1. Ana ni yindu yapi yayikulosya kuti ŵandu ŵajinji ngakusanonyelana masiku agano?

BAIBULO jasasile kala kuti m’masiku gambesi ŵandu “tachiŵa ŵangali [chinonyelo.]” (2 Tim. 3:1, 3) Yeleyitu ni yayikutendekwa masiku agano. Mwachisyasyo, maŵasa gejinji gakumala. Yeleyi yikusatendekasya kuti achinangolo atumbilangane, mwamti ŵanache ŵawo akusalipikana kuti ngakusanonyeledwa. Atamose m’maŵasa gele mwangali yakusawusya mpela yeleyi ndaŵi sine ŵandu ŵakwe ngakusaŵa paunasi wambone. Mundu jwine jwakusakamuchisya ngani sya m’maŵasa jwaŵechete kuti, “Mayi, baba soni ŵanache ngakusaŵechetana ndaŵi syejinji. Mmalo mwakwe akusamalila ndaŵi jawo ali pa kompyuta, pafoni soni kulolela magemu. Atamose kuti ŵanduŵa akusatama nyumba jimo nambope ngakusamanyigana chenene.”

2-3. (a) Ana lilemba lya Aloma 12:10, likulosya kuti ali ŵani ŵatukusosekwa kwanonyela ni mtima wosope? (b) Ana chitukambilane chichi munganiji?

² Ngatukusosekwa kuŵa ŵandu ŵangali chinonyelo mpela mwaŵelele ŵandu ŵane m’chilambomu. (Alo. 12:2) Mmalo mwakwe tukusosekwa twanonyeleje ni mtima wosope ŵandu ŵa mwiŵasa mwetu soni Aklistu achimjetu. (Aŵalanje Aloma 12:10.) Ana kunonyelana ni mtima wosope kukusagopolela chichi? Maloŵega gakusasala ya chinonyelo chachikusaŵa pasikati pa ŵandu ŵakupagwana. Chinonyelo chelechi ni chatukusasosekwa kwalosya abale ni alongo ŵetu. Patukulosya chinonyelo chelechi yikusakamuchisya kuti ŵandu aŵe ŵakamulana pakumtumichila Yehofa.—Mik. 2:12.

³ Kwende tulole yisyasyo yine ya m’Baibulo yampaka yitukamuchisye kuti twanonyeleje ŵane ni mtima wosope.

4. Ana lilemba lya Yakobo 5:11, likutusalila yamtuli pakwamba ya chinonyelo chakwete Yehofa?

⁴ Baibulo jikusatusalila ndamo syambone syakwete Yehofa. Mwachisyasyo, jikusasala kuti “Mlungu ali chinonyelo.” (1 Yoh. 4:8) Kumanyilila yeleyi kukusatutendekasya kuti tumŵandichileje. Baibulo jikusasalasoni kuti Yehofa ‘ali jwakusalala mtima’ kapena kuti jwachinonyelo chekulungwa. (Aŵalanje Yakobo 5:11.) Maloŵe gelega gakulosya kuti Yehofa akusatunonyela mnope m’weji.

5. Ana Yehofa akusalosya chamtuli chanasa? Ana mpaka tumsyasye chamtuli Yehofa?

⁵ Lilemba lya Yakobo 5:11 likusala ya chinonyelo chakwete Yehofa yimpepe ni ndamo jine jajikusatukamuchisya kuti tuŵe najo paunasi. Ndamoji jili chanasa. (Eks. 34:6) Yehofa akusalosya chanasa mwakutukululuchila ya kulemwa yetu. (Sal. 51:1) Chanasa chakusachikolanga m’Baibulo chikusapunda kwamba kumkululuchila mundu. Chanasa jili ndamo jakutyochela mumtima jajikusamtendekasya mundu kusaka kwakamuchisya ŵane pakusimana ni yakusawusya. Chanasa chakwete Yehofa chili chekulungwa mnope kupunda chakusakola mama kwa mwanache jwakwe. (Yes. 49:15) Patukusimana ni yakusawusya Yehofa akusaŵa jwakusachilila kutukamuchisya, ligongo lya chanasa chakwe. (Sal. 37:39; 1 Akoli. 10:13) Naga tuli ŵachanasa mpaka twakululuchile Aklistu achimjetu patulemwechesye, soni tuchiŵambala kwasunjila chakulukosi. (Aef. 4:32) Litala lyambone mnope lyampaka tulosye chanasa lili kwakamuchisya abale ni alongo ŵetu pakusimana ni yakusawusya. Patukutenda yeleyi, tukusaŵa tuli kumsyasya Yehofa, jwakwete chinonyelo chekulungwa.—Aef. 5:1.

6. Ana Yonatani ni Daudi ŵalosisye chamtuli kuti akusanonyelana?

⁶ Baibulo jikusatusalila ya ŵandu ŵaŵanonyelanaga mnope. Ŵandu ŵeleŵa ŵaliji mpela m’weji. Aganichisye ya Yonatani ni Daudi. Baibulo jikusatusalila kuti, “Yonatani mwanache  jwa Saulo ŵamnonyele Daudi ni mtima wakwe wosope nipo ŵamnonyele Daudijo mpela muŵalinonyelelaga ŵelewo asyene.” (1 Sam. 18:1) Yehofa ŵamsagwile Daudi kuti chaŵe mwenye mmalo mwa Sauli. Payatendekwe yeleyi Sauli jwatumbile mnope mwamti jwasakaga kumwulaga Daudi. Nambo Yonatani mwanache jwa Sauli nganakamulanaga ni nganisyo sya babagwesi. Jwalakwe ŵakamulene ni Daudi kuti aŵe paujakwe soni kuti chakamuchisyaneje yakutenda.—1 Sam. 20:42.

7. Ana ni yindu yapi yayikatendekasisye kuti Yonatani ni Daudi akaŵa paujakwe?

⁷ Papali yindu yine yayikatendekasisye kuti Yonatani ni Daudi akanonyelanaga. Mwachisyasyo, Yonatani jwaliji jwamkulungwa mnope kumpunda Daudi. Jwalakwe akaganisyaga kuti pangali chilichose champaka atende ni kamwanache keleka. Nambope Yonataniju ŵamwonaga Daudi kuti ali jwakusosekwa mnope.

8. Ana ni yindu yapi yayikulosya kuti Yonatani jwaliji mjakwe jwapamtima jwa Daudi?

⁸ Yikaŵele yakomboleka kuti Yonatani amtendeleje jelasi Daudi. Pakuŵa Yonatani jwaliji mwanache jwa Mwenye Sauli, jwalakwe akaliwonaga kuti ni jwakuŵajilwa kuŵa mwenye. (1 Sam. 20:31) Nambo Yonatani jwaliji jwakulinandiya soni jwakulupichika kwa Yehofa. Jwalakwe jwakamulene ni yaŵasagwile Mlungu kuti Daudi chaŵe mwenye jwa msogolo. Kupwatika pelepa, jwalijisoni jwakulupichika kwa Daudi, atamose kuti yeleyi yamtumbilikasisye mnope Sauli.—1 Sam. 20:32-34.

9. Ana Yonatani ŵamwonaga Daudi mpela jwakwimuchila?

⁹ Yonatani ŵamnonyelaga mnope Daudi mwamti nganamwonaga mpela jwakwimuchila. Yonatani jwaliji jwakulimba mtima soni jwamanyililaga chenene kuputa ngondo. Jwalakwe yimpepe ni Sauli ŵamanyikaga kuti “ŵaliji ŵachitema” kujipunda ngwasi soni “ŵamachili kugapunda masimba.” (2 Sam. 1:22, 23) Yeleyi yikamtendekasisye Yonatani kuŵa jwakulilapilila mnope. Nambope jwalakwe nganakola mtima wampikisano kapena kumtendela jelasi Daudi. Yonatani ŵamyamichilaga Daudi ligongo lyakuti jwaliji jwakulimba mtima soni ŵamdalilaga mnope Yehofa. Daudi ali amwuleje Goliyati, Yonatani ŵatandite kumnonyela Daudijo ni mtima wakwe wosope mpela mwaŵalinonyelelaga msyene. Ana m’weji mpaka tulosye chamtuli chinonyelo chelechi kwa abale ni alongo ŵetu?

10. Ana ‘kwanonyela Aklistu achimjetu ni mtima wetu wosope’ kukusagopolelaga chichi?

¹⁰ Baibulo jikusatulimbikasya kuti ‘twanonyeleje Aklistu achimjetu ni mtima wetu wosope.’ (1 Pet. 1:22) Yehofa ali chisyasyo chambone pangani ja kwanonyela ŵane. Jwalakwe akusatunonyela mnope, mwamti naga tukuŵape ŵakulupichika, pangali champaka chimlepelekasye kutunonyela. (Alo. 8:38, 39) Maloŵe ga Chigiliki gaŵagagopolele kuti “ni mtima wenu wosope,” gakusasala ya kulingalinga kwakusatenda mundu pakusaka kuti amnonyele mjakwe. Yeleyi yikulosya kuti ndaŵi sine mpaka tusosekwe kutenda yiliyose yakomboleka kuti tumnonyele Mklistu mjetu. Naga mjetu atutumbilikasisye, tukusosekwa kuŵa ŵakusimana mtima soni ‘tuŵeje ŵakulinjilila kusunga umpepe . . . pa kamulana mu mtendele.’ (Aef. 4:1-3) Naga tukusasaka kuŵa “pa mtendele” ni Aklistu achimjetu, ngatukusosekwa kwambaga kulola yakulemwecheka yawo. Mmalo mwakwe tuchilingalinga kwawona abale ni alongo mpela mwakusawonela Yehofa.—1 Sam. 16:7; Sal. 130:3.

11. Ligongo chichi kwanonyela ŵane mpaka kuŵe kwakusawusya ndaŵi sine?

 ¹¹ Ndaŵi sine tukusalepela kwanonyela Aklistu achimjetu, mnopemnope patukumanyilila yakulemwa yawo. Nombenawo Aklistu ŵa 100 yandanda yatendechelaga yeleyi. Mwachisyasyo, Yuwodiya ni Sintike ‘ŵakamulaga masengo chenenepe ga kwasalila ŵandu Ngani Syambone pamo ni [Paulo].’ Nambope achakongwe ŵaŵiliŵa yalemaga kuti aŵe ŵakamulana. Myoyo Paulo ŵaŵendile jemanjaji kuti aŵe ‘ŵakamulana mpela ŵakulupilila mwa Ambuje.’—Aef. 4:2, 3.

12. Ana mpaka tutende wuli kuti twanonyeleje abale ni alongo?

¹² Ana mpaka tutende wuli kuti twanonyeleje abale ni alongo? Patukulingalinga kuti twamanyilile chenene abale ni alongo, yikusaŵa yangasawusya kwapikanichisya soni kutanda kwanonyela. Yeleyitu mpaka yikomboleche atamose tuli ŵakulekangana misingu kapena ndamo. Paja Yonatani ŵaliji jwamkulungwa pakuwanichisya ni Daudi. Mwamti jemanjaji ŵalekanganaga yaka 30. Nambope atamose kuti yaliji myoyo, ŵaŵele paujakwe. Ana pana mwanache kapena jwamkulungwa jwine mumpingo mwawo jwakumwona kuti mpaka aŵe mjawo? Naga akukola mjawo, chachilosya kuti ‘akusiŵanonyela ŵakulupilila achimjawo.’—1 Pet. 2:17.

13. Ana mpaka tumnonyele jwalijose mumpingo mwakulandana? Alondesye.

¹³ Ana kola mtima wakwanonyela ŵane kukulosya kuti tuchimnonyela jwalijose mumpingo mwakulandana? Iyayi. Yeleyi nganiyiŵa yikomboleche. Nganikuŵa kulemwa kukamulana ni ŵandu ŵakusanonyela yindu yatukusayinonyelaga m’weji. Mwachisyasyo, Yesu jwakolangaga ŵandumetume ŵakwe wosope kuti ali ‘achimjakwe.’ Nambope jwalakwe ŵamnonyelaga mnope Yohane. (Yoh. 13:23; 15:15; 20:2) Atamose yaliji myoyo, jwalakwe nganamwonaga Yohane kuti ali jwakusosekwa mnope kwapunda ŵandumetume ŵanewo. Mwachisyasyo, Yohane ni Yakobo paŵamŵendile kuti chiŵape malo gapenani mu  Uchimwene wa Mlungu, Yesu ŵajanjile kuti, “Nganigaŵa masengo gangu gakumsagula mundu kuti atame kumkono wangu wamlyo kapena wamchiji.” (Maliko 10:35-40) Mwakulandana ni Yesu, tukawonaga achimjetu ŵatukusakamulana nawo mnope kuŵa ŵakusosekwa mnope kwapunda ŵane. (Yak. 2:3, 4) Naga tukwawona myoyo nikuti abale ni alongo mumpingo mpaka aŵe ŵagaŵikangana.—Yud. 17-19.

14. Ana lilemba lya Afilipi 2:3, mpaka litukamuchisye chamtuli kuŵambala msimu wampikisano mumpingo?

¹⁴ Patukwanonyela Aklistu achimjetu, yichikamuchisya kuti mumpingo mukapagwa msimu wampikisano. Akumbuchileje kuti Yonatani nganalinga ata panandi kulimbana ni Daudi kapena kumwona jwalakwe kuti ali jwakwimuchila. Yili yakomboleka kuti wosopewe tutendeje yindu mpela Yonatani. Tukawonaga Aklistu achimjetu kuti ali ŵakwimuchila ligongo lya yindu yakusakombola kutenda. Mmalo mwakwe ‘twawone achimjetu kuti ali ŵakutupunda.’ (Aŵalanje Afilipi 2:3.) Amanyilileje kuti jwalijose mumpingo ali jwakusosekwa. Naga tuli ŵakulinandiya, tuchilola yindu yambone mwa abale ni alongo ŵetu soni tuchipindula yejinji kutyochela mwa jemanjaji.—1 Akoli. 12:21-25.

15. Ana yaŵasimene nayo Mlongo Tanya yikutujiganya chichi?

¹⁵ Patusimene ni yakusawusya, Yehofa akusatukamuchisya mwachinonyelo kupitila mwa abale ni alongo ŵetu. Aganichisye yayamtendechele Mlongo Tanya yimpepe ni ŵanache ŵakwe ŵatatu, pandaŵi jiŵatendaga msongano wa yilambo ku United States. Msonganowu wakwete mtwe wakuti “Chinonyelo Chili Changamala!” Mlongoju jwatite, “Lisiku line  tuli mkuwujila kumalo getu gagona, galimoto jine jatyosile kumbali jakwe ni kujigunda galimoto jetu. Pangali jwalijose juŵawulele, nambo twagambile kopoka m’galimotomo ni kuja kwima pambali. Ndaŵi jijojo, m’bale jwine juŵatyochelaga kumsonganoku ŵajimi, ni ŵatusalile kuti tukatame m’galimoto mwakwe ni chakulinga chakuti tuŵe pamalo gambone. Abale ni alongo ŵanesoni ŵakwana msano ŵakutyochela ku Sweden ŵajimi. Alongoŵa ŵayiche patwajimi ni kutukumbatila, mwamti twapikene chenene kwabasi. Atamose nasalile kuti chituŵe chenene, nambope nganatuleka jika. Abaleŵa ŵatupele yakusosechela yosope mpaka pandaŵi jele ŵakamuchisya pajitendekwe ngosi ŵayiche. Pandaŵi jakusawusyaji Yehofa ŵatukamuchisye mnope. Yayatutendecheleyi yatukamuchisye kuti tutande kwanonyela mnope abale ni alongo ŵetu soni Yehofa.” Ana akukumbuchila ndaŵi jaŵasimene ni yakusawusya, nambo Mklistu mjawo jwayiche ni kwakamuchisya mwachinonyelo?

16. Ligongo chichi tukusosekwa kwanonyela ŵane ni mtima wosope?

¹⁶ Aganichisye yindu yambone yayikusapagwa ligongo lyakwanonyela ŵane mwakutyochela pasi pamtima. Mwachisyasyo, tukusakombola kwalimbikasya pasimene ni yakusawusya. Tukusakamuchisya kuti abale ni alongo aŵe ŵakamulana. Nambosoni tukusalosya kuti tuli ŵakulijiganya ŵa Yesu. Mwamti yeleyi yikusakamuchisya ŵandu ŵamitima jambone kuti alijiganye usyesyene. Nambo chakusosekwa mnope chili chakuti patukwanonyela ŵane tukusamchimbichisya Yehofa jwali ‘Atati ŵachanasa, soni Mlungu jwakusatulimbisya mitima.’ (2 Akoli. 1:3) Kwende wosopewe tupitilisye kwanonyela ŵane ni mtima wetu wosope.