1. Wetin show say plenty family today no get strong love for each other?

BIBLE talk say for last days, people no go get strong “love” for their family members. (2 Tim. 3:1, 3) This thing wey Bible talk de happen today. For example, plenty husband and wife don end their marriage, and so them de vex for each other and their children de feel say their papa and mama no love them. Even family members wey de live for the same house de do like say they be stranger. One man wey e work na to advice people about family matter, talk say: ‘The mama, the papa and the children no de talk to each other, and them de spend plenty of their time de press computer, phone, or play video game. Even as this family them de live for the same house, they no really know each other well.’

2-3. (a) Who we go show the kind love wey Romans 12:10 talk about? (b) Wetin we go talk about for this article?

² We no want be like plenty people for this world wey no de show love. (Rom. 12:2) Instead, we need to learn how to get more love for our family members and our brothers and sisters for congregation. (Read Romans 12:10.) Which kind love this Bible verse de talk about? Na the kind love wey family members de get when they really dey close to each other. Na this kind love we suppose to get for our brothers and sisters for congregation. When we show this kind love for each other, this one go help us de serve Jehovah together with joy.​—Mic. 2:12.

³ To help us get this kind love and show-am, make we see wetin we fit learn from some examples for Bible.

4. How James 5:11 show us how Jehovah love us reach?

⁴ Bible tell us the fine-fine character wey Jehovah get. For example, e talk say “God na love.” (1 John 4:8) The thing wey that Bible verse talk about Jehovah, de make us want be e friend. But Bible still talk say the “love wey Jehovah get really deep.” (Read James 5:11.) The way this Bible verse put-am, really show how Jehovah de feel for us reach!

5. How Jehovah de show pity, and how we fit do like-am?

⁵ James 5:11 connect the love wey Jehovah get with the pity wey e get. This character de make us near God. (Ex. 34:6) One way wey Jehovah de show us pity na when e de forgive us for the mistakes wey we make. (Ps. 51:1) For Bible, to show pity no be just to forgive person for wetin e do. Pity na the strong feeling wey person get when e see another person de suffer and this one de move-am to want help. Jehovah talk say the strong feeling wey e get to want help us, strong pass the way mama de feel for e small pikin. (Isa. 49:15) When we de face problem, the pity wey Jehovah get de move-am to help us. (Ps. 37:39; 1 Cor. 10:13) We fit show say we get pity for our brothers and sisters when we forgive them and no continue to vex for them when they do wetin we no like. (Eph. 4:32) Another important way wey we fit show say we get pity na to support our brothers and sisters when them de face problems. When love move us to show people pity, we de do like Jehovah, wey be the number one example of person wey de show deep love pass any other person.​—Eph. 5:1.

6. How Jonathan and David show say they get deep love for each other?

⁶ Bible talk about people wey show deep love for each other even though say they no dey perfect. Make we talk about the  example of Jonathan and David. Bible talk say: “Jonathan and David come be very tight friends, and Jonathan begin love David the way e love e self.” (1 Sam. 18:1) Jehovah choose David to be king after Saul. After that one, Saul begin vex for David no be small and e try to kill David. But Jonathan wey be Saul pikin, no join e papa when e try to kill David. Jonathan and David promise each other say they no go stop to be friends and they go always support each other.​—1 Sam. 20:42.

7. Wetin for don stop Jonathan and David make they no be friends?

⁷ E fit surprise person say Jonathan and David na really tight friends because many things dey wey for don stop them. For example, Jonathan take about 30 years senior David. Jonathan for don think say David too young and e no too get experience, so they no fit be tight friends. But Jonathan no think like that. E really get respect for David.

8. Why you think say Jonathan na really better friend to David?

⁸ Jonathan for don jealous David. Because Jonathan na King Saul pikin, e for talk say e suppose be the next king. (1 Sam. 20:31) But Jonathan dey humble and e hold Jehovah tight. So e use all e heart support David, the person wey Jehovah don choose as the next king. And Jonathan no leave David even when this one make Saul over vex.​—1 Sam. 20:32-34.

9. Jonathan jealous David? Explain.

⁹ Because Jonathan love David, e no jealous David. Jonathan na warrior wey get strong heart, and e sabi use bow and arrow well. People de talk that time say Jonathan and Saul “fast pass eagle and they strong pass lion.” (2 Sam. 1:22, 23) So, this things wey Jonathan do for don make-am de boast about the strong heart wey e get. But, Jonathan no try to better pass David and e no jealous-am for the things wey e do. Instead, e like David for the strong heart wey e get, and the trust wey e get for Jehovah. For example, na after David kill Goliath Jonathan start to love David the way e love e self. How we fit show say we love our brothers and sisters like that?

10. Wetin e mean to get ‘strong love for each other from our heart’?

¹⁰ Bible tell us make we get ‘strong love for each other from our heart.’ (1 Pet. 1:22) Jehovah show us better example. The love wey e get really strong sotey if we hold God tight, nothing go fit break the friendship wey we get with-am. (Rom. 8:38, 39) The Greek word wey they translate as “strong” give the idea of person wey de do everything to show love. Sometimes e no easy to get deep love for our brothers and sisters. When people make us vex, we go need to continue to ‘endure wetin we do each other. De try our best to keep the one mind wey the spirit de give with the kind peace wey de make us dey as one.’ (Eph. 4:1-3) When we work hard to maintain the “kind peace wey de make us dey as one,” we no go put our mind for the mistakes wey our brothers and sisters de make. We go try our best to see our brothers and sisters the way Jehovah de see them.​—1 Sam. 16:7; Ps. 130:3.

11. Why e be say e no de always easy to show our brothers and sisters deep love sometimes?

¹¹ E no de always easy to show our  brothers and sisters deep love, especially when we know their mistakes. E fit be say, this one na one problem wey some Christians for apostles their time get. For example, Euodia and Syntyche fit no get problem as them de work “with [Paul] for the good news.” But something go don make-am hard for them to work with each other well. So Paul advice them make them “dey as one because they be disciples of the Lord.”​—Phil. 4:2, 3.

12. How we fit get deep love for our brothers and sisters?

¹² How we fit get deep love for our brothers and sisters today? When we know our brothers and sisters more, e fit dey easy to understand them and get deep love for them. We fit become friends even if we senior the person or e senior us, or the person culture different from our own. Remember say, Jonathan senior David with about 30 years. Even with that one, Jonathan still make David e tight friend. Person dey your congregation wey you senior or wey senior you wey you fit make your friend? When you do like that, you fit show say you “love brothers for the whole world.”​—1 Pet. 2:17.

13. Why we fit dey close to some people for congregation pass other people?

¹³ To get deep love for our brothers and sisters mean say we go dey tight with everybody for congregation? No, that one fit no dey possible. Na normal thing to dey close to some people for congregation pass other people because wuna like the same things. Jesus call all e apostles “friends,” but e really dey close to John. (John 13:23; 15:15; 20:2) But the way Jesus treat John no better pass the way e treat the other apostles. For example, when John and e brother James tell Jesus make e give them one important position for the Kingdom of God, Jesus tell them say: “No be my hand e dey to talk who go sitdown for my right hand or for my left hand.” (Mark 10:35-40) Like Jesus, the way we de treat our close friends no suppose better pass the way we de treat other people. (Jas. 2:3, 4) If we  do like that, then we no go dey together as one for congregation.​—Jude 17-19.

14. As e dey for Philippians 2:3, wetin go help us make we no try to better pass other people?

¹⁴ When we show deep love for each other, we no go try to better pass other people for congregation. Remember say Jonathan no jealous David, and e no try to be king instead of David. All of us fit do like Jonathan. No jealous your brothers and sisters because of wetin they sabi do. Instead, make you “dey humble and de think say other people better pass” you. (Read Philippians 2:3.) Get-am for mind say, each person for congregation get wetin e fit do wey go help congregation. If we continue to dey humble, we go fit see the fine-fine character wey our brothers and sisters get and we go benefit from their better example.​—1 Cor. 12:21-25.

15. Wetin you learn from the thing wey happen to Sister Tanya and e family?

¹⁵ When bad thing wey we no expect happen to us, Jehovah de comfort us with the deep love wey our brothers and sisters de show us and the things wey them de do to help us. Make we see the example of one family when them de come back from the Saturday program for one of the 2019 “Love No De Ever Fail!” International Convention for America. One sister wey get three children, wey e name na Tanya, talk say: “We de drive go back to our hotel when another motor lose control enter our lane and jam our motor. Nobody wound, but we shock, we come out of the motor and stand for road. So somebody tell us make we come stay for e car so that we go dey safe. This person na one of our brother wey de come back from convention  too. And no be only this brother stop. Five other brothers and sisters from Sweden wey de come back from the convention still stop. The sisters hug me and my daughter, and this one really make our mind come down! I tell them say we go dey fine and say they fit de go, but they no gree go. They stay with us until people wey de give treatment come, and they make sure say we get everything wey we need. For this hard time, we feel-am say Jehovah love us. This thing wey happen make our love for our brothers and sisters strong more-more. And e still make us love and de thank Jehovah more-more.” You fit remember anytime wey you need help and one brother or sister show you deep love?

16. Which reasons we get to show deep love for each other?

¹⁶ Think about the good things wey fit happen when we show deep love for each other. We de comfort our brothers and sisters when them de face problems. We de make our brothers and sisters dey as one more-more. We de show say we be disciples of Jesus, and this one de draw people wey really want worship Jehovah come e organization. And the number one important thing be say, we de honor Jehovah, ‘the Father wey de treat person with care and de show pity, and the God of all comfort.’ (2 Cor. 1:3) Make all of us continue to show love and de grow for our love!