1. Ginipai nayugo gupai nga nyemuse gbua ni toonihe rogo badungu ariikporo areme?

ZIAZIA KEKEAPAI agumba gupai kumbatayo nga, ti yangara arame, aboro nika du ni “airasakparakpa” watadu agu aboro adunga na wesewese nyemuse ya. (2 Tim. 3:1, 3) Ani nabi gi sangbanebi re abi si nidigisi tihe areme. Ni kpiapai, dungu avunguagude naima mbutiyo na i na zinga dagbatiyo, na gipai re nasa awiriyo i naabitiyo nga i akpinga nyemu yo te. Zavura agu aborokporo naraka kina rogo bangisa kporo sa ima rengba ka zanga du na mbembedi pagume dagbatiyo. Ni kpiapai kura bafu rugute sa fu ariikporo aya: “Anaagude, abaagude, gbiati agude afuranga dagbatiyo te, na i nadia bakere gayo regbo kina kuti mangasunge na akompiuta, ataburet, aterefuni, watadu agu ambaro nga ga vidio. Wa vura duhe nga agi aborokporo re naraka rogo bangisa kporo sa, i ainongo tiyo wenengai gbe te.”

2-3. (a) Ringbisihe kuti ARomo 12:10, ada si aida ani yugu wesewese nyemuse fuyo? (b) Ginipai ani nika sakapai tipaha rogo gi kekeapai re?

² Si aidanga gu toro nga ga zanga du na nyemuse du rogo zegino du na maapai kurii rani te. (Rom. 12:2) Kuba gure, si naida ani sonosi wesewese nyemuse, angianga tipa kina gaani aborokporo sa ya, ono tipa agu aboro a du ani na yo rogo idapase yo. (Oni gedi ARomo 12:10.) Ginihe nga wesewese nyemuse? Wesewese nyemuse nga gu dawedawe pabakure du dagba mbembedi aborokporo. Si nga gu ngbatunga nyemuse si aida ani sonosihe tipa gu gaani aborokporo nga ga toro yo, du nga agu awirinarani nga aKristano. Ho ani ayugo wesewese nyemuse ni, ani naundo na banda gu kodatise du ni nyanyakipa papara ndikidi irisombori.—Mika 2:12.

³ Tipa ka sonosa wesewese nyemuse na kini yuguhe, ani bingo gupai rengbe ani ka wirikaha ti akpiapai nga ga Ziazia Kekeapai.

4. Ginipai Yakoba 5:11 apehe furani tipa ga Yekova nyemuse?

⁴ Ziazia Kekeapai nayugopai furani tipa gu wene asino du ti Yekova. Ni kpiapai, si nape gupai nga, “Mbori nga nyemuse.” (1 Yo. 4:8) Ho ani awirika gupai re ni tipa Yekova, ani nadu na nyemu kadu ni abakureako. Ono Baibiri nayugo gupai a nga Yekova “na bakere nunga” watadu wesewese nyemuse tiko. (Oni gedi Yakoba 5:11.) Gere nga gu bawene afugo nayugo pa wai Yekova nakpinyemu rani!

5. Waigu Yekova ayugo inapai, na waigu rengbe ani ka wirika gako kpiapai?

⁵ Oni bi gupai nga Yakoba 5:11 nafura tipa ga Yekova wesewese nyemuse wa sa na kura sinoko nga inapai nga gu nambedisa rani koyo du ko ni. (Gate 34:6) Gene sa Yekova ayugo gako inapai furani ngbaha nga ni mbuko pai furani ti agu aingahe ani amangaha. (Tam. 51:1) Rogo Ziazia Kekeapai yo, inapai ayugongo kina pa mbupai sa fu gu boro mangi ingahe te. Si nayugopa wai a du boro ho ni abi kura boro ni rogo gberãrago si ki fõ ngbaduniyo tipa ni mangipai ka undo gu boro re. Yekova nape gupai nga gu bakere nyemupai du ko na ni ka undo rani ima kio kisusi gu nyemuse du nagude na ni koyo du wiiri ni. (Yes. 49:15) Ho du ani ni rogo fudifudipai, ga Yekova inapai nafõngbadukoyo tipa ko undo rani. (Tam. 37:39; 1 Kor. 10:13) Ani nayugo inapai fu awirinarani ni mbu ani pai fuyo na ni zanga kpi ani pai kutiyo ho i namangi gupai ni ba gberãrago tirani. (Ef. 4:32) Ono gu nyanyakipa gene sa rengbe ani ka yugo inapai fu awirinarani ngbaha nga ni songoda ani yo rogo agu akpakarapai i agbiatiyo na ni. Ho nyemuse afõngbaduraniyo ni ani yugu inapai fu kura aboro, ani nawirika gu bawene kpiapai kisusi nga ga Yekova nga gu ko kii gbe rogo yugo wesewese nyemuse yo.—Ef. 5:1.

6. Waigu aYonatana na Davide ayugu wesewese nyemuse dagbatiyo?

⁶ Ziazia Kekeapai na apangbanga rogoho nga ga kpakpa aboro nga aguyo nayugu  wesewese nyemuse. Oni bingo gu kpiapai nangia ga Yonatana na Davide. Ziazia Kekeapai naya: “Mbisimo Dawidi ki ngba ti mbisimo Yonatana, Yonatana ki nikpi nyemu ko wa kina boro mbisimoko.” (1 Sam. 18:1) Yekova aima sia Davide tipa ko du ni bakindo fuo Saura. Mbiko gipai re, Saura akpipai kuti Davide na kini asadi ka imo ko. Ono wiri Saura nangia Yonatana aasongodanga bako rogo gu asadatise yo ko aamangaha tipa ka imo Davide te. AYonatana na Davide amangi kidohe ka nye ni abakure na kini songodi tiyo dagbatiyo ti aregbo dũ.—1 Sam. 20:42.

7. Ginipai naaima rengba ka ká na aYonatona na Davide ti du yo ni wene abakure?

⁷ Kina ngbarani rengbe ka zera ka bi wai aYonatana na Davide adu ni wene mbembedi abakure bambiko dungu apai kinaho naaima rengba ka sayo ka i dunga ni wene abakure ya. Ni kpiapai, Yonatana adu ni unvuru fu Davide na agarã wa 30. Yonatana aima rengba ka berã gupai nga, ko arengbanga kadu mbembedi na paranga boro wa gure nga gu ni adunga na bakere inohe rogo raka yo ya te. Ono Yonatana aaberãnga pai wa gure tipa Davide te. Ko anaabi Davide na bakere irisa.

8. Ginipai mo abihe ti ni nga Yonatana angia wene bakure fu Davide?

⁸ Yonatana aima rengba ka kpipai kuti Davide. Wa Yonatana adu ni wiri Bakindo Saura, ko aima rengba ka kakuti gupai nga kina ko si aida ko du ni bakindo fuo bako. (1 Sam. 20:31) Ono Yonatana adu na umbasitise, na ko adu ni ruruko fu Yekova. Ko asongodi gu siapai na ngbadukoyo dunduko Yekova amangihe ka maa Davide ni bakindo. Ko adu ni ruruko fu Davide wa si avura du nga gipai re asa Saura ko du na bakere zinga.—1 Sam. 20:32-34.

9. Ya mo Yonatana aabi Davide ni vurako? Oni sakingo rogoyo.

⁹ Yonatana aima kpinyemu Davide, ko anaakpingo ko te. Yonatana angia ngangarã kumba, ko aso dungu avura na ko aima ino wai ka mangasunge na mboto gbiati aguanza wenengai. Aboro anaape gupai nga ko gbiati bako “aniipi ki susi adingimo” na “i adu na ome ki susi abahu.” (2 Sam. 1:22, 23) Sidu, Yonatana aima rengba kaa manga rukö tipa gu bakere apai ko amangihe. Ono tie, ko aasadanga kadu na pako kuari kisusi ga Davide te, ko aakpingo Davide tipa gu weneapai Davide amangihe te. Kuba gure, Davide aima ngba ti Yonatana mbiko gu wingbaduse Davide adu na ni gbiati kido kuti Yekova. Ni kpiapai, tifuo Davide imi Goriata, Yonatana atona kadu na mbembedi pagume na Davide gbe. Waigu rengbe ani ka yugo gu ngbatunga wesewese nyemuse re fu awirinarani?

10. Gupai nga ani ‘kpí nyemu akuarani akpi kakaka kpotorani yo’ nayugo ginipai?

¹⁰ Ziazia Kekeapai nayugopai furani tipa ani ‘kpí nyemu akuarani akpi kakaka kpotorani yo.’ (1 Pet. 1:22) Yekova namaa kpiapai furani. Gako nyemuse ni ba nyanyakihe koyo du ani ni na ka ani du ni rururani fuko, ko nikaa kpinyemu rani akpi kindi. (Rom. 8:38, 39) Gu fugo i namangisunge na ni nga “kakaka” nayugo pa gu bakere asadatise boro amangaha tipa ka yugo nyemuse. Ti kura aregbo, si arengbanga kadu taata tipa ani yugu nyemuse fu awirinarani te. Ho kura aboro aba gberãrago ni tirani, si naida ani naandu kindi kumbatayo kaa ‘hi pai fu akuarani ni nyemuse; nike na ka kuti gu du sa nga ga Toro zikazika, ni gu ũkpamiatise nga zereda.’ (Ef. 4:1-3) Ka ani mangi asadatise nyanyaki tipa ka manga zereda na awirinarani, ani amaanga berãrani fuo kina gayo aingahe te. Ani nika asada tirani gbe tipa kaa bi awirinarani wakina gu Yekova abiyo.—1 Sam. 16:7; Tam. 130:3.

11. Tipagine rengbe pa sonosa wesewese nyemuse ti ni kadu ni kpakarakpakaraha ti kura aregbo?

 ¹¹ Anga taatapai ngaha ti aregbo dunduko kaa yugo wesewese nyemuse fu awirinarani te, gbe ho ani arugatirani ni na pa gayo aingahe. Si nawira gupai nga, gere nga gu kpakarapai naadu tipa gu kura aKristano naadu rogo bambata sa kama agarã. Ni kpiapai, si nawira gupai nga aEuodia na Sunduke aadunga na kpakarapai kaa ‘mangasunge na [Pauro] rogo wene pangbanga’ yo te. Ono mbiko gu kura ndupai, i aadunga na giatise dagbatiyo te. Sidu, Pauro aruguyo tipa “i dú na berã sa rogo Gbia” yo. —Frp. 4:2, 3.

12. Waigu rengbe ani ka sonosa wesewese nyemuse tipa awirinarani?

¹² Waigu rengbe ani ka sonosa wesewese nyemuse tipa awirinarani areme? Ho ani aino akuarani aidipase ni wenengai, si ima rengba kadu taata furani ani rugutirani na yo na ani ki sonosi wesewese nyemuse tipa yo. Ani ima rengba kadu na bakure na yo ka si vura du vurũ nga garãyo kii ti gaani watadu ani ni paranga rani tiyo na gaani sino mangaapai kidu kia tigayo. Oni tingidi gupai nga, Yonatana angia unvuru fu Davide na agarã wa 30; ono wa si avura du wo, ko aima sonosa mbembedi pabakure na Davide. Ya mo boro ho rogo gamo dungurati du nga unvuru foro watadu du nga tame foro rengbe mo ka zio bakure na ni? Ka mo mangi gupai re, gure nga mo nayugo gupai nga mo ima “kpí nyemu awirina” dunduko.—1 Pet. 2:17.

13. Tipagine ani arengbanga kadu ti ni mbembedi na aboro dunduko rogo dungurati ya?

¹³ Ya mo padu ani na wesewese nyemuse koyo du awirinarani aidipase ni nayugo gupai nga ani nika du na mbembedi pabakure na aboro dunduko rogo dungurati? Oó, ka pai mangingo wo te. Gbegberẽpai ngaha kadu mbembedi na kura aboro kisusi agu akurayo mbiko gupai nga i nakpinyemu kina agu apai ani nakpinyemuhe te. Yesu afura tipa gako amokedi dunduko nga i angia “abadiangba” ko watadu abakureako, ono ko aima du mbembedi na Yoane kisusi. (Yo. 13:23; 15:15; 20:2) Ono tie, Yesu aangbanga na Yoane kisusi kura aboro te. Ni kpiapai, ho Yoane na wirinako nangia Yakoba asana  Yesu ni tipa nyanyakipa bangiriba rogo ga Mbori Kindo, Yesu aya fuyo: “Sunga ku kumbabere na garebere gi gamahe nga ha te.” (Mk. 10:35-40) Wakina Yesu, si aidanga ani ngba na kina mbembedi abakurearani kisusi kura aboro te. (Yak. 2:3, 4) Ka ani mangihe wo, si ima rengba ka sonosa gu toro nga ga kparakaro—nga gu toro adunga baha rogo gu dungurati nga ga aKristano ya.—Yuda 17-19.

14. Ringbisihe kuti AFiripoio 2:3, ginipai rengbe ka undo rani ani ne gu sino nga ga abaangirã?

¹⁴ Ho ani ayugo wesewese nyemuse ni fu kura aboro, ani nabanda dungurati be gu toro nga ga abaangirã. Oni tingidi gupai nga Yonatana aakpingo pai kuti Davide te, na ko aasadanga kadu ni bakindo kuba Davide a te. Ani dunduko naima rengba ka wirika ga Yonatana kpiapai. Ka mo kpingo awirinamo mbiko gayo tandu mangaapai ya, ‘ono na umbasitise nga ga berã, mo niiberẽ gupai nga akuaro kiipayo tiro.’ (Oni gedi AFiripoio 2:3.) Si naida ani tingidi gupai nga, ani dunduko ima rengba ka manga gupai rengbe ka undo dungurati. Ka ani nye ni aboro umbasitise, ani ima rengba ka bi gu wene asino duti awirinarani na ani ki gbia undo ti gayo kpiapai nga ga du ni ruruse.—1 Kor. 12:21-25.

15. Ginipai mo awirikaha ti gu kpiapai nga ga Tanya na gari aborokporo?

¹⁵ Ho gbegberẽpai amanga ni rogo gaani raka, Yekova nafu wasa furani vurube gu wesewese nyemuse nga ga awirinarani na vurube gayo undo rogo mangimangipai yo. Oni bingo gu kpiapai nga ga kura aborokporo nga aguyo naadu pati gu bakere dunguratise nga ga dungu aringara, Amerika yo rogo 2019 riihe adu nga, “Nyemuse Adíga Nga Te”! Tanya nga boro sa dagba agu aborokporo re du na agude beri  biata aya, “Ho ani aaga ni ku rogo gu bambu rame ti marã ani adu rogoho, gu kura tarambiri agusi gene na ki ye kuti gu gene ani adu ti ni na ki fõ gaani tarambiri. Boro ho gbegberẽpai amangi ni te, ono gipai re aima zigbä rani, ani akuru rogo tarambiri na ki ru bangiri gene. Gu kura boro naadu ku banduru gene kuba ni agumba gupai furani nga ani ye ku rogo gani tarambiri tipa kadu yo ni bandabanda rani. Gu boro re angia boro sa dagba awirinarani yo nga guni naayego a ba bakere dunguratise yo. Na anga kina ni nga gu yangara boro naru te. ADezire Yekova bisue naye rogo gu ringara nga Sweden naadu kina pati gu bakere dunguratise re aima ru fuo rani a. Agu awirina nga adee adungo wire gbiati re, si asa rani ani du wenengai! Mi agumba gupai fu agu awirina re nga ani nika duadu wenengai, i mbu rani ambu ki ga. I anye fuo rani daho aboro bambungua aye ni, na i ki bihe nga ani na agu ahe dunduko berani si aaidaha tipa rani. Ti gu kpakarakpakara regbo re, ani aima bi ga Yekova nyemuse. Gipai namangi rani re aima nyakasa gaani nyemuse tipa awirinarani na si ki nyakasi gaani tambuahe fu Yekova a.” Ya mo mo natingidanga pa regbo nga gu mo aaida undo na wirinamo idipase ki yugu wesewese nyemuse foro?

16. Gini nduapai du berani ka yugo wesewese nyemuse dagba tirani?

¹⁶ Oni berẽnga pa gu weneapai namanga ho ani ayugo wesewese nyemuse ni fu akuarani. Ani nafu wasa fu agu awirinarani nagbiatiyo na akpakarapai. Ani naundo awirinarani tipa i naairiso Yekova kina sa na ngbarago. Ani nayugo gupai nzunzu nga ani nga ga Yesu abawiriki na gipai re naundo agu aboro du na ruru ngbaduyo yo tipa i du na nyemu ka iriso Yekova. Kurii agi apai re dunduko, ani nafu taarimo fu gu “Mbori nga Ba gaani Gbia Yesu Kristo, nga Ba inaapai, nga Mbori wasa dunduko,” nga Yekova. (2 Kor. 1:3) Ani dinga berã adia wa du ani dunduko kaa sonosa wesewese nyemuse na kini yuguhe!