Harvey meha íbugañaünbei houn gádürü líbirigu. Lidan meha uburugu le gíribei Midland Junction, le luágunbei oubaü le ñeinhin lubéi lálüda Weyu libiti Australia hafurendeirei liduheñu inarüni lidan lidaani likesinouga lidan burí irumu darandi. Aba línsiñedun Heowá lun Harvey ani aba labadiseirun dan le 14 lubéi irumu lau. Murusun dan lárigiñe, aba lafurendeirun moun lumuti lan lariñagun uá lun dasi lúmagiñeti Heowá le ichugúbei lun. Luagu aban weyu, aba lamuriahan aban íbiri luma Harvey lun laliihanu Garüdia Awisahatu to lánina aturiahani, ábati lariñagun Harvey uá ladüga meha samina lan maranserungili lan lun ladügüni dasi ligía buidu. Aba layanuhan íbiri ligía luma Harvey, aba lariñagun lun: “Dan le lamuriahóun buma tidan lóundarun Heowá lun badügün aban dasi, ladügarügüliña afiñe lan le amuriahabalin buma gayara lan badügüni buidu” (2 Ko. 3:5).

Furendei numuti inarüni Ingülatéra, ítara kei núguchu tuma níbugaña. Lau sun meha mínsiñe hamá gefentiña luagu Heowá lun núguchi furumiñe, furendei lumuti inarüni lau lásügürün dan. Íbini yebe mabusenrun lan lun nabadiseirun, badiseitina dan le nefu lubéi irumu nau. Busentina meha lun prekursora nan luma lun neseriwidun dan lárigiñe kei misionera. Subudi numuti meha mígirunbei lan núguchi lun prekursora nan darí nagunfulirun 21 irumu. Ani mabuseruntina meha nagurabahan saragu dan. Ligía dan le lubéi nagunfulirubei 16 irumu, aba namuriahan üma luma lun nidin aganawa tuma níbugaña to meha águyaaruboun awinwanda Australia.  Danti le nagunfulirubei 18 irumu, aba nagumeserun eseriwida kei prekursora, chülüdüga buga dan!

Australia nasubudirei Harvey. Biángubei wagía, busentiwa meha weseriwidun kei misionerugu. Aba wamarieidun lidan irumu 1951. Lárigiñe weseriwidun úara kei prekursorugu luagu bián irumu, aba wagunbirahóun eseriwida lidan sirkuitu. Wéiriti meha fulasu le ñein lubéi sirkuitu le aubei wariha luéigiñe oubaü le ñeinhin lubéi lálüda Weyu libiti Australia, ligía meha gabügürügua lubéi wabugahan luagu saragu oura lun wachülürün lidoun burí fulasu le dísetimabei ani mábeiti.

Lidan irumu 1954, aba wagunbirahóun lidoun külase 25 tidan Leskuela Galaadü. Chülümémeeli meha dan lun lagunfulirun wayumahan lun misionerugu wamá! Tidan waporu wachülüra Newayórun ani aba wagumeserun aturiahoun Bíbülia hulili. Tidan meha Leskuela Galaadü, mosu meha wafurendeirun ayanuha chumagü, aban méhati katei hénrenguti lira lun Harvey lugundun hénrenguti meha lun líriduni létüra ere.

Ariñagatiña íbirigu ha arufudahabaña tidan Leskuela Galaadü houn aturiahatiña gayara lan labürüdǘn hiri sun ha busenbaña houdin eseriwida Hapón lun larufudahóun haponési houn. Anúadiratiwa lun mabürüdǘniwa lan wiri ladüga busén wamá lun lóundarun lan Heowá ariñagei woun halíaba lan weseriwida. Dan le líchugunbei íbiri Albert Schroeder, aban hádangiñe íbirigu ha arufudahabaña tidan Leskuela Galaadü, fe mabürüdǘn lan wiri, aba lariñagun woun: “Saminaya humá san luagun”. Dan larihinbei awanhagua lan ásuha, aba lariñagun woun: “Au hama ha híbiri arufudahatiña, bürügüda wamaali hiri. Ariha huméi san ida luba lan lidin hun lidan iñeñein haponési”. Ménrenguntimati meha lun Harvey lafurendeiruni iñeñein le.

Lidan irumu 1955 wachülüra Hapón. Lidan meha dan ligía, seingü-sánrügüñanu meha apurichihatiña lidan sun ageiraü. Wein-sisi meha irumu lau Harvey lidoun dan ligía, ánheinti nuguya, 24. Aba hóunahaniwa eseriwida lidan aban potu lidan uburugu le gíribei Kobe, gádürüñein irumu wau eseriwida ñein. Lárigiñe, ábaya wagunbirahóun lun weseriwidun kei óunigirutiña sirkuitu yarafa lun uburugu Nagoya, ani adügati le lun wagundaarun saragu. Hínsiñeti meha woun weseriwidun Hapón: hínsiñetiña meha íbirigu ha ñéinbaña woun, heigin luma lubuidun burí fulasu le ñeinbei. Íbini ítara, murusun dan lárigiñe, ábaya lachülaagun amu chansi woun lun warufuduni anhein aranseñu waña lubéi lun wadügüni le lamuriahabei Heowá wama.

Lárigiñe weseriwidun ǘrüwa irumu óunigira sirkuitu, aba wálügüdüniwa tídangiñe Beteli to Haponboun  anhein busén wabéi wáguyun ageiroun Taiwán lun wapurichihan houn gürigia ha ayanuhabaña amisi lidan aban aüdü le hani wárounu. Añaheinhaña meha fiu íbirigu amisi agarabaagutiña luagun Bungiu ñein ani mégeitu meha Beteli to Taiwanboun aban íbiri le ayanuhati haponési lun líderaguniña aransehei turobuli le. * Hénrenguti meha woun lun wanúadirun lugundun hínsiñeti meha woun weseriwidun Hapón. Keiti furendeihali lan meha Harvey lun mariñagun lan uá dan le lichugún aban dasi lun, ánhatiwa lun wáguyun.

Dan le wachülürünbei ageiroun Taiwán lidan unsu-hati, irumu 1962, añahein meha 2,271 apurichihatiña ñein. Amisi meha hiibe-agei hádangiñe. Guenleti, mégeitiwa meha wafurendeirun ayanuha cheiní ani ábanrügüñoun meha líburu wama tuma aban máisturu to mariñagadiboun inglesi. Íbini ítara, furendeitiwa cheiní.

Murusun dan lárigiñe wachülürün Taiwán, aba liridún Harvey kei arihiti tau Beteli to Taiwanboun. Kei meha ñüraü tubéi Beteli, gayaraati meha letenirun Harvey lun lidasin, furí ligía apurichiha hama íbirigu amisi ǘrüwa dimaasu lidan hati. Anihein meha giñe dan leseriwidun kei óunigiruti distritu ani mosu meha líchugun yanu lidan burí adamurini. Lau sun gayara lan hamuga meha líchuguni yanu ligía lidan haponési ladüga gunfuranda hamani íbirigu amisi, busenti meha urúei lun lídanrügü lan iñeñein cheiní hadügei tílana burí relihión hadamuridagun. Ligía meha aba lubéi líchuguni Harvey yanu lidan cheiní, lau sun mariñagadi lan meha lun buidu, ani mosu meha lásügüragüdüni aban íbiri yanu ligía lidoun amisi.

Luagu aban dan, súdaragu meha arúeihabaña Taiwán. Mosu meha habihin íbirigu üma lun burí hadügün adamurini. Hénrenguti meha tibihíniwa gárada burí to, anihein meha dan lü hamá polisía lubá hederegerunu houn íbirigu. Anhein méhati achülüra dimaasu le lánina adamurini ani mibihin hamagiru meha íbirigu gárada, ábaha lidin Harvey añuura tidan hani polisía áfisi darí híchugunu gárada tuguya lun. Ruti meha busiganu houn polisía lerederun aban terencha agurabaha tidan hani áfisi, ligía meha híchugunbarun gárada lun lau lóufudagun.

Dan le meha wapurichihan úara hama íbirigu, anihein meha dan wásügürün aban oura o lóugiñe amudeireina liñun burí wübü luma ánhiñuragua duna. Haritagua nágili le furumiñetibei wéiyaasu namudeirun wübü. Lárigiñe watun bachati lau lóufudagun, aba wádinun tidoun aban busu ladaürün seingü dimí binaafin lun woudin apurichiha lidan aban aüdü díseti. Lárigiñe wánhiñuraguni duna, aba wagumeserun amudeira aban wübü. Hanarimeti meha lararamun wübü ligía darí lun luagun lan lugudi íbiri le náugiñebei nariha.

Hama fiu íbirigu ha lílana aüdü ligía lapurichiha Harvey binaafin ligía, ánheinti nuguya, napurichihaña meha nábugua lidan aban liraüraü aüdü le ñein lubéi layanuhóua haponési. Kéiburi ladaürün aban rábounweyu, aba nasandirun méreedina lan ladüga barühadina lan meha saragu oura méiginga. Chülüdüga buga oura lun nadunragun luma Harvey, ñǘdünguouga meha íbirigu. Ani edewehóuaaru meha ǘrüwa gañé lun Harvey lidan apurichihani tuagu fiu garüdia. Aba larufuduni Harvey nun ida luba lan neigin gañé íñegiru. Aba láfudurunu luéigiñe biángubei touba, ábati lachuuruni tila. Íbini yebe mabusenrun nan neigin gañé íñetu, hou numutu. Kaba  méhati eigoun to tagumuhóun? Mosu meha néiginu lugundun siñabei meha lóuyuahanina Harvey anhein adagara falalaü nuagu danme le warariruni wübü.

Luagu aban weyu, dan le wóudinbei lun aban adamurini sirkuitu, aba lasuseredun aban katei nun le magurabun numuti. Lúbiñe meha aban íbiri le awinwandubei tóubagiñe Luban Adamuridaguni weredera. Wéiriti méhati lisudinin ágouni houn amisi. Ligía aba lubéi tadügün lani óunigiruti sirkuitu weiriou aransehani lun wagoun. Keiti bereseguñein lubéi meha Harvey, aba lariñagun nun lun nidin ágawa furumiñe. Sétitu íbiri bián búngidu: aban lau duna diliti, aban lau duna süti luma aban adabugülei. Ábati taweiridun nanigi dan le tíchugunbalin bóugudi tun muna ani añahein meha íbirigu tidan Luban Adamuridaguni asayaha lubá adamurini. Aba namuriahan tuma lun tíchugun aban korutína nun, ábarüga tiabin nun tau aban to tautu nailoun ani harugoungatu! Aba yebeti nasaminarun nidin ágawa tanagangiñe muna, ani madügün numuti ladüga meha añahein lan fiu lubue (o gansu) ñein aranseñu lun háfigihani furumiñeguarügü le ayarafaduti houn. Ábayati nasaminarun: “Bereseguñanu íbirigu, másiñati míchugungubeibaña lan fe luagu nágouña lan. Ani ánhana magoun, gayaraabei hasandiragun íbirigu ha houngua wuriba”. Ábagubei nagoun.

Aba meha líchugun Harvey fe hénrengu lan houn íbirigu amisi hawanserun ladüga gibe hamá maliiraditiña hadan, ua tuguya agumeiraguagüdüni lidan hererun. Kei méhati málügili lubéi lúmagiñe lagumeserun amisi abürüdǘwa —lau burí létüra le ayusurúbei lun labürüdǘn chumagü—, aba wasaminarun buídubei lan lun warufudahan houn íbirigu ida luba lan haliihani hererun. Lau sun meha aban lan óunwenbu wadagimanu lira, lau lásügürün dan, furendeitiña íbirigu aturiaha hábugua. Lidoun lagumuchagüle burí irumu 1960, aba tagumeserun agumeiraguagüdüni áfurida lidan amisi. Ani lidan irumu 1968, ligía táfuridun Garüdia Awisahatu lidan amisi.

Kei méhati maha habéi gumadimatiña lun wapurichihan tau agumeiraguagüdüni to mámatu lidan cheiní, aba tadügǘn Garüdia Awisahatu lidan hererun amisi lidan ámuñegueinarügü igaburi. Kéiburi lau tadügǘniwa ábanmeme Garüdia Awisahatu lidan bián iñeñein: cheiní mandarín luma amisi. Ítarati, genegebei meha warufudahaña lan cheiní houn gürigia. Lúmagiñe dan ligía, aba tagumeserun lóundarun  Heowá adüga agumeiraguagüdüni lidan amisi lun hafurendeiruni gürigia ha inarüni le tídanbei Bíbülia lidan hererun guánarügü (Adü. 10:34, 35).

Lidan burí irumu 1960 luma 1970, gíbetiña meha íbirigu amisi ha mafalarun hamuti lilurudun Bungiu lidan habagari. Kei meha ua lubéi gunfuranda hamani arufudahani le tídanbei Bíbülia sunsuinagubei, añahein meha hádangiñe adügatiña magíaguni, gátaditiña, agumulahatiña o achaguha hamuti tin aban nadü gíritu areka. Ñǘdünti meha Harvey abisidaha saragu damuriguaü lun líderaguniña íbirigu gunfurandei ida liña lan larihini Heowá katei burí le. Lidan aban lídangiñe bisida ligía lasusereda sügǘ le buga uágubei nabahüdagua hun furumiñe.

Sun meha íbirigu ha ǘnabugubaña, ánhatiña hadügüni asansiruni le mégeiwabei lidan habagari, ánhañati hiibe-agei, madügün hamuti. Ma lirun! Lídanrügü wein irumu, aba halouguadun 2,450 íbirigu ha meha Taiwanbaña darí hachülürün lun nefu-sánrügaaña lan. Lau sun adüga lan katei le lun wasandirun saragu íruni, subudi wamuti meha maweiyasunbei lan Heowá abinira aban óundaruni to marumantu (2 Ko. 7:1). Lau lásügürün dan, aba lagumuchagun sun luriban burí échuni ligía lídangiñe damuriguaü ani seremei lun Heowá, añaheinhaña hóugiñe 11,000 íbirigu Taiwán uguñe weyu.

Lúmagiñe irumu burí 1980, aba labuidurun hamadagua íbirigu amisi luma Heowá. Aba méhati gayaraahali lan lásügürün Harvey saragu dan apurichiha houn gürigia ha ayanuhabaña cheiní. Hínsiñeti meha lun líderaguniña hani íbirigu würiña weiriei adügagua houngua gefentiñame luagu Heowá. Haritagua nágili aba lan labuinchun Harvey lau ugundani dan le lafurieidunbei aban hádangiñe eyeriñu hagía lun Heowá luagu furumiñeti wéiyaasu. Gúndaatina giñe lau níderagun saragu gürigia ayarafada lun Heowá luma luagu seriwi nan tidan Beteli to Taiwanboun úara hama bián tisaanigu aban hádangiñe gürigia ha meha únbaña níchiga aturiahani.

Féridina nupaaná. Lárigiñe 59 irumu wau maríeiñu, aba lagumuchun kánserü lau libagari Harvey weyu 1 lidan eneru, irumu 2010. Seriwihali meha kéiburi 60 irumu lidan dan dayarüti. Lau sun weiri lan nálugun lárigi nani weiriei, sanditina saragu ugundani dan naritaguni íderaguanani lidan lagumeserun apurichihani lidan bián lubuidun burí ageiraü. Furendeitiwa ayanuha lidan bián hererun ásiana le hénrengubei, furendei ligía Harvey abürüdei.

Fiu irumu lárigiñe lounwen Harvey, aba lóunahanina Musu Úaraguati nárigoun Australioun ladüga aningiraali lan nirumudiri nau. Saminatina yebe furumiñe: “Mabusenruntina nidin Taiwangiñe”. Ábati naritaguni arufudaha lan meha Harvey nun lun mariñagun nan uá tun lóundarun Heowá. Ligía nagiribudunbei. Lau lásügürün dan, aba gunfuranda nani buidu lan nadüga lau nagiribudun.

Uguñe weyu, neseriwiduña tidan Beteli to Australásiaboun ani apurichihatina hama lílana aban damuriguaü samudi luma dimaasu. Dan burí le hachülürün íbirigu ha ayanuhabaña cheiní o haponési asubudiroun Beteli, nuguya arufudubalin turageirugu houn ani wéiriti línsiñe dasi le nun. Nayumahaña lagunfulirun füramasei lánina águyuguni. Furendeihali meha Harvey lun mariñagun lan uá lun Heowá. Ligíati subudi nubalin lídanñein fulasu le chóurutimabei: lidan laritagun Heowá (Huan 5:28, 29).