Omushija wange Harvey ni we mukuru omuri benenyina bana. Abazire beye bakamanyira amazima omu tawuni ya Midland Junction, omu burengerwizoba bwa Ositareliya, obu habire hariho ekizibu c’akasente omu myaka ya za 1930. Harvey akakura ari kukunda Yehova kandi yabatizibwa ayine emyaka 14. Bwanyima y’obwire buce, akega kuguma ari kwikiriza omurimo gona ogu yahebwa omu kibina. Nk’omwojo ocari muto, Izoba rimwe akanga kushoma Omunara g’Omurinzi omu nterane ahakuba akaba ari kutekateka ku atari kubibasa. Konka mwenetata omwe akagambira Harvey ngu: “Omu kitongore ca Yehova hagira owakushaba kukora ekintu, naba ari kumanya ku ori kukibasa!”—2 Kor 3:5.

Nka mama na mukuru wange, nkegera amazima omuri Bungereza. Bwanyima tata na we akega amazima, konka omu kubanza akaba atari kubyenda. Nkabatizibwa nyine emyaka mwenda, n’obu tata kitaramushemize. Nketeraho entego y’okuba omupayoniya n’okuba omumishonari. Konka tata akanyangira ngu ndikikora nahisa emyaka 21. Nyowe nkaba ntari kwenda kutegereza obwo bwire buringwa. Obwe rero ku nahikize emyaka 16, akanyikiririza ngu nze kubana na mukuru  wange omuri Ositareliya, ahu mukuru wange yabire yafurukire. Bwanyima ku nahikize emyaka 18, nkatandika obupayoniya.

Ku nahikire omuri Ositareliya, nkabugana na Harvey. Twembi tukaba twine entego y’okukorera Yehova turi abamishonari. Tukagitwa omuri 1951. Ku twamazire emyaka ibiri turi abapayoniya, tukatandika kukora omurimo g’okutayayira ebibina. Ekicweka kitu kihango kikaba kiri omu burengerwizoba bwa Ositareliya, obwe rero kikaba nikitushaba kugenda omu butayo n’omu byaro bya hare.

Omu mwaka gwa 1954, tukaza kwega ishomero rya 25 rya Gileyadi. Obwe rero entego yitu y’okuba abamishonari tukaba twaza kuyihikaho! Tukahika omuri New York tukoresize obwato twatandika kwega Bibuli tutireho omutima. Obu twabire turi omu ishomero, nambwenu tukaba nitwega Orusipanishi, kandi Harvey rukamuremesa ahabw’okuba kugamba enyuguta ya “r” kikaba nikimugumira.

Turi omu ishomero, abegesa bitu bakatanga ekirango ngu abantu bona bari kwenda kuza kukorera omuri Japani behandikise omu ishomero eriri kwegesa Orujapani. Itwe tukasharamu ngu ekitongore ca Yehova kibe ni co catushariramu ahu turaze. Bwanyima y’akire kace, omwe omu bashomesa w’omu ishomero rya Gileyadi ori kwetwa Albert Schroeder, akatwijusya ku itwe twebirwe kwehandikisa. Akatugambira ngu: “Mushube mukitekatekeho.” Ku twagumizemu kuzarira, mwenetata Schroeder akangambira ngu: “Nyowe n’abandi bashomesa twamazire kubahandika. Obwe rero mutandike mugezaho kwega Orujapani.” Harvey we rukahika nirumworobera.

Tukahika omuri Japani omuri 1955 kandi omu ihanga ryona hakaba harimu ababurizi 500 bonka. Harvey akaba ayine emyaka 26, konka nyowe nyine 24. Bakatwohereza omu tawuni ya Kobe eri aha cambu, twahamara emyaka ina. Bwanyima tukashemererwa ku twagarukire omu murimo g’okutayayira ebibina, turi kukorera hihi n’etawuni ya Nagoya. Ebintu byaho byona bikatushemeza, harimu benetata, ebyokurya, n’ecaro caho. Konka hatakahwireho obwire, tukatunga ogundi mugisha g’okwikiriza omurimo gona ogu Yehova yatuha.

Bwanyima y’emyaka ishatu tugarukire omu murimo g’okutayayira ebibina, ofisi ya Japani ekatushaba yaba turi kubasa kuza kukorera omuri Tayiwani, turi kuburira abataka abari kugamba  Orwamisi. Abahakani bakaba batandikire kurebeka omuri Tayiwani kandi hakaba hari kwetengwa mwenetata ori kumanya ge Orujapani kugira ngu atereze ebyo bizibu. * Tukaba nitukunda kukorera omuri Japani obwe rero kukora eyo nsharamu kikaba kigumire. Konka Harvey akaba yayegire kwikiriza omurimo gona ogu yahebwa, obwe rero tukahika turi kugenda.

Tukahikayo omu Kwikuminakumwe, 1962. Omuri Tayiwani hakaba hariyo ababurizi 2,271 kandi abingi bakaba bari Abaamisi. Konka, tukaba tushemerire kubanza twayega Orucayina. Tukaba twine ekitabo kimwe conka n’omwegesa witu atari kumanya Orungereza, konka tukagezaho twayega Orucayina.

Hahwire obwire buce tuhikire omuri Tayiwani, Harvey akahika ari kuba omukozi wa ofisi. Ahabw’okuba ofisi yabire eri nce, Harvey akaba nabasa kukora omurimo gweye gw’ahari ofisi, ezindi sande ishatu azimara ari kukora hamwe na benetata b’Abaamisi. Nambwenu, hine obu yabire ari kukora nk’omureberezi w’ihanga, ahereza za toku omu biterane. Harvey akaba ari kubasa kuhereza toku omu Rujapani, kandi benetata b’Abaamisi baruhurira. Konka, gavumenti ekaba yaragire amadini kwegesa omu Rucayina rwonka. Obwe rero, Harvey akaba nataho amani kugira ngu ahereze toku omu Rucayina ondijo mwenetata amuvunurira omu Rwamisi.

Omuri Tayiwani hakaba hariyo omutekano muce, obwe rero benetata bakaba nibashabwa kubanza bashaba oruhusya rw’okukora ebiterane. Kutunga orwo ruhusya kikaba kitorobi, kandi hine obu abapolisi babire nibabacerereza. Ku babire nibahika omu sande y’ekiterane batakatungire oruhusya, Harvey akaba naza ahari polisi ashitama yo mpaka barumuhire. Abapolisi ku babire nibareba ari omunyamahanga bakaba nibahika bari kumuha oruhusya.

Omu sande ezi twabire turi kumara na benetata, tukaba nitumara eshaha ninga eri kurenga turi kugenda n’ebigeri, tutemba enshozi kandi twambuka n’emigera. Ninyijuka obu natembire orushozi aha murundi rw’okubanza. Ku twamazire kunywa cayi, tukakwata basi ya shaha 5:30 z’omu kasheshe twaza omu caro ca hare, twarugamu, twayambuka omugera muhango, obundi twatemba orushozi. Rukaba ruri ruringwa munonga kuhisya obu mwenetata owabire ondi omu misho yabire ori nk’ondi aha mutwe.

Omuri ako kasheshe, Harvey akaburira na benetata b’omuri ako kacweka, nyowe naburira ndi nyenka omu caro ecabire kirimu abantu ababire nibagamba Orujapani. Nk’omuri za shaha mushanju, enjara ekaba endi kubi, ahakuba nkaba namara amashaha mingi ntakahumire. Bwanyima ku nabugine na Harvey, abandi benetata bakaba batahire. Harvey akaba agabire za magazine rero bamuha amahuri ashatu agatatekire. Akanyereka oku bari kwata ihuri aha mutwe rero barinywa. N’obu ryabire ritanuzire, nkanywaho rimwe. Mbwenu shi ni oha owanywire erya kashatu? Na ryo Harvey akarimpa ahakuba akaba atari kubasa kumpeka nayitwa enjara.

Izoba rimwe obu twabire turi omu kiterane c’akacweka, nkabugana embera ezi nabire  ntamanyirire. Tukaba tucumbikire omu nju ya mwenetata owabire atwire aha rubaju rw’Enju y’Obukama. Ahabw’okuba Abaamisi bari kureba okunaba nk’ekintu c’omugasho munonga, omukazi w’omureberezi ori kutayayira ebibina akatutebekanisiza omwanya g’okunabiramu. Harvey akaba ahugire, rero yangambira ngu mbe ni inye owabanzayo. Akaba atebekanisize ebikoreso bishatu: Endobo y’amizi agari kufukira, ey’agari kosya, n’ebafu erimu busha. Ecantangarize, omukazi w’omureberezi akabita aheru ahari kurebana n’Enju y’Obukama ahu benetata babire bari kutebekanisiza ekiterane. Nkamubuza yaba hariho ekitambara c’okuhakinga. Akandetera ec’okutaho konka nabwo kiri kureberana! Nkatekateka okuza kweshereka enyima y’enju, konka nabwe hakaba hariyo embata ezabire ziri kubasa kuruma owayenda kuzitahirira. Bwanyima nkatekateka ku benetata bahugire batari kubasa kundinguriza. Kandi ku ku ndabe ntanabire ndi kubasa kubateza ensibo. Obwe rero nkahika ninaba!’

Harvey akareba ku benetata b’Abaamisi babire batari kugira entunguka omu by’omwika ahabw’okuba abingi bakaba bataregire kandi batine n’ebitabo. Ahabw’okuba habire hahwire obwire buce orurimi rw’Orwamisi rutandikire kuhandikwa, bukaba buri obwire burungi bw’okwegesa benetata okushoma orurimi rwabo. Ogo gukaba guri omurimo gutorobi, konka mporampora benetata bakabasa kutunga ebitabo by’okweyegesezamu. Omu mwaka gwa 1960 ebitabo omu rurimi rw’Orwamisi bikatandika kurebeka, kandi omu mwaka gwa 1968, Omunara g’Omurinzi omu Rwamisi gukatandika kushohora.

Konka, gavumenti ekaba yazibire ebindi bitabo byona ebyabire bitari omu Rucayina. Obwe rero, ekitongore kitu kikega agandi magezi g’okushohora Omunara g’Omurinzi kugira ngu twerinde ebizibu. Ecokureberaho: Hine obu twakoresize endimi ibiri omu Munara g’Omurinzi, ari zo Orumandarine n’Orwamisi. Omuntu ku yabire nayereka ku ari kwenda kwega tukaba nitumwegesa omu rurimi rw’Orucayina. Okwiha obwo, ekitongore kitu kikacapa ebitabo byingi omu rurimi rw’Orwamisi kugira ngu bikwase abantu kwega amazima g’omuri Bibuli.—Byak 10:34, 35.

Omu myaka ya za 1960 na 1970, abingi omuri benetata b’Abaamisi bakaba batari kubaho bari kugendera aha misinge ya Ruhanga. Ahabw’okuba babire batashoborokirwe ge emisinge ya  Bibuli, abamwe bakaba bari kukora ebikorwa by’obushambani, okusinda, okuresa n’okukoresa ebitaburabwonko. Harvey akatayayira ebibina byingi, ari kukwasa benetata okumanya oku Yehova ari kureba ebyo bikorwa. Omuri obwo bwire, ebi tugambire tucatandika nibwo byatuhikireho.

Benetata b’abacurezi bakaba betegwire kukora empinduka, konka ekiri kushasha, abingi tibarazikozire, kandi omu myaka 20 omubaro gw’ababurizi b’omuri Tayiwani gukashuma, baruga aha 2,450 bahika ahari 900. Mazima eco kikaba nikimaramu amani. Konka, tukaba nitumanya ku Yehova atari kubasa kuha omugisha ekitongore ekitari kwera. (2 Kor 7:1) Bwanyima y’obwire, abantu babi bona bakahwa omu kibina, kandi Yehova akatuha omugisha, hati omuri Tayiwani hariyo ababurizi abari kurenga 11,000.

Kwiha omu myaka ya za 1980 kugumizamu, tukerebera oku ebibina by’Abaamisi byabire nibikura omu buryo bw’omwika kandi Harvey akatunga omugisha g’okumara obwire n’abantu abari kugamba Orucayina. Kandi akashemererwa munonga ahabw’okuba yakwasize benetata na banyanyazi bingi bakahamira omu mazima. Ninyijuka ku yagambire ngu akashemererwa munonga ahabw’okureba abo benetata bari kushaba Yehova aha murundi g’okubanza. Nanye aha bwange nkashemererwa ahabw’okuba nakwasize abantu bingi abine emitima etarimu oburyarya kuhika hihi ya Yehova. Nambwenu nkatunga omugisha g’okukorera ahari ofisi y’omuri Tayiwani ndi hamwe n’omwojo n’omuhara abazirwe n’omwegi wange wa Bibuli.

Ec’obusaasi, tincari n’omushija wange. Bwanyima y’emyaka eri kuhika ahari 59 ndi hamwe n’omushija wange Harvey, akafa aha kiro ca 1, Okokubanza 2010, ayisirwe kansa. Akaba amazire emyaka eri kuhika ahari makumi mukaga omu murimo g’obwire bwona! Hariho obu ndi kumusisira munonga. Konka ekiri kunshemeza, ni oku namushagikire omu ntandikiro y’omurimo ogwabire gutorobi omu mahanga abiri! Tukega kugamba endimi ibiri z’omuri Asia ezabire zigumire, kandi Harvey we akega n’okuzihandika.

Ku hahwireho emyaka mice, Akakiko k’Abarisa kakareba kiri kirungi ngu ngaruke omuri Ositareliya ahabw’okuba nabire ndi omu myaka ya za bukuru. Nkabanza kuhurira ntari kwenda kuruga omuri Tayiwani. Konka Harvey akanyegesa kwikiriza omurimo gona ogu ekitongore ca Yehova campa. Obwe rero, nkahika ndi kugenda. Bwanyima, nkerebera ku nakozire ensharamu ndungi.

Hati, ninkora ahari ofisi yitu kandi omuri wikendi nyekwatanisa n’ekibina. Ninshemerererwa kukoresa Orujapani n’Orucayina ndi kurambuza abija kutayayira Beteli. Kandi, ntegerize n’ekihika obwire bw’okuzoka, ahabw’okuba nimanya ku Harvey, owanyegesize kwikiriza omurimo gona ogu Yehova yampa, ari nk’ocahurire ahari Yehova.—Yoh 5:28, 29.