Esposojajj Harvey satawa, familiapan pusi jiläpjjewa, jupaw jilïrejja. Midland Junction markanwa (Australia Occidental) familiapajj Jehová Diosar uñtʼatayna. Ukhajj 1930 maranakänwa, uka markanjja manqʼat pistʼañaw utjarakïna. Esposojajj 14 maranïkäna ukhaw bautisasïna. Uka qhepatjja, Jehová Diosar taqe kunan istʼañwa yateqäna. Mä kutejja, waynitükäna ukhajj tantachäwin revistat liytʼañapatakiw mayipjjäna, jupajj janiw munkänti, ‘janiw nayajj puedkiristti’ sasaw amuyäna. Ukampis mä jilatajj akham sasaw esposojar säna: “Kun lurañtï mayipjjätam ukhajja, ‘jupajj uk lurañ puediwa’ sasaw jumat amuyapjje ukatwa uk lurañ mayipjjtam” sasa (2 Cor. 3:5).

Nayajj Inglaterra markanwa mamitajampi jilïr kullakajamp chika Jehová Diosar uñtʼawayta. Qalltan papitujajj janis Bibliat yateqañ munkchïnjja, qhepat yateqjjänwa. Nayajj llätunka maranïkasaw bautisasta. Precursoräñwa amtayäta, qhepat misioneräñwa munarakiyäta. Papitujajj janiw precursoräñaj munkänti, ‘21 maranëjjäta ukhaw precursoräsma’ sasaw sitäna. Janiw nayajj ukhakam suyañ munkayätti. Ukhamajj 16 maranïkayäta ukhajja, Australia markaruw kullakajan ukar sarjjayäta.  Ukar sarañatakejj papitujaw permiso churitäna. 18 maranëjjayäta ukhaw precursorat serviñ qalltayäta.

Australianwa esposojar uñtʼayäta, jupajj misionerot serviñwa munarakïna. 1951 maranwa casarasipjjta. Pä maraw precursor regularat servisipkayäta, ukhaw congregacionanak tumptʼirit servipjjañajatak invittʼapjjetäna. Visitapkayäta uka circuiton territoriopajj wali jachʼänwa, ukawjanakar puriñatakejj wali jaywa autot sarapjjerïta.

1954 maranwa Galaad Escuelar (clase 25) invittʼapjjetu. Munapkayäta uka asignación niyaw katoqapjjañajäna. Nueva York markarojj barcotwa puripjjayäta. Uka escuelanjja, Bibliat wali sumwa yatjjatapjjayäta. Ukatjja español aru parlañwa yateqapjjañajarakïna, ukampis esposojatakejj wali chʼamänwa, jupatakejja errenak arsuñaw jan faciläkänti.

Uka escuelan yatichapkäna uka jilatanakajja, ‘khitinakatï Japón markan serviñ munapki ukanakajj japonés aru yateqañatakiw qellqayasipjjasma’ sasaw sapjjetäna. Ukampis janiw qellqayasipkayätti, kawkirutï Jehová Diosajj khitañ munapjjetäna ukaruw sarañ amtapjjayäta. Albert Schroeder jilatajj ukar jan qellqayasipjjataj yatïna ukhajja, akham sapjjetänwa: “Mä jukʼamp amuytʼasipjjam” sasa. Albert jilatajja, escuelan mä yatichiripänwa. Pächasisipkakitaj yatisajja, akhamwa sapjjarakitäna: “Nayampi mayni yatichirinakampejj japonés aru yateqapjjañamatakiw qellqayjjapjjsma” sasa. Esposojatakejj uka aru yateqañajj facilakïnwa.

1955 maranwa Japón markar puripjjta. Uka tiemponjja, 500 publicadoranakakiw uka markan utjäna. Esposojajj 26 maranïnwa, nayasti 24 maranirakiyätwa. Qhepatjja mayampiw congregacionanak tumptʼirit servipjjañajatak invittʼapjjetäna, uk yatiñajj wal kusisiyapjjetäna. Japón markan serviñajj wal gustapjjetäna, jilat kullakanakajj wali munasirïpjjänwa, manqʼasa paisajenakasa wali sumänwa. Uka qhepatjja, yaqha asignacionan servipjjañajatakiw mayipjjetäna. Uk phoqañatakejj chʼamachasipjjañajänwa.

Kimsa mara congregacionanak tumptʼirit servisipkayäta ukhajja, sucursalajj janit Taiwán markar sarañ munapkasma sasaw jisktʼapjjetäna, uka markanjja ami aru parliri jaqenakaruw  predicapjjañajäna. Ami aru parliri yaqhep jilat kullakanakajja, apostatanakaruw tukupjjatayna. Mayni jilat kullakanakan jan ukham tukupjjañapatakejja, japonés aru parlir mä jilataw jupanakar yanaptʼañatak munasïna. * Uka asignacionar iyawsañajj janiw faciläkänti, nanakajj Japón markan yatinoqtatäjjapjjayätwa. Kuntï Jehová Diosajj mayipkitäna ukar istʼañwa esposojajj yateqäna, ukatwa uka asignacionar sarañ amtapjjayäta.

Noviembre de 1962 maranwa Taiwán markar puripjjayäta, ukanjja 2.271 publicadoranakaw utjäna, jilapartejj ami aru parlirinakäpjjänwa. Jichha kutinjja chino aru yateqapjjañajänwa, ukampis yateqañatakejj mä librokiw utjapjjetäna, uka aru yatichapkitäna uka profesoras janiw inglés parlañ yatkänti, ukhampachas yateqapjjayätwa.

Taiwán markar puripjjayäta uka qhepatjja, esposojaruw sucursal pʼeqtʼañapatak uttʼayapjjäna. Niyakejjay sucursalajj jiskʼakïchïnjja, lurañanakajj janiw waljäkänti, ukatwa esposojajj ami aru parliri jilat kullakanakampejj phajjsin walja urunak predikir misturïna. Awisajj superintendente de distrito ukhamaw yanaptʼarakirïna, ukatwa asambleanakan discursonak arstʼarakirïna. Uka discursonakjja, japonés arutwa arstʼasapäna, ami aru parlirinakas entiendipjjarakispänwa. Ukampis gobiernojja, ‘religionanakajj chino arutakwa yatichapjjañapa’ sasaw mä ley apsüna. Esposojajj janis chino aru yatkchïnjja, uka arutwa discursonak arstʼirïna, ukatjja yaqha jilataw ami arur uka discursonak traducirïna.

Uka tiemponjja, ley marcial ukaw Taiwán markan utjäna. Ukatwa jilatanakajj asambleanak apasiñapatakejj gobiernor permiso mayipjjerïna. Uka permisonak apsuñajj janiw faciläkänti. Asamblea urunakajj purinjjäna ukhakamasa policianakajj janiw permisonak churapjjerïkitänti. Ukajj pasirïkäna ukhajja, esposojajj comisariaruw sarirïna, permiso churayasiñkamaw ukan suyarakirïna. Comisarian mä extranjero jaqe suyaskir uñjañajja, janiw policianakarojj gustkänti, ukatwa mun jan muna permiso churapjjerïna.

Jilat kullakanakamp predicapkayäta ukhajja, wali jachʼa qollunakaruw kayuk makatapjjerïta, jawiranaksa paskatapjjarakirïta. Mä qollu nayrïr kutin makatkayäta uk janipuniw armaskti. Janïr qhanjtankipanwa mä autot mä jaya lugarar sarapjjerïta. Mä jawir paskatasajja, qolluruw predicañatak makatapjjerïta, uka qollojj wali saytʼat qollünwa.

Uka alwajja, esposojajj mä qhawqha jilatanakampiw predicaskäna. Nayasti, japonés aru parlir mä jiskʼa markänwa sapak predicaskarakiyäta. Niyakejjay walja horanak jan manqʼatäjjchiyätjja, chika uru pasatajj jan chʼamanjamaw jikjjatasjjayäta. Esposojamp jikisjjapjjayäta ukhajja, jilatanakajj janiw ukankjjapjjänti. Predicacionanjja, mä qhawqha revistanak lantejj kimsa kʼawnanakwa esposojar churapjjatayna. Jupasti jan qhatita kʼawnanak juchsuñwa yatichitäna. Jupajj mä kʼawnwa manqʼantäna, nayarojj janis gustkchitänjja, mä kʼawn manqʼantarakiyätwa. Ukampis mä kʼawnampiw utjaskäna, nayaw uka kʼawn manqʼantayäta, janitï manqʼantkiriskayätjja qollut saraqañatakejj janiw chʼamajajj utj-jjetaspänti.

Mä kutejja, asamblea de circuito ukatakiw wakichasisipkayäta, Salón jakʼan jakiri mä jilatan utapanwa alojatäpjjayäta. Ami aru parliri jaqenakatakejja, bañasiñajj wali importantewa. Ukatwa congregacionanak tumptʼirin esposapajj bañasipjjanajatak wakichäna. Esposojajj wali ocupatänwa ukatwa ‘jum nayraqat bañasinim’ sasin sitäna. Kullakasti, mä balden juntʼu uma, yaqha balden alal uma, ukat mä bañadorampwa wakichäna. Ukanaksti uta anqaruw uchäna, Salonan asambleatak wakichapkäna uka jilat kullakanakas uk uñjasinipkarakïnwa. Ukatwa nayar jan uñjanipjjañapatakejj mä cortina kullakar mayiyäta, ukampis kullakajj mä naylonakwa churitäna, ukajj janiw kunsa imantkitänti. Ukhamasti ‘uta qhepäjjaruw bañasir sarirista’ sasaw amuyayäta, ukampis gansonakaw uta qhepäjjan utjäna, ‘pʼatanoqapjjetaspawa’ sasaw ajjsarayasiyäta. Ukatwa ‘jilat kullakanakajj nayar uñchʼukinisipkañapatakejj wali ocupatäpjjewa’ sasin amuyayäta. Ukhamasti bañasiyätwa, janitï bañaskiriskäyätjja inas ami aru parliri jilat kullakanakajj colerasipjjchispäna.

Esposojajj maywa amuyäna, ami aru parlir jilat kullakanakat jilapartejja, janiw liytʼañ yatipkänti, janirakiw Bibliat apstʼat qellqatanakas uka arut utjkänti. Ukatwa jilat kullakanakatakejj Jehová Diosar jukʼamp munasiñajj chʼamakïna. Alfabeto latino ukamp qellqasiñapatakiw ami aru yatichasipkäna, ukhamasti uka arut liytʼapjjañapatakiw jilat kullakanakar yanaptʼañ munapjjayäta. Janiw faciläkänti, ukampis tiempompejja jupanak pachpaw Bibliat sapak yatjjatjjapjjäna. 1960 maranakanwa ami arut nayrïr qellqatanakajj utj-jjäna. 1968 maranjja Yatiyañataki sat revistaw utj-jjarakïna.

Ukampis gobiernojja, chino arutakwa qellqatanakajj utjañapa sasaw mä ley apsüna. Ukatwa jan problemanakanïñatakejja, Yatiyañataki revistajj mä qhawqha tiempojj chino arumpita ukat ami arumpit apsusïna. Ukhamasti chino arsa yatichapkirista ukhamänwa. Uka tiempot jichhakamajja, Diosan markapajj jaqenakar yanaptʼañatakejj walja qellqatanakwa ami arut apsuwayi (Hech. 10:34, 35).

1960 ukat 1970 maranakanjja, ami aru parliri jilat kullakanakat waljanejj jan walinakwa lurasipkäna. Niyakejjay Biblian yatichäwinakap jan sum amuyapkchïnjja, waljaniw qʼañu juchanakan sarnaqasipkäna, machantasipjjäna, tabaco jan ukajj nuez de areca ukanakamp drogasipjjäna. Jehová Diosajj kunjamsa uka jan wali lurañanakar uñji uk amuyapjjañapatakiw esposojajj uka congregacionanakar visittʼäna. Uka congregacionanakar visitkasinwa kuntï qalltan cuenttʼapkayäsma ukajj pasapjjetäna.

Humilde chuymanïpkäna uka jilat kullakanakajj uka jan wali lurañanak apanukupjjänwa. Ukampis yaqhepanakajj janiw ukham lurapkänti. Taiwán markanjja, 2.450 jila publicadoranakaw utjäna, ukampis 20 maranak qhepatjja mä 900 publicadoranakakiw utj-jjäna. Uk yatisajj nanakajj wal llakisipjjayäta. Ukampis Jehová Diosan bendicionanakap katoqañatakejja, congregacionanakan qʼomäñapaw wakisïna (2 Cor. 7:1). Tiempompejja, jilat kullakanakajj janiw uka jan walinak lurjjapjjänti. Jichhajja, Jehová Diosan bendicionapampejj 11.000 publicadoranakaw Taiwán markan utj-jje.

1980 marat aksarojja, ami aru parliri congregacionankir jilat kullakanakajj jukʼampiw Diosar confiyjjapjjäna. Ukatwa esposojajj chino aru parliri jaqenakar jukʼamp predikjjäna. Yaqhep kullakanakan esposonakaparus Testigöpjjañapatakiw yanaptʼarakïna. Jupanakat maynejj nayrïr kuti Jehová Diosar oraskäna uk istʼasas esposojajj walpun kusisïna, uk amtasipuntwa. Nayas waljaniruw Jehová Diosar uñtʼapjjañapatak yanaptʼawayta, ukajj wal kusisiyitu. Bibliat maynir yatichkayäta ukan yoqapampi ukhamarak phuchapampi sucursalan trabajiñas wal kusisiyarakitäna.

Esposojajj cancerampiw jiwjje, 1 de enero, 2010 maranwa jiwjje. 59 maranakaw casadöpjjayäta. Niya 60 maranakaw jupajj Jehová Diosarojj sapürunjam serviwayi. Wal jupat faltachastjja. Ukampis jupar yanaptʼatajat walpun kusista. Esposojampejj wali chʼama pä idiomanakwa yateqawayapjjta, jupajj qellqañ kunwa yateqawayi.

Esposojajj jiwjjäna uka qhepatjja, Oraqpachan Jilïr Irpirinakajj edadanëjjataj laykojj Australia markar kuttʼjjañajatakiw mayipjjetäna. Qalltanjja, “janiw Taiwán markat sarjjañ munkti” sasaw amuyayäta. Ukampis kun lurañtï Jehová Diosajj maykitu ukar istʼañwa esposojajj yatichitäna, ukatwa Australia markar kuttʼjjayäta. Kunatsa kuttʼañajajj wakisïna ukjja, qhepatakwa amuyayäta.

Jichhajja, Australasia sucursalanwa serviskta, sabadompi domingompejj congregacionajamp predikiriw sararakta. Chino jan ukajj japonés aru parlirinakajj visitir jutapki ukhajja, nayaw jupanakar Betel uñtʼayta, uk lurañajj wal gustitu. Jehová Diosajj jiwatanakar jaktayañ arsuwayki uk phoqasiñap walpun suyaskta. Esposojajj taqe kunanwa Jehová Diosar istʼañ yateqawayi, ukatwa Jehová Diosajj jupar niy jaktayanini (Juan 5:28, 29).