт ӟыгыртӥзы. Милемлы со туж кулэ вал! Мон агайёслы но сузэръёслы верай, соос ми понна медаз сюлмаське но сюрессэс мед азьланьтозы шуыса. Но соос милемыз ӧз кельтэ. Соос возьмазы, куке эмъясьёс вуозы но вералозы, милемын ваньмыз умой шуыса. Вань со дыр ӵоже ми Иеговалэсь яратыса сюлмаськемзэ шӧдӥмы. Та учыр бере ми эшшо но золгес дунъяны кутскимы вын-агайёсмес но сузэр-апайёсмес, озьы ик Иеговалэсь яратэмзэ но сюлмаськемзэ». Нош вал-а тӥляд сыӵе учырды, куке вын-агайёс но сузэр-апайёс самой кулэ дыръяз яратэмзэс возьматӥзы но тӥледлы юрттӥзы?

16. Кыӵе милям мугъёсмы вань вын-агайёсмылы но сузэр-апайёсмылы яратонмес возьматыны?

¹⁶ Макем кулэ ог-огмылы яратонмес возьматыны? Озьы ми юрттомы вын-агайёслы но сузэр-апайёслы, кудъёсызлы юрттэт кулэ, озьы ик Инмарлэн калыкезлы огкылысь улыны юрттомы. Со сяна, зӥбыт-востэм адямиос адӟозы, ми Христослэн зэмос дышетскисьёсыз луиськомы шуыса. Солы луыса соослэн но Иегова Инмармылы ужамзы-тыршемзы потоз. Нош эшшо но кулэезгес, озьы ми данъяськомы Иеговаез — «гажан-жалянлэсь Атайзэ, котькыӵе буйгатсконлэсь Инмарзэ» (2 Кор. 1:3). Соин ик ойдолэ азьланяз но яратонмес будэтомы но сое вын-агайёсмылы но сузэр-апайёсмылы возьматомы.