1. Tiempu riʼ, ¿xi rusihuinni maʼ cadi nadxiisaa binni?

BIBLIA ná maʼ qué zannaxhii binni lu ca últimu dxi riʼ (2 Tim. 3:1, 3). Ne cayaca cumplir ca diidxaʼ riʼ ca dxi stinu riʼ. Guzéʼtenu caadxi ejemplu, cayuni sufrir stale familia purtiʼ maʼ guca divorciarcaʼ, nabé ridinde ca padre ne runi sentir ca xiiñicaʼ guirutiʼ nadxii laacaʼ. Nuu familia nabézacaʼ juntu peru casi ñaca qué runibiaʼcaʼ. Ti binni ni rudii conseju ca familia ca guníʼ: «Ca padre ne ca xiiñicaʼ qué ruiʼcaʼ diidxaʼ, sínuque maʼ guíʼdicaʼ lu computadora, lu tablet, lu teléfono o maʼ caguítecaʼ videojuego. Neca nabézacaʼ juntu, qué runibiáʼsaacaʼ».

2, 3. a) Casi ná Romanos 12:10, ¿tuu nga naquiiñeʼ gannaxhiinu né stale cariñu? b) ¿Xi zadúʼyanu artículo riʼ?

² Qué racaláʼdxinu guicá xpiaʼ binni guidxilayú laanu ne maʼ cadi gannaxhiinu (Rom. 12:2). Nga runi, cadi gusaana de gannaxhiinu familia stinu ne ca hermanu de congregación (biindaʼ Romanos 12:10). ¿Xi riníʼ diidxaʼ «lagannaxhiisaa»? Lu diidxaʼ griegu, laani nga guendarannaxhii ni nápanu familia stinu purtiʼ ridúʼyanu laacaʼ casi xhamígunu. Ngaca nga ni naquiiñeʼ guni sentirnu pur ca hermanu de congregación, purtiʼ nácacaʼ familia espiritual stinu. Pa gannaxhiisaanu né stale cariñu, zacanésaanu  para gúninu ni ná Jehová tobi si (Miq. 2:12).

³ Lu artículo riʼ zadúʼyanu caadxi ejemplu zeeda lu Biblia ni zacané laanu guni cultivarnu cualidad riʼ ne gannaxhiisaanu né stale cariñu.

4. ¿Ximodo racané Santiago 5:11 laanu guiénenu pabiáʼ nadxii Jehová laanu yaʼ?

⁴ Lu Biblia riete ca cualidad galán napa Jehová. Luni riete «Dios nga guendarannaxhii» (1 Juan 4:8). Ra gánnanu ndiʼ rucaani laanu chuʼnu jma gaxha de laabe. Ne laaca ruzeeteʼ Biblia guizáʼ «nadxii Jehová binni» (biindaʼ Santiago 5:11). ¡Aque sicarú modo ruzeeteʼ Biblia ni runi sentir Jehová pur laanu!

5. ¿Ximodo rusihuinni Jehová misericordia, ne ximodo zanda chinándanu ejemplu stibe yaʼ?

⁵ Lu Santiago 5:11 riete nadxii Jehová laanu, peru laaca riete sti cualidad ni nabé riuuláʼdxinu de laabe: misericordia stibe (Éx. 34:6). Rusihuinni Jehová cualidad riʼ ora runi perdonar ca pecadu stinu (Sal. 51:1). Peru ora caníʼ Biblia de misericordia, cadi caníʼ si ni guni perdonarnu. Misericordia ca riáleni ndaaniʼ ladxidóʼ binni ne rucaani laa gacané tuuxa ni cayacaná. Biblia ná deseu ni napa Jehová de gacané laanu jma nadipaʼ ni que ni runi sentir ti gunaa pur xiiñiʼ (Is. 49:15). Misericordia stiʼ Jehová nga rucaa laa gacané laanu ora cayacananu (Sal. 37:39; 1 Cor. 10:13). Laaca zanda guni cultivarnu cualidad riʼ ora guni perdonarnu ca hermanu stinu ne cadi guidxiichinenu laacaʼ ora gúnicaʼ xiixa ni qué riuuláʼdxinu (Efes. 4:32). Pa gacanenu laacabe ora cadíʼdicabe ra nagana, zusihuínninu rianu laacabe. Ora rucaa guendarannaxhii laanu gápanu misericordia, rinándanu ejemplu stiʼ Jehová purtiʼ laa rannaxhii né stale cariñu (Efes. 5:1).

6. ¿Ximodo bisihuinni Jonatán ne David nadxiisaacaʼ yaʼ?

⁶ Lu Biblia zeeda relatu stiʼ stale binni ni nabé gunnaxhiisaacaʼ. Guidúʼyanu ejemplu stiʼ Jonatán ne David. Lu Biblia ná «guca xhamigu Jonatán ne David, ne bizulú gunnaxhii Jonatán laabe cásica nadxii laca laa» (1 Sam. 18:1). Gulí Jehová David para gaca rey despué de Saúl, bixhoze Jonatán. Guizáʼ bidxiichiné Saúl David dede gucalaʼdxiʼ ñuuti laabe. Peru qué ñuu Jonatán pur bixhoze dxi gucalaʼdxiʼ ñuuti David. Guníʼ Jonatán ne David qué zusaana de gaca xhamígucaʼ ne zacanésaacaʼ (1 Sam. 20:42).

7. ¿Xi ti cosa ñándaca nucueeza Jonatán ne David para cadi ñaca xhamígucaʼ?

⁷ Nabé ridxagayaanu guca xhamigu Jonatán ne David purtiʼ guyuu stale cosa ni ñándaca nucueeza de ñaca xhamígucaʼ. Tobi de laacani nga huaniisi Jonatán biaʼ 30 iza jma que David. Nga runi, ñándaca niníʼ ique Jonatán qué zanda gaca xhamigu tuuxa jma nahuiiniʼ que laa ni huaxiéʼ napa experiencia. Neca zacá qué ñúnibe menu David.

8. ¿Xiñee rábiluʼ guca xhamigu Jonatán ne David?

⁸ Laaca ñándaca nidxiichi Jonatán ne nicá tema laa nga napa derechu de gaca rey despué de bixhoze (1 Sam. 20:31). Peru lugar de nga la? guca Jonatán humilde ne leal Jehová, biʼniʼ apoyarbe decisión stiʼ Jehová ora guníʼ David nga gaca rey. Laaca qué nusaanabe David neca guizáʼ bidxiichiné Saúl laabe (1 Sam. 20:32-34).

9. ¿Xiñee nanna dxíchinu qué ñuuyaʼ Jonatán David casi ti enemigu yaʼ?

⁹ Cumu nabé nadxii Jonatán David la? qué ñuuyabe laa casi ti enemigu. Guizáʼ gunna Jonatán gundaa flecha ne guca nadxibalú dxi guyé lu guerra. Guníʼ binni jma nagueenda Jonatán ne Saúl «que ca águila ne jma nadípacaʼ que ca lión» (2 Sam. 1:22, 23). Nga runi, ñándaca ñuni presumir Jonatán guiráʼ ni biʼniʼ dxi guyé lu guerra. Peru qué ñacaláʼdxibe nidíʼdibe lú David ne qué nidxiichibe pur guiráʼ ni cayuni, sínuque bisisácabe laa purtiʼ nadxibalú ne napa confianza Jehová. Ne bizulú gunnaxhii Jonatán David né stale cariñu despué de biiti Goliat. Yanna, ¿ximodo zanda gusihuínninu laaca nadxiinu ca hermanu stinu cásica biʼniʼ Jonatán ni yaʼ?

10. ¿Ximodo nga gannaxhiisaanu de guidubi ladxidoʼno yaʼ?

¹⁰ Biblia ná: «Lagannaxhiisaa de guidubi ladxidoʼto» (1 Ped. 1:22). Maʼ bisaana Jehová ti ejemplu galán para laanu. Nabé nadxiibe laanu, nga runi, pa gácanu leal laabe la? gastiʼ zanda guxheleʼ laanu de laabe (Rom. 8:38, 39). Ca diidxaʼ «de guidubi ladxidoʼto» caniʼni naquiiñeʼ guni tuuxa stipa para gannaxhii, ne ngaca nga ni naquiiñeʼ gúninu né ca hermanu stinu nuu biaje. Biblia cayabi laanu xi naquiiñeʼ gúninu ora guchiichi tuuxa hermanu laanu, sicaríʼ ná ni: «Lagusihuinni nadxiisaatu ora guni huantartu ni guni stobi laatu; laguni stipa pur chuʼtu tobi si casi ná espíritu ne cadi tíndetu» (Efes. 4:1-3). Para cadi tindenenu ca hermanu stinu, cadi naquiiñeʼ guidúʼyasinu ra cucheecabe, sínuque naquiiñeʼ gúninu stipa guidúʼyanu laacabe casi ruuyaʼ  Jehová laacabe (1 Sam. 16:7; Sal. 130:3).

11. ¿Xiñee nuu biaje raca nagana para laanu gannaxhiinu né stale cariñu yaʼ?

¹¹ Nuu biaje raca nagana para laanu gannaxhiinu ca hermanu stinu né stale cariñu, jmaruʼ si ora ridúʼyanu puru si ra cucheecabe. Maca rizaaca ni bizéʼtenu riʼ lu primé siglu. Guzéʼtenu ni bizaaca Evodia ne Síntique. Gucanecaʼ Pablo «para gaca predicar ca noticia galán». Peru guca nagana para laacaʼ gaca llevarcaʼ. Ngue runi, gudxi Pablo Evodia ne Síntique «chuʼcaʼ tobi si lu ni riníʼ íquecaʼ ra cayúnicaʼ xhiiñaʼ Señor» (Filip. 4:2, 3).

12. ¿Xi naquiiñeʼ gúninu para gannaxhiinu ca hermanu stinu né stale cariñu yaʼ?

¹² ¿Xi naquiiñeʼ gúninu para gannaxhiinu ca hermanu stinu né stale cariñu yaʼ? Gúninu stipa gunibiaʼnu laacabe jma. Pa gúninu ni la? qué zaca nagana para laanu guiénenu ne gannaxhiinu laacabe. Cadi guiníʼ íquenu qué zanda gaca xhamígunu tuuxa purtiʼ jma huaniisi o jma nahuiiniʼ que laanu o purtiʼ de gadxé cultura laa. Cadi guiaandaʼ laanu guizáʼ guca Jonatán xhamigu David neca huaniisi biaʼ 30 iza jma que laabe. ¿Xiñee qué quixhe íqueluʼ gaca xhamíguluʼ tuuxa hermanu ra congregación stiluʼ ni jma huaniisi o jma nahuiiniʼ que lii yaʼ? Pa gúniluʼ ni, zusihuínniluʼ nadxiiluʼ «guiráʼ ca hermanu» (1 Ped. 2:17).

13. ¿Xiñee nuu biaje zuni sentirnu jma galán né caadxi hermanu?

¹³ Naquiiñeʼ gannaxhiinu ca hermanu stinu, peru ¿ñee malu nga chuʼ tuuxa ni guizáʼ xhamígunu la? Coʼ. Nuu biaje zuni sentirnu jma galán né caadxi hermanu purtiʼ laaca riuuláʼdxicaʼ ni riuuláʼdxinu. Biiyaʼ Jesús guiráʼ ca apóstol stiʼ casi xhamigu, peru nabé gunnaxhiibe Juan (Juan 13:23; 15:15; 20:2). Neca zacá qué ñúnibe jma pur laa. Guzéʼtenu ti ejemplu, dxi gudxi Juan ne Santiago Jesús gudii laacaʼ ti puestu risaca lu Reinu stiʼ Dios guibáʼ, sicaríʼ gudxi laacaʼ:  «Cadi naa diaʼ nga guinieeʼ tu cuiʼ ladu derechu ne ladu bigaʼ stinneʼ» (Mar. 10:35-40). Laanu laaca naquiiñeʼ chinándanu ejemplu stiʼ Jesús ne cadi gúninu jma pur ca ni guizáʼ xhamígunu ne gúninu menu xcaadxi hermanu (Sant. 2:3, 4). Pa qué chinándanu ejemplu stiʼ Jesús, qué zacanenu chuʼ congregación tobi si (Jud. 17-19).

14. Casi ná Filipenses 2:3, ¿xi naquiiñeʼ gúninu para cadi guyúbinu tídinu lú ca hermanu de congregación?

¹⁴ Pa gannaxhiinu ca hermanu de congregación qué zuyúbinu tídinu lúcabe. Cadi guiaandaʼ laanu qué ñacalaʼdxiʼ Jonatán nidiʼdiʼ lú David ne laaca qué ñuuyabe laa casi ti enemigu. Chinándanu ejemplu stiʼ Jonatán ne cadi guidúʼyanu ca hermanu stinu casi ti enemigu pur ca habilidad galán ni nápacaʼ. Lugar de nga la? gúninu ni guníʼ Pablo: «Lagusihuinni humilde laatu ora guiníʼ íquetu jma risaca xcaadxi que laatu» (biindaʼ Filipenses 2:3). Cadi guiaandaʼ laanu guiráʼ hermanu racané ndaaniʼ congregación. Pa humilde laanu, zadúʼyanu ca cualidad galán ni napa ca hermanu stinu ne zacané ejemplu stícabe laanu (1 Cor. 12:21-25).

15. ¿Xi riziidiluʼ de ni bizaaca Tanya ne familia stiʼ?

¹⁵ Ora ridídinu ra nagana, né stale cariñu riguixhedxí Jehová ladxidoʼno ne riquiiñebe ca hermanu para gacanecaʼ laanu. Guidúʼyanu ni bizaaca ti familia ti sábadu despué de guyecaʼ asamblea internacional ni láʼ «Qué ziuu dxi guirá guendarannaxhii» ni guca Estados Unidos lu iza 2019. Tanya, ti hermana ni napa chonna xiiñiʼ guníʼ ora  zecaʼ ra hotel sticaʼ málasi guyuu ti carru lu carril sticaʼ ne bidxelasaa laacaʼ. Sicaríʼ guniʼbe: «Guirutiʼ ñacaná, peru biétedu de lu carru que ne cadxíbidu bizuhuaʼdu lu carretera que. Óraque biiyaʼ zuhuaa ti carru guriá carretera ne cayuni ti binni seña laadu chuudu ra nuu. Guca si ni ti hermanu ni laaca zeeda de asamblea que. Ne cadi laasibe bizuhuaabe para gacanebe laadu; laaca beeda gaayuʼ delegadu de Suecia ra nuudu. Gudiidxi ca hermana que naa ne dxaapahuiiniʼ stinneʼ né stale cariñu, ngue peʼ nga ni caquiiñedu óraque. Neca gúdxidu laacabe nuudu bien, biaanacaʼ ra nuudu. Qué ñédicabe neca maʼ biiyaʼ ca doctor nuudu bien. Gucanécabe laadu. Neca nagana ra gudídidu que, biʼniʼ sentirdu qué nusaana Jehová laadu ne nadxii laadu. Ni bizaacadu riʼ gucaneni laadu gannaxhiidu ca hermanu stidu jma. Ne gunnaxhiidu Jehová jma ne bidiʼdu xquixe peʼ laabe». ¿Ñee rietenaláʼdxiluʼ dxi bisihuinni tuuxa hermanu nadxii lii né stale cariñu ora peʼ caquiiñeluʼ ni la?

16. ¿Xi razón nápanu para gannaxhiisaanu né stale cariñu?

¹⁶ ¿Xi zabeendunu pa gannaxhiisaanu yaʼ? Zaguixhedxinu ladxidóʼ ca hermanu stinu ora cayacanacaʼ ne zacanenu chuʼ xquidxi Dios tobi si. Laaca zusihuínninu dxandíʼ xpinni Jesús laanu, ne pur nga ziuulaʼdxiʼ binni guni ni ná Jehová. Peru ni jma risaca nga zusisácanu Jehová purtiʼ «Bixhózenu laa ne riá laanu ne riguixhedxí ladxidoʼno» (2 Cor. 1:3). Nga runi, cadi gusaana de gannaxhiinu né stale cariñu ne gusihuínninu ni.