Harvey i skoḇe fyak ma iso ḇeba syadi ya. Rya swaf taun 1930 ḇe bo, kina ḇyesi sakfarkor Refo ro Midland Junction, Australia bar Wambarek. Fafisu anya, kawasa ḇero sup ani sananjar roḇean na. Harvey iswar Yahwe I mura ḇyebaptis fyor ḇyeumur taun ri 14. Fyoro ḇa mura fyarkor fa sbuk fararur ḇesren ḇe i ido, pyampum na ḇa. Fyor byabo kaker, skur i fa iwasya pyan syap Baryas ro fananjur, mboi imewer kukro kyara ima isyus ḇaim faro fararur ani. Ḇape naek oso dawos asuser ḇe Harvey i ḇo doḇe, ”Fyor snonggaku oso ro Yahwe organisasi Ḇyedi byuk fararur oso fa wafrur na ido, ine snar kyara auma wasyus kwar!”​—⁠2 Kor. 3:⁠5.

Yafarkor kakaku ro Inggris, raris awin ma eba yedi. Kamam ima randak ya imewer fyarkor Refo, mboi mura insape dakḇe Saksi kako. Yaḇebaptis fyor umur yedi taun risiw, roi kamam imarisen ḇa kaku. Yafrur aw fa yakḇe perintis ma mura yakḇe misionaris. Ḇape kamam imewer, doḇe yaḇeumur taun ri 21 insape yaksun ro fararur perintis. Yakara yamewer yawaf kawan wer. Fyor yaḇeumur taun ri 16, kamam imarisen yara ḇe Australia fa yaḇarekus eba yedi, ḇera ḇepon ḇe diwa. Inja ḇarpur ya, fyor yaḇeumur taun ri 18 insape yakḇe perintis. 

Ro Australia, yasrow Harvey i. Numarisen kam nufarmyan ḇe misionaris. Nufarḇuk ro taun 1951. Nufarmyan ḇe perintis swaf taun risuru raposa, sor fa nuḇe pengawas wilayah ḇo nura numamfar sidang-sidang na. Nufarmyan ro Australia bar Wambarek. Sup ya iba, inja nuyek oto fa nura ḇe moḇ ḇeḇinggwan ma ḇesyor na.

Ro taun 1954, sor nu fa nuso Farkarkor Gilead kelas ḇe 25. Inja nusmai roi numarisen kaku na, iso nufarmyan ḇe misionaris! Nuyek kapal fa nura ḇe New York, ma nufarkor mnis kaku Refo ya ro diwa. Ro Farkarkor Gilead ine nufarkor wos Spanyol kako, ine roi ḇemarḇak faro Harvey i kukro jadi fa dap mnis huruf ’r’ ya ḇa.

Fyor nggofarkor kaker, naek ḇebuk farkarkor soḇe mansei ḇemarisen ḇefarmyan ro sup Jepang bisa sfasepen sisnosna fa siso kelas wos Jepang. Nuna wos oser fa nufasepen snonsnon nuḇena ḇa, ma nuwaf Yahwe organisasi Ḇyedi iso ḇeyap fararur nuḇena. Fyoro ḇa mura, Naek Albert Schroeder, oso ḇebuk farkarkor ro Farkarkor Gilead ifawi nufasepen snonsnon nuḇena ḇa. Ikofen ḇe nu fa nukara kaḇer na resari. Mboi nufasepen nusnosna ḇaim, inja naek Schroeder ikofen ḇe nu, ”Aya ma naek ḇebuk farkarkor ḇesesya nggofas snonsnon muḇena kwar. Inja mufarkor pan fa mufawi muyawos wos Jepang.” Harvey ifawi fasaw kaku wos ine.

Nufyafer ro sup Jepang taun 1955, fyor ya manbaryas ro diwa se 500 monda. Harvey ḇyeumur taun ri 26 ma aya 24. Sor nu fa nufarmyan ro mnu Kobe, ma nufarmyan ro dia swaf taun rifyak. Numarisen kukro sor nu wer fa nufarmyan ḇe pengawas wilayah ma nufarmyan ro moḇ fanam mnu Nagoya. Roi ḇefrur fa numarisen nufarmyan ro dine isoine naek srar sya, roḇean na, ma moḇ ḇepduk na. Mura nusmai swaf ḇese fa nufasnai numewer nupampum fararur Yahwe byuk na.

Nufarmyan ḇe pengawas wilayah taun rikyor raposa, kantor  cabang Jepang sifuken numarisen ido bisa nura ḇe Taiwan fa nufnoḇek kawasa ḇeyawos wos Amis. Naek ḇeḇeso ro diwa sibur kakaku ya kwar. Kantor cabang Taiwan sfandun naek ḇeyawos pyum wos Jepang fa ifnoḇek naek srar ro fafisu ḇesamswen anya. * Ine napyan ḇa, kukro numarisen kaker nuro Jepang. Ḇape Harvey nya wos oser kwar imewer pyampum fararur sbuk ḇe i, inja numarisen fa nura ḇeri.

Nufyafer ro Taiwan ro paik November 1962. Fafisu ya manbaryas sya se 2.271, ma ḇebor sya sramaker keret Amis. Imbape, ḇepon ya fandun fa nufarkor wos Mandarin. Nusmai monda syap wos Mandarin ma ḇebuk farkarkor ḇe nu ifawi dawos wos Inggris ḇa, rarirya mboi nufarkor pdef.

Fyoro ḇa mura skur Harvey i fa duffarmyan ḇe pengawas cabang. Kantor cabang Taiwan kyasun monda, inja Harvey bisa myam fararur ḇyeja ro kantor ma ifararur kayam kuker naek srar ro keret Amis ansi swaf minggu rikyor ro paik oser. Fyorno ido, duffarmyan ḇe pengawas distrik ma dun faya ro munara sarawrow na. Harvey bisa dawos faya ḇyeja ro wos Jepang kukro naek srar ḇeraker keret Amis sfawi na kako. Fama, pamarenta ro diwa siwan fa fananjur ari sifrur na ro wos Mandarin monda. Inja Harvey fyarkor kaker mboi dun faya ḇyeja ro wos Mandarin ma nari naek oso dawos pyan na ro wos Amis.

Fafisu ya ro Taiwan, pamarenta sifrur roi sor ḇe darurat militer, inja naek srar sya imbe sifrur munara sarawrow ido fandun fa sor ijin ḇepon. Ine roi ḇepyan risya ḇa, ma fyorno ido siwaf kawan kaku. Polisi sya sbuk ijin ḇaim isof ro ras fanam ḇe munara ya ido, Harvey nari kyain iwaf ro kantor polisi isof sbuk ijin. Polisi sya na simai kukro snon amber oso iwaf kawan ro kantor sedi, inja sbuk ijin ḇeri.

Fafisu nurakaki naek srar ido, nari numbran ro swaf oras oser syadi, nuyek urek bon na ma numbranuk warḇeki na. Yaswarepen mura ḇe ras randak kaku yek ḇe urek bon na. Nuyan raposa, nuyek bis ro oras 5.30 arwo babo fa nura ḇe mnu kasun oso ḇeḇinggwan, numbranuk warḇeki ma nuyek urek bon. Urek na nabyoḇer, inja mambesrar oso ḇeyek ḇepon ya wemin ḇyeja isya ryo yabrusna.

Ro arwo ani kako Harvey byaryas kayam kuker mambesrar ḇeḇeso ḇero moḇ ya. Aya ido yemir yabaryas ro mnu kasun kawasa ḇero diansya sawos ro wos Jepang. Fanam oras oser arkok ya, baken yedi syambraḇ wer ḇa kukro yanan ro arwo monda. Mura yasrow Harvey i isya derer. Harvey isasyar syap ḇeḇeso kwar ma ismai manggoko pnor rikyor. Fyasnai moḇsa san pnor anna rai kuker kyuskir pnor oser ma isosef fawas na. Rya yamarisen yan na ḇa mboi yaḇetes pan oso. Nuyan suru kwar, inja pnor oser ḇedawer ine mansei na ḇeyan i? Aya iso ḇeyan i, snar yaḇiser rawo yamarkakyur ido, na Harvey imewer kyapok aya fa nuyado ro bon ya.

Fyor nuso munara sarawrow wilayah, yasmai roi yamam ḇaim na. Nuḇarek ro naek oso rum ḇyedi ḇekain fanam kaku ro Balai Karajan ya. Snonggaku Amis smam masasi ḇe roi ḇefandun, inja pengawas wilayah swari fyasos pyan war ḇe nu. Harvey fyararur kaker, inja yamasi epon. Pengawas wilayah swari fyasos ember rikyor, eser ya iser war ḇepnunek, eser ya iser war ḇesam, ma eser wer ḇyeḇei. Yakandor kukro ryir ember anna ro rum ya ḇarpondi, inja naek srar ḇefararur fa ḇefasos munara ro Balai Karajan bisa smam ḇeri aya. Yor fa sbuk srei fa byukidwarek aya. Mboi PW swari dun plastik! Inja yakara yamasi ro ḇarpur monda, mboi angsa sisya ro dia sores fanam ro padwar ma mansei ḇefanam yoḇ si ido nari sarek si. Inja yoḇo, ’Mambesrar ansi kako sisya sfararure, inja na smam aya ḇa fyor yamasi. Yamasi ḇa ido, nari yafrur naek srar ansine fa skarkar. Iḇye mura!’ Inja yamasi.

Harvey ifawi roi ḇedwarek naek srar ro keret Amis ansi fa sisur ro rur ya iso snar ono sisya sifawi siwasya ḇa ma sna syap ro wos sena ḇaim. Ḇarpur ya sifrur fasfas ro wos Amis. Inja ine swaf ḇepyum fa nufarkor naek srar sya fa sifawi siwasya ro wos manggun sedi. Ine fararur ḇemarḇak kaku, mboi fawawas mura naek srar sya manggunsi bisa sfarkor ro wos sedi. Indokada taun 1966 insape sifrur syap-syap na ro wos Amis ma ro taun 1968 sifrur syap Baryas wer.

Ḇape pamarenta sbuk ijin fa nggorwas syap-syap ro wos Mandarin monda. Insama nggosmai samswen oḇa, nggofrur syap Baryas ro wos Amis kuker nyan ḇese. Rupa ra, nggofrur syap Baryas ine ro wos risuru, wos Mandarin ma Amis. Ono sifakfuken ido, nggofrur ra smam rya nufarkor wos Mandarin ḇe snonggaku Amis sya. Kirine organisasi fyasos kwar syap ḇebor ro wos Amis fa nafnoḇek snonggaku ansine insama sfawi kakaku ro Refo ya.​—⁠Kis. 10:​34, 35.

Indokada swaf taun ri 20, naek srar ḇebor ḇeraker keret Amis sikenem imnis Yahwe farkankin Ḇyena ḇa. Sna kenem ḇeḇye ḇa, simasarser, san ropum ḇaido sisyor tabaku. Fyor nurakaki ḇe sidang-sidang na, Harvey syewar kaku fa ifnoḇek naek srar sya insama sfawi moḇ Yahwe myam roi anna. Ro marandan oso nuḇena, nusmai roi yapḇair ro randak fawar ine.

Naek srar ḇena sne ḇerun simarisen sifadwer kenem sena, ḇape faḇye kaku ḇebor sya simewer. Inja ro swaf taun ri 20, barbor ro manbaryas ḇero Taiwan dado kaku ro 2.450 ḇe 900 monda. Nuḇesanekar mboi nufawi organisasi ḇesren ḇa ismai barakas ro Yahwe I ḇa. (2 Kor. 7:⁠1) Ḇarpur mura, naek srar sya sisyom Yahwe I ro nyan ḇekaku ya inja Yahwe ḇyebarakas si. Kirine ro Taiwan manbaryas sya sisyadi ro 11.000.

Taun 1980 ḇyenande mura, numam mboi naek srar ro sidang Amis sna kakyar ḇenako kwar. Inja Harvey bisa byuk swaf nabor fa byaryas ḇe snonggaku ḇeyawos wos Mandarin. Imbesrar ono sisya siswasi sakfarkor Refo ḇa, inja Harvey imarisen kaku ifnoḇek ḇeḇeso ro si fa sakḇe Saksi Yahwe. Yaswarepen ikofen ḇe aya snar imarisen kaku ifnoḇek snon oso fa ifawi inadi ḇe Yahwe I. Yakmarisen kako kukro yakfarkor snonggaku ḇebor ḇena sne ḇenapes fa sakfawi Yahwe I. Yasmai raryaḇ snar bisa yafarmyan ro kantor cabang Taiwan fnoḇek roma ma inai ro ḇefarkor Refo kuker aya ro ḇepon iwara.

Kirine ayama yaḇe kabom kwar. Nufarḇuk ro swaf taun ri 59 kwar raposa, Harvey iduf kanker rawo imar ro tanggal 1 paik Januari 2010 aniwara. Duffarmyan ro oras nakam indokada swaf taun ri 60 kwar. Yamander i rawo. Ḇape yamarisen kaku kukro yafnoḇek i kwar ro randak fararur nuḇena ro sup ḇeba risuru! Nufawi nuyawos wos risuru ḇesamswen kaku ro Asia. Harvey ifawi fyas ro wos suru suine kako.

Taun fawas mura, Raryur Naek Ḇefarkin soḇe yaḇe binsar kwar, inja ipyum fa yakaḇer ḇe Australia. Randak ya yakara ḇo yoḇo, ’Yamewer yabur Taiwan indi.’ Ḇape Harvey fyarkor aya kwar insama yapampum awer fararur organisasi byuk ḇe aya. Inja yaso monda roi sikofen na. Insape yafawi ine nun payamyum ḇe aya.

Kirine yuffarmyan ro kantor cabang Australasia, ma ro minggu pupes yafarmyan fnoḇek sidang ayedi. Yamarisen yabuk wos Jepang ma Mandarin ḇe naek srar ḇemamfar Betel sya. Ḇesyadi yawaf ras kaḇakbok ya, yafawi Yahwe iswarepen Harvey i snar imewer pyampum fararur Yahwe byuk ḇe i na.​—⁠Yoh. 5:​28, 29.