1. Nye ci lekisa okuti koloneke vilo, pokati kapata ka pali ocisola?

EMBIMBILIYA lia popele okuti koloneke via sulako omanu ka va kuatela ‘ocisola vangadiavo.’ (2 Tim. 3:1, 3) Koloneke vilo, tu lete oku tẽlisiwa kuocitumasuku eci. Ndeci, apata alua a linyala kuenda va likuetele olonyeño kuenje omãla va liyeva okuti ka va soliwe. Ndaño epata lina okuti li kasi pamosi ka va likuetele ukamba. Umue ukuakueca alungulu vapata wa popia hati: “Ina, isia kuenda omãla ka va sapela, va pita otembo yalua volokombutador, volotablet, volotelefone kuenda volovideo game. Ndaño okuti va kasi vonjo yimuamue ka va li kũlĩhĩle ciwa.”

2-3. (a) Ndomo ca tangiwa ku Va Roma 12:10, velie tu sukila oku sola lutima wosi? (b) Nye tu konomuisa vocipama cilo?

² Ka tu yongola oku setukula ovituwa violuali lulo okuti, ka lu kuete ocisola. (Va Rom. 12:2) Pole, tu yongola oku lekisa ocisola kepata lietu kuenda ku vamanji vosi vekongelo lutima wosi. (Tanga Va Roma 12:10.) Oku sola lutima wosi ci lomboloka nye? Ci lomboloka ocituwa cimue ci lekisiwa pokati kepata eci va likuetele ukamba. Ocisola caco, haicovo tu sukila oku kuatela vamanji vekongelo. Eci tu sola lutima wosi, tu kuatisa koku kuata omunga okuti oco ci kuete esilivilo vefendelo liocili.—Mika 2:12.

³ Oco tu kuatisiwe oku sola lutima wosi, tu konomuisi eci tu sukila oku lilongisa kovolandu o kosimbu.

4. Ndomo ca tangiwa ku Tiago 5:11, ku tu sapuila nye catiamẽla kocisola ca Yehova?

⁴ Embimbiliya li tu sapuila eci catiamẽla kovituwa viwa via Yehova. Ndeci, olio li tu sapuila hati, “Suku eye ocisola.” (1 Yoa. 4:8) Oku kũlĩha ovina evi, ci tu vetiya oku linga ukamba la Yehova. Pole, Embimbiliya li tu sapuilavo okuti Yehova “ukuacisola calua.” (Tanga Tiago 5:11.) Yehova o tu kuetele ocisola calua!

5. Yehova o lekisa ndati ohenda kuenda tu pondola oku u setukula ndati?

⁵ Limbuka okuti kukanda wa Tiago 5:11, ku tukula ocisola calua ca Yehova kuenda ocituwa cikuavo ci tu vetiya okuti, ohenda. (Etu. 34:6) Onjila yimue Yehova a siata oku lekisa ohenda kokuetu, poku ecela akulueya etu. (Osa. 51:1) Vembimbiliya, vohenda mua kongela vali calua okuti oku ecela lika ci sule. Ohenda ocituwa cimue ci kasi vokati komunu okuti, eci eye a mola umue o kasi oku tala ohali o vetiyiwa oku kuatisa omunu waco. Yehova o tu sapuila okuti, onjongole yaye yoku tu kuatisa yalua vali okuti, eyi ina umue a kuetele omõlaye yi sule. (Isa. 49:15) Eci tu tala ohali, Yehova omo liohenda o vetiyiwa oku tu kuatisa. (Osa. 37:39; 1 Va Kor. 10:13) Tu sukila oku lekisa ohenda ku vamanjetu poku va ecela kuenda oku yuvula oku va kuatela ocikumbiti eci va tu lueyela. (Va Efe. 4:32) Onjila yikuavo tu lekisa ohenda poku kuatisa vamanjetu eci va liyaka lovitangi. Eci ocisola ci tu vetiya oku lekisa ohenda ku va kuetu, tu setukula Yehova ukuangangu ya velapo yocisola calua.—Va Efe. 5:1.

6. Ocisola cipi Yonatão la Daviti va likuatela?

⁶ Embimbiliya li lombolola ovolandu omanu ka va lipuile okuti va lisolele lutima wosi. Kũlĩhĩsa ulandu wa Yonatão la Daviti. Embimbiliya li popia hati: “Yonatão wa lipandeka lutima wa Daviti kuenje wo sola ndomuenyo waye  muẽle.” (1 Sam. 18:1) Yehova wa ñola Daviti oco a linge osoma noke lia Saulu. Eci Saulu a fetika oku kuatela esepa Daviti, wa seteka oku u ponda. Pole, Yonatão omõla a Saulu ka likongelele kusuanji wa isiaye woku ponda Daviti. Yonatão la Daviti va likuminya oku amamako oku kala akamba loku likuatisa pokati.—1 Sam. 20:42.

7. Ovina vipi nda via tateka Yonatão la Daviti oku kala akamba?

⁷ Ocisola Yonatão la Daviti va likuatela ca limbukiwa vali enene eci tu konomuisa ovina vialua nda via tateka ovo oku likuatela ukamba. Ndeci, Yonatão la Daviti va likambelele 30 kanyamo. Yonatão nda wa sokolola okuti, eye la Daviti kanyamo va litepa calua kuenda umalẽhe waño, okuti ukũlĩhĩso waye utito. Pole, Yonatão ka kuatele ovisimĩlo viaco, eye wa sumbilile calua Daviti.

8. Nye o simĩla okuti Yonatão wa kala ekamba liwa ku Daviti?

⁸ Yonatão nda wa kuata esunga lioku kuatela esepa Daviti. Omo okuti Yonatão omõla a Soma Saulu, eye nda wa tamalala oku nõla oku piñala ocalo ca isiaye. (1 Sam. 20:31) Pole, Yonatão wa kala embombe kuenda wa kala ukuacili ku Yehova. Eye wa pokola konjila Yehova a kuama yoku nõla Daviti oco a piñale usoma. Yonatão wa kalavo ukuacili ku Daviti, ndaño okuti eci ca kokela onyeño yalua Saulu.—1 Sam. 20:32-34.

9. Tua kũlĩha ndati okuti Yonatão ka kuatelele esepa Daviti? Ci lombolola.

⁹ Yonatão wa solele Daviti lutima wosi kuenje ko tendele ndunyali. Yonatão wa loñolohele koku hasa ohonji kuenda wa kala esualali limue ukuotõi. Eye kumue la isiaye Saulu, va kuatele oluhimo luokuti, “kongusu va velapo” okuti, olohosi vi sule.” (2 Sam. 1:22, 23) Yonatão wa kuatele esunga lioku lipanda omo liovoloño aco. Ndaño ndoco, Yonatão ka setekele oku lekisa okuti wa velelepo Daviti kuenda ka lekisile esepa kovina viwa Daviti a linga. Pole, Yonatão wa komõha calua utõi wa Daviti kuenda ekolelo liaye ku Yehova. Noke lia Daviti oku ponda Goliata, Yonatão wa fetika oku sola vali calua Daviti. Tu pondola oku solavo ndati vamanjetu lutima wosi?

10. Nye ci lomboloka oku ‘lisola pokati omunu lukuavo lutima wosi’?

¹⁰ Embimbiliya li tu sapuila oco tu “lisoli pokati omunu lukuavo lutima wosi.” (1 Pet. 1:22) Yehova ongangu yiwa kokuetu. Ocisola caye, calua okuti nda etu tuamamako oku kala vakuacili kokuaye, eye lalimue eteke a ka liwekapo oku tu sola. (Va Rom. 8:38, 39) Oku sola “lutima wosi” ceca ocisimĩlo comunu umue o likolisilako oku lekisa ocisola. Olonjanja vimue ka ca lelukile oku sola vamanjetu lutima wosi. Eci vakuetu va tu sumuisa tu sukila oku ‘pandikisa omunu lukuavo locisola, loku kuata ombembua omunu lukuavo loku likolisila oku likuata omunga, yina tua tambula omo liespiritu sandu.’ (Va Efe. 4:1-3) Eci tu likolisilako ‘oku kuata ombembua’ lavamanjetu, ka tu ka kapako akulueya avo. Tu ka likolisilako oku va tenda ndeci Yehova a va tenda.—1 Sam. 16:7; Osa. 130:3.

11. Momo lie olonjanja vimue ci tĩlila oku sola lutima wosi?

¹¹ Olonjanja vimue, ka ci leluka oku sola va manjetu lutima wosi, ca piãla enene eci tu limbuka akulueya avo. Eci oco ca kala ocitangi Kakristão vamue vo kocita catete. Ndeci, Euodia la Suntuke, ci tava okuti ka  va kuatele ovitangi eci va kala oku talavaya “kumue [la Paulu] koku kunda olondaka viwa.” Pole, omo liasunga amue va kuatele ocitangi coku lisola pokati. Kuenje Paulu wa va lungula “oco va kuate utima umuamue vu Ñala.”—Va Fil. 4:2, 3.

12. Tu lekisa ndati okuti tu sole vamanjetu lutima wosi?

¹² Tu lekisa ndati okuti tu sole vamanjetu lutima wosi koloneke vilo? Eci tu kũlĩha ciwa vamanji, ci leleluka calua oku kuata elomboloko liovitangi va liyaka lavio kuenda oku va sola lutima wosi. Kuenje tu pondola oku kala akamba vavo ndaño okuti akulu, amalẽhe, ale vakuapata a litepa. Ivaluka okuti Yonatão la Daviti va likambelele 30 kanyamo; ndaño ndoco eye wa pamisa ukamba uwa laye. Anga hẽ vekongelo o kasi, muli umue okuti ukulu, ale umalẽhe okuti o pondola oku kala ekamba liove? Poku ci linga, o lekisa okuti o ‘sole vamanji vosi.’—1 Pet. 2:17.

13. Momo lie pamue ka tu ponduila oku kala ekamba lia vosi vekongelo?

¹³ Oku sola vamanji lutima wosi ci lomboloka hẽ oku kuata ukamba la vosi vekongelo? Sio, eci ka ci tẽliwa. Pole, ndaño okuti ka tu kuata ukamba la vosi vekongelo eci ka cĩviko, momo vosi tu kuete ocimaho cimuamue. Yesu wa tukula olondonge viaye viosi okuti “akamba,” pole, wa kuatelele ocisola ci likasi ku Yoano. (Yoa. 13:23; 15:15; 20:2) Pole, Yesu wa tata olondonge viosi lonjila yimuamue. Ndeci, eci Yoano lamanjaye Tiango va pinga ocitumãlo cimue ca velapo Vusoma wa Suku, Yesu wa va sapuila hati: “Si kuete omoko yoku tuma omunu oku tumãla kondio yange ale kepĩli liange.” (Mar. 10:35-40) Poku setukula Yesu, tu sukila oku tata vamanji lonjila yimuamue. (Tia. 2:3, 4) Nda ka tua cilingile ka tu pondola oku kuatisa ekongelo oku likuata omunga.—Yuda 17-19.

14. Ndomo ca tangiwa ku Va Filipoi 2:3, nye ci tu kuatisa oku yuvula ocituwa coku lipanda?

 ¹⁴ Eci tu lekisa okuti tu sole vamanji lutima wosi, tu ka teyuila ekongelo kocituwa coku lipanda. Ivaluka okuti, Yonatão ka kuatelele esepa Daviti kuenda ka setekele oku tambula usoma kokuaye. Vosi yetu tu sukila oku setukula ongangu ya Yonatão. Ka tu ka kuateli esepa vamanji omo liuloño va kuete, ‘pole, loku omboka tu tendi vakuetu okuti va velapo etu tu sule.’ (Tanga Va Filipoi 2:3.) Ivaluka okuti omunu lomunu vekongelo, o pondola oku linga cimue ci kuatisa ekongelo. Nda tuamamako oku lekisa umbombe tu ka limbuka ovituwa viwa via vamanjetu kuenda tu ka kuatisiwa longangu yekolelo liavo.—1 Va Kor. 12:21-25.

15. Nye wa lilongisa kulandu wa manji Tanya kumue lepata liaye?

¹⁵ Eci tu liyaka locitangi cimue, Yehova locisola calua o tu lembeleka kuenda o tu kuatisa pocakati ca vamanjetu. Kũlĩhĩsa eci ca pita lepata limue noke yongele yolofeka ya Casapalo kunyamo 2019, losapi hati: “Ocisola Lalimue Eteke ci Tokoka!” ko Estados Unidos. Manji Tanya okuti o kuete omãla vatatu wa lombolola hati, “Eci tua kala oku tiukila ko wotele ekalu limue lia veta vekãlu lietu. Lomue wa li lemeha, pole, tua kala lumba, tua tunda vekãlu kuenje tua talama vetapalo. Umue wa tu sapuila oco tu iñile vekãlu liaye okuti tu teyuiwa. Eye manjetuvo wa kala oku tunda kohongele yofeka. Hayeko lika wa talama. Ci soka vamanji vatãlo vo ko Suécia, va talamavo. Vamanji  akãi va kuata kapepe omãla vange lame kuenje tua liyeva ciwa! Ame nda sapuila vamanji oco vamameko lungende wavo tu kala ciwa, pole, ovo ka va tavele oku tu siapo. Ovo va kala letu toke eci olondotolo via pitĩla kuenda ovo va kũlĩhisa ovina viosi tua sukilile. Vokuenda kuocitangi caco, tua limbuka ocisola ca Yehova. Eci ca pamisa ocisola tu kuetele vamanjetu, ca pamisavo ocisola lolopandu vietu ku Yehova.” Ove hẽ ivaluka epuluvi wa sukilile ekuatiso kuenda vamanji va lekisa ocisola kokuove?

16. Asunga api tu kuete oku lekisa okuti tu lisole lutima wosi?

¹⁶ Tu sokololi ovina viwa vi pita letu eci tu lekisa okuti tu lisole lutima wosi. Tu lembeleka vamanjetu eci ovo va pita lovitangi. Tu pamisa omunga yi sangiwa pokati kafendeli va Suku. Tu lekisa okuti tu londonge via Yesu kuenda poku ci linga omanu va kuotima wa sunguluka va ka vumba Yehova. Handi vali ocina ca velapo, tu ka eca ulamba ku “Isia yohenda kuenda Suku yelembeleko liosi,” Yehova. (2 Va Kor. 1:3) Omo liaco, vosi yetu tu amamiko oku likolisilako oku lisola lutima wosi!