1. Itthu xeeni olelo-va sinooniherya wira imusi khasiniphentana?

BIIBILIYA aahihimya vahinatthi wira mahiku ookiserya atthu khiyaarowa “waaphentaka akhwaaya”. (2 Tim. 3:1, 3) Tthiri olelo-va, ninniweha yiiraneyaka eprofesia ela. Mwa ntakiheryo, anamuyari anceene olelo-va annimwalana, anninyoonyihana ni anamwane anoona wira khaniphentiwa. Hata akhalaka etthoko emosa awo anoona wira khanisuwelana. Mulopwana mmosa onvaha miruku itthoko ohimmye so: “Maama, paapa ni anamwane khanivaanela mukina ni mukhwaawe. Okathi wotheene animurumeela komputatore, ataablet ni atelefoni wala oweetta axooku. Nto hata akhalaka etthoko emosaru awo khanisuwelana oratteene”.

2-3. (a) Moovarihana ni aRoma 12:10, tani ninreerela ahu owooniheryaka niphento neekeekhai? (b) Mwaha ola, ninrowa othokorerya exeeni?

² Hiyo, khanimphavela otakiha mukhalelo wa atthu a olumwenku ola yaawo ahinooniherya ophenta. (aRom. 12:2) Ohiya-vo, hiyo nihaana wiimananiha waaphenta atthu a etthoko ahu vamosa ni anna ni arokora a mmulokoni. (Mmusome aRoma 12:10.) Ophentana ntoko axinna ontaphulela exeeni? Moolumo oowi ophentana ntoko axinna, onitaphulela okhalana waataana wooloka ni ophentana mukina ni mukhwaawe ntoko nnaaphenta ahu amusi ahu. Enamuna eyo ya ophenta, nihaana owooniherya anna ni arokora a mmulokoni. Ophentana wekeekhai onninikhaliherya waataana ni khula mutthu mmulokoni onnimurumeela Yehova moohakalala.—Mik. 2:12.

³ Wira nikhalane enamuna eyo ya ophenta, ninrowa oweha ele nniixutta ahu ni matakiheryo a mBiibiliyani.

4. Yakobo 5:11, onooniherya sai wira Yehova onniniphenta vanceene?

⁴ Biibiliya onnooniherya wira Yehova ookhalana mikhalelo sookuxa murima. Mwa ntakiheryo, owo onihimya wira: “Muluku ti  ophenta”. (1 Yoh. 4:8) Nto mukhalelo owo onniniiriha okhala apatthani awe. Nave Biibiliya onnihimya-tho wira: “Yehova toophenta vanceene”. (Mmusome Yakobo 5:11.) Tthiri moolumo ala annooniherya wira Yehova onniniphenta vanceene.

5. Yehova onooniherya sai wira onnimoriwa ikharari ni ninrowa omutakiha sai?

⁵ Moone wira Yakobo 5:11, onnooniherya wira ophenta wa Yehova onnivarihana ni mukhalelo mukina yoowo onnikhaliherya okhalana waataana wooloka ni Yehova, eyo piiyo, omoriwa wawe ikharari. (Okhum. 34:6) Yehova onnooniherya wira toomoriwa ikharari vaavo onnilevelela awe okathi nimmutthekela ahu. (Esal. 51:3) MBiibiliyani nuulumo noowi “omoriwa ikharari” ninhela muhina itthu sikina ohiya paahi olevelela. Maana omoriwa ikharari khontaphulela paahi omulevelela mutthu opanke etthu yoohiloka, masi-tho onihela muhina omukhaliherya mutthu onihaawa. Yehova onniphavela onikhaliherya vanceene okathi sinniphwanya aya mixankiho, ovikana othunku wala omoriwa ikharari maama onimooniherya awe mwanawe. (Yes. 49:15) Mwaha woowi etthu enimwiiriha Yehova onikhaliherya okathi ninkumana ahu mixankiho, okhala wira owo onninimorela ikharari. (Esal. 37:39; 1 aKor. 10:13) Hiyo nihaana waamorela ikharari anna ni arokora ni ohinyakulihana okathi awo annitthekela aya. (aEef. 4:32) Masi enamuna yuulupale nikhanle ahu oowaamorela ikharari anna ni arokora ori waakhaliherya okathi sinaaphwanya aya mixankiho. Vaavo ophenta onniiriha aya waamorela ikharari atthu akina, ninnimutakiha Yehova yoowo ori ntakiheryo nuulupale na ophenta wekeekhai.—aEef. 5:1.

6. Yonathani ni Davidi yoonihenrye sai wira yaaniphentana mwekeekhai?

⁶ Biibiliya onnihimya matakiheryo a apinaatamu oohimalela yoonihenrye ophenta wekeekhai. Nrowe nithokorerye ntakiheryo na Yonathani ni Davidi. Biibiliya onihimya so: “Yonathani ahisiveliwa vanjene ni yowo [Davidi], khupajerya omphenta ntoko saíphentawe”. (1 Sam. 18:1) Musuweleke wira Yehova  aahimuthanla Davidi wira omuranttele mwene Sawuli. Nuumala Sawuli osuwela eyo, aahipacerya omukhalela nrima Davidi ni aaniphavela omwiiva. Hata vari siiso, Yonathani khaamukhalihenrye paapa awe wira omwiive Davidi. Ohiya-vo, Yonathani ni Davidi yaahileiheryana okhala apatthani eekeekhai ni okhaliheryanaka mukina ni mukhwaawe.—1 Sam. 20:42.

7. Etthu xeeni yaakhanle oomukhoottiherya Yonathani okhala mpatthani a Davidi?

⁷ Ophenta wekeekhai wa Davidi ni Yonathani ti wootepexa oloka vaavo ninthokorerya ahu itthu saakhanle oowaakhoottiherya okhala apatthani eekeekhai. Mwa ntakiheryo, Yonathani aahikhalana iyaakha 30 onvikana Davidi. Hata vaari siiso, Yonathani khuupuwela wira Davidi aahitepa oyeva ni khaasuwela etthu. Tthiri vannooneya wira Yonathani aanimuttittimiha vanceene Davidi.

8. Etthu xeeni enooniherya wira Yonathani aari mpatthani eekeekhai a Davidi?

⁸ Vanweryaneya Yonathani omukhalela nrima Davidi. Okhala wira yena aari mwaana a Mwene nto aahikhalana ehakhi ya omuranttela paapa awe. (1 Sam. 20:31) Masi Yonathani aari mutthu oowiiyeviha ni aaniroromeleya wa Yehova. Maana Yonathani aahikhaliherya yoothanla ya Yehova ni murima wotheene vaavo aamuthanlale awe Davidi okhala mwene aattharelana. Nave Yonathani aahiroromeleya wa Davidi nnaamwi paapa awe aarowa onanariwa vanceene.—1 Sam. 20:32-34.

9. Niireke Yonathani aanimuthokorerya Davidi ntoko nwanani awe? Mutthokiherye.

⁹ Okhala wira Yonathani aanimphenta mwekeekhai Davidi, nto khaamuthokorerya ntoko nwanani awe. Yonathani aanisuwela orumeela saana ikaruma sa ekhotto, nave owo aari nakhotto oolipa murima. Yonathani ni Sawuli yaanisuweliwa okhala “atthu yari òveyaveya onvikana xaka: yari a ikuru onvikana kharamu”. (2 Sam. 1:22, 23) Tthiri Yonathani anwerya wiivuwiha mwaha wa itthu sooloka aapanke awe. Ohiya-vo, owo khaimananiha okhala mutthu ootepexa ovuwa onvikana Davidi ni khaakhalenle nrima itthu sooloka Davidi aarina awe. Masi Yonathani aanisiveliwa vanceene olipa murima wa Davidi ni omuroromela wawe Yehova. Musuweleke wira Yonathani aapacenrye omphenta Davidi ntoko iiphenta awe nuumala owo omwiiva Goliyathi. Ninrowa owooniherya sai ophenta wekeekhai anna ni arokora?

10. Ontaphulela exeeni ‘ophentana vanceene ni murima wotheene’?

¹⁰ Biibiliya onninitumererya ‘ophentana vanceene ni murima wotheene’. (1 Ped. 1:22) Yehova oonivaha ntakiheryo nooloka, maana onniniphenta vanceene. Nto akhala wira nnoovikaniha ororomeleya wa yena owo khonikhala-khala ohiyaka oniphenta. (aRom. 8:38, 39) Nuulumo na eKereku nitaphuleliwe-va wira “vanceene” nintaphulela wiimananiha. Okathi mukina, khivanikhweya waaphenta anna ni arokora. Nto nihaana wiimananiha. Vaavo atthu akina anninyoonyiha aya nihaana ovikaniha ‘ovilelana mukina ni mukhwaawe niphentanaka. Niimananiheke okhalana wiiwanana omosa-ru onikumiheriwa ni munepa woowaarya, ni murettele onnikhaliherya wiiraana’. (aEef. 4:1-3) Musuweleke wira vaavo nniimananiha ahu okhalana murettele ‘onnikhaliherya wiiraana’, hiyo khaninwehexexa soovonya sa anna ni arokora. Maana ninrowa wiimananihaka waathokorerya anna ntoko Yehova onaathokorerya awe.—1 Sam. 16:7; Esal. 130:3.

11. Xeeni okathi mukina vanixankiha aya waaphenta mwekeekhai anna ni arokora?

¹¹ Khivanikhweya waaphenta mwekeekhai anna ni arokora. Otepexa wene akhala wira ninnisuwela soovonya saya. Vanikhala ntoko wira maKristau a eseekulu yoopacerya yaahikhalana  muxankiho owo. Mwa ntakiheryo, vanikhala ntoko wira Evodia ni Sintikhe khiyaarina muxankiho olaleya ihapari sooreera ni murummwa Paulo. Masi hata vari siiso, awo yaahikhalana muxankiho maana khayiiwanana mukina ni mukhwaawe. Tivonto murummwa Paulo aatumerenrya awe “okhalana muupuwelo mmosa-ru, onivarihana ni Apwiya”.—aFil. 4:2, 3.

12. Ninrowa owerya sai wuncererya waaphenta wahu anna ni arokora?

¹² Olelo-va, ninrowa wuncererya sai waaphenta wahu anna ni arokora? Nihaana wiimananiha waasuwela oratteene anna ni arokora. Niira siiso, vanoonikhweela osuwela mikhalelo saya ni waaphenta vanceene. Nave nnoowerya waapaka apatthani anna ni arokora oowuuluvala, amiravo ni a ilapo sikina. Muhiliyale wira Yonathani aahikhalana iyaakha 30 onvikana Davidi. Masi hata vari siiso, awo yaahikhalana waataana ni ompatthani woolipa mukina ni mukhwaawe. Nto niireke ookhala munna aahiiso murokora mmulokoni mwanyu oowuuluvala wala mmiravo aareerela okhala mpatthani anyu? Akhala wira nyuwo munoopaka eyo, munimooniherya wira ‘munnaaphenta anna a olumwenku wotheene’.—1 Ped. 2:17.

13. Xeeni okathi mukina nihintepa ahu wiiraana ni atthu akina a mmulokoni?

¹³ Niireke waaphenta anna ni arokora ontaphulela wira anna otheene a mmulokoni anrowa okhala apatthani ahu? Ohimya ekeekhai, nnaari. Maana hiyo pooti okhala ootaphuwa ni atthu akina ni okhalana waataana woolipa ni atthu awo mwaha woowi sookhala itthu sinlikana ahu. Mwa ntakiheryo, arummwa otheene yaari “apatthani” a Yesu. Masi hata vaari siiso, Yesu aanimphenta mwa enamuna ya vameekhaaya murummwa Yohani. (Yoh. 13:23; 15:15; 20:2) Nnaamwi vaari siiso, Yesu khahiyo aarina nthalu, niire so, khahiyo aatepa onvaha efaita Yohani waavikana arummwa awe akina. Mwa ntakiheryo, okathi Yohani ni munna awe Yakobo yaaronwe aya onvekela nipuro noovuwa Moomweneni mwa Muluku, Yesu aahaaleela wira: “Okilaathi moono aka woolopwana aahiiso woothiyana, khahiyo miyo kinivaha”. (Mar. 10:35-40) Nimutakihaka Yesu, nihaana osyaka nthalu, eyo piiyo, waathokorerya atthu akina mwa enamuna  ya vameekhaaya waavikana akina. (Yak. 2:3, 4) Maana akhala wira nnookhalana nthalu muloko khonrowa okhala wowiiraana ni wa murettele.—Yuda 17-19.

14. Moovarihana ni aFilipi 2:3, etthu xeeni enrowa onikhaliherya ohixinttana?

¹⁴ Vaavo hiyo nimphentana ahu vanceene mukina ni mukhwaawe, hiyo khanniimananiha oxinttana ni atthu akina a mmulokoni. Muupuweleke wira Yonathani khaaphavela oxinttana ni Davidi ni khaamuthokorerya okhala nwanani awe. Otheene ahu nihaana otthara ntakiheryo nooloka Yonathani onivanhe awe. Nto muhaakhaleleke nrima ni muhiwooneke ntoko awanani anyu anna ni arokora anisuwela itthu sinceene woovikanani nyuwo. Ohiya-vo, “mwiiyeviheke, khula mutthu awooneleke vatthu akhwaawe ovikana mmensawe”. (Mmusome aFilipi 2:3.) Musuweleke wira anna otheene a mmulokoni anoowerya opaka etthu wira akhaliherye muloko. Nto akhala wira nnimwiiyeviha nnoowerya oweha mikhalelo sooloka anna ni arokora arina aya ni nnoottottela mureerelo ntakiheryo naya na ororomeleya.—1 aKor. 12:21-25.

15. Yowiiraneya ya murokora Tanya ewiixuttinheni exeeni?

¹⁵ Okathi wa mixankiho, Yehova onninimaaliha mwaha wa oniphenta wawe, nave anna ni arokora anninikhaliherya anivahaka itthu sinnithowa. Nkahaya nwehe etthu yiiraneyale ni emusi emosa nuumala oweha eprokrama ya Esaabadu ya Konkresu internasional aapakiwe wEstados Unidos aarina muru oni: “Ophenta Khonimala-tho”. Tanya, maama orina anamwane araru onihimya so: “Okathi naatthikela ahu wOteel naamannke ahu, ekaaro emosa yeetta mphironi yaahihiya ephiro ni yaahimanana ni ekaaro ahu. Khuuvo mutthu aavulanle, masi naahixanka.  Naahikhuma mukaaroni neemela waattamela mustraatani. Vano mutthu mukina aaniweha aahinlattula okela mukaaroni mwawe wira nikhale oovareleleya. Mulopwana ole aari munna yoowo-tho aakhuma okonkresuni. Anna akina 5 yaakhumme oSuécia yaaheemela nto arokora yaahikikhupaarela miyo ni anaaka. Okathi ole hiyo naaniphavela omaalihiwa. Moottharelana, kaahaaleela anna ni arokora ale wira itthu saamuloka ni nanvikaniha weetta mukwaha ahu. Masi awo khiyaanihiyale mekhihu. Anna ni arokora ale yaahikhala ni hiyo mpakha mameediku ophiya ni yaahiimananiha oweha akhala wira naahikhalana itthu sotheene saanithowa. Tthiri okathi wotheene wa muxankiho ole naahoona wira Yehova onniniphenta vanceene. Yowiiraneya ele yoolipiha vanceene waaphenta wahu anna ni arokora ni ehincererya omphenta wahu ni omuxukhurela wahu Yehova”. Niireke nyuwo munnuupuwela okathi mwaaphavela anyu okhaliheriwa, nto munna wala murokora owooniheryani niphento neekeekhai?

16. Itthu xeeni sinniiriha waaphenta atthu akina mwekeekhai?

¹⁶ Nkahaya nwehe itthu sinikhumelela vaavo nimphentana ahu mwekeekhai mukina ni mukhwaawe. Hiyo ninniwerya waamaliha ni waalipiha anna ni arokora okathi wa mixankiho ni ninnilipiha waataana wahu ntoko atthu a Muluku. Nave eyo ennooniherya wira naatthareli eekeekhai a Yesu ni enniwiiriha atthu akina ophavela wiirela mpantta okokhorela wekeekhai. Etthu yootepexa otthuneya ninninvuwiha Yehova, “Tiithi oomoriwa ikharari vanceene, ni Muluku onnimaaliha mwa mikhalelo sotheene”. (2 aKor. 1:3) Nto otheene ahu nihihiye okhalana ni wooniherya ophenta wekeekhai!