1. Cossa che mostra che no ghen’è pi amor nele fameie de ancoi?

NELA BÌBLIA, l’era belche scrito che nei ùltimi giorni no ghen saria amor intrà le persone dela medèsima fameia. (2 Tim. 3:1, 3) Ancoi, vedemo che questo l’è pròpio drio suceder. Par esémpio, in arquante fameie, i fioi no i riceve amor, i genitori i seita barufar e milioni i se spartisse. Tante volte, gnanca quei che i ze de star nela medèsima casa i se cognosse ben. Un omo che el dà consili par le fameie el ga dito: “El pupà, la mama e i fioi no i se parla intrà de lori, ma i ze sempre su par i computadori, tablet, telèfoni e giughi. Anca che i sìpia de star nela medèsima casa, lori i se cognosse poco.”

2-3. (a) De acordo con Romani 12:10, a chi che ghemo de amar? (b) Cossa che ndaremo imparar in questo stùdio?

² Noantri no volemo esser come tante persone del mondo che no le ga amor. (Rom. 12:2) Noantri volemo mostrar amor ai altri. (Ledi Romani 12:10. *) Volemo mostrar che amemo quei dela nostra fameia, ma volemo anca mostrar amor par i nostri fradei. Quando mostremo amor par i nostri fradei, tuti noantri servimo a Geovà contenti e unidi. — Mic. 2:12.

 ³ Cossa che pol giutarne a far pi forte el amor che ghemo par i nostri fradei? Ndaremo imparar a far questo par meso de arquanti esempi dela Bìblia.

4. Cossa che el Salmo 103:8 el parla sora el amor de Geovà?

⁴ La Bìblia la mostra le bele qualità de Geovà. Par esémpio, la parla che “Dio l’è amor”. (1 Gio. 4:8) Saver che Dio l’è amor, ne fà voler esser so amighi. Ma la Bìblia anca la dise che Geovà el ‘ga tanto amor leal’ par noantri. (Ledi Salmo 103:8. *) Queste parole le ne giuta a capir che Geovà el ne ama tanto.

5. (a) Come che Geovà el mostra misericòrdia? (b) Come che podemo far compagno a Geovà?

⁵ Come ghemo visto, el Salmo 103:8 el parla che Dio el ga tanto amor e anca che l’è misericordioso. (Éso. 34:6) La misericòrdia la ze quel che fà una persona giutar nantra quando la infronta dificoltà. Geovà el mostra la so misericòrdia quando el ne perdona e quando el ne giuta a infrontar le nostre dificoltà. (Sal. 51:1; Sal. 37:39; 1 Cor. 10:13) Geovà el dise che lu el vol giutarne de pi che una mama la vol giutar el so fiol. (Isa. 49:15) Come che noantri podemo far compagno a Geovà? Noantri mostremo misericòrdia par i nostri fradei quando li perdonemo e quando no seitemo disgustadi con lori. (Efe. 4:32) Ma la maniera pi importante de mostrar misericòrdia l’è giutar ai nostri fradei quando lori i infronta dificoltà. Cossita, saremo drio imitar el nostro pi grando esémpio de amor, che l’è Geovà. — Efe. 5:1.

6. Come la era la amicìssia intrà Gionatan e Davi?

⁶ Nela Bìblia, ghen’è esempi de servi de Geovà che i era veri amighi. Un bel  esémpio l’è quel de Gionatan e Davi. La Bìblia la dise che Gionatan e Davi i ze deventadi veri amighi e che Gionatan lo amea come a lu stesso. (1 Sam. 18:1) Saul, che l’era pare de Gionatan, el gavea tanta gelosia de Davi parché Geovà lo gavea scoliesto come rè de Israel e el gavea fin proà copar Davi. Ma Gionatan no l’è restà dela banda de so pare. Gionatan e Davi i ga prometesto continuar amighi e sempre giutarse un al altro. — 1 Sam. 20:42.

7. Cossa che podea intrigar Davi e Gionatan de esser amighi?

⁷ Gionatan e Davi i gavea tante robe difarente un del altro. Par esémpio, Gionatan el gavea intorno de 30 ani de pi che Davi. Gionatan el podea pensar cossita: “Davi l’è tanto pi gióveno che mi e ancora no’l sa tante robe. La nostra amicìssia no la pol ndar avanti.” Ma Gionatan no’l pensea cossita e gnanca no’l tratea Davi come manco importante che lu.

8. Parché che Gionatan l’è stato un vero amigo par Davi?

⁸ Come fiol de Saul, Gionatan el podaria voler esser el pròssimo rè e gaver invìdia de Davi. (1 Sam. 20:31) Ma Gionatan l’era ùmile e leal a Geovà. Alora, lu el ga acetà che Geovà el gavea scoliesto Davi par esser rè. Gionatan l’è stato leal anca a Davi, anca se so pare el restesse pròpio inrabià con questo. — 1 Sam. 20:32-34.

9. Sarà che Gionatan el vedea a Davi come un nemigo? Spiega.

⁹ Gionatan el savea doperar tanto ben el arco e la fressa e l’era un omo de coraio. Tanti i disea che Saul e Gionatan i era “pi svelti che le àchile e pi forti che i leoni”. (2 Sam. 1:22, 23) Ma Gionatan no’l volea farse veder ai altri, no’l gavea invìdia de Davi e gnanca no’l pensea che lu l’era so nemigo. Invesse, Gionatan el amea tanto a Davi. Lu el vedea che Davi l’era un omo de coraio e che el se fidea tanto in Geovà. Par esémpio, Gionatan el ga scominsià a amar Davi come a lu stesso dopo che Davi el ga copà Golia. Come che noantri podemo mostrar che amemo cossita i nostri fradei?

10. Cossa che vol dir amar tanto ai nostri fradei?

¹⁰ Geovà l’è un esémpio par noantri parché lu el ne ama tanto e lu el ndarà amarne par sempre se noantri ghe semo leai. (Rom. 8:38, 39) La Bìblia la dise che noantri ghemo de amar tanto ai altri e de cuor. (1 Pie. 1:22) La spression greca doperada in questo testo la vol dir stirar una roba fin che se pol. Dele volte, noantri gavaremo de far tanto sforso par mostrar amor ai nostri fradei. Par esémpio, se un fradel el fà qualcossa che ne assa cativi, ghemo de ‘soportar un al altro con amor, far sforso par mantegner la pace parché la produse la union che la vien del spìrito’. (Efe. 4:1-3) Alora, se volemo che ghen sìpia pace nela congregassion, ghemo de veder i fradei come Geovà li vede e no seitar vardar i so sbali. — 1 Sam. 16:7; Sal. 130:3.

11. Cossa che pol intrigarne de mostrar amor par i nostri fradei?

¹¹ No l’è fàcile amar ai nostri fradei quando noantri vedemo i so sbali. Nel  primo sècolo, questo el ga sucedesto con Evòdia e Sìntiche. Lore le era brave par laorar nela predicassion con Paolo. Ma ghen’era qualcossa che no le assea ndar intese. Alora, Paolo el ghe ga dito che le gavea de cambiar la so maniera de pensar e pensar come Cristo. — Fil. 4:2, 3.

12. Come che podemo far pi forte el amor che noantri ghemo par i nostri fradei?

¹² Come che noantri podemo far pi forte el amor che ghemo par i nostri fradei? Noantri ghemo de cognósserli meio, parché de pi che li cognossemo pi fàcile sarà de capirli e amarli. Ghemo anca de ricordarse che Gionatan el gavea 30 ani de pi che Davi e anca cossita, lori i era veri amighi. Questo el ne insegna che podemo esser amighi de persone de tute le età e de tute le culture. Sarà che anca ti te pol esser amigo de qualchedun nela congregassion pi vècio o pi gióveno che ti? Cossita, te mostri che te ami tuti i to fradei. — 1 Pie. 2:17, nota.

13. Sarà che amar i nostri fradei vol dir esser tanto amighi de tuti nela congregassion? Spiega.

¹³ Sarà che amar i nostri fradei vol dir esser tanto amighi de tuti nela congregassion? Nò, parché noantri semo pi amighi de quei che ghe piase dele medèsime robe che noantri. Ma anca cossita, noantri no ghemo de tratar i nostri amighi meio che tratemo i altri fradei. Par esémpio, Gesù el ga ciamà tuti i so apòstoli de amighi, ma el amea tanto e l’era tanto amigo de Gioani. (Gioani 13:23; 15:15; 20:2) Ma Gesù no’l ga tratà Gioani meio che i altri apòstoli. Quando Gioani e el so fradel Tiago i ga domandà un posto importante nel Regno de Dio, Gesù el ga dito che lu no’l gavea poder de dessider questo. (Mar. 10:35-40) Cossita come Gesù, noantri no ghemo de tratar i nostri amighi meio che i altri fradei. (Tiago 2:3, 4) Se femo compagno  a Gesù, noantri giutemo che ghen sìpia pace nela congregassion. — Giuda 17-19.

14. De acordo con Filipensi 2:3, cossa che ndarà giutar noantri a no voler esser meio che i altri?

¹⁴ Gionatan no’l volea esser meio che Davi e gnanca esser rè nel so posto. Tuti noantri podemo imitar el esémpio de amor de Gionatan. Come che podemo mostrar amor ai nostri fradei? Quando noantri vedemo le bele qualità dei nostri fradei, no ghemo de vederli come nostri nemighi, ma ghemo de ‘esser ùmili e pensar che lori i ze pi importanti che noantri’. (Ledi Filipensi 2:3. *) Ghemo anca de ricordarse che tuti nela congregassion i fà quel che i pol par giutarla. Alora, se noantri semo ùmili, noantri ndaremo veder le bele qualità dei nostri fradei e imparar tanto coi so esempi. — 1 Cor. 12:21-25.

15. Cossa che te ghè imparà de quel che ga sucedesto con Tanya e la so fameia?

¹⁵ Quando noantri infrontemo brute robe nela nostra vita, Geovà el pol doperar i nostri fradei par darne consolo, amor e el aiuto che ghemo de bisogno. Par esémpio, varda quel che ga sucedesto con Tanya e i so tre fioi. Nel ano de 2019, lori i ze ndati al Congresso Internassional “El amor no’l se finisse mai” nei Stati Unidi. Tanya la conta quel che ga sucedesto dopo del congresso del sabo: “Quando èrino drio  ndar via del congresso, nantro auto l’è vegnesto par dosso de noantri. Nissun se ga fato mal, ma noantri semo restadi fermi la nela strada e sensa saver cossa far. Alora, un fradel, che l’era nel congresso, el se ga fermà e el ga parlà con noantri. Dopo, anca sinque fradei dela Suèssia i se ga fermà. Alora, le sorele le ze vegneste e le ga strucà mi e la me fiola. L’era pròpio quel che noantri gavéino de bisogno. Mi ghe go dito che i podea ndar via, ma i ze restadi con noantri tuto el tempo, anca quando l’è rivà el aiuto de un dotor. Noantri ghemo sentio el amor de Geovà tuto el tempo. Quel che ga sucedesto ne ga fato amar ancora de pi ai fradei, a Geovà e a esser ancora pi grati a Lu.” Te te ricordi de gaver ricevesto aiuto de un fradel quando te gavei pròpio de bisogno?

16. Cossa che sucede quando mostremo amor ai altri?

¹⁶ L’è tanto bon veder le bele robe che le sucede quando mostremo amor ai altri. Par esémpio, noantri podemo consolar i nostri fradei quando i ga bisogno de aiuto e giutemo i servi de Dio a viver in union. Mostremo che seghimo a Gesù e cossita altre persone le vol adorar a Geovà. E el pi importante, noantri ghe demo onor al nostro Pare, che l’è misericordioso e che el ne consola. (2 Cor. 1:3) Alora, seita a far ancora pi forte el amor che te ghè par i to fradei e mostra che te li ami tanto!